Para sa mga Magulang

Nagpapasalamat para sa Isang Propeta

Binati ni Pangulong Russell M. Nelson ang mga Banal sa mga Huling Araw sa Kona, Hawaii, noong Mayo 16, 2019, sa kanyang Pacific ministry tour.

Mahal na mga Magulang,

Ipinagdiriwang ni Pangulong Russell M. Nelson sa buwang ito ang kanyang ika-100 kaarawan. Binibigyang-diin ng mga artikulo sa isyung ito kung paano niya tayo itinuturo at ng iba pang mga propeta kay Jesucristo.

Ang isang paraan para masunod ng mga kabataan ang propeta ay sa pagtugon sa kanyang paanyaya na regular na dumalo sa seminary at basahin ang mga banal na kasulatan araw-araw. Nangako Siya ng magagandang pagpapala sa mga gumagawa nito, pati na ng pagkatutong tumanggap ng personal na paghahayag, paghahanap ng mga sagot sa mahihirap na tanong sa buhay, at pagkilala sa Tagapagligtas. Narinig na ba ng mga anak ninyong tinedyer ang paanyayang ito ng propeta? Bisitahin ang seminary.ChurchofJesusChrist.org para malaman ang iba pang impormasyon.

Mga Talakayan Tungkol sa Ebanghelyo

Alalahanin ang Inyong mga Tipan

Sa artikulo ni Pangulong Jeffrey R. Holland sa pahina 4, nalaman natin kung paano tayo poprotektahan at pananatilihing malapit sa Espiritu ng pagtupad sa ating mga tipan at pagsusuot ng garment ng banal na priesthood matapos tayong tumanggap ng endowment. Maaari ninyong ibahagi sa inyong pamilya ang isang sipi mula sa artikulo at pag-usapan kung paano naging “isang hayagang pagpapakita ng katapatan ng kalooban” ang pagsusuot ng garment. Ano ang iba pang ginagawa nating mga hayagang pagpapakita ng ating tapat na pangakong maging mga disipulo?

Sundin ang mga Kautusan

Humingi ng personal na mensahe si Elder Isaac K. Morrison kay Pangulong Nelson para sa kanyang asawa at mga anak. Ang tugon ng propeta ay “Sundin ang mga kautusan.” (Tingnan sa pahina 20.) Maaari ninyong itanong sa inyong mga anak: Paano maiiba ang inyong mga pagpapasiya kung kasama ninyong nakaupo ang propeta sa isang mesa at hilingin niya sa inyo na sundin ang mga kautusan?

Sundin ang Propeta

Magiging 100 taong gulang na si Pangulong Nelson ngayong buwan! Ibinahagi ni Pangulong Dallin H. Oaks ang ilan sa mga aral na natutuhan niya mula sa propeta (tingnan sa pahina 12). Ano ang natutuhan ng inyong mga anak mula sa propeta? May partikular na mensahe o debosyonal bang nakintal sa kanilang isipan? Ibahagi ang inyong mga iniisip. Maaari ninyong panoorin ang isang video message mula sa kanya.

Katuwaan ng Pamilya sa Pumarito Ka, Sumunod Ka sa Akin

Pakikinig sa Tinig ng Diyos

3 Nephi 11:5

Sa 3 Nephi 11, mababasa natin kung paanong hindi narinig ng mga Nephita ang tinig ng Diyos hanggang sa ibaling nila ang kanilang mga mata sa tinig at buksan nila ang kanilang mga tainga.

1. Tumayo sa tapat ng isang tao. Tumalikod ka para hindi kayo nagkakatinginan.

2. Isa sa inyo ang tagapagsalita, at ang isa naman ang tagapakinig. Patakpan sa tagapakinig ang kanyang mga tainga.

3. Ipasabi sa nagsasalita ang isang parirala sa mahinang tinig, tulad ng “Sinisikap kong tularan si Jesus.”

4. Tingnan kung masasabi ng tagapakinig ang sinasabi ng tagapagsalita.

5. Ngayon ay ipaalis sa tagapakinig ang takip sa kanyang mga tainga at paharapin sa taong nagsasalita.

6. Uulitin ng tagapagsalita ang parirala ding iyon.

Talakayan: Mas madali bang marinig ang tinig nang humarap ang tagapakinig sa tagapagsalita? Basahin ang 3 Nephi 11:5. Paano mo ibabaling ang iyong mga mata at bubuksan ang iyong mga tainga sa tinig ng Diyos ngayon?

Mula sa Magasing Para sa Lakas ng mga Kabataan

Mamuhay sa Liwanag ng Tagapagligtas

Alamin mula kay Elder Dieter F. Uchtdorf kung paano ka maaaring akayin ng kapangyarihan ng Tagapagligtas na magpagaling at magpalakas palabas ng kadiliman kapag nagsisisi ka.

Mas Malusog na Pag-iisip

Nagbahagi si Sister Tamara W. Runia ng ilang ideya para mapabuti at mapanatili ang mabuting kalusugan ng pag-iisip at manatiling malapit sa Espiritu.

Hindi Laging Sikat Pero Laging Nagpopropesiya

Tulad ng itinuro ni Samuel na Lamanita, hindi palaging sikat ang mga propeta, pero itinuturo nila sa atin ang kailangan nating marinig.

Mula sa Magasing Kaibigan

Pagkatutong Magsisi

Basahin ang mensahe ni Pangulong Dallin H. Oaks para matulungan ang iyong mga anak na matutuhan ang tungkol sa pagsisisi.

Hello mula sa Zimbabwe!

Kilalanin ang kaibigan nating si Sariah mula sa Zimbabwe at alamin kung paano niya sinusunod si Jesus.

Tulong sa Pumarito Ka, Sumunod Ka sa Akin

Maghanap ng lingguhang masasayang aktibidad para tulungan ang inyong pamilya na matuto mula sa Aklat ni Mormon.

Malulusog na Puso’t Isipan

Sa Bahaging Nakatatandang mga Bata, maghanap ng mga kuwentong pambata at resources tungkol sa kalusugan ng isipan.