O le ‘Masini Foai’ o le Kerisimasi ua Musuia le Au Foai, e Fesoasoani i Tagata e Le Tagolima
O le uluai Masini Foai i le Itulagi i Saute i le Faleoloa Tele o le Logan Hyperdome i Peresipeni, Ausetalia ua faamaeaina se taumafaiga e faamanuiaina olaga o i latou ua sili ona le tagolima.
I le vaitau o le Kerisimasi na tea nei, o se vaega o se auaunaga faale lalolagi atoa ua taua o le “Faamalamalama le Lalolagi” (“Light the World”), sa uluai amata ai le faaaogaina o se masini faatau oloa (vending machine) fou e le masani ai i le itulagi i saute, i Kuiniselani, Ausetalia.
Na taua o se “masini foai,” o le masini lea e taulai i le alofa na mafai ai e tagata faatau i le Faleoloa Tele o le Logan Hyperdome i le Aai o Logan ona foai atu ai i soo se faalapotopotoga alofa i le lotoifale pe faaleatunuu latou te filifilia.
E sili atu i le 2,700 tagata faatau ma isi tagata asiasi ane i le faleoloa tele na tali lelei atu i le masini foai, ma faatupeina ni aitema e foai alofa e ala i a latou foai tupe.
E $92,785 na foaiina i faalapotopotoga alofa e ono i le lotoifale i le masina o Tesema.
O faalapotopotoga alofa o le a faaaogaina tupe ua foai atu e fesoasoani ai i tagata taitoatasi, i aiga ma nuu o: Angel Flight; Children’s Hospital Foundation; Community Involvement Solutions; GIVIT; Rosie’s – Friends on the Street; ma le Royal Flying Doctor Service.
O tagata taitoatasi sa faia se foai i le masini sa mafai ona filifili mai i se tele o aitema na faamoemoe e fesoasoani e faaleleia atili le olaga o se tasi.
O Foai na aofia ai le:
293 Taga o Mea Aogā mo Faalavelave Faafuasei (Emergency Essential Packs) mo aiga e faaaoga i le falemai i se taimi faafuasei
165 Seti o Lopa o le Lototele (Bravery Beads) e faailoa ai le lototele o se tamaititi i le taimi o se togafitiga faigata i le falemai
340 Taga o Mea Faaaoga i le Faletaele (Toiletries Care Packs) mo tamaitai i se malutaga mai sauaga i le lotoifale ma le aiga
380 Palanikeke mo tagata ua leai ni fale
101 O Meaai Papakiu mo le Toatolu (BBQ Meals for Three) mo tagata ua leai ni fale
312 O Faagaau Mānava (Breathing Tubes) e fesoasoani e laveai se ola pe a le mafai e se tasi ona mānava ma manaomia se fesoasoani faafomai faafuasei
O nisi o foliga faapitoa o le masini foai o avanoa mo tagata foai e pue ai se ata o loo uuina se kata tele lava e faailoa mai ai le meaalofa na latou faatauina faapea tamai pine faalauiloa e mafai ona tautau i le laau Kerisimasi, mo meaalofa e mafai ona maua, e faailoa ai le meaalofa ua foai atu.
O masini foai sa i nofoaga e 31 i le lalolagi atoa i le vaitau o le Kerisimasi na tea nei e aofia ai le 23 i le ISA, lua i Mekisiko, lua i Filipaina, lua i Kuatemala, tasi i Kanata, ma le tasi i Ausetalia.
O le uluai masini foai na muamua lava faalauiloaina i le 2017 ma na faatupeina e Le Ekalesia a Iesu Keriso o le Au Paia o Aso e Gata Ai o se vaega o lana taumafaiga faaletausaga o le #FaamalamalamaLeLalolagi (#LightTheWorld), faatasi ai ma le 100% o faatau uma lava e alu i le faalapotopotoga alofa na filifilia e le tagata foai.
I le avea ma e mulimuli ia Iesu Keriso, e taumafai tagata o Le Ekalesia a Iesu Keriso o le Au Paia o Aso e Gata Ai e ola ai i poloaiga maoae e lua—ia alofa i le Atua ma ia alofa i o latou tuaoi.
O Russell M. Nelson, le peresitene o Le Ekalesia a Iesu Keriso o le Au Paia o Aso e Gata Ai na saunoa mai: O i latou e loto e ta’ua o le nuu o le Alii ‘ua loto e ave le avega a le tasi, … e faanoanoa faatasi ma e faanoanoa, … ma [e] faamafanafana i latou o e manaomia le faamafanafanaga.’”
O tagata o le Ekalesia e saili ia i latou o loo le tagolima ma tuuina atu le fesoasoani i fanau uma lava a le Atua e aunoa ma le manatu i tulaga tau tapuaiga, lanu, po o le atunuu. O le Ekalesia, ma ona tagata ma ana uo ua tuufaatasia a latou foai faatasi ma taumafaiga ofo fua atu e faamāmā ai mafatiaga ma fausia le ola tutoatasi i le lalolagi atoa.