Vaqaqacotaka na Nomu Vakabauta ena Matai ni Raivotu

Mai vei Elder Neil L. Andersen

Ena Kuoramu ni iApositolo Le Tinikarua

Sa noqu masu ni ko na muria na ivakarau ni masu i Josefa, vulica na dina a vulica, ka vakaqaqacotaka na nomu vakabauta na Tamamu Vakalomalagi kei na Luvena, o Jisu Karisito.

iVakatakilakila

Teenaged Elder Anderson shares his beliefs with friends Illustration of Elder Neil Anderson when he was 16 years old at a conference he traveled to the east coast to attend. He is in a informal group of people and he is explaining his beliefs to the group.

Ni’u yabaki 16 tu, au a lako mai na noqu itikotiko e Idaho ki na dua na koniferedi ena Tokalau ni Baravi kei Amerika, ka lewena na itabagone mai na 50 taucoko na yasana ka volekata e 40 na matanitu. Ni bera oya, au a sega ni bau sotava e dua na ituvaki me vakatakilai kina na noqu vakabauta kei na veidinadinati.

Dua na yakavi ena soqoni vakailawalawa, a yaco e dua na veivosaki me baleta na nodra vakabauta kei na valavala eso na Lotu i Jisu Karisito ni Yalododonu Edaidai. Era a vuki vakasauri kivei au e dua na ilawalawa levu na gonevuli ka tekivu vakatataro, ka so vei ira e malewa tu ki na noda vakabauta.

Era vakidacalataki au saraga. Ia ni oti vakalailai noqu kidava, au sa tekivu wasea eso na yavu ni vakavuvuli ni kosipeli. Au vakamacalataka ni tiko e dua na Tamada Vakalomalagi, ni da sa Luvena tagane kei na yalewa, ka da sa tiko e vuravura me taraicake na vakabauti Jisu Karisito ka vakadinadinataki keda ena digitaki ni ka vinaka mai na ka ca.

Na wasei ni veivakavuvuli oqo a muataki au ki na ivakadinadina i Josefa Simici. Era a sega ni tarogi Josefa Simici na vo ni gonevuli, ia au sa goleva ga na itekitekivu ni vuna au vakabauta kina na ka au sa vakabauta. Ni’u sa tukuna na rairai ni Tamada kei na Luvena ena Veikau Tabu, era sa vakanomodi kece vakasauri. E dua na yalo veimositi ni vakatatabu a curuma na rumu, ka dua na yalo levu ni kaukauwa vakayalo a tarai au kei na noqu vosa.

Ni oti oya, e vakavinavinakataki au e vica na gonevuli ena kaukauwa na noqu veidinadinati. Eso e vakataroga e levu tale na itukutuku me baleta na Lotu. Ni’u lesu ki na noqu rumu ena bogi oya, au vakila ni o koya na tamata ka tarai koya vakalevu sara na ka e sotavi oqo o au. Au sa vakila vakataki au na kaukauwa ni wasei ni ivakadinadina me baleta na Kalou na Tamada, Jisu Karisito, kei na Matai ni Raivotu.

Mai na ka e sotavi oya sivia e 50 na yabaki sa oti, au sa vakadinadinataka ena drau na gauna na Tamada, na Luvena, kei na parofita o Josefa Simici. Ena veika e sotavi oqo, au sa dau vakila tu na vakadinadina veivakadeitaki ni Yalo Tabu.

Au na via wasea e lima na ivakavuvuli au sa vulica mai na noqu kila dei tu vakayalo na Matai ni Raivotu. Na veivakavuvuli oqo sa vaqaqacotaka na noqu vakabauta kei na noqu gagadre ni muria na Tamada Vakalomalagi kei na Luvena Daulomani. Au nuitaka ni na vaqaqacotaki iko talega.

iVakatakilakila

An illustration of the First Vision

1. Na Tamada, na Luvena, kei na Yalo Tabu sa Ratou Tamata Duidui

Ena vica vata na senijiuri, era a veivosakitaka na kenadau vakalotu kei na daunivuku na ituvaki ni Kalou na Tamada, o Jisu Karisito, kei na Yalo Tabu. Vuqa e vakabauta ni Ratou sa dua ga na tamata. Ena vuku ni ka a sotava o Josefa ena Veikau Tabu ena 200 na yabaki sa oti, eda sa kila deivaki tu na ituvaki ni Kalou.

Matai saraga, sa bula o Koya! Karua, na Tamada kei na Luvena sa rua na tamata duidui, lagilagi, vakaturi cake, ka sa dui vakasakiti. Emuri, a vulica o Josefa “na Yalo Tabu sa sega ni vakalewena se vakasuina na yagona, raica sa yalo ga ka sa vaka na ibulibuli ni tamata. Kevaka me sega ni vakakina, ena sega ni rawa ni mai tiko e lomada na Yalo Tabu” (Vunau kei na Veiyalayalati 130:22).

2. Eda sa Luvena Tagane kei na Yalewa na Kalou.

Mai na Matai ni Raivotu kei na veika tale eso, a vulica na Parofita o Josefa Simici ni Kalou e sega ni mai dua na kaukauwa vakatani ka bulia na vuravura kei ira na lewena ka qai guilecavi ira tu. Na ka dina, o keda yadua sa “luvena yalewa [se tagane] daulomani na noda itubutubu vakalomalagi.”¹

E tukuna na ivakaro ki na matavuvale: “Na tamata kece sara—na tagane kei na yalewa—era sa buli me ra ucuya na Kalou. O keda yadua sa luvena tagane se yalewa daulomani na noda itubutubu vakalomalagi, ka sa tiko na noda dui inaki vakalou kei na icavacava.”² Sa cauraka vakamatata na Tamada na icavacava oya: “Oqo na noqu cakacaka kei na noqu lagilagi—me’u vakavuna na tawa mate rawa kei na bula tawamudu ni tamata” (Mosese 1:39).

Na keda ivakatakilakila sa tiko vua na Kalou, ka da sa tiko oqo e vuravura meda vakataki koya vakalevu cake. Na kilai vakamatata oqo ni Matai ni Raivotu sa vakatarai au ni’u se cauravou ni kila ni sa tiko e dua na Tamaqu Vakalomalagi ka lomani au ka vinakata tu me’u lesu Vua.

3. Sa Rawa ni Da Vosoti ena Noda iValavala Ca

Dua na kauwai bibi i Josefa oya me vosoti ena nona ivalavala ca. Ena dua na itukutuku ni Matai ni Raivotu, a tukuna na vosa oqo na Turaga kivua na gone dauvakasaqara na dina: “Josefa, na luvequ, sa bokoci na nomu valavala ca. Lako ena nomu sala, tiko ena noqu lawa, ka muria na noqu vunau. Raica, koi au na Turaga ni lagilagi. Au a vakamatei ena vuku i vuravura, me rawata na bula tawamudu o ira ka vakabauta na yacaqu.”³

A vulica o Josefa mai na Veisorovaki i Jisu Karisito, ni sa rawa ni vosoti na nona ivalavala ca ka yaco me savasava sara ena mata ni Kalou. E sa dei na nona kila ni sa taura ki Vua o Jisu Karisito na ivalavala ca kei na icolacola ni tamata kecega ka sa bula tu ka na mai bula e vuravura.

Mai na Matai ni Raivotu, eda vulica ena vuku ni loloma soliwale ni noda iVakabula, o Jisu Karisito, sa rawa talega ni vosoti na noda ivalavala ca ka duri savasava tu ena dua na siga ena mata ni Tamada.

Sa Dau Rogoca ka Sauma na Tamada Vakalomalagi na Noda Masu

Ena loma ni veikau na siga oya ena 1820, a vulica o Josefa ni sa dau rogoca ka sauma na Tamada Vakalomalagi na masu. E muri, a kaya o Josefa, “Au sa vakadinata ena vu ni yaloqu taucoko ni na vakatakilai vakaidina vei au me vaka na raivotu au a raica e liu” (Josefa Simici—Ai Tukutuku 1:29). Sa vakavulici keda na nona ivakaraitaki ni sa rawa meda torova na Tamada Vakalomalagi ena masumasu meda ciqoma kina na kena isau.

A vakayacora veitaravi o Josefa na iwalewale ni masu oqo. A yalodei o koya ni na rogoci koya na Turaga ka sauma na nona masu. A masulaka o koya na veika o sa rairai masulaka tu.

A masulaka o koya na vuku (raica na Josefa Simici—Ai Tukutuku 1:12–13).

A masulaka o koya na veipapitaisotaki (raica na Josefa Simici—Ai Tukutuku 1: 68).

A masulaka o koya na veisereki (raica na Vunau kei na Veiyalayalati 121:1–4).

A masulaki ira na daukaulotu o koya (raica na Vunau kei na Veiyalayalati 109:22).

A masulaka o koya na Lotu, ira na lewena, kei ira na iliuliu (raica na Vunau kei na Veiyalayalati 109:71–76).

Ka masulaka o koya na nona matavuvale (raica na Vunau kei na Veiyalayalati 109:68–69).

Oqo sa dua na iwalewale vei keda. Sa vakaraitaka vei keda o Josefa ni sa rawa meda lako taucoko vua na Tamada ena masumasu.

5. Sa Kilai Keda Vinaka na Tamada kei na Luvena

Mai na Matai ni Raivotu, eda vulica ni rau sa kilai keda vinaka na Tamata vakasilesitieli oqo, me vaka rau sa kilai Josefa. Na Tamada a kacivi Josefa ena yacana ka, “dusi koya na kena ikarua,” kaya, “Oqo na Luvequ Lomani. Mo Rogoci Koya!”(Josefa Simici—Ai Tukutuku 1:17).

Na Tamada kei na Luvena sa kila tu na gagadre i Josefa, lomaleqa, kei na sasaga, me vaka ga Rau sa kila na noda. Rau sa kila talega na noda rawaka kei na rarawa.

Ni’u se cauravou, au a masulaka e vuqa na ka. Ni’u railesuva tu oqo, sa vaka mera sega ni bibi na veika oya. Ia era a bibi tu vei au ena gauna oya, ka’u yalomatuataka ni’u se gone ni sa tiko e dua na Tamaqu mai Lomalagi ka dau rogoci au. Au sega ni dau ciqoma kusarawa e dua na kena isau, ia au vakila ni na doka o Koya na noqu kerekere ena sala e sa dodonu vei au ena Nona gauna kei na Nona sala Vakai Koya.

Yalodei tu ka nuitaka ni na vosa vei iko na Kalou. Vakabauta na nanuma eso oya e basika titobu ki na vu ni yalomu. Au sa vakadinata tu na masumasu ka kila vakavinaka na kena kaukauwa baleta au sa kila na veika a sotava na Parofita o Josefa Simici. Au kila ni sa kila na Kalou na yacaqu ka na sauma vei au o Koya, me vaka ga sa kila na yacamu o Koya ka na sauma vei iko.

iVakadinadina

Ena vuqa na gauna ni 68 na yabaki au bula tu kina e vuravura, au sa vakatovolea kina na iwalewale ni masumasu i Josefa. Me vakataki ira kece na tisaipeli yalodina ni iVakabula, au talega sa ciqoma na sausaumi mai lomalagi. Au kila ni sa Karisito o Jisu. Sai Koya na Luve ni Kalou. A sa tucake tale o Koya ka bula tiko nikua. Sa Nona na kaukauwa me vosota na noda valavala ca. Mai na noda vakabauta, talairawarawa, kei na veivutuni, sa rawa Vua me taqomaka na ilakolako lesu ki na noda itikotiko vakalomalagi.

Me vaka e dua na iApositolo ni Turaga o Jisu Karisito ka Nona vakadinadina tabaki, au vakadinadinataka ena yalodei kei na veidinadinati e vakadeitaka na Yalo Tabu ni a rairai na Tamada kei na Luvena vei Josefa Simici ena Veikau Tabu. Sa noqu masu ni ko na muria na iwalewale ni masu i Josefa, vulica na dina eso e vulica, ka vakaqaqacotaka na nomu vakabauta na Tamamu Vakalomalagi kei na Luvena, o Jisu Karisito.

Droini mai vei David Malan

Droini mai vei Kendall Ray Johnson