Suesue ma Talitonu i le Aoaoga Faavae a Keriso

By Elder Carl Maurer

Fitugafulu Eria

I le vaega amata o le Nifae e tolu, sa tulimatai tagata faatuatua o le Faaola i le afio mai o Keriso. Sa valoiaina ua latalata mai le taimi o Lona afio mai, ae peitai sa tauivi nisi e tumau i le faatuatua seia oo i le iuga. Sa amata ona latou faagaloina faamanuiaga ma folafolaga sa fetalai atu ai le Alii ia i latou. Sa saili le mana o le tiapolo e faaseseina loto o tagata, ae o i latou o e sa tumau i le faatuatua sa iloaina o le aoaoga faavae a Keriso e le o se mea vale poo se mea noa.¹

E faapena lava le i ai moni o faaosoosoga a le tiapolo i le asō a o tatou taulai atu i le toe afio mai o le Faaola. E le mafai ona galo ia i tatou faailoga ma mea mataina i o tatou olaga a o valaaulia pea lava pea i tatou e o tatou perofeta, tagata vaai ma tali faaaliga ia tatou tumau i le ala o feagaiga.

I le taimi o lona valaauga i le 2018, sa faasoa mai ai e Peresitene Russell M. Nelson faapea:

“I le avea ai ma se Au Peresitene fou, matou te fia amata ma le faatasi ai o le taunuuga i le mafaufau. Mo lenei mafuaaga, ua matou talanoa atu ai ia te outou i le asō mai se malumalu. I le taunuuga lea tatou te tauivi uma i ai ina ia faaeeina i le mana i totonu o se maota o le Alii, faamauina o ni aiga, faamaoni i feagaiga e osia i totonu o se malumalu lea e agavaa ai i tatou mo le meaalofa silisili a le Atua—le ola e faavavau. O sauniga o le malumalu ma feagaiga tou te faia iina o ki ia i le faamalosia o lou olaga, lau faaipoipoga ma le aiga, ma lou tomai e tetee atu ai i osofaiga a le fili. O lou tapuai ai i totonu o le malumalu ma lau auaunaga iina mo ou tuaa o le a faamanuiaina ai oe i le faateleina o faaaliga faaletagata lava ia ma le filemu, ma o le a faamalosia ai lou tuuto e tumau i luga o le ala o le feagaiga”.²

A o faia le galuega a Peresitene Nelson, ua faifaipea lona aoaoina o le aoaoga faavae a Keriso ma faamalosiauina i tatou e tumau i luga o le ala o feagaiga. O a ni mea tatou te aoaoina mai i ana savali e mafai ona taitaiina i tatou i taimi faigata ma luitau o lenei olaga faaletino? Na ia aoao mai, “O le manumalo i le lalolagi e le o se mea e tupu i se aso se tasi pe lua. E tupu i le olaga atoa pe a tatou taliaina pea lava pea le mataupu faavae a Keriso”.³

O le aoaoga faavae a Keriso o le: faatuatua i le Alii o Iesu Keriso, salamo, papatisoga e ala i le faatofuina, taliaina o le meaalofa o le Agaga Paia ma le tumau seia oo i le iuga.

“Tatou te faafaileleina le faatuatua ia Iesu Keriso e ala i le salamo i aso taitasi ma tausia feagaiga ia e faaee mai ai le mana ia i tatou. Tatou te tumau i luga o le ala o feagaiga ma faamanuiaina i le malosiaga faaleagaga, faaaliga faaletagata lava ia, faateleina o le faatuatua, ma auaunaga a agelu. O le ala i le mataupu faavae a Keriso e mafai ona tupu mai ai le taamilosaga mamana o le mamā lea e fatua’i ai le malosiaga faaleagaga i o tatou olaga”.⁴

Faatuatua

“O le faatuatua ia Iesu Keriso o le mana silisili lea ua avanoa ia i tatou i lenei olaga.”⁵ A o tupu pea lo tatou faatuatua, e faaitiitia ai lo tatou popole i manatu o isi e uiga ia i tatou ae amata ona faasili mamao atu lo tatou popole i le finagalo o le Atua ia i tatou.

O le faatuatua i le Alii o Iesu Keriso e faateleina i ni ala se lima, e pei ona aoao mai e Peresitene Nelson:

Suesue
Filifili e talitonu ia Iesu Keriso
Galue i le Faatuatua
Taumamafa ma le agavaa i sauniga paia
Ole atu i lou Tama oi le Lagi i le suafa o Iesu Keriso, mo se fesoasoani.⁶

Salamo

Ua fetalai mai le Faaola ia i tatou uma ia salamo. “Pe o e malaga ma le filiga i luga o le ala o feagaiga, pe ua see ese pe laa ese mai le ala o feagaiga, pe ua lē mafai ona vaai atu i le ala mai le mea o e i ai i le taimi nei, ou te aioi atu ia te oe ia salamo. O le lagonaina o le mana faamalosiau o le salamo i aso taitasi – o le faia ma le avea ma se tagata lelei teisi atu i aso taitasi”.⁷ O la tatou filifiliga e salamo e aumaia latalata sili atu ai i tatou i le Alii ma i le olioli tele atu.

Papatisoga – le Faamanatuga – le Malumalu

Mo i tatou o tagata o le Ekalesia a le Alii, o feagaiga tatou te osia i le papatisoga ma isi sauniga e faafouina a o tatou aai ma feinu i le faamanatuga. O le aai ma feinu i le faamanatuga e mafai ai ona tatou tumau i luga o le ala o feagaiga. E valaaulia ai i tatou ina ia tatou naunau e tauave i o tatou luga le suafa o le Faaola, ia manatua pea o Ia ma tausi i Ana poloaiga.⁸

O le malumalu o le Maota o le Alii. O le faavae mo sauniga ma feagaiga uma o le malumalu – le fatu o le ata o le faaolataga – o le Togiola a Iesu Keriso. Ou te valaaulia outou ia taulai atu i le malumalu i ala e te lei faia lava muamua.⁹

Ua faamalamalama mai e Peresitene Nelson faapea, “Pe a tatou ulu atu foi i lena ala, ua tatou maua se ala fou o le olaga. Afai tatou te faamuamua le Atua i o tatou olaga, o lena feagaiga o le a taitai atu ai i tatou ia latalata atili atu ia te Ia”.¹⁰

O le taulaiga a lo tatou Eria o le Pasefika 2023 e faamalosiauina i tatou ina ia faapotopoto i nofoaga autu nei e lua ia tatou te taliaina ma tausiaina ai sauniga ma feagaiga: o le faamanatuga, ma le malumalu. E maeu le faamanuiaina o i tatou a o tatou valaauliaina tagata uma e faapotopoto e le aunoa i nei nofoaga paia i lenei tausaga atoa ma talaatu.

O Le Agaga Paia

O le talosaga a Peresitene Nelson mo i tatou ia, “… fai po o le a lava le mea e faateleina ai lo outou gafatia faaleagaga e maua ai faaaliga faaletagata lava ia”.¹¹ A taulai atu o tatou olaga i le mauaina o Lona agaga ia faatasi ma i tatou i taimi uma¹² a o tatou auai i sauniga o le faamanatuga, ua faamanuiaina i tatou i le mana faaopoopo e taulimaina ai faaosoosoga, tauiviga ma vaivaiga. O le a faateleina lo tatou gafatia e lagonaina ai le olioli.¹³

Ia faamausali lo oe lava faavae faaleagaga ma ia mafai ona tu i le taimi o luitau e ala i le faia o na mea e faatagaina ai le Agaga Paia ia faatasi ma oe i taimi uma. Aua lava ne’i manatu faatauvaa i le mea moni loloto faapea, “e tautala mai le Agaga….e uiga i mea e pei ona i ai moni lava, ma e uiga i mea e pei o le a i ai moni lava.”¹⁴ “O le a faaali mai e ia ia te outou mea uma e tatau ona outou faia.”¹⁵

E mafai ona tatou usitai i lo tatou perofeta ma faaaoga mataupu faavae a Keriso i o tatou olaga i aso taitasi. Ou te molimau atu afai tatou te faia o lea, o le a faamanuiaina i tatou i le faaletino ma le faaleagaga. O le ala o feagaiga ua na o le pau lea o le ala e toe foi atu ai i le afioaga o le Tama ma le Alo. Na saunoa mai Peresitene Nelson, “O le mataupu faavae mamā a Keriso e mamana tele. E suia ai le olaga o tagata uma e malamalama i ai ma saili e faatino i lona olaga. E fesoasoani le mataupu faavae a Keriso ia i tatou e saili atu ma tumau i luga o le ala o feagaiga”.¹⁶

E mafai ona tatou ola i le ala o le aoaoga faavae a Keriso e ala i le aai ma feinu ma le manatunatu i le faamanatuga i vaiaso taitasi. E mafai ona tatou tatalo i le faatuatua mo le malosi tatou te manaomia e suia ai, e mafai ona tatou saili e aoao e uiga i Ana aoaoga faavae ma aoao atu i totonu o o tatou aiga. E mafai ona tatou i ai i totonu o le malumalu i taimi uma e mafai ai e tusa ai ma o tatou tulaga. Ua faamalosiauina i tatou e Peresitene Nelson i upu nei, “Pe o se faamalosiauga po o se talanoaga, matou te manaomia tou leo e aoao atu le mataupu faavae a Keriso.”¹⁷ A o tatou faia o lea o le a afio mai le Agaga Paia i o tatou olaga ma aumaia le malosi ma le fesoasoani. O le a tatou faatuatua ma lē faaseseina a o tatou saunia mo le toe afio mai o le Faaola. O le olioli ma le filemu lea e faatoa maua lava i nei auala o le a faatumulia o tatou olaga ma o le a tatou iloa e mafua ona o le aoaoga faavae a Keriso.