O Nanuma Beka ni Sega na Nomu iNaki ni o iTabagone Qase Cake? Vakasamataka Tale

Mai vei Cesar Gervacio

Ni ko vakasamataka mo veiliutaki ena Lotu ena dua na siga e rawa ni veivakalomaocaocataki, ia sa tu na sala o rawa ni tekivu veiliutaki kina ena gauna oqo.

Ena siga ni sa voleka na iKarua ni Lesu mai i Jisu Karisito, ena yaco na “ivalu kei na irogorogo ni valu.

“… Ena veibolebolei na veimatanitu, kei na veivanua; ena yaco talega na dausiga, kei na mate dauveitauvi, na tavuki ni vanua, ena yasana e vuqa.

“Kei na dua tale, ni sa tubu vakalevu na ivalavala ca, sa na batabata mai na nodra loloma na tamata” (Josefa Simici—Maciu 1:28–30).

Ena loma ni veilecayaki vakaoqo, o cei ena veivuke me liutaki ira na tacida kei na ganeda, ena loma kei na taudaku ni lotu, mera lesu vua na Tamada Vakalomalagi?

Oqori na vanua eda na curu mai kina.

Eda Na Veiliutaki Vakacava

Eda sa kacivi ni da sa dua na itabatamata cecere duadua ni itabagone qase cake. E vakamacalataki keda o Peresitedi Russell M. Nelson me vakataki ira “sa nuitaki ira na Kalou me tala mai ki vuravura ena itabagauna veirawai duadua ena itukutuku ni vuravura oqo” (“Tudei vaka–Tamata Dina ni Mileniumi,” Liaona, Okot. 2016, 46).

Ia, ena rawa vakacava meda tudei tiko ena noda gugumatua me da yaco meda iliuliu qaqa ena Lotu ni Turaga? Ia, kevaka mo na veiraiyaki, o na raica rawa ni o sa dua tiko na iliuliu ena dua na sala oqo se dua tale.

Sa rawa mo veiliutaki ena dua na veikacivi ni Lotu. Me vaka ni ko daukaulotu, sa rawa mo liutaka e dua na veivosaki, vakatulewa ena dua na itaviqaravi ni cakacaka ni kaulotu, se lesi mo dua na iliuliu ni iwasewase se iliuliu goneyalewa. Sa rawa mo dua na iliuliu ena nomu matavuvale se vei ira na nomu itokani. Sa rawa mo liutaki ira na nomu qase e liu me ra vakabulai ena cakacaka ni tuva kawa. Sa rawa talega mo dua na iliuliu vakapolitiki, ka sa rawa mo dauveiliutaki ena cakacaka cava ga o digitaka.

Ia na taro oqo, meda na veiliutaki vakacava? A veiliutaki na iVakabula ena Nona ivakaraitaki. E a veiliutaki ena “Lako Mai, Mo Muri Au” ka sega ni “Sa vinaka cake na noqu sala.” A veiqaravi, veivakatavulici, loloma, ka kauwaitaki ira na tu wavoliti Koya. O Jisu Karisito sa ivakaraitaki cecere duadua ni dua na iliuliu. Ni gadrevi meda sa dua na itabatamata iliuliu cecere, sa rawa meda tekivu ena noda saga meda vakataka na iVakabula ena noda cakava na veika lalai oqo:

Masulaki ira era tiko vakaleqai, era gadreva tu na veivuke, se o ira mo na qarava, ka vakasaqara mo kila na sala mo vukei ira kina. Masulaki ira ena yacadra yadudua, me vaka na iVakabula a qaravi ira “yadudua” (3 Nifai 11:15).
Taura na gauna mo vakasaqaqara ena ivolanikalou vakatabakidua ena ivakaraitaki vinaka ni veiliutaki, vakabibi mai vua na iVakabula vakai Koya.
Masulaka na nomu tabanalevu, iteki, kei ira na iliuliu raraba ni Lotu. Masulaki ira talega na iliuliu ni matanitu, me ra rawa ni vakauqeti vakayalo ka cakacaka ena yalo ni veisaututaki kei na duavata.
Mo dau kilai ira era tiko wavoliti iko. Mo kila na veika era taleitaka, nodra matavuvale, nodra vuli, kei na nodra gagadre kei na veika era taleitaka ena bula oqo (raica na Efeso 2:19).
Wilika na nomu veivakalougatataki vakapeteriaki ka vakasamataka vakatitobu na nomu rawa ni yaco mo vinaka sara.

Ena noda vakayacora na noda vinaka taucoko meda veiliutaki ena ivalavala dodonu, eda na yaco me da tisaipeli dina ka muri Jisu Karisito ka rawa meda na veitokani kei na Yalo Tabu. Ni da sa cakava ka rokova tiko na veiyalayalati tabu, sa noda na ilesilesi meda na ciqoma na vakavakarau ka gadrevi me na vakayacori kei na isasabai vakayalo me ra na valuti kina na meca.

Sa Rawa Mo Tekivu Oqo

O na laki mataqali iliuliu vakacava? Se, cavuti na qaqanivosa ni iVakabula, “Ia a cava na ivalavala sa kilikili kei kemudou [na iliuliu]? Au sa kaya vakaidina vei kemudou, mo dou vakataki au” (3 Nifai 27:27).

Ni da sa volekata tiko na iKarua ni Lesu Mai, ena gadreva na Turaga eso tale na iliuliu ivalavala dodonu era na muria na Nona parofita ka curu ki na ivalu oqo. Sa gadrevi keda o Koya. Eda sa tiko oqo enai ka 11 ni auwa, ka levu na ka meda cakava. Sa rawa meda sa tekivu vakavakarau meda yaco me dua na itabatamata iliuliu cecere ena gauna oqo. Eda sega ni bera sara meda tekivu! Kevaka e tiko na ka e gadrevi mo vosa kina vei nomu bisopi, sa rawa vua me vukei iko ena salatu ni veivutuni. Kevaka o gadreva na veidusimaki ena sala mo vakatorocaketaki kina, tekivu ena nomu vakatorocaketaka na nomu veiwekani kei na Tamada Vakalomalagi kei Jisu Karisito; ni sa rawa me Rau vakaraitaka vei iko na vanua mo na gole kina. O iko kei au e daru sa kacivi ena gauna oqo me daru cakava na cakacaka ni Turaga ka vukea na noda parofita me liutaki kina na mataqali i Isireli ki na bula taqomaki, ka kevaka me da saga ga meda cakava na noda vinaka duadua, eda na rawata.