Vakavinakataki Cake na Veika Eda Sotava ena Valetabu

Mai na Mataveiliutaki Taumada

“Na vatutalei ulu ni Veivakalesui mai sai koya na valetabu. Na kena veicakacaka vakalotu tabu kei na veiyalayalati era sa itakele ni nodra vakarautaki na tamata era sa vakarau tu me ra kidavaka na iVakabula ena iKarua ni Nona Lako Mai.”¹

Ena veigauna e so, eratou sa dau vakamoica na Mataveiliutaki Taumada na veisoqoni tabu ni valetabu kei na kena iwalewale me vinaka cake na veika era sotava kina na lewenilotu ka vukei ira kece era curuma me ra vakila ni ra semati vakavoleka cake vua na Kalou ena loma ni veivanua tabu oqo.

Me tiki ni veika e sotavi ena valetabu, era dau tokara na lewenilotu na isulu ni soqoni ka vakaibalebale vakaivunau kei na ivakatakarakara ka na semati lesu ki na sokalou ni valetabu ena Veiyalayalati Makawa (raica na Vunau ni Soro 8 kei na Lako Yani 28).

Sa na yaco tiko eso na veisau ki na isulu ni soqoni tabu ni valetabu. Na veisau oqo e sega ni tukuna na veisau ena ivakatakarakara ni valetabu se na ivunau ia na kedra inaki me vakarawarawataki, logaloga vinaka, ka rawa ni rawati, ena kena vakarawarawataki na kena daramaki, qarauni, ka voli.

Eso na veisau oqo e oka kina:

Vakarawarawataki na icakacaka ni iubi kei na icurucuru balavu.
Kau laivi na palasitika mai na isala kei na wa mai na isala kei na iubi.
Vakayagataki e dua na isulu bula dede me tautauvata ena icurucuru balavu, isala, kei na ioro, me rawa ni dede na kena vakayagataki ka rawarawa na kena qarauni.

Keitou nuitaka ni na veivuke na veisau oqo me vinaka cake na gauna bibi oqo ni o vakayacora me tiki ni nomu bula na sokalou e veigauna ena valetabu.

iSau ni Taro dau Tarogi Wasoma

E rawa beka niu vakayagataka tikoga na isulu ni soqoni tabu sa tu rawa vei au?

Io. Se rawa tikoga ni vakayagataki na kena mataqali e liu me yacova na gauna sa dodonu me vakaisosomitaki.

Meu na biuta laivi vakacava na isulu ni soqoni tabu makawa?

“Me vakarusai na isulu ni soqonitabu ni valetabu sa makawa, sa dodonu me kotikotilaki me kakua ni kilai na kena ivakavakayagataki taumada” (iVoladusidusi 2: Veiliutaki ena Lotu [2010], 21.1.42).

Au rawa ni veisautaka noqu isulu sa tu rawa me tiko kina na veisau vou?

Io. Eso tale na itukutuku me baleta na kena ivakarau e rawa ni kunei ena store.ChurchofJesusChrist.org/ceremonialclothing ni o curuma ena nomu akaude ni lewenilotu se ena nomu sikova na Sitoa ni Lotu ka taroga vua e dua na kena vakailesilesi.

E rawa beka niu solia na isulu makawa ni soqoni tabu?

Ena kena gauna donu, e rawa ni o solia na isulu vakayagataki vakalailai vei ira na lewe ni matavuvale se o ira na itokani sa edaumeni oti. Ia, na isulu ni soqoni, se cava ga na kena ituvaki, me kakua ni soli ki na dua tale na valetabu, Deseret Industries, se ena dua tale na vanua ni veisau isulu.

Au na rawata vakacava na isulu vou?

Me baleta na ivakamacala ni kena isau kei na kena sa tu ena nomu iwasewase, lako ki na store.ChurchofJesusChrist.org/ceremonialclothing se sikova na Sitoa ni Lotu.