Ua Olioli Le Au Paia o Aso e Gata Ai i Niue i le Tapuai ai i le Malumalu i le Mavae o le Tolusefulu Tausaga
“Na ou faaIogoina e pei ua mou ese atu uma o’u faafitauli ma popolega.”
Mo le uluai taimi i le 27 tausaga, na faimalaga ai tagata o le Paranesi a Lakepa -Toi Niue, o se aulotu toalaiti o Le Ekalesia a Iesu Keriso o le Au Paia o Aso e Gata Ai, i le 2,484 kilomita le mamao mai lo latou motu e tapuai faatasi i le Malumalu o Hamilton Niu Sila ia Ianuari 2023.
O tagata taitoatasi ma aiga na teuina, ma su’e tupe, faia le tele o tatalo ma anapogi ina ia taunuu ai le faigamalaga.
Sa latou auai foi i le sailia o talafaasolopito o aiga, aoina o faamatalaga mo tagata o aiga e 120 ua maliliu.
I le malumalu, sa sui ai tagata Niue i tagata o o latou aiga ina ia maua papatisoga ma isi sauniga paia i le malumalu.
Ua faapea mai le uepisaite o le malumalu a le Ekalesia: “O le aoaoga faavae o sauniga sui (tu e suitulaga) sa avea pea ma vaega o le talalelei a Iesu Keriso. O le mea moni, o Lana Togiola o le faatinoga sili lea e suitulaga ai i le talafaasolopito o le lalolagi. E ala i Lana taulaga, na Ia faia ai mo tagata uma lava le mea e le mafai ona tatou faia mo i tatou lava. Ona o Ia, o le a toetutu ai tagata uma. O le a faalogo ai tagata uma i le talalelei, ma o le a maua le avanoa e toe foi atu ai i o tatou Matua Faalelagi.”
Na saunoa mai Peresitene Timothy Wilson, le taitai o le Paranesi a Lakepa-Toi Niue, “E maeu le matagofie o le vaaia o le toatele o tagata o la matou Paranesi… o loo faia galuega paia mo i latou ua maliliu…”
Na ia toe faapea mai, “Sa matou lagonaina le matuā latalata atu i lo tatou Faaola o Iesu Keriso i le malumalu. O se faagaeetia faaleagaga mo a’u, mo tagata o le Paranesi o e ua leva tele o valavala ma le malumalu, ma mo a matou talavou o e faatoa oo i le malumalu mo le taimi muamua lava.”
Na auai Mereoni e 13 ona tausaga faatasi ma lona uso, o Karisi, ma lona tina matua, o Tapu Pihigia.
“Ina ua ou savali atu i luma o le malumalu, sa ou lagonaina e pei ua mou ese atu uma o’u faafitauli ma popolega,” o le tala lea a Mereoni. “Sa ou lagonaina le filemu.”
Na faaopoopo mai lona tina matua, “E le toe uma le talanoa o fanau teine o a’u fanau e uiga i le malaga talu ona foi mai i le fale. O le a matou le faagaloina lava lenei malaga i le malumalu.”
E mafaufau le Au Paia o Aso e Gata Ai o malumalu o ni nofoaga sili ona paia i le lalolagi lea latou te saili e faalatalata atili ai i le Faaola ma e faavavau ai sootaga faapelepele faaleaiga.
Na feiloai Peresitene Alan Leuluai, o se tasi o le Au Peresitene o le Misiona a Niu Sila Aukilani, ma le autalavou ae le i amataina la latou faigamalaga e toe foi ai i Niue.
Na ia fautuaina i latou ia “manatua faalogona na [latou] lagonaina i le malumalu.”
Na faatusaina e Peresitene Leuluai le malumalu i le Fetu o Tavita lea na taitaia le au makoi i le pepe o Keriso ma faamalosiauina le autalavou ia atamamai ma “avea le malumalu ma o latou fetu, e taitaia o latou ala i le ola e faavavau.”
E toa 11 tagata talavou na i ai i le vaega, sa auai foi i le FSY (MMA Mo le Malosi o le Autalavou), o se konafesi mo talavou e faatupeina e le Ekalesia lea sa faia i Aukilani, Niu Sila i le amataga o Ianuari.