Na Matavuvale Vakaoti i Alonso
“For the temple is a holy place where we are sealed together” (Children’s Songbook, 95).
“E rawa li ni’u tiko vata tale kei Ta kei Na?”
“Na Siganimate sa gauna vinaka me vakasamataki kina o Jisu ka vakananuma na Nona Tucaketale,” a kaya o Sisita Rojas. A taura cake o koya e dua na yaloyalo kei Jisu. “Ena Vukuna, era rawa ni bula tale na tamata ka sa mate.
A rai cake o Alonso ni tukuna na ka oqo na nona qasenivuli ni Lalai. E kena ibalebale oya ni rawa ni’u raici rau tale na noqu itubutubu? A vakananuma o Alonso.
A mate o tinana ena vica na yabaki sa oti. A sega ni kilai koya vinaka o Alonso, ia e dau taleitaka ni sarava tu na kena itaba. A qai mate talega o tamana.
Sa tiko oqo o Alonso vata kei Abuela, na buna. E sa dau vakavulici koya tu me baleta na nona lotu, Na Lotu i Jisu Karisito ni Yalododonu Edaidai. E sa na papitaiso ka vakadeitaki o koya ena yabaki ka tarava, ni sa qase cake.
Qai taura cake o Sisita Rojas na yaloyalo ni dua na vale vulavula. “E dua tale na isolisoli vakamareqeti i Jisu oya na valetabu. Oqo e dua na valetabu eke e Chile.”
A vakaraica o Alonso na ivakatakarakara koula ena delavuvu ni vale. E sa totoka dina! A vakananuma o koya na ka e yaco e loma.
“Na valetabu sa vanua era vauci tawamudu vata kina na matavuvale,” a kaya o Sisita Rojas. “Oqo na valetabu e Santiago au a vauci kina vei rau na noqu itubutubu ni keitou sa lewena na Lotu. Ena vuku ni veivauci oqo, au na rawa ni tiko vata kei rau ni sa oti na bula oqo.”
A kurabui o Alonso ni sa rogoca ya. “E rawa li ni’u vauci kivei rau na noqu itubutubu?” a taroga o koya. “E dina ga ni rau sa mate oti?”
A deguvacu o Sisita Rojas. “Io! Oya e dua na vuna era sa ka bibi kina na valetabu. Era vakalougatataka kece na lewe ni noda matavuvale, oka kina o ira ka sa mate.”
Ena vo ni siga oya, a vakasamataka tikoga o Alonso na valetabu. A kerei Abuela me vakatavulici koya vakalevu cake. A tukuna o koya me baleta na isulu vulavula era tokara na tamata e loma kei na droini totoka ena veilalaga.
“Kena usutu levu duadua, sai koya na vanua o rawa ni vauci kina vei rau na nomu itubutubu,” a kaya o Abuela. “Eda na kerea e rua na tamata mai na tabanalevu me matataki rau ena gauna ni veivauci.”
“Rawa ni tou gole nimataka?” A taroga o Alonso. “Au sa via tiko vakaoti kei Ta kei Na!”
A matadredredre o Abuela. “Au marau ni o sa via lako,” kaya o koya. “Ia na valetabu voleka duadua e tiko mai Concepción. E sega ni rauta na nodaru ilavo me baleta na tikite ni basi.”
“Au na veivuke ni mamaroroi ena vuku ni lakolako!” A kaya o Alonso.
Mai na gauna oya, ni dau kunea o Alonso e dua na ilavo e gaunisala se rawata mai eso na ilavo, e sauma o koya na ikatini ka qai vakuria na ivovo ki na nodrau ilavo ni valetabu.
Ni oti na vula eso ni mamaroroi, sa yaco me veirauti na ilavo me gole kina o Alonso kei Abuela ki na valetabu. Rau a kerei Baraca kei Sisita Silva me lako vata kei rau. Ena siga ni lakolako, rau a vodo basi vakabalavu ki na siti o Concepción. E a via dromu toka na siga ni sa raica vakayawa rawa o Alonso e dua na ka koula.
“Au sa rawa ni raica na agilosi o Moronai!” A kaya o Alonso, ni dusia tu na ivakatakarakara ena delavuvu karakarawa ni valetabu.
Rau a moce ena dua na itikotiko vakarautaki tikiva tu na valetabu. Ena mataka, sa curu o Alonso ki na ki loma ni valetabu ena matai ni gauna. A raica o koya e loma e dua na yaloyalo levu kei Jisu. A vakaisulu vulavula o Alonso kei Abuela. A yalomarau ka vakacegu o koya.
Ni sa yaco mai na gauna ni veivauci, a curuma o Alonso e dua na rumu totoka e iloilo tu na kena lalaga. A vakaraitaka e dua na dauveiqaravi ena valetabu vei Alonso, Abuela, kei rau na Silva na ivakarau ni tekiduru wavolita na teveli vakasakiti e vakatokai na icabocabo ni soro. E a tabonaki tu ena dua na isulu malumu.
A tiko ekea o Baraca kei Sisita Silva ena vukudrau na itubutubu i Alonso. O Abuela e tiko ekea ena vuku ni ganena ka a mate ni se bera ni sucu o Alonso.
Ni bobo tu, a raitayaloyalotaka vakataucoko o Alonso na nona matavuvale.
Au sa sega ni rawa ni wawa ni raici ira tale, e vakananuma o Alonso. Au vakavinavinakataka ni sa rawa ni tiko deivaki vata tu na matavuvale. ●
Veidusimaki mai vei Mark Jarman