Va na yaloyalo ena Macawa ni Siganimate

“Sa sega ni vakavuravura na noqu matanitu” (Joni 18:36).

iSala Wa-votovotoa

Raica na Maciu 27:29; Marika 15:17; Joni 19:2.

Era biuta na sotia ni Roma e dua nai sala wa-votovotoa kivua na iVakabula. “De dua na ivukivuki dragali oqo e sa iwalewale matau me vakatauvatani kina na tikori ni dua na itutu dokai ki Vua. … Sa vakatuburarawa dina oqo, ni sa vakatakila na wa-votovotoa na cudru ni Kalou ena Nona cudruva na qele ena vuku i Atama me sa na vakavuturi mai kina na wa-votovotoa. Ia mai na tikori ni sala, a veisautaka o Jisu na wa-votovotoa ki na dua na ivakatakarakara ni Nona lagilagi” (Peresitedi James E. Faust, koniferedi raraba Epe. 1991).

Sulu Lokaloka

Raica na Maciu 27:28; Marika 15:17; Joni 19:2.

Na lokaloka na roka vakatui, ka ra vakaisulutaki Jisu Karisito kina na sotia ena veivakalialiai baleta ni a kaya o Koya ni sa nodra tui na Jiu. E dina sara, sa levu cake vakaidina o Koya mai na ka oya—sai koya na “Tui ni tui, kei na nodra Turaga na turaga” (1 Timoci 6:15; Ai Vakatakila 19:16).

“Sa tuturu mai kina na dra mai na veiqara ni yagona, ni sa rui levu sara na nona yaluma” (Mosaia 3:7).

iQaqi ni Olive

Raica na Maciu 26:36; Marika 14:32; Luke 22:39–40; Joni 18:1.

“E sa ivakatakarakara vakatuburarawa na ‘tuturu ni dra mai na veiqara ni yagona’ [Mosaia 3:7] ni vakararawataki tu o Jisu e Kecisemani, na vanua ni qaqi ni olive. Ni caka na waiwai olive ena gauna ni iVakabula, era na qaqiraki mada e liu na olive ena dua na vatu levu qiqivaki. Sa qai biu na kena sa ‘qaqiraki oti’ ki na basikete tali malumu, ka galala, ka ra veitaqataqai tu. Na kedra bibi sa vakaraitaka nai matai ni waiwai savasava duadua. Sa ra qai bikai yani na basikete veitaqai tu ena kena biu e delana e dua na bimi se tolo ni kau levu, me rawati vakalevu na waiwai. Kena iotioti, me tauri mai na itinitini saraga ni turu, ena vakabibitaki na bimi ena vatu ena dua na yasana me vakavuna na kena qaqi kaukauwa duadua. Io, na waiwai sa damudra ena matai ni kena drodro ituba” (Elder D. Todd Christofferson, koniferedi raraba Okot. 2016).

“Sa sega eke ko koya, sa tu cake tale” (Luke 24:6).

iBulubulu Lala

Raica na Maciu 28:1–8; Joni 20:1–18.

Nai bulubulu lala enai mataka ni matai Siganitucaketale oya e sa isau ni taro i Jope, ‘Kevaka sa ciba na tamata, ena bula tale ko koya?’ [Jope 14:14]. Vei kemuni kece ka rogoca rawa na domoqu, au sa cauraka, Kevaka sa ciba na tamata, ena bula tale ko koya. Eda sa kila, baleta ni sa tiko vei keda na rarama ni dina vakatakilai” (Peresitedi Thomas S. Monson, “Sa Tucake o Koya!” koniferedi raraba ni Epe. 2010).

Droini ni sala wa-votovotoa mai vei Dilleen Marsh

Karisito kei Pailato, mai vei Marcus Vincent, lolomataka na Church History Museum

iTaba ni qaqi ni olive mai na Getty Images