Dua na Tekisi, Gonevuli Tagane, kei na iSau ni Masu
Na dauvolaivola e vakaitikotiko e Rivers State, Nigeria.
Keirau a vakauqeti ni na kune o koya, ia cava na vuna e sega ni yaco tiko kina?
Dua na siga a soli vei au kei na noqu itokani vakaulotu e dua idusidusi me keirau vakavulica e dua na turaga ka vakaitikotiko ena koro o Tema, volekata na siti totoka o Accra, Ghana. A sega ni matata sara na kena dau nabataki na vale ena koro oya, ka sa volai ga e dua na kena ivakamacala me vukea na neirau kunea na vale oya.
Ni keirau yaco yani ki na koro, keirau a muria na ivakasala ia e sega ni kune na turaga oya baleta ni via veisotari vata tu ga na ivakamacala ni vuqa na vale. Ena yalo veilecayaki, keirau sa navuca ni tukituki ena veikatuba ekea me tarogi, ia e sega ni dua e bau kila tu na turaga keirau vaqara tiko. Au a qai vakauqeti me’u kere veivuke vua na Tamada Vakalomalagi.
Ni keirau masu oti, au a vakila ni keirau na raica na turaga keirau vaqara tiko, ka tomana yani na neirau sasaga. Ia, keirau sega ga ni raici koya. Keirau sa oca tu ka navuca me keirau vakasuka ki na wasewase ni neirau veivakalotutaki ni tiko tale eso me keirau raica. Ni keirau yaco ki na yasana ni tekisi, sa raica na draiva ni tekisi ka kauti keirau ki na koro na irairai druka ni matai keirau ka taroga ke sa kune o koya keirau a vaqara tiko. Keirau a sauma, e sega saraga.
A vakatura o koya me keitou curuma e dua na koronivuli e toka kea ka taro kina. Keirau tukuna vua ni sega ni oya na ivakamacala e soli vei keirau, ia a cikeva ga o koya. Keirau curu mai tuba ena tekisi ka gole ki na koronivuli—sega ni keirau nanuma ni na kune kina e dua, ia me vakalomavinakataka ga na neirau itokani kauwai.
Ni keirau sa tekivu goleva yani na valenivolavola ni koronivuli, a cici mai vei keirau e dua na gonetagane lailai. A dredre o koya ka tukuna vei keirau ni sai koya duadua ga kei tacina na lewe ni Lotu i Jisu Karisito ni Yalododonu Edaidai ka vakaitikotiko ena wasewase oya ka sa rawa ni vukei keirau.
Keirau a veiraici vakaitokani ena yalo tawavakabauta. A sa ka veivakurabuitaki. A vukei keirau na gonetagane ni kunea na turaga keirau a vaqara tiko, ka mani ciqoma sara o koya na kosipeli ka papitaiso.
Sa vakavulica vei au na ka e sotavi oqo ni sa dau sauma na masu na Tamada Vakalomalagi ena Nona gauna kei na Nona sala vakataki Koya. Ni sega ni ciqomi vakatotolo na isau ni noda masu, sa rawa ni da cakacakataka na noda vakabauti Koya ka vulica meda dau vosota.
Droini mai vei Corey Egbert