‘Na Ia Matuā Sailia Faifeautalai

Saunia e Lillian Arp

“O le a ou tautala sa’o,” o le tala lea a Tyreece. “Pau lava le mafuaaga na ou manao ai e avea a’u ma tagata o le Ekalesia ina ia ou faatasi ma se tamaitai.” Sa 17 ona tausaga ina ua ia feiloai atu i le tamaitai ma le leai o se manatu o la laua faigauo o le a suia ai lona olaga.

Muamua, sa musu le tamaitai e ta’u ia Tyreece o ia o se tagata O Le Ekalesia a Iesu Keriso o le Au Paia o Aso e Gata Ai – sa popole o ia atonu na te faamasinoina lē tonu o ia. Ae nai lo lena, o lana tali lea: “Oi e mo’i? E faapefea la ona avea oe o se tagata o le Ekalesia?” O lenei mea na taitai atu ai i se talanoaga loloto e uiga i le talalelei a Iesu Keriso ma tapulaa faavae e taumafai le Au Paia o Aso e Gata Ai e ola ai. Ona ia faamalamalama atu ai lea o lana lava tautinoga o le a ia faaipoipo atu i se faifeautalai ua maea lana misiona.

“O le a ou faia,” o le tali vave lea a Tyreece. Na ia filifili ai i le taimi lava lena iina o le a ia auai i le Ekalesia ma auauna ai i se misiona. E matua tatau mo lea tamaitai.

I le aso lava na sosoo ai, sa alu ai lana sailiga mo faifeautalai. “E te iloa foi le auala e saili ai e faifeautalai tagata le auai ma tagata le toaaga?” na ia faamatala mai. “Sa ou saili mo faifeautalai – sue solo i latou.” Na amata Tyreece i lona fesilisili solo i ana uo aoga ma iloa ai o se tasi o ana uo, o Siale Aloua, o se tagata o le Ekalesia. Na faamautu mai e Siale e tatau lava ona talanoa Tyreece i faifeautalai, ae i le taimi lava lea, na fiafia o ia e tali ni fesili a Tyreece.

I se tasi aso, a o malaga i le fale mai le aoga, na iloa mamao atu ai e Tyreece alii talavou ofu papa’e, o loo savavali mai i le auala. “Na ou tamoe loa lava e tuliloa i laua!” E oo atu loa i ai Tyreece, ae afe loa faifeautalai i se fale. “O lea, na ou faatalitali ai i fafo, i le isi itu auala, toeitiiti atoa le itula tau ina ou talanoa ai ia i laua.”

Ina ua iu ina ulufafo mai faifeautalai mai le fale, na faanatinati atu Tyreece ma faailoa atu o ia, ona fai atu lea na manao o ia e auai i le la ekalesia. Sa manino lava le faate’ia ma le fiafia o faifeautalai, ae na la ta’u atu ia Tyreece e tele ni mea e tatau ona ia aoaoina muamua. E lei atoa se luasefulufa itula mulimuli ane, sa la aoaoina ai o ia i le lesona muamua i se paka tafao latalata ane.

“Sa matuai ou manao lava i lena lesona, VAVE LAVA, aua pau lava le mea sa i lo’u mafaufau o le avea o a’u ma se faifeautalai ua maea le misiona. O le mea lea, sa ou taumafai ai e avea a’u ma tagata o le Ekalesia i le vave e mafai ai.” Ae e le i tupu mea na faamoemoe i ai o ia. Na ese se fuafuaga a le Tama Faalelagi.

Tusa o le taimi lava lea, sa faigata ai le sootaga a Tyreece ma ona matua, ma sa ia faailoa lana vaega i le faafitauli. “Sa ou tali upu i ai, lē faaaloalo ma mea uma faapena, ma sa faamata’u mai o’u matua o le a tuli ese a’u aua sa le mafai ona la taulimaina a’u.”

Ina ua foi mai Tyreece mai lana uluai lesona ma faifeautalai, na ia maua ai ana mea totino uma ua salalau solo. “O le mea lena e iloa ai le matuā manao tele o o’u matua ou te alu ese,” na ia fai mai ai. Ae na mafaufau o ia i le tamaitusi na faatoa tuuina atu lava ia te ia e faifeautalai e uiga i le talalelei a Iesu Keriso; ma manatua le valaaulia na la tuuina atu ia te ia: ia alu i le fale ma tatalo i le Tama Faalelagi. Nai lo le tali atu la i tulaga ua i ai, fai mai Tyreece, “Sa ou le amanaiaina na mea uma ae na ona fai lava o se tatalo.”

Na ia lagona lava i le taimi lena le Agaga Paia. Na oo mai lea lagona faatasi ma se faalogona manino, e ui lava i se taimi le mautonu faapenei mo ia. Sa nofo o ia i se uo mo ni nai aso, ona filifili lea e aapa atu i faifeautalai, faamatala i ai le tulaga i lona aiga ma fesili atu mo se fautuaga. I le lima minute, na maua e faifeautalai se aiga e nofo ai i totonu o le la uarota. O iina na iloa ai e Tyreece i lona loto le moni o le Tama Faalelagi, ma e mafai ona tuu atoa i ai lona talitonuga ma lona faatuatua ia te Ia.

“Na iu ina ou nofo ai i le aiga mo sina taimi,” o le tala lea a Tyreece. I le taimi o lona i ai ma i latou, sa faaauau pea ona ia mauaina lesona mai faifeautalai, auai i le Autalavou a le Ekalesia ona oo ai lea i polokalama a Talavou Matutua, ma mafai ona ia aoao i faiga masani a se aiga o le Au Paia o Aso e Gata Ai. Na amata ona ia matua suesue faamaoni i tusitusiga paia, ma ina ua ia malamalama i le poloaiga a le Alii mo i tatou ia ava i o tatou matua, na iloa e Tyreece e tatau ona faasa’o mea uma i totonu o lona lava aiga.

Na toe amata ona fetautalaa’i ma ona matua ma toe atiinaeina lemu la latou sootaga. Na oo lava ina amata ona auai lona tina i le lotu faatasi ma ia – na manao lona tina e fia iloa le mafuaaga o le suia o le loto o lana tama. E tusa o le taimi lava lea, na molimauina ai e Tyreece le tapenaga a lana uo o Siale mo le misiona ma lona valaauga e auauna i le Misiona o Peresipeni Ausetalia. Na faasolo pea ina ola ma malosi lana molimau. Na ia iloa lelei o faamanuiaga uma na sasaa mai i lona olaga na oo mai ona o lana filifiliga e mulimuli i aoaoga a Iesu Keriso.

E sili atu i se tausaga talu lana uluai feiloaiga ma faifeautalai, faatasi ma ona matua na auai e lagolagoina o ia, na ui ifo ai Tyreece i le vai o le papatisoga ma avea ai o se tagata o le Ekalesia a Iesu Keriso o le Au Paia o Aso e Gata Ai. O loo sauni nei o ia e auauna i se misiona, ae o le mea sili atu ona taua, ua mafai nei e Tyreece ona folafola mai ma le mautinoa: “E ui lava na ou amataina lenei faigamalaga mo se isi tagata, ae o la’u molimau o le talalelei e a a’u lava ia.”

O le alualu i luma o Tyreece i le Ekalesia e le o mafai ona lilo. I le faaiuga o le 2022, na valaaulia ai o ia e lauga i le Konafesi a le Siteki o Aukilani Papatoetoe, lea na faia ai lana molimau:

“Ou te iloa e moni lenei Ekalesia. Ou te iloa afai e malosi lou faatuatua i le Tama Faalelagi, o le a Ia faamanuiaina oe ma lou aiga mo le faavavau atoa. Ou te iloa afai e te mulimuli i poloaiga a Tama Faalelagi, o le a Ia taitaia oe ma lou aiga i le ala sa’o . . . ua ou vaai i ai i o’u lava mata ma e ala i o’u aafiaga. O lea la ua ou manao e fesoasoani e taitai aiga ia agai atu i le Tama Faalelagi, ina ia mafai ona latou faatasi e faavavau mo le faavavau atoa. Ma ou te faia nei upu uma lava i le suafa o Iesu Keriso Amene.”