A Vakananuma Vei u e Dua na Manumanu Vuka Lailai
Laura Linton
Utah, Amerika
Droini mai vei Carolyn Vibbert
Au sa yabaki 26 ena gauna keirau vakayalia kina kei na watiqu na neirau ulumatua. A laurai vei Kennedy e dua na tubu ena nona mona ni se qai vula 13. Ni oti e tolu na veisele, lima na wavoki ni kemocerapi, kei na vicavata na wainimate kei na veiqaravi, a takali mai ligai keirau ni vula 20 tiko.
Au a rarawataka vakalevu na nona takali na neirau goneyalewa totoka, kaukauwa dau vakatataro. Na cava e yaco kina oqo? Rawa vakacava meu toso? Sa dua na ka na levu ni noqu taro, ia e sega ni dua na kena isau e tu vei au. Ni oti e vica na siga mai na veibulu, keirau a lako kei watiqu ki na ibulubulu, se tu ga kina na senikau piqi totoka kei na reveni mai na gauna ni veibulu.
Niu vakasamataka tiko na luvequ yalewa, au raica e dua na manumanu somidi, se bera ni rawa ni vuka, ni kiso voli ena co. E vakananumi Kennedy vei au na manumanu oqo baleta ni dau taleitaka o koya na manumanu. A kiso yani na manumanu ki na ibulubulu ka laki vaqitora na reveni kei na senikau. Au matadredredre, niu kila ni oqo sara ga na ka ena vinakata o Kennedy. Qai kiso mai vei au na manumanu. Au sega sara ga ni bau toso vakalailai. A kiso sara mai vei au na manumanu, mai ravi e yavaqu, bobo na matana, ka moce.
E dredre meu vakamacalataka na veika au vakila ena gauna oya. Au vakila ni vaka e mai mokoti au o Kennedy. Au sega ni rawa ni tara na luvequ goneyalewa, ia na manumanu lailai oqo—e dua na ibulibuli nei Tamada Vakalomalagi—e rawa ni lako mai ka mai vakotora na uluna lailai vei au, ka vakananuma vei au ni kila tu na Tamada Vakalomalagi na noqu mosi ka na dau tu e yasaqu me vakacegui au ka vukei au ena veivakatovolei oqo.
O Elder David A. Bednar ena kuoramu ni Apositolo Le Tinikarua a kaya, “Ena gauna e sega kina ni rawa vua na vosa me vakarautaka na veivakacegui eda gadreva … , ni sega ni rawa ni vakavurea na vakasama kei na iulubale na yalo me ciqoma na veika e cala ka sega ni dodonu ni bula, … ia ena gauna sa kena irairai kina ni da sa tu taudua voli, na ka dina ni da sa vakalougatataki ena loloma cecere ni Turaga” (“Na Yalo Loloma ni Turaga,” Liaona, Me 2005, 100).
Se bera ga ni yaco mai vei au na isau taucoko ni noqu taro, ia na loloma cecere oqo sa vakadeitaka vei au ni lomani au kei Kennedy na Tamada Vakalomalagi mai na isoro ni veivakaduavatataki ni Luvena, o Jisu Karisito, sa noqu vakanuinui ni dua na siga keitou na duavata tale vakamatavuvale o Kennedy, na watiqu vata kei au.