Monalivaliva Walega
E Vesuki Iko Tiko li Na Nomu Veigauna Sa Oti?
Sa sauma oti na iVakabula na isau. Taura na Ligana ka toso tikoga ki liu.
E dua na gauna sa oti, a veisureti na noqu bisopi ki na neimami tabanalevu mera vakasamataka eso na malumalumu se ivalavala ca, ka rawa ni vakatovotovotaka me biuta ena teveli ni sakaramede me kauta tani ko Jisu Karisito. E tiko eso na ivalavala ca au se kauta vata tiko kei au ena noqu bula ni itabagone qase cake taucoko kau a tovolea meu rawata kau se sega ni gumatua kina mai na masu se na noqu igu e loma. Se cava ga na noqu tubu ena loma ni veiyabaki, au sa kila niu gadreva meu ulabaleti ira meu tomana tiko na toso ki liu.
Na Sigatabu ni oti na bolebole nei bisopi, au sa lewa meu biuta tu e dua ga na noqu ivalavala ca ena teveli ni sakaramede, e dua na ivakatakarakara vakayago baleta na iVakabula kei na Nona isoro veivakaduavatataki. Niu vakavakarau tiko me ciqoma na sakaramede, au qai nanuma ni na isulu ka ubia tiko e matataka na Nona isulu ni veibulu, kei na madrai kei na wai na Yagona kei na dra.
Ena yalodina kei na inaki taucoko ni yaloqu, au vakavouya na noqu veiyalayalati ni papitaiso, ka cavuta e dua na masu e yaloqu, kerea na veivuke nei Tamada Vakalomalagi ka yalataka meu biuta tu mai na ivalavala ca oqo. Ia e dua na ka a yaco kau sega vakadua ni namaka: sa takali vakadua na noqu gagadre meu valavala ca tiko. Au tovolea oqori ena vica tale na gauna, ia na ka vata ga oya sa yaco ki na ivalavala ca tale eso. E sa rui vinaka beka me dina?
Vakasotara na Noqu Lewa kei na Nona
Ena macawa ka tarava, au sa kila na ivalavala ca cava au vinakata meu biuta tu ena teveli ni sakaramede, ia au sega ni vakila niu tu vakarau meu laiva. Niu raica lesu, au qai kila ni sega ni tiko e na vanua dodonu na yaloqu. Au a sega ni yalodina sara meu tutaka na veisau. Ia au kila ni rarawataka vakalevu o Tamada Vakalomalagi na ivalavala ca. Au kila niu gadreva meu vakasotara vata na noqu lewa kei na Nona ka meu vakadaberi Koya e lomadonu ni noqu bula meu galala kina. Ia au qai cakava na noqu vinaka taucoko me vakavotukanataka oya.
Au sa levea na veitemaki kece e rawa ni veimuataki ki na ivalavala ca oqo. Au veisautaka na ivakarau ni wiliki ni noqu ivolanikalou ena veisiga ka tugani ira vakaidina ka taurivaki ira ena noqu bula. Au vakanamata meu lomadina ki na noqu yalayala meu veisau, kau segata ena veisiga meu vakasaqara na lewa ni Turaga mai na noqu. Au vakaliuci Koya, baleta niu kila niu sega ni rawa ni biuta na ivalavala ca oqo kevaka e sega na kaukauwa ni Veisorovaki ni iVakabula. Niu tomana tiko meu vakaliuci Koya, au sa rawa kina ni sorovaka na ivalavala ca oqo ena teveli ni sakaramede. Au sa qai galala vakaoti mai na dua na ka ea vesuki au tu ena vica vata na yabaki.
Ena ikalawa oqo, au a toro voleka cake kina vua na Tamaqu Vakalomalagi kei na noqu iVakabula. Au raitayaloyalotaki Rau ni raici au sobu tiko mai ena veiyabaki kece oqo ena vosota kei na loloma—ka kila tiko, ni na yaco ga, niu na biuta na ivalavala ca ka tarova vakayalo tu na noqu toro cake. Ia niu sa vakarau meu biuti ira, ena tiko e kea o Jisu Karisito me laveti au cake—me tubera na ligaqu ka solia vei au na veivosoti kei na kaukauwa. Sa vakarautaka oti tu e dua na sala meu galala kina mai na noqu ivalavala ca ena Nona Veisorovaki. E sa sauma na isau ni noqu malumalumu, caka cala, kei na ivalavala ca. Au gadreva walega meu vakararavi vua.
E Rawa Mo Toso Ki Liu
Ena gauna oqo, au wilika eso na vosa mai vei Elder Richard G. Scott (1928–2015) ena Kuoramu ni iApositolo Le Tinikarua ka solia vei au na ibili lailai au gadreva: “Kevaka e na nomu bula ena kasura ka o vakila ni o logaloga ca ka tawayaga … , kakua ni yalolailai. Sa kila oti tu me baleta na veika kece oqori. Sa na waraki iko mo tekiduru ena yalomalumalumu ka taura e vica na imatai ni kalawa. Masulaka na veivakaukauwataki. . . . Masulaka me sovaraki ki lomamu na loloma ni iVakabula.”1
Neimami a lagata na “Loloma i Jisu” (na noqu serenilotu taleitaki) ena macawa ka tarava, e voqa ni dina na vosa yadudua; au sa qoroqoro dina sara ga—au kurabui ena kena kau tani na veika au a ogataka tu me sivia e tini na yabaki. E kurabuitaki niu rawa ni toso ki liu ena kaukauwa ni Veisorovaki ni iVakabula. Okoya e rawa ni vakabula kece na ivalavala ca kei na mavoa ka sega ni dua na mawe e laiva tu mai. Niu sega ni gadrevi meu na tarovi tu ena noqu gauna e liu.
E se levu tu na ka meu vulica ka ulabaleta, ia na noqu bula e sa tu ena ilakolako muacake. Au sa vakila tiko e levu cake na marau kei na vakacegu. Au sa vakaraitaka tiko e levu cake na vakavinavinaka. Au sa toro voleka cake ka vaqaqacotaka na noqu ivakadinadina me baleta na Tamada Vakalomalagi kei na iVakabula. E veisiga au sa digitaka meu tovolea tale, au sa voleka me dua na ikalawa vei Rau kei na tamata Erau kila ni rawa niu yacova.