Monalivaliva Walega: iTabagone Qase Cake
Na Vakayagataki ni Yaca Taucoko ni Lotu e Tawamatau ia e Yaga Dina
Na vakamuria na ivakasala ni parofita e rairai rawarawa, ia e qai yaco me taura e levu cake na sasaga mai na kena au namaka.
Ena gauna ea vosa kina o Peresitedi Nelson me baleta na kena vakayagataki na yaca dodonu ni Lotu ena koniferedi raraba ni Okotova 2018, sa matata sara tu vei au na nona itukutuku: “Oqo sa ivakaro ni Turaga. …
“… Ni da kauta laivi na yaca ni Turaga mai na Lotu ni Turaga sa dua na qaqa levu vei Setani” (“Na Yaca Dodonu ni Lotu,” Liaona, Nove. 2018, 87, 88.).
Au sa qai kila niu gadreva meu vakasamataka tale mada na sala kau torova kina na noqu veitalanoa kei ira era tu wavoliti au, oka kina eso na tamataqaravi ena noqu vanua ni cakacaka ka sa matau me ra kacivi au me dua na “Momani” kei na dua na lewe ni “Lotu Momani.”
Niu yalataka meu vakayagataka na yaca taucoko ni Lotu, au waraka na madigi ka tarava meu tukuna kina na noqu lewena Na Lotu i Jisu Karisito ni Yalododonu Edaidai. E dina sara, e yaco mai na madigi oya, ena kena ibalebale vaka bisinisi. “Oi kemuni na Momani o ni tamata lomavinaka,” ea kaya vei au e dua tamata qaravi lalawavaki. “Vinaka, vinaka vakalevu,” au a sauma. “Ni keimami lewena Na Lotu i Jisu Karisito ni Yalododonu Edaidai, keimami vakabauta ni da sa veitacini ka veiganeni kece sara.” Qai tomani na veivosaki vata kei koya kei ira kece tale eso ni vosa me baleta na nodra loma vinaka na “Momani.”
E dina ga niu sa vakayacora na noqu itavi ena cavuti ni yaca taucoko ni Lotu, kau se vakila ga ni dua na ka e se cala tiko. Ko ira na noqu itokani kei ira na cakacaka vata era se raici au tiko ga me tiki ni “Lotu Momani” ka sega ni vaka e dua na daumuri Karisito, laiva mada niu dua na lewe ni Lotu i Karisito vakalesuimai.
Ea Yaga Li na Sasaga?
Mai na vica na veimaliwai ka tarava me baleta na noqu vakabauta, au kunea niu vakadrukai ena tawamatau ni cavuti na yaca balavu, taucoko ni Lotu me vakavuqa ena dua tiko ga na veitalanoa. Na tamata kece au a vosa kina e vaka me ra raici au vakatani. Ia na veivosaki e se dau vakanamata tiko ga ena “Momani.”
Au a saga meu cakava na noqu veimaliwai me vakilai me bau bulabula cake. Ia oqo sa yaco me dredre sara vakalevu mai na kena au namaka tiko, vakabibi vata kei ira na tamata yadua au sega ni vinakata me vakacudruya. Au sega ni vinakata meu datuvu se wele ena bulataki ni noqu vakabauta, ia au sega ni vinakata meu rairai voravora, me vaka ni vuqa vei ira na tamata oqo era sa kacivi au na “Momani,” eliu kau a ciqoma. Au a rogoca talega e vuqa na lewe ni Lotu era se kacivi ira kei ira na lewe ni Lotu tale eso na “Momani” ena veisoqoni eso kei na kena ibalebale tale eso.
Au raica niu taroga se ni vakayagataki ni yaca taucoko ni Lotu sa dina sara ni bibi ki na inaki cecere ni veika kece. Na ivakatakilakila na “Momani”, e dina ga, sa ka vinaka ena nodra vakasama e vuqa na tamata—niu dua na “Momani” e dau vakawasoma me ka yaga vei au. Ia ena sikovi lesu ni vosa nei Peresitedi Nelson, au sa vakayarayarataki ni oqo e bibi dina, kevaka sara mada e vuna eso na tawamatau ena veitalanoa. Au sa yaco kina meu yalayala tale vakai au ga.
E Dua na Gauna mo Vakadinadinataka kina na Karisito
Ena gauna ka tarava meu vakayagataka kina na yaca taucoko ni Lotu, au a veitalanoa tiko kei dua na itokani ena dua na valenilotu ni dua tale na matalotu. E dua e gole mai vei au ka ena matadredredre ramase ea taroga kevaka au dua na Momani. “Au lewe ni Lotu i Jisu Karisito ni Yalododonu Edaidai, io,” au a kaya. A vakatekivu me tarogi au tiko ena vica na taro, ka tekivu yadua ena: “E vakabauta li na Lotu Momani na … ?” Ena veigauna yadua, au tekivuna noqu isau ni taro ena matavosa: “E na Lotu vakalesuimai i Karisito, keimami vakabauta …”
Na veisau vosa oqo e toso yani ka toso mai me vaka va se vaka lima. Ni a raica okoya niu sega ni ciqoma na yaca na “Momani,” a tarogi au mai vakadodonu, “O sega beka ni Momani?”
Kau mani tarogi koya kevaka e kila se o cei o Momani—e a sega ni kila. Au tukuna vua ni o Momani e dua na parofita, e dua na daunitukutuku makawa, e dua na turaganivalu, ka dua na dau ni politiki ena vanua o Amerika makawa. Au sa doka me sema kei na dua na Turaga ka a cabobula ki na veiqaravi vua na Kalou kei ira na tani.
“Ia,” au tomana, “O Momani ea sega ni mate baleta noqu ivalavala ca. Ea sega ni vakadavea na nona dra o Momani ea sega ni vakadavea na nona dra me baleti au se vakararawataki mai Kecisemani se mate ena kauveilatai. E sega ni noqu Kalou o Momani. Sa noqu Kalou ka noqu iVakabula o Jisu Karisito. E noqu Dauveivueti o Koya. Ia ena Yacana au vinakata meu kilai kina e na siga mai muri, ia ena Yacana au nuitaka meu kilai kina nikua.”
Au vakila na veivakadeitaki ni Yalotabu ni tokoni au tiko ena ivakadinadina lekaleka oqo vei noqu itokani vou. Ni oti e vica na sekodi na vakanomodi, ea kaya mai, “Oi, o iko o Lotu Vakarisito?”
“Io, au Lotu Vakarisito,” au a sauma, “ia e dua na lewe ni Lotu i Karisito vakalesuimai.”
Na sasaga me muri na ivakasala ni parofita e vaka me rawarawa, ia a qai yaco me taura na sasaga e levu cake mai na kena au namaka. Au se sega ni vinaka sara ena kena muri na veika kece e kerei meu cakava. Ia ena veigauna kece, au sa vakadeitaka me vakayagataka na yaca taucoko ni Lotu.
Au sa vakavinavinaka ki na Yalotabu au sa vakila niu vakadinadinataka vei ira tale eso me baleta na noqu iVakabula kei na noqu lewena na Nona Lotu. Ia oqo sa noqu e dua na sala cecere meu vakadinadina bulabula kina baleti Koya kei na Nona Lotu vakalesuimai ena veigauna au tarogi kina me baleta niu “Momani.”