Lako Mai, Mo Muri Au: iVola i Momani
Na Cava na iBalebale ni Siganimate Vei Au?
30 ni Maji–12 ni Epereli Siganimate
Ena Siganimate, eda marautaka na “siga bibi duadua ena itukutuku ni veigauna”1—na tucake tale ni noda iVakabula o Jisu Karisito. Na ka oqori na iusutu ena ituvatuva ni marau nei Tamada Vakalomalagi.
Ena bula taumada, a digitaki ko Jisu Karisito me noda iVakabula. A yalataka o Koya me vakarautaka na sala vei keda meda vosoti ena noda ivalavala ca ka lesu tale ki na noda itikotiko vakalomalagi.
Ena mataka ni imatai ni Siganimate o ya, a vakayacora ko Jisu na nona yalayala. A vakadrukai mate. Sa yaco kina o Koya me “rarama kei na bula kei vuravura; io, na rarama sa tawacava, ka sega ni vakabutobutotaki rawa; io, kei na bula talega sa tawacava, ni sa sega tale na mate” (Mosaia 16:9).
Na veivakalougatataki cava soti e kauta mai vei iko na Tucake tale?
Veivutuni
Sa taroga kina vei keda yadua ko Jisu: “Ko ni na sega li ni lesu mai vei au, ka veivutunitaka na nomuni ivalavala ca, ka saumaki mai, meu vakabulai kemudou?” Sa yalataka kina ko Koya, “Ko koya yadua sa lako mai, au na ciqomi koya” (3 Nifai 9:13–14). Na cava o vakila ni o veivutuni?
Tucaketale
Ena sega ni tarovi rawa o mate, ia e vakadeitaka na nona vakadrukai mate na iVakabula ni da na tucake kece tale mai na mate—vakaduavatataki tale na yago kei na yalo ena ituvaki uasivi sara (raica Alama 11:43). E kauta mai vakacava vei iko na inuinui na nomu kila na Tucake tale mai na mate?
Bula Tawamudu
Na Veisorovaki ni iVakabula ena rawa kina na bula tawamudu, se na bula vakacerecerei. Me ciqomi na veivakalougatataki oqo, sa dodonu me da talairawarawa ki na ivakaro. E vakatoka o Peresitedi Russell M. Nelson na sala ki na bula tawamudu “na salatu ni veiyalayalati.”2 Na cava e dodonu me da cakava me da muria kina na salatu oqo ki na bula tawamudu?