E vakadewataka vakacava o Josefa Simici na iVola i Momani?
Ni bera ni vunitaki na peleti koula, a vola ena tabana ni ulutaga ni ivola o Moronai, na iotioti ni parofita ni iVola i Momani ni na vakadewataki na ivola “ena isolisoli kei na kaukauwa ni Kalou.” Oqo sa ivakamacala vinaka duadua tu ni vakadewa ni iVola i Momani.
A cavuta o Josefa Simici na vosa eso ni vakadewa vei ira na vunivola, vakabibi o Oliver Cowdery. Baleta ni a vakadewataka tiko o Josefa e dua na vosa tawakilai vakaoti, sa gadrevi vua me vakararavi vua na Turaga. Dua na sala a veivuke kina na Turaga oya na vakarautaki ni yaya ni cakacaka eso me vukei Josefa ena vakavakadewa. Era kaya na vakadinadina ni a rai o Josefa ki na loma ni yaya ka ra sa basika vaka-Valagi kivua na vosa eso. Na veiyaya ni vakadewa e oka kina na “ivakavakadewa” se na “Urimi kei na Cumimi”—e rua na vatu matalia ka qasoti ena dua na iubi kaukamea me rawa kina vei Josefa me rai curumi ira. Oqo era a soli vei Josefa vata kei na peleti. Dua tale na yaya a vakayagataka o Josefa oya na “vatu ni daurairai” me na rai kina o koya, ena kena dau biu ena isala. A kunea vakailiu o Josefa na vatu oqo ka sa dau vakayagataka me raica kina na veika vuni se yali. A vakayagataka ruarua na ivakavakadewa kei na vatu ni daurairai ena nona vakavakadewa, ka vakararavi tu ga ki na veivakauqeti mai lagi.
E sa veivakurabuitaki vakaidina na vakadewataki ni iVola i Momani ka sa caka “mai na isolisoli kei na kaukauwa ni Kalou.”