A Tu na Nodra iNuinui ena Lako mai i Karisito—e Rawa Talega vei Keda
Era a vakanuinui na parofita ni iVola i Momani ni na lako mai na Karisito. Ni da wilika na nodra vosa, sa rawa me tu vei keda na inuinui vata oqori ki na gauna ena lesu tale mai ko Koya.
“The Visit”, Droini mai vei Jorge Cocco Santangelo
Na vosa cava e lako mai ki na noda vakanananu ni ko vakasamataka na iVola i Momani?
Nifaiti, Leimanaiti, aiti tale eso?
iValu, lekutu, ena ca?
Veivutuni, veivueti, buladodonu?
Jisu Karisito?
iNuinui?
Na Siganimate sa gauna vinaka sara ga meda vakasamataka vou tale na itukutuku ni iVola i Momani. Vakabibi, na itukutuku ni o Jisu na Karisito, na noda iVakabula ka Dauveivueti. Ena vukuna ga, eda na qai sereki mai na mosi ni yago kei na yalo. Mai na mate kei na ivalavala ca. Eda na vorata rawa na veika ca kecega e viritaka mai vei keda na vuravura.
Na kena rawarawa ga, eda na rawata na inuinui.
Na inuinui—inuinui dina, e yavutaki vei Jisu Karisito—a vakauqeti ira na parofita ni gauna e liu me ra maroroya na itukutuku ena peleti koula ka qai yaco me iVola i Momani. E tukuna vei keda o Jekope, “Ni, ena vei inaki oqo keimami sa vola kina na veika oqo, me ra kila kina ni keimami a kila na veika baleti Karisito, ka a tu vei keimami na inuinui ni nona lagilagi ena vica na drau na yabaki ni se bera na nona lako mai” (Jekope 4:4; vakamatatataki).
E vinakata o Jekope me da kila ni ra sa—kila o koya kei ira tale eso na parofita dau volaitukutuku na nona lako mai na Karisito. E na vuqa na drau na yabaki ni bera Nona lako mai! Ka ra sa vakauqeti kina me ra rawata na inuinui o ya mai na nodra vosa na parofita era wilika. E vakamacalataka o Jekope, “ka sega walega ni tu vei keimami na inuinui ni nona lagilagi, ia ko ira kece talega na parofita tabu ka ra a bula e liu vei keimami.
Raica, era a vakabauta na Karisito ka vakarokorokotaka na Tamada ena yacana, kei keimami talega, keimami sa vakarokorokotaka na Tamada ena yacana.
“O koya, keimami sa dau vakasaqarai ira kina na parofita ka sa levu kina na neimami ivakatakila kei na yalo ni parofisai; ka sa tu vei keimami na ivakadinadina kece oqo, keimami sa rawata kina na inuinui ka sa yaco me tawayavalati rawa na neimami vakabauta”(Jekope 4:4–6; raica talega na 1 Nifai 19:21; Jekope 7:11; Mosaia 3:13; Ilamani 8:16).
Na inuinui era a rawata mai na veika era a sotakaya kei na veiparofisai era a wilika ena ivolanikalou, sa vakarautaki ira ki na siga ena lako mai kina na Karisito. Sa vakakina, o ira na parofita nikua era sa vakauqeti keda me da vakavakarau ki na gauna ena lako tale mai kina na Karisito. Kevaka me na tu vei keda na inuinui vata o ya, eda gadreva tale ga “[me da] vakasaqarai ira na parofita [me] levu na [noda] ivakatakila kei na yalo ni parofisai.” Na nodra ivakadinadina baleti Jisu Karisito ena sega walega ni vaqaqacotaka na noda ia ena vukea na noda vakavakarau ena nona lako mai.
Liai
“O koya, sa ka bibi sara kina me tukuni yani na veika oqo vei ira na lewei vuravura, me ra kila kina ni sa sega ni rawa ni dua na ka bula me tiko ena iserau ni Kalou, ka vakavo ga ena nona cakacaka dodonu, kei na loloma cecere, kei na nona loloma soli wale na Mesaia Tabu, o koya sa solia na nona bula me vaka na veika vakayago, ka sa taura lesu tale ena kaukauwa ni Yalotabu, me vakayacora kina na tucake tale mai na mate, ni sa imatai me tucake tale.
Nifai
“Ia eda veivosakitaki Karisito, eda reki ena vukui Karisito, eda vunautaki Karisito, eda parofisaitaki Karisito, ka eda sa volavola me vaka na noda parofisai, me rawa ni ra kila kina na noda kawa na ivurevure me ra rai kina me bokoci kina na nodra ivalavala ca.
Na Tui o Penijamini
“Ia ena vakatokai na yacana me o Jisu Karisito, na Luve ni Kalou. …
“Ka raica, ena lako mai ko koya kivei ira na kai nona, me na yaco kina na veivakabulai vei ira na luve ni tamata ena vakabauti ni yacana; …
“Ka na tucake tale mai na mate ena ikatolu ni siga;
“Ia raica, na nona dra sa sorovaki talega kina na nodra ivalavala ca ko ira era a lutu ena vuku ni caka cala i Atama, ka ra mate ka sega ni kila na inaki ni Kalou me baleti ira, se ko ira era sa sega ni kila ni ra sa ivalavala ca.”
Alama
“Ia ena lako yani ko koya, ena vakila na mosi kei na veivakararawataki kei na veivakatovolei kecega, ia sa yaco na veika oqo me vakayacori kina na vosa sa tukuni, ni na colata ko Koya na nodra mosi kei na nodra tauvimate na nona tamata.
“Ia ena mate ko Koya me tasereka kina na ivau ni mate sa vauci ira tu na nona tamata; ia sa ciqoma ko koya na nodra malumalumu, me vakasinaiti na loloma ena loloma cecere, me vaka na veika vakayago, me rawa kina ni vakila me vaka na veika vakayago na sala me vukei ira kina na nona tamata me vaka na nodra veimalumalumu.”
Amuleki
“Ia na ilutua ka iotioti ni isoro oqo sai koya na Luve ni Kalou, io, e tawayalani ka tawamudu.
“Ia oqo ena kauta mai ko koya na veivakabulai vei ira era vakabauta na yacana; sai koya oqo na inaki ni iotioti ni isoro, me vakayacori kina na loloma cecere, o koya ena vakamalumalumutaka na lewa dodonu, ka kauta mai na sala vei ira na tamata me na tu kina vei ira na vakabauta ki na veivutuni.
“Ia sa vakaceguya na gagadre ni lewa dodonu na loloma cecere oqo, ka sa ologi ira ena liga ni veitaqomaki, ia ko koya e sega ni vakabauta me veivutuni ena sota kei na lawa ni lewa dodonu; ko koya ga e tu vua na vakabauta ka veivutuni ena rawata na inaki ni ituvatuva ni veisereki cecere ka tawamudu.”
Gethsemane, by Jorge Cocco Santangelo
Samuela na Leimanaiti
“Raica sa dodonu me mate vakaidina ko koya me rawa kina na veivakabulai; io sa kilikili me mate ko koya me rawa kina na tucake tale mai na mate, ka me rawa vua na tamata me tu ena iserau ni Turaga.
“Io raica, na mate oqo e rawa kina na tucake tale mai na mate ka sereki ira na tamata kecega mai na imatai ni mate, ko ya na mate vakayalo; ni ra a muduki tani na tamata kece ena lutu i Atama ena nona muduki tani mai na mata ni Turaga, ka okati me ra sa mate, ena veika vakayago kei na veika vakayalo.
“Ia raica, na tucake tale mai na mate i Karisito sa sereki ira na tamata, ia na tamata kecega ka kauti ira lesu mai ki na iserau ni Turaga.”
Blessing the Children, by Jorge Cocco Santangelo
Momani
“Sa dodonu mo dou kila na kedra itukutuku na nomudou qase, ka veivutunitaka na nomudou ivalavala ca kei na nomudou caka cala, ka vakabauti Jisu Karisito, ni sai koya na Luve ni Kalou, ka ra a vakamatei koya na Jiu, ka sa tucake tale ena kaukauwa i Tamada, ka sa qaqa kina ko koya mai na ibulubulu; mai vei koya tale ga sa takali kina na bati gaga nei mate.
“A sa rawa ena vukuna na tucake tale mai na mate, ka ra na vakaturi cake kina na tamata kecega ka tu ena mata ni nona itikotiko ni veilewai.
“Sa mai rawata na nodra sereki na kai vuravura, ia ko koya sa kunei ena siga ni lewa ni sa tawacala, ena tiko ena nona iserau na Kalou ena nona matanitu, ka na duavata kei ira na veimatasere mai cake me ra lagata tiko ga na nodra vakacaucau ki vua na Tamada, kei na Luvena, kei na Yalo Tabu, ka ratou sa Kalou e duabau ga, ena marau ka sega na kena iyalayala.