Na Sala Era Vakayaco Duidui Tiko Kina na Tabagone Qase Cake ena Tomani ni Veivakalesuimai

Epereli 2020

iTabagone Qase Cake

Na Sala Era Vakayaco Duidui Tiko Kina na Tabagone Qase Cake ena Tomani ni Veivakalesuimai

Sa dau nodra tu ga na tabagone qase cake na itavi bibi ena cakacaka ni veivakabulai.

Na veigauna kece o rogoca na veisureti ni dua na iliuliu ni Lotu mo vakaitavi ena tomani ni Veivakalesuimai se veivuke ni vakasokomuni Isireli, o sa vakasamataka tu li, “Na cava au rawa ni cakava? O au e dua ga na tamata,” “Au se gone sara,” “Au se bera ni vakawati,” se “Au sega so ni kilaka. Na veisau cava au rawa ni cakava?”

Eda sa sotava vakayadua na mataqali vakasama vakaoya ena veigauna. Ia tovolea mo vagaluya na vakatitiqa oqori ena nomu wilika na yatuvosa e vica ka tarava:

A se qai yabaki 22 ga o Josefa Simici ena gauna a tekivu vakadewataka kina na iVola i Momani.
O Oliver Cowdery talega a 22 ka 26 tu o John Whitmer (rau sega ni vakawati!) ni rau sa tekivu cakacaka vaka vunivola i Josefa Simici.
Ena 1835, ni sa kacivi na matai ni Kuoramu ni iApositolo Le Tinikarua, era a yabaki 23 ki na 35.
E vuqa na Yalododonu taumada ka lewena na Lotu ka vakatetea na kosipeli era i tabagone qase cake.

Vakaoti, a cakacaka vata kei ira na tabagone qase cake na Kalou ena gauna eliu ni kena Vakalesui mai na kosipeli i Jisu Karisito. Ira na tamata vakataki iko.

Laiva me na curuma.

Na Lotu ena sega ni rawa ni tete e vuravura taucoko nikua ke nanuma na tamata kecega era sega ni rawa ni cakava na veisau. O iko—io, o iko!—sa tiki ni dua na tabatamata digitaki nikua mo tomana na kena vakalesui mai ka liutaki na Lotu i Jisu Karisito.

Ko Sa Talai Mai Kike. Ena Gauna Oqo. Ena Dua na iNaki.

Ni vosa tiko baleti ira na noda tabatamata, a vakavulica o Peresitedi Russell M. Nelson, “Ko sa bula donuya tiko na ‘ikatinikadua ni auwa.’ Sa tukuna na Turaga ni oqo sai otioti ni gauna ena kacivi ira kina na tamata cakacaka ki na Nona were ni vaini me vakasoqoni ira na sa digitaki mai na yasai vuravura e va. (Raica na V&V 33:3–6.) Ka o sa talai mo vakaitavi ena veivakasokomuni oqo.”¹

Vakasamataka mada na nodra qaqa na 65,000 na daukaulotu tudei ka wasea tiko na kosipeli ena siga taucoko, ena veisiga, e vuravura raraba. Vakasamataki ira taucoko na tabagone qase cake ka caka veiyalayalati voli ena valetabu, ka taura matua tu na veivakalougatataki ni matabete vakalesui mai kei na valetabu ka veiyalayalati tiko mera yalodina tu, vaqaqacotaka na nodra matavuvale, ka tara cake na matanitu ni Kalou e vuravura. Vakasamataki ira na tabagone qase cake ka veiqaravi voli vaka iliuliu ni Lotu e vuravura raraba. Vakasamataki ira ka sasagataka tiko mera muri Jisu Karisito se vakacava na dredre eso era sotava. Era sa dau tiki bibi tu ni Veivakalesuimai na tabagone qase cake mai na itekivu. Ka sa tiki bibi tu na tomani ni Veivakalesuimai ki na bula ni tabagone qase cake tawawili rawa ka lewe ni Lotu.

Na iBalebale ni Veivakalesuimai kivei Keda

Ki na vuqa vei keda, na noda vakaitavi ena Veivakalesuimai sa vu mai na ka e sa vakavulica vei keda. Vei Vennela Vakapalli, e dua na tabagone qase cake curuvou mai Andhra Pradesh, Idia, “na Veivakalesuimai e sa baleta na vakasaqarai ni vakatakila. A qara o Josefa Simici na vakatakila e loma ni veikau. A masuta na Turaga o koya, a waraka na kena isau, a vosota tu. O ya na ka au taleitaka.” E vakamacalataka o Vennela, “Ni bera ni’u rogoca na Veivakalesuimai, au sega ni kila tu vakalevu na vakasaqarai ni vakatakila. Dua na ka au kurabui vakalevu kina oya na levu ni gauna a vakayagataka me rawata kina na vakatakila mai vua na Kalou. O ya na ka au vulica mai na Veivakalesuimai.”

E vakadinata o Emma kei Jacob Roberts, e dua na veiwatini gone mai Utah, Amerika, ni Veivakalesuimai e sa baleta na “tomani ni vakatakila”—me baleti keda kei na vuravura—”ni sa rawa ni da vaka parofita, e dua na gusunivosa eke e vuravura mai vua na Kalou, ka vakadeitaka se bolebole cava ga e kauta mai o vuravura, sa tiko e dua ka sa cakacaka ka masu ka veivosaki tiko kei na Kalou me vakadeitaka ni da sa vakarau tu ni sotava na bolebole cava ga e kauta mai o vuravura ni sa veisau.”

“Levu sara na kilaka e salavata mai na Veivakalesuimai e sa vakarawarawataka na noqu bula ka lailai na lomaocaoca,” e kaya o Jacob. E sa salavata kece mai e dua na veivakadeitaki “ni sa tiko e dua na Kalou ka lomani keda ka wanonovi keda,” e kaya o Emma. “Na Nona inaki sa noda bula marau. Vaka na tabagone qase cake, sa rawa ni da vakararavi vakataucoko ka muri Koya baleta ni da kila na Nona takete sa noda bula marau. Eda kila ni da sa tamata tawamudu, oya sa solia vei au e levu na nuinui kei na vakabauta, ni cava ga au kitaka oqo kei na cala cava ga au cakava oqo, se rawa tikoga ni’u veivutuni ka sa tiko na gauna me’u toso kina ki liu ka vuli.”

Na mataqali veivakadeitaki vakaoya a vukei Ramona Morris talega, e dua na tabagone qase cake mai Barbados, ni vulica ena matai ni gauna na Veivakalesuimai. Mai na veika tale eso, a rawata o koya e dua na ivakadinadina ni “sa tiko na Tamada Vakalomalagi ena vukuda. E sa kauta mai na vakacegu na Veivakalesuimai kivei ira ka vakataroga na nodra bula kei na ituvatuva ni Kalou me baleti ira.”

Ia dina ga ni sa mai vakaibalebale ki na nona bula na kilai vakamatata ni Veivakalesuimai, e vakadinadinataka talega ni “nona yawaka tu mai na itikotiko liu ni Lotu, e sa dredre me sema ki na kosipeli, ia baleta ga ni qaqaco tu na noqu ivakadinadina ena kosipeli vakalesui mai, au kila se vakacava na kena yawa, au vakila ni’u vaka tu e dua na tiki ni Veivakalesuimai, ni’u sa sega ni galili.”

Ka sega vua. Era sa vakaitavi tiko ena Veivakalesuimai na tabagone qase cake e vuravura raraba ena veiqaravi ena valetabu, tuva kawa, kei na cakacaka ni kaulotu. Ena kilai vakamatata ni noda vakatakila eda sa rawata ena vulici ni Matai ni Raivotu i Josefa Simici kei na Veivakalesuimai, eda sa rawa ni tomana taucoko ni qara meda kila na loma ni Kalou kei na itavi cava eda rawa ni qarava ena tomani ni Veivakalesuimai.

Ira na Tabagone Qase Cake ka Liutaka Tiko na Lotu

Eda na rairai tabagone qase cake, ia eda sa rawa ni liuliu ni Lotu ena gauna oqo. Dina ga ni lewe ni Lotu duadua ga ena nona matavuvale, o Janka Toronyi mai Győr, Hungary, e sa vaqaqacotaki ena nodra vakaitavi na nona itokani tabagone qase cake ena veika eso ni Veivakalesuimai: “E dua na noqu ilawalawa tokani sa gole ki na kaulotu, ka sa veivakadrukai me raici na nodra rawaka ka ra qai lesu mai ka tubu cake vakalevu ena veika kece era sotava mai. E sa dua na kalawa levu sara vei keda kece. Ka dau talei tu meu raici ira na noqu tokani tabagone qase cake tawavakawati ni qarava na nodra veikacivi ka so na gauna na madigi eso era cakava vakai ira, vaka na bole mera daunivakasala ena koniferedi eso ni MST (Me iSakisaki ni Tabagone). Au vakila vaka na Veivakalesuimai e sega tu ni baleta walega na nodra vakavulici na tamata ena kosipeli—e sa baleta na nodra vaqaqacotaki na lewenilotu e tiko vei keda.”

Era kila vakavinaka tu na tabagone qase cake e Hungary ni ra na liuliu ni Lotu mai muri. “Eda sa gadrevi ka da gadreva meda rawata na itavi, ka veivakadrukai tu ena so na gauna,” e vakadinadinataka o Janka. “Sa vakusakusataka tiko na Turaga na cakacaka ka da sa vakaitavi kina. Eso na gauna eda vakasamataka ‘Au na cakava vakacava na ka oqo?’ Ia sa ka talei meda raica ni ra nuitaki keda tu na noda liuliu. E sa veivakauqeti vei ira ka taleitaka tu na Lotu ka qaqaco tiko na nodra ivakadinadina, baleta ni da kila ni na vakatautaki vei keda ena dua na siga. Sa vakatautaki vei keda na noda rawaka vakayalo vakai keda.”

E vakaitavi o Sean kei Stefany Joseph mai na Ra kei Ositerelia ena Veivakalesuimai ena vakavulici ni tabagone ena nodra tabanalevu. “Vei au, na vakaitavi ena Veivakalesuimai oya na nodra vukei na tabatamata mai muri mera kila vakamatata se cava sara na kosipeli kei na sala e rawa ni vukei ira kei na so tale ena nodra bula,” e kaya o Stefany. “Sa rawa ni da bulia e dua na yavu kaukauwa cake me baleta na Lotu ena noda vanua mai muri.”

“Eda vinakata ni vukei ira na tabagone ni rawata e dua na ivakadinadina me baleta na iVola i Momani kei Josefa Simici ka vakila vakai ira ni ra sa luve dina ni Kalou,” e vakamacalataka o Sean. “Eda sega ni vinakata tu me dua na ka era se qai lagata ga ena Lalai—eda vinakati ira ni kila saraga na kena dina.”

Ia vei Vennela, na bulataki ni kosipeli e Idia e sega ni dau rawarawa, ia sa kila o koya na kaukauwa ni lewe ni tabagone qase cake ekea ena vakauqeti ira na tani ka vukea me rawaka na Veivakalesuimai. “Eke, era sa yalodina saraga na tabagone qase cake taucoko. Era vaqara na madigi eso mera wasea na nodra ivakadinadina,” kaya o koya. “Keimami sa vakataka na ivuvu e Idia. Keimami toki mai na vanua duidui eso ka so vei keimami e biuta tu na neimami matavuvale. E rawa ni veibolei eke na bula, ia keimami digitaka tu ga ni bulataka na kosipeli. E vakatakila vei au na ivolanikalou e levu na inuinui, kaukauwa, kei na yaloqaqa.”

Veitalia na vanua keimami tiko kina, vaka tabagone qase cake, sa rawa ni keimami tomana ni rawata e dua na veivakayarayarataki kaukauwa ena tomani ni Veivakalesuimai ena neimami vakabauta ka dinata na kosipeli.

Na Gauna e Muri ni Lotu: E Sa Vakatau vei Keda

O keda na gauna e muri ni Lotu. Eda sa tiko ena iotioti ni valu. Sa vakararavi vei keda na Tamada Vakalomalagi meda vukei Koya ni kitaka na Nona cakacaka—na Nona cakacaka ni veisau-bula tawamudu. Sa kila o Koya ni da sa kaukauwa tu ni toso tiko ki liu ka vala voli kei na ka kecega e vakavurea mai na vunica. Ka sa makimaki voli o Setani. Sa kila o koya ni sa lusi tiko baleta na cakacaka ni Turaga ena qaqa.

“Eda kila ni sa vakusakusataka tiko na Turaga na cakacaka ka sega ni dua e tarova rawa,” e kaya o Janka. “Eda sa kila tu ni na yaco se cava ga e basika. Ia sa dodonu meda navuca kevaka eda na vakaitavi kina ka vukea ki liu se sarasara tu ga mai tuba. Sa noda na galala ni digidigi meda vakaitavi kina, ka sa tiko vei keda na ivakadinadina meda digitaka na dodonu ka digitaka ni muri Karisito. Sa dodonu meda vakaitavi kina.”

Ia sa vakatau tu se na ito icei eda digitaka meda tiko kina.

E sa vakatau vei keda meda yaloqaqa ni tutaka na ka eda vakabauta.

E sa vakatau vei keda meda qara na noda vakatakila me baleta na noda bula.

E sa vakatau vei keda meda vakatara na veibolebole duidui eda sotava me vaqaqacotaka na noda vakabauta na iVakabula.

E sa vakatau vei keda meda muri Koya ka cakava ena noda igu taucoko ni kauti ira mai na tani ki Vua.

E sa vakatau vei keda meda vosota me yacova na ivakataotioti ena kena vinaka duadua eda rawata.

Eda sa tiko dina ena iotioti ni gauna. Kei na liutaki ni Lotu ena ka e vakatoka o Peresitedi Nelson na “itabagauna veivakatotogani duadua ena itukutuku kei vuravura”² sa rogo tu vaka e dua na itavi vakarerevaki vakaidina. Ia vakasamataka mada—sa nuitaki keda tu na Tamada Vakalomalagi ka sa biuti keda vakawawa ena vuravura oqo ena gauna vakatabakidua oqo, na gauna eda sotava tu kina na veitemaki kei na veivakayarayarataki tawawili rawa kei na vuqa na nanuma veisaqasaqa.

Ena noda talai mai ke ena tabagauna bibi duadua, a sega ni vakarautaki keda tiko na Tamada Vakalomalagi meda druka. Sa kila tu o Koya na ka eda rawata, noda kaukauwa, noda yaloqaqa, ka kenai lutua, sa kila o Koya eda rawa ni cakava e dua na duidui ena Veivakalesuimai ni Lotu, se cava ga na noda yabaki se tuvaki ni bula vakawati. Se cava ga na kena dredre na noda vakatovolei, se na kena dredre tu na liutaki kei na wasei ni kosipeli e vuravura taucoko, ni sa noda ito o Koya, o cei ena rawa ni vala vata kei keda? Ena vukei keda o Koya ni vakataucokotaka na ka e dredre.