“Raica na Ka e Rawa ni Cakava e Dua na Vakabauta Lailai?”

Godfrey J. Ellis

Washington, Amerika

Ena dua na gauna sa oti, keirau a kauti rau na luvei keirau tagane gone sara kei na watiqu ki Varanise me keitou sarava na vanua au a veiqaravi kina vakadaukaulotu tudei. Keitou a sikova na veitabana ni Lotu au a veiqaravi kina ka marau vata kei ira na lewenilotu au a vakatavulica. Keitou sikova talega na veivanua makawa.

E dua vei ira na icaca ni Château de Châlucet. Na kasela ni gauna e liu vakaitamera oqo a kabai ka vakacacani vakalevu sara ena vica na senijiuri sa oti. Sa tubua vakalevu na yasa ni icaca ni vale, na sala me da yacova kina e qiqo ka dua na icabecabe levu. A dua na cabe dredre, ia a mate vinaka na sasaga ni keitou sa yacova yani.

Erau taleitaka na cauravou na nodrau sirova sobu na sela ka kabata cake na ivovo ni lalaga ni kasela. A vesuka na nodrau vakasama na kasela me vaka ga na kena a vesuka na noqu ena 24 na yabaki sa oti.

Ni keitou tiko voli e kea, sa tekivu uku vakayawa mai e dua na cava ni vulaikatakata. A totolo na kena toso mai. E vakatuloaloa na lomalagi ka tibi na liva, qai muria mai na calidi ni yaseyase.

Keitou sirova vakatotolo sobu yani na gaunisala ka cici yani ki na motoka ni cici muri keitou mai na cava. Sega ni dede, keitou sa suasua mai na uca bibi ka vuki na gaunisala me soso. Keitou lomaleqa de sisi na yavai keitou ka keitou lutu yani ena bari ni veivatu.

Keitou qai raica eso na vanua ni vakaruru e maliwa ni veivunikau ena bati ni sala. Keitou mai vakasokumuni toka ena ruku ni ivakaruru ka taroga voli se na vakacava na balavu ni neitou wawa me rawa ni keitou qai lako sobu.

“Tou cabora mada e dua na masu,” e kaya o luvei keirau tagane gone sara.

A kerea me cabora na masu ka masuta me mudu na uca me rawa ni keitou lako sobu yani vakavinaka. A raici keitou mai ka kaya, “Sa qai vo ga me veirauti na nodatou vakabauta.”

Au vakamacalataka ni sega ni dau vakakina na masu.

“Sega,” a kaya, “sa na mudu na uca ena 10 na miniti!”

Ni oti e rauta ni 10 na miniti, a mudu na uca.

“Sa donu, tou lako!” e kaya o koya.

“Kevaka edatou lako qo, ena tekivu tale na uca ka tou qai tao tu,” e kaya na luvei keirau qase cake.

“Sega!” sauma na neirau gone duadua. “Tou lako.“

Keitou goleva na veivanua bau mamaca toka ena sala, ka veibiliyaka na co kei na tabanikau ni keitou lako tiko. Ni keitou yaco ki na motoka, keitou cabora e dua na masu ni vakavinavinaka. Sega ni dede sa tekivu tau tale na uca.

“Raica na ka e rawa ni cakava e dua na vakabauta lailai?” e kaya vakamalua na luvei keirau tagane.

E vakatavulica vei keitou kece e dua na lesoni cecere ena siga o ya.