Talei Vakalevu Cake mai na iTaube Siliva
Sylvie Houmeau
Quebec, Kenada
Droini mai vei Emily Lui
Niu kerei meu liutaka e dua na veivosaki ena iSoqosoqo ni Veivukei ena nona veisureti na iVakabula me da vakania na Nona sipi, au nanuma ni kevaka au gadreva mera vakauqeti na marama, e dodonu meu cakava mada e dua na ka me baleta e dua vei ira na Nona sipi.
Au soqona na noqu yalodei ka sureta e dua na marama luluqa vakalotu me keirau lako vata ki na itaviqaravi ni iSoqosoqo ni Veivukei. A ciqoma na noqu veisureti ka keirau sotava e dua na gauna marautaki. Au vakila ni oqo e dua na ivakaraitaki vinaka, au sa maqusa sara meu wasea na veika au sotava. Ia e levu cake na ka e tu vua na Turaga me vakavulica vei au.
Ena dua na mataka niu vakaisulu tiko, au qai kila ni sa yali na noqu itaube siliva. A soli vei au na itaube oqo me iloloma ni siganisucu niu veisiko voli e Varanise, o koya e vakaibalebale kina vakalevu vei au. Sa tekivu meu vaqara ena veivanua au nanuma ni rawa ni tu kina, ia au sega ni rawa ni raica. Au qai tukuna vei au ni kevaka au masulaka ga, ena rawa ni totolo na noqu raica na noqu itaube.
Niu masu oti, au a vaqaqara ena veivanua kece. Ena rua na siga, au a masulaka vagumatua ka vakasaqara vakaukauwa. Au vakatakekere vua na Tamada Vakalomalagi me vukei au meu kunea, ia au se sega ga ni rawa ni raica. E bibi na lomaqu baleta ni sa ka talei sara vei au na itaube oqo.
Ena dua na bogi a masu vata kei au ena noqu yasa ni imocemoce na luvequ tagane. Ni oti na masu, a tomika e dua na ka, ka solia mai vei au. Na noqu itaube. A raica ena ruku ni loga. Au a sega beka ni raica ena noqu vaqaqara. Au tagi ena reki ni sa tiko tale vei au.
Vakasauri, e yaco mai vei au e dua na ivakatakilakila: “O dau masu beka vagumatua ena vukudra na marama ena Lotu me vakataka nomu masulaka nomu itaube? Era sa ka talei beka vei iko me vaka na nomu itaube? Vakacava o ira na marama ena taudaku ni Lotu? O dau masulaki ira talega?”
Niu wasea na veika au sotava me baleta noqu itaube a yali ena iSoqosoqo ni Veivukei, sa dua na veivosaki totoka. Au tukuna vei ira na marama ni kerei keda na iVakabula me da vakania na Nona sipi, e dodonu me da nanuma tiko, ni “sa ka talei ena mata ni Kalou na yalo ni tamata” (Vunau kei na Veiyalayalati 18:10). E vinakata o Koya me ra dau nanumi, lomani, kauwaitaki, ka masulaki ena noda igu taucoko o ira era wavoliti keda. Ni da vakayacora vakakina, eda na kunea ni tamata kece e talei vakalevu cake mai na itaube siliva.