Eda Rawa ni Vakatetea na Rarama ni Kosipeli

Na gauna vakaitabagone qase cake e gauna ni tubu, sotavi ni madigi eso, ka gauna mo tekivu tara cake kina na nomu bula. Na veika kece oqori e rawa ni veirawai, talei, ka rerevaki ena gauna vata ga (a vaka sara ga kina vei keimami).

Ia ni da sega beka ni kila na isau kece ni taro lelevu bibi ni bula, e tiko e dua na ka eda sa vakadeitaka—o ira na itabagone qase cake era sa ka bibi sara ena Veivakalesui mai tomani tiko ni Lotu i Jisu Karisito.

Ena kena tuvai na iwasewase ena vula oqo, keitou a veivosaki kei ira e vuqa na itabagone qase cake me baleta na nodra vakaitavi ena vakasoqoni vata kei Isireli. Eda sa vakayalomalumalumutaki ena nodra loloma dina kei na yalodina ki na kosipeli i Jisu Karisito. Se cava ga na kedra ituvaki, o ira na itabagone Yalododonu era kila vakavinaka na nodra itavi bibi ena iotioti ni itabagauna oqo. Ena “iVakarau Era sa Vakayacoka Tiko Kina na iTabagone Qase Cake ena Veivakalesuimai Tomani Tiko” ena tabana e 44, e rawa ni o wilika kina na nodra sa vakarautaka tiko na itabagone qase mai Idia, Hungary, Barbados, Ositerelia kei Amerika na vuravura me baleta na iKarua ni Lako Mai ni iVakabula.

Ena itukutuku ena monalivaliva walega, e veivakararamataki kina o Cesar ena sala eda rawa ni kunea kina na noda inaki ka yaco me iliuliu vinaka cake. E tukuna o Lauri na veivakalougatataki eda na rawata ni da muria na ivakasala ni parofita. Eso tale na itabagone qase cake era wasea na veika era sotava ena veiqaravi ni valetabu, veiqaravi, tuva kawa, kei na cakacaka ni kaulotu. Ka da wasea vata e dua na ivakaraitaki mai vua e dua na itabagone qase cake mai New Caledonia ka vakaraitaka na ivakarau era sa cakava tiko kina na lewenilotu itabagone na cakacaka ni Turaga ena vei wasewase lalai ni Lotu.

Se vanua cava ga o tiko kina kei na ituvaki cava o sotava tiko, e rawa ni o vakayacoka ena vakasoqoni vata kei Isireli mai na ka o rawa ni nanuma. Ni da itabagone qase cake, o keda na iliuliu ni Lotu ena veisiga ni mataka. Na caudre lailai ni noda igu nikua ena vakacaudreva ka vakatetea na rarama ni kosipeli i vuravura raraba ni mataka.

Wekamuni dina,

Chakell Wardleigh kei Mindy Selu

Edita ni wase ni itabagone qase cake ni Mekasini ni Lotu