Monalivaliva Ga: iTabagone Qase Cake
Kune Marau ni Caka Tiko na Cakacaka ni Turaga
Ena itutu ni itabagone qase cake, e osooso na bula. E tiko e vuqa na ka eda rawa ni cakava: tomani ni noda vuli, vakasaqara na noda itokani tawamudu, vakatulewataka e dua na cakacaka, tekivutaka e dua na matavuvale. Ka salavata kei na veika vinaka kecega oqori, eda sa vakayaloqaqataki talega me da “dau kunei tikoga ni da cakava tiko na cakacaka ni Turaga.”1
“Sa kena gauna oqo vei keda taucoko meda kilamatata sara na noda itavi ena maqusataki ni cakacaka ni veivakabulai. Ni da sa vakayacora na cakacaka ni kaulotu, … na valetabu kei na tuvakawa, kei na vakavulici ni kosipeli me tiki dei ni noda bula, eda na sotava na marau cecere ka ciqoma na isolisoli vakayalo eso eda gadreva me vaqaqacotaka na Lotu.”2
Oqo e vica ga na itabagone qase cake osooso ka ra kunea na reki ena vakarautaka na gauna me baleta na cakacaka ni Turaga.
Tuva Kawa: Tekivu Ga Oqo
“Na Vakalesuimai e sa cakava e vuqa na ka vei au vakai au baleta ni sa yaco meu kila ni rawa ni bula tawamudu vata na matavuvale,” e kaya o Itumeleng Tlebere mai Maseru, Lesotho. “Au rawa ni raici rau na tubuqu kei ira na noqu qase e liu era sa takali. Oqori na vuna au taleitaka vakalevu kina na tuva kawa. Me baleta niu qai imatai ni tabatamata ena loma ni Lotu, e levu sara na ka meu cakava e vukudra.”
E kila tu o Itumeleng mai na ka e sotava na vakamuria na ivolatukutuku kei na itukutuku e rawa me veibolei, ia e vakayaloqaqataki ira na itabagone qase cake tale eso me ra dokoulu yani ki na nodra ituvatuva ni kawa: “Tekivu cakava ga. … Na tuva kawa sa vakavuna meu vakavinavinakataka na veika kece sa tu vei au.” E rawa ni yaco vakakina vei iko.
Veiqaravi: Mo Liga ni Kalou
E wasea o Lucy Fergeson mai Utah, Amerika, na sala a veivuke kina nona veiqaravi ena loma ni macawa ca duadua ni nona bula—ia ena dua na sala sega ni namaki. Ea iotioti ni macawa ni veitarogi e koronivuli, e macawa ni cakacaka osooso ka sa biuti koya nona itau cauravou. Ka oti o ya, e kaya okoya, “Au sa guilecava ni keirau a tuvanaka me keirau caka muffins kei noqu itokani veiqaravi me baleti ira na marama keirau a lesi me qarava.”
Ni rau vavavi vata tiko, na itokani dauveiqaravi nei Lucy ea vakarorogo, lomana, ka soli ivakasala. “Na caka kei na veisoliyaki ni muffins e sa sega soti ni ka bibi se vu ni dua na veisau levu,” ea nanuma lesu o Lucy. “Ia ni talaci au oti ki vale ko noqu itokani, au qai kidava ni sa ikoya saraga oya na ka au gadreva meu loga vinaka kina ia e dau tala mai va gauna na Kalou na tamata eso, me ra mai Ligana. Na ka e matalia vei au, oya ni veivuke e yaco mai vei noqu itokani ni veiqaravi ka sega mai vei ira na marama sa lesi meu qaravi ira. Au matalau sara ga ni vukei au okoya meu vakila niu sega ni tu taudua ka niu lomani.”
Cakacaka ni Kaulotu: Bula Tiko Mo dua na iVakaraitaki
E sega ni gadrevi mo dua na daukaulotu tudei mo vakatetea na kosipeli. E vakamacalataka o Vennela Vakapalli, mai Andhra Pradesh, Idia, “Niu lako ena basi, niu lako ena tereni, au dolava na iVola i Momani ka wilika. Ia e vuqa na tamata era tarogi au kina.”
E wasea o Ashlee Dillon mai Utah, Amerika: “Baleta ga niu a sega ni laki kaulotu e sega ni kena ibalebale niu sega ni dua na daukaulotu. Niu a sega niu biuta na noqu matavuvale me qarava na Turaga, au qarava na Turaga kei na noqu matavuvale. Au qaravi ira na tani, kau bula meu dua na ivakaraitaki ni dua na tisaipeli i Jisu Karisito.”
iTubutubu: Vakatavulici ni Luvedra ena Kosipeli
Ingrid de Bastian Ortiz, mai Veracruz, Mexico, e dua na tina ni tolu yabaki 26. A vakamacalataka okoya, “Niu itubutubu gone ni gonelalai, e tu eso na siga dredre dina, ena cakacaka tawayalani kei na gone e gadreva na kauwaitaki. Ia, eda sa vakila e dua na noda itavi cecere me vakavulica na kosipeli vei ira na luveda me ra kila ni ra sa luve ni Kalou.
“Na noqu itavi vaka-tina me vukei ira mera kila vakataki ira ni tu vua na Tamada Vakalomalagi e dua na ituvatuva ni bula marau ena vukudra.”
Kevaka ko se bera mada ga ni dua na itubutubu, ko rawa ni vakaitavi ena vukei ni nodra vakavulici na gone. “Sa ka bibi sara me ra sa kila na gone me baleta na ivakavuvuli kei na ivunau,” e kaya o Ingrid, “ka rawa vakaidina ni da cau ni da uabula sega ni vakawati se vakawati ena so na veikacivi ena Lalai kei na isususu.”
Eda sa itabagone qase cake osooso kece. Ia se cava ga na ituvaki o sotava tiko, sa rawa mo raica na sala rawarawa ni kena caka na cakacaka ni Turaga ena veitiki ni nomu bula—okoya na lelevu kei na lalai.