Pagpili sa Istasyon [Channel]
Unsa kaha kon si Brooke dili na gusto nga mahimong higala ni Camille?
“Ang Ginoo manalipod kanimo; busa buhata unsang matarung!” (Mga Himno, nu. 145).
“Akong nakita ang kataw-anan kaayo nga pasundayag kagahapon. Kinahanglan susihon gyud nimo kini. Unya magdungan tingali kita og panan-aw niini puhon!” Miingon si Brooke.
Ganahan si Camille makigtabi sa iyang labing suod nga higala samtang manglakaw sila padulong mamauli gikan sa eskwelahan. Ganahan siya kon unsa ka dako ang ilang pagkaparehas.
“Sige nindot kaayo na!” Mibabay si Camille ug dayong sulod sa ilang atubangang pultahan.
Pagkahuman ni Camille sa iyang homework, gibuksan niya ang TV ug nakit-an ang husto nga pasundayag. Makalingaw kaayo nga mahisgutan kini ugma uban ni Brooke!
Ang salida kataw-anan. Ang mga character naghimo og mga kabuang ug nagsulti og mga pasiaw. Nagkatawa og maayo si Camille. Apan dili tanan nilang gisulti kataw-anan. Nagsulti sila og mga pulong nga nakapahimo ni Camille nga mobati nga mura og mga baki nga nanglukso diha sa iyang tiyan. Dili kini maayo nga mga pulong.
Unsay angay nakong buhaton? naghunahuna siya. Nasayud si Camille nga kining mga pulong dili nindot. Apan gusto siyang mahibalo kon giunsa pagtapos sa salida. Unsay iyang isulti kon mangutana si Brooke mahitungod niini ugma?
Uban sa pagpanghupaw, gipalong ni Camille ang TV.
Human nga nakauli si Mama, mitabang si Camille sa pag-andam sa lamesa para sa panihapon. “Kumusta ang eskwela?” Nangutana si Mama.
Gipahimutang ni Camille ang mga tinidor ug mga kutsara. “Nindot gyud kaayo! Gawas sa … gisulti ni Brooke nako mahitungod sa usa ka salida nga tan-awon. Misugod nako sa pagtan-aw niini, apan aduna kini bati nga mga pulong. Dili maayo ang akong gibati mahitungod niini, mao nga ako kining gipalong.”
“Murag maayo gyud kaayo ang imong gipili.”
“Apan ganahan si Brooke magdungan mi sa pagpanan-aw niini. Suod kaayo mi nga managhigala! Parehas ang musika nga among ganahan, parehas nga ice cream, parehas og mga libro …”
Gipahimutang ni mama ang usa ka bandihado nga pasta diha sa lamesa. “Tinuod na, apan dili na nagpasabut nga kinahanglan gayud nga magparehas ang tanan nga butang nga inyong buhaton. Ilabi na kon kini usa ka butang nga dili maayo ang imong gibati. OK ra nga mohimo og lahi nga mga pagpili kay sa gibuhat sa usa ka higala.”
“Unsay buot nimong ipasabut?” Nangutana si Camille.
“Nan, pilion nato ang paglikay sa bati nga mga pulong aron nga kita mobati sa Espiritu Santo,” mipasabut si Mama. “Apan dili ang tanan adunay sama nga sumbanan sama kanato. Kana wala makapahimo nilang bati nga mga tawo.”
Nabalaka gihapon si Camille mahitungod sa unsay mahitabo kon si Brooke mangutana kaniya mahitungod sa pasundayag. Gihisgutan nila ang mahitungod sa bisan unsa nga butang! Unsa na lang kon si Brooke maghunahuna nga siya nagbinata? O mosamot pa, unsa kaha kon dili na siya gusto nga mahimong higala?
Nag-ampo si Camille sa wala pa matulog. Langitnong Amahan, palihug tabangi ko nga makig-istorya ni Brooke ugma. Palihug tabangi ko nga magmaisugon. Misaka si Camille sa higdaanan ug nanghinaut nga ang mga butang mahimong ok ra sa eskwelahan.
“Camille!” Misinggit si Brooke diha sa playground. Midagan siya diha sa mga kasagbutan aron sa pagsugat ni Camille. “Unsay imong hunahuna sa salida? Dili ba kataw-anan kini?”
Miginhawa og lawom si Camille. “Sa tinuod lang wala ko mitan-aw niini og maayo.”
Murag naglibug tan-awon si Brooke. “Ngano man?”
Naghunahuna si Camille og kadiyot. Mosulti lang ba kaha siya nga na-busy siya? Unsay kaha ang isulti ni Brooke? “Kuan… wala ko motan-aw kay nagsulti sila og mga pulong nga dili ko ganahan. Dili maayo akong gibati nga nagtan-aw niini.”
“Oh,” hilum nga misulti si Brooke. Dayon miingon siya, “OK ra na. Dili ta kinahanglan mag-uban sa pagpanan-aw niini. Makapangita ta og salida nga ganahan tang duha o magdungan ta sa paghimo og laing butang.”
“OK.” Mipahiyom si Camille. Dayon ang duha ka managhigala nagdungan og sulod sa klase, nag-inistoryahanay ug nagkinataw-anay sa tibuok higayon. ●
Ang tagsulat nagpuyo sa Utah, USA.