25

Ngai Bon Kaain Ana Ekaretia Iesu Kristo Ibukiia aika Itiaki ni Boong Aika Kaitira

Te Kabwarabwara Ibukin te Tia Reirei

N te aro bwa ko na tauraoi n te tamnei n anga te reirei aei, taiaoka warekii ao n iangoi raoi bwaai aikai:

Ngke e mena Iesu iaon te aba, E katea Ana Ekaretia. Imwiin Taurakin Kristo ao mateia Abotoro, bwaninin te euangkerio e bua, ao te Ekaretia ae koaua e anaaki mai iaon te aba. Rinanon te Burabeti Iotebwa Timiti, bwaninin te euangkerio e a manga kaokaki, ao Ana Ekaretia Iesu Kristo ae e koaua e a manga roko iaon te aba riki. (Taraa D&C 1:15–30; Rongorongon—Iotebwa Timiti 1:68–72.)

Te Katauraoi

• Uota kaobiin bootaki aika tabu. Mwaakena D&C 115:4 bwa e aonga ni bebete rekena iroum.

• Uota tamnein te Beretitenti n te Ekaretia ae ngkai, ngkana e tauraoi.

Reiakinan Waaki Ni Kakukurei

Moanna ma waaki ni kakukurei ni bootaki. Ibukin iango, taraa iteraniba 3.

Tataro

Kaoa te ataei bwa e na anga te tataro ni kaukuki.

Te Tamnei

Katea ieta te tamnei iaon te iteraniba 106. Tuangiia ataei bwa aio tamnein Iesu Kristo ao ngaira kaain Ana Ekaretia. Kotea te tamnei ao titiraki, “Antai aio?”

Rekena: “Iesu Kristo.”

Koroboki Aika Tabu

Tuangiia ataei bwa Iesu e tuangiira aran te Ekaretia inanon booki aika tabu. Kauki booki aika tabu ao wareka D&C 115:4: “Mangaia ae e riai au ekaretia n aranaki ni kabanean boong, bwa Ana Ekaretia Iesu Kristo Ibukiia aika Itiaki ni Boong Aika Kaitira.” Kaoia ataei bwa ana kaokiokia n taekina aran te Ekaretia ma ngkoe, tabeua taeka n te taina.

Taua ieta am kaobii ni booki aika tabu. Tuangia ataei bwa e tuangiira Iesu bwa tera ae tangiria bwa tina ataia inanon booki aika tabu ao n Ana Ekaretia Iesu Kristo iai ara boki aika tabu. Tuangiia ataei bwa ana kauki baiia ni katangainai aongkoa ae a wareware inanon booki aika tabu. Kaoia bwa ana taekina “Ana Ekaretia Iesu Kristo.”

Kabwarabwaraa bwa Iesu e taetae nakoia Ana burabeti ao bwa n ana Ekaretia Iesu Kristo iai ara burabeti. Kaoia ataei bwa ana taekina “ana Ekaretia Iesu Kristo.” Kaota tamnein te beretitenti n te Ekaretia ae ngkai. Kabwarabwaraa bwa bon ngaia ara burabeti n te bong aei. Kaoia ataei bwa ana taekina arana ma ngkoe.

Anene

Kaoia ataei bwa ana mwaati ni kamnronron inanon teruu ngke ko tabe n anene ke n taekin taeka aikai nakon “Ana Ekaretia Iesu Kristo” (Aia Boki n Anene Ataei 77):

Ngai Bon Kaain Ana Ekaretia Iesu Kristo Ibukiia aika Itiaki ni Boong Aika Kaitira.

I ataia bwa antai Ngai.

I ataa ana baire te Atua.

N na toua mwiina n te onimaki.

Kabaneana

Tibwaua am koaua ni kakimototoa bwa ngaira bon kaain ana Ekaretia Iesu Kristo ni koaua.

Tataro

Kaoa te ataei bwa e na anga te tataro ni kainiin.

Kawai n Angareirei

Tamnei: N te angareirei ma tamnei, te moan tuangiia ataei bwa tera ke antai are n te tamnei. Kotei taekaia n te tamnei ni katabetabei nanoia ataei. Imwiina kaoia ataei bwa ana kaokioka taekana teuana ke uoua taeka ma ngkoe. Ngkana a ongo ao n taekin taeka aikai n aia tai n taraa te tamnei, ao a na moana reiakinan a na uokaburari te euangkeerio.

Kakamwakuri: Ataei ake a roro n netiurii a na rang ni marurung. Kabonganai waaki ni kakukurei ae iai inanona te uboubo, te mwaati, ao te nakonako ni buokiia ataei bwa ana anaaki nanoia.

Waaki ni Kakukurei Aika a Kona n Rineaki

Te Katauraoi

• Ibukin te waaki ni kakukurei n te kara ao te takakaro n te mwaati: Karekea kaobiin te tamnei n te iteraniba 107 ibukiia ataei n tatabemaniia bwa ana karanna. Uota te mwakoro ni beeba ae uarereke ibukiia ataei bwa ana kabonganaa bwa bwaai ni kororobki ibukin te takakaro ni kabotau; uota ae tau ibukiia ataei bwa a na karekei tenua aia bwai ni koroboki n tatabemaniia.

  

  Ngai Bon Kaain Ana Ekaretia Iesu Kristo Ibukiia aika Itiaki ni Boong Aika Kaitira

  Iai ana burabeti Ana Ekaretia Iesu Kristo.

  Iai booki aika a tabu n Ana Ekaretia Iesu Kristo.

Karanakin

Tuangiia ataei bwa a na karana te iteraniba 107. N aia tai ni kara, rinanoi reirei ake a reiakinaki n te reirei. Kotoi kabwarabwarakiia inanon taian tamnei ao kabwarabwaraa nakoia ataei te bwai ae ko karanna. Wareki taeka iaon kabwarabwara n te tamnei nakoia.

Te Takakaro ni Kabootau

Anganiia ataei tenua mwakorokoro ni beeba. Kaota te kabwarabwara n te tamnei iaon te iteraniba 107. Kotea tamnein Iesu ao taekina, “Aio tamnein Iesu Kristo. Ngaira kaain Ana Ekaretia.” Kaoia ataei bwa ana katuka te mwakoro ni beeba iaon tamnein Iesu iaon aia kaobi.

Ngkanne kotea tamnein te burabeti ao wareka te koroboki are iaona. Tuangiia ataei bwa a na taekina “burabeti” ao katuka te mwakorokoro ni beeba iaon aia korotamnei. Kaokia ibukin korean tamnein booki aika tabu. Ngkanne tuangiia ataei bwa a na taekinna ma ngkoe, “Ngai bon kaain Ana Ekaretia Iesu Kristo Ibukiia aika Itiaki ni Boong Aika Kaitira,” tabeua taeka n te taina.

Manga rinanona

Rinea te waaki ni kakukurei man reirei 23 ao teuana mai ibuakon reirei 24 ni buokiia ataei ni manga rinanon bwa tera are atia n reiakin booki aika tabu ao burabeti. Imwiin karaoan waaki ni kakukurei aikai, kauringiia ataei bwa n ana Ekaretia Iesu Kristo iai ara booki aika a tabu ao burabeti.

Kawai n Angareirei

Karanakin: Tiaki ni kabane ataei aika ana kukurei ni kani kara. Tabeman a na bae n ti katanea ti teuana ke uoua te mwaake i aon te iteranibaa. Te kantaninga ibukin te kara ni waaki ni kakukurei n taia n reirei aikai bwa e na anganiia ataei aikai mwiin te reirei n te tamnei are a kona n taua ao ni uotia nakon mweengaia. E aki kakawaki bwa a na karana te tamnei ma te konabwai.

Rinanona: Ataei a reirei man kaokiokana. Kaokioki karaki ke waaki ni kakukurei ake tabeua aika a taraa ni kukurei iai. Ko kona ni karaoa aei n te tai teuana n tain te netiurii kiraati, n aron n tain te tinaeki ke n aia tai ataei n tataningaia aia karo.