Sa Vakalesuimai na Lotu i Jisu Karisito!
Ni bera noda lako mai ki vuravura, eda a bula vata tu kei na noda iTubutubu Vakalomalagi. Rau sa lomani keda! A tiko vua na Tamada Vakalomalagi e dua na ituvatuva totoka me baleti keda. Eda na lako mai ki vuravura meda mai vakayago ka vuli ka tubu. Eda na qai rawa ni lesu ka laki bula ena noda itikotiko vakalomalagi. Ia eda sega ni rawa ni cakava vakai keda. Eda na gadreva na veivuke.
A digitaka na Tamada Vakalomalagi na tuakada, o Jisu Karisito, me lako mai ki vuravura me vukei keda. Sa vakaraitaka vei keda o Jisu na sala mera lomani kina na tani ka muria na ivunau ni Tamada Vakalomalagi. Sa digitaka o Koya na iApositolo mera liutaka na Nona Lotu.
A qai vakararawataki o Jisu ena vukuda ena Were o Kecisemani. A vakila o Koya na noda mosi kei na rarawa kecega. A mate o Koya ena vukuda ena kauveilatai. Ena vuku ni ka oqo, sa rawa ni da gole Vua ni da mosi se rarawa se gadreva tu na veivuke. Sa rawa me da veivutuni ni da caka cala.
Enai katolu ni siga ni oti na mate i Jisu, a tucake tale o Koya. Sa bula tale o Jisu! Ena vuku ni ka oqo, eda na tucaketale. Eda na lai bula tale mai lomalagi ena gauna eda sa takali kina.
Ni oti na Nona Tucaketale, a sikovi ira na Nona tisaipeli o Jisu e Jerusalemi kei na vanua vaka-Amerika. A kerei ira na Nona iApositolo me ra vakavulici ira tikoga na tamata ena Nona kosipeli. E vuqa na tamata ka rogoci ira na iApositolo sa ra papitaiso ka lewena na Lotu.
Ni ra sa mate na iApositolo, sa ra tekivu guilecava na tamata eso na tiki bibi ni kosipeli i Jisu. Era sa sega ni vakabauta ni na vakauqeti ira tikoga na Luvena na Tamada Vakalomalagi e vuravura. Era sa guilecava ni sa tiko na gauna era na rawa ni papitaiso kece kina na tamata e vuravura. Era sa sega ni vakabauta ni ra na dau liutaka tikoga na Lotu na parofita kei na iapositolo.
Sa sivi e vuqa na yabaki. Me itinitini, sa kena gauna me kau lesu mai kina na veitiki ni kosipeli i Jisu ka yali tu. Sa kena gauna me vakalesui mai na Nona Lotu! Sa gadreva tu na Tamada Vakalomalagi e dua me parofita me vukea na kena vakau lesu mai ki vuravura. A digitaka o Koya e dua na gonetagane yacana o Josefa Simici.
Dua na siga, a wili Vola Tabu voli o Josefa. Ena Jemesa 1:5, e tukuni ni na sauma na Tamada Vakalomalagi na noda vakatataro ni da kerea ena vakabauta. A tiko vei Josefa e dua na taro! A kila tu o koya ni ra vakatavulici Jisu voli e vuqa na matalotu. Ia a vinakata o koya me vaqaqa ke tiko e dua vaka na Lotu i Jisu ena Veiyalayalati Vou.
Ena dua na siga totoka ni vulaitubutubu donuya na gauna ni Siganimate, a gole o Josefa ki na veikau volekata na nona itikotiko. A tekiduru o koya ka tekivu masu. Qai vakila o Josefa e dua na yalo butobuto. A saga tiko o Setani me vakayalolailaitaki koya. Ia a masu tikoga o Josefa ena nona igu taucoko.
A qai basika mai e dua na rarama totoka. Sa raica o Josefa na Tamada Vakalomalagi kei Jisu Karisito. Sa vakatokai oqo na iMatai ni Raivotu. Rau a kaya ni sega ni tiko e vuravura na Lotu i Jisu. Ia e sa voleka. Sa vakatekivutaki na Veivakalesuimai!
Sa talai ira na agilosi na Tamada Vakalomalagi me ra vakalesuya mai na veitiki bibi ni kosipeli. A solia na agilosi o Moronai vei Josefa na peleti koula me da rawata kina na iVola i Momani me vukea na noda vulici Jisu Karisito.
A vakalesuya mai na Matabete i Eroni o Joni na Dauveipapitaisotaki me rawa kina ni da papitaiso. A vakalesuya mai o Pita, Jemesa, kei Joni na Matabete i Melikiseteki me rawa kina ni da ciqoma na Yalo Tabu ka vakalougatataki tu ni da sa tauvimate.
A lako mai o Ilaija me rawa kina ni da vauci ki na noda matavuvale ena valetabu.
E sa tauyavutaki Na Lotu i Jisu Karisito ni Yalododonu Edaidai. Sa kena ibalebale ni sa tiko tale e vuravura na Lotu i Jisu! Na veika kece oqo sa tiki ni Veivakalesuimai.
Na vakalesui mai ni kosipeli e selako tikoga nikua. Ira na Parofita, iApositolo, ira na daukaulotu, kei ira na lewenilotu era wasea tiko na itukutuku vinaka i Jisu Karisito e vuravura taucoko. Sa tara na valetabu ena vuqa na vanua me rawa ni ra vauci vakaoti kina na tamata ki na nodra matavuvale. Ka sa veivuke tiko na Lotu vei ira na tamata ena vanua duidui e sotavi kina na lauqa se leqa tubukoso.
Na tamata kecega sa rawa ni cakava e dua na ka me vukea na Veivakalesuimai. O rawa ni veivuke ni vulica na nomu tuva kawa ka vakayaco papitaiso ena valetabu. O rawa ni soli ikatini me tara kina na valenilotu kei na valetabu. O rawa ni solia na isolisoli ni lolo me ra vukei kina na vakaleqai tu. O rawa ni tukuni Jisu Karisito vei ira na tamata.
A solia vei keda o Jisu na nona Lotu me vukei keda meda lesu vei rau na noda itikotiko vakalomalagi. Eda rawa ni da vakayagataka na sakaramede ka dau nanuma tikoga na ka sa cakava vei keda o Koya. Eda rawa ni vakaraitaka na loloma vei ira na tani, me vakataki Koya? Eda rawa ni vukea na tamata kecega ni vulica na Nona kosipeli! ●
Droini mai vei Apryl Stott