Rawati Noqu Vakabauta ena iKalawa Vakayadua
Na rawati ni dua na ivakadinadina e vagauna. E wasoma na kena dau vakasotara vata na veika lalai.
Dua na gauna veivakurabuitaki ena noqu bula a yaco ni’u se qai yabaki 10 ena noqu a vulica tu me rua na macawa na ivunau va-Katolika ena Loreto Roman Catholic Mission, rauta ni 20 na maile (32 na kilomita) mai na noqu itikotiko vagalala e Silobela, Zimbabwe. Au sa mai kila tu ka lomana na iVakabula o Jisu Karisito ka dau dagava na Turaga ena veilesoni kei na sasaga taumada oqo.
Ni’u a tiko ena valenilotu ni Katolika, au raica kina na droini ni vakaraitaki eso mai na bula ni iVakabula e kabi tu e lalaga: ivakaraitaki ni sucu i Jisu Karisito, veivakavulici ena valetabu, masu tu ena Were o Kecisemani, colati ni kauveilatai ki Kalivari, vakamatei tu e Kolikoca, kei na Nona Tucaketale. E vakararawataki au saraga ga na raici ni vako kei na wa vakavotona oya. Ena gauna au yacova kina na droini ni nona Vakamatei, sa tonawanawa ga na mataqu. Ka’u na tagicaka ka kaya tu, “Isa, sa vakararawataki vakaidina o Koya, ena vukuqu.”
Ena soqoni ni veivakadeitaki, a raici au vakadodonu e dua vei ira na bete ka kaya, “O iko na rarama kei vuravura” (raica na Maciu 5:14). Qai, dusia tu e dua na kadrala waqa, a cavuta na vosa ni iVakabula: “Me caudre vakakina na nomudou rarama e matadra na tamata, mera raica na nomudou ivalavala vinaka, ka vakarokorokotaka na Tamamudou sa tiko mai Lomalagi” (Maciu 5:16).
Ni’u vulica vakalevu tu na veika e baleti Jisu, au sa tekivu vinakata mai ni qaravi ira na tani. Me ivakaraitaki, e lima na maile (8 na kilomita) na yawa ni neimami koro mai na vanua me keimami laki kau wai mai kina. Dau wasoma, nodra colata tu na marama ena koro, oka kina na tinaqu, e dua na itawatawa 20 na lita ena uludra ka sinai ena wai. Ni oti na ka au sotava ena semineri ni Katolika, au dau biliga e dua na itawatawa 200 na lita na wai me vukea na tinaqu, ka’u vukea talega e rua na yada ka tiko volekati keitou. Au nanuma tu na lomavinaka au dau vakila ena veigauna kece au vukei ira na tani.
Sa vukei au na veika e sotavi oqo ena taraicake ni noqu vakabauta na Tamada Vakalomalagi kei Jisu Karisito ka sa vakarautaki au tawanavuci ni ciqoma na kosipeli i Jisu Karisito ena noqu sa yabaki 22.
Ciqomi ni iVola i Momani
Au a tubu cake ena dua na gauna ni veisau ena noqu vanua. Na ilawalawa vulavula lailai ka liutaka o Ian Smith a vakarota na tu vakataki koya mai vei Peritania ena 1965. O ya a vakauqeta na tataro ni Matanitu Cokovata ka vakavuna na veivaluvaluti vaka lewe ni vanua me vica na yabaki me yacova na 1980, ka vakatakilai kina na tu vakataki koya i Zimbabwe. Ni oti na noqu vuli, au a toki ki na dua na siti me’u laki cakacaka ka sega ni lewena e dua na lotu me vica na yabaki.
Dua na siga au a qito voli kei rau na luvei noqu boso. Rau yabaki ciwa kei na vitu. Rau a kaya, “Kila tu ni tamai keirau na peresitedi ni tabana ena neitou Lotu.” Rau vakamacalataka se cava na peresitedi ni tabana ka, sega mada ni vakasamataka tu, au a kaya, “O tamamudrau ena sega ni lako ki lomalagi.” Au qai kila tu ni’u sa cakava e dua na cala levu, ka’u vakasamataka vagumatua na ka au rawa ni tukuna vei rau me rawa kina ni rau guilecava na vosa au tauca. Ena mua ni siga, ni sa laurai o tamadrau, rau a cici vua ka tokaruataka na ka au a kaya. Au nanuma ni’u sa na vakayalia na noqu cakacaka.
A vakaraitaka taumada vei au o noqu boso e dua na jakete ni gauna e a sotia tu kina ka vakaraitaka ni a veivakamatei. O ya na vuna au a cavuta kina na ka au kaya. Ena sala malumu sara, a tarogi au na vuna au a kaya kina. Au kaya, “Boso, nanuma, o a tukuna vei au ni ko a veivakamatei ena ivalu. E kaya na iVola Tabu, ‘Mo kakua ni ia na veivakamatei.’”
A tarogi au o koya se lotu cava au lewena. Au tukuna vua ni’u a dau lewena tu na Lotu Katolika ia ka sega ni taleva tu ena vitu na yabaki. A wasea o koya na veika e yaco ena Veiyalayalati Makawa me baleta na ivalu kei na veivorati, ka qai solia vei au e dua na ilavelave ni iVola i Momani. Au a kurabui ni’u sega ni vakayalia na noqu cakacaka.
A sa solia vei au o koya na iVola i Momani ena 1981, ia au a sega ni wilika se dolava mada ga me rua na yabaki. Dua na Sigatabu ni’u wele tu ni ra gole ki tauni na noqu itokani, au mani tomika cake na ivola ka lako ki na siteseni ni sitima ni vanua voleka ga ka wiliwili. Ni’u sa wiliwili na siga oya, au sa rawa ni vakila na veivakauqeti ni caka vinaka, ia na ka e tarai au vakaidina e muri ena noqu wiliwili oya na 3 Nifai 11. Au wilika me baleti ira na Nifaiti ka bula mai na ivalu kei na veilecayaki, ka qai rairai mai vei ira na iVakabula o Jisu Karisito.
A lako curuma tu na ivalu vakataki koya na noqu vanua me 15 na yabaki. Eso na tamata au a tubu cake vata ena noqu koro sa ra lako ki valu ka sega ni lesu tale mai. Eso tale sa lokiloki tu vakadua.
Ia, ni wiliki tu baleti ira na Nifaiti, au vakila ni vaka me sa torovi au tiko mai na iVakabula o Jisu Karisito ena Nona kaya, “Mo ni tucake ka lako mai vei au, mo ni … tara tale ga na we ni ivako ena ligaqu kei na yavaqu, mo ni kila kina ni sai Au na Kalou ni Isireli, kei na Kalou ni vuravura taucoko, ka’u a vakamatei ena vuku ni ivalavala ca ni vuravura” (3 Nifai 11:14).
Au vakila ni sasaga tiko yani me yaco yani vei au ka me sureti au meu lako vua. A tarai au niu rawa ni cakava vaka oqo. E veisautaka na veika kece.
Rawati ni Noqu iVakadinadina
E a vakavula tu me rawa ni’u yaloqaqa tale ni lako ki lotu. Au sa kila na itikotiko ni lotu, ia a sega tu na daukaulotu ena neimami tabana lailai. Ena Feperueri 1984, au a curuma yani na valenilotu e Kwekwe. Au a via vakasuka lesu tale. Au sega ni yalodei ni ganiti au ka dabe sara mai muri, vakarau tu ni gutuwa. Ni oti na idola ni soqoni, a wasea na peresitedi ni tabana, o Mike Allen, na nona ivakadinadina me baleta na iVakabula o Jisu Karisito kei na iVola i Momani. Au a vakila na veisemati. A wasea talega na nona ivakadinadina na tamata ka tarava me baleta na iVakabula kei na iVola i Momani, ka vaka talega kina na kena ikatolu. Au sa yalomarau. Au a sega ni doudou ni lako ki na itutu ni vunau, ka’u sa duri ga ena vanua au toka kina ka kaya, “Au sa lomani Jisu. Au sa wilika tiko na iVola i Momani.” Ka’u mani dabe. Oqori na itekitekivu ni noqu ivakadinadina.
Na veivakadinadina oya sa ivakarau e torovi au tiko mai kina na Turaga baleta ni sa vukei au ni vakila ni’u sa taukeni e kea. Au vakila ni oqo o ira na taciqu kei na ganequ. Ena veisiga ka tarava au a masulaki ira kei na nodra veiciqomi. Au sotavi ira na lewenilotu ekea ka sa rui yalovinaka ka vukei au.
E levu na ka a yaco ena siga oya ni’u a curu yani ki na valenilotu. Au vakananuma se cava e rawa ni yaco ke ra a sega ni wasea na nodra ivakadinadina na lewenilotu oya. O sega ni kila kevaka e tiko e dua ka lomaleqa voli. Ni o duri ka tukuna na ka o vakila tu, ena rairai koya saraga oya na ka e gadreva tu e dua me rogoca.
Wasea vakawasoma na nomu ivakadinadina. Ni o cakava, o sa vaqaqacotaki iko kei ira na wavoliti iko. Tutaka na ka o kila tu. Ni ko vakamuria na ivakasala mai na iVola i Momani, o sa na toro voleka yani vua na iVakabula.
Toro Voleka Vua na iVakabula
Na gauna au a vakayagataka ena Loreto Roman Catholic Mission a tavoci au ena sala ni mai dua tu na tisaipeli ni iVakabula o Jisu Karisito. Mai na gauna oya au sa vulica ni bula vaka tisaipeli e sa dua na ituvatuva ka sa gadrevi meda toso tikoga ki liu veitalia na noda malumalumu kei na iyalayala. Ni da sa ciqoma na veisureti: “O koya mo dou qai vinaka sara, me vaka sa vinaka sara na Tamamudou sa tiko mai lomalagi” (Maciu 5:48), eda na rawata tu na bula tawamudu “na vosa ena vosa, na vunau ena vunau” (raica na Vunau kei na Veiyalayalati 98:12).
Eda kila tu ni na sega ni rawarawa na sala, ka ni na sotavi na dredre eso kei na mosi ni yalo ena ituvatuva, ia na raici cake ni Turaga sa sala duadua ga me kune vakacegu kina na noda bula.
Na Veisorovaki ni iVakabula o Jisu Karisito e sa ka taucoko kivei au. Au kila ni sa torovi keda tiko mai na iVakabula. Sa gadrevi meda rai cake, muri Koya, ka sudra yani ni laveti ira na tani me vaka sa sudra yani o Koya ka laveti keda.
Au sa vulica ni bula vaka tisaipeli e sa dua na ituvatuva ka sa gadrevi meda toso tikoga ki liu.
Droini mai vei Greg Newbold