6
Te Tamnei ae Raoiroi e Buokai
Te Kabwarabwara Ibukin te Tia Reirei
N te aro bwa ko na tauraoi n te tamnei n anga te reirei aei, taiaoka warekii ao n iangoi raoi bwaai aikai:
Te Tamnei ae Raoiroi bon kaain te Utu n Atua, n raonaki ma Tamara are i Karawa ao Iesu Kristo. Bon te rabwata n tamnei Ngaia (taraa D&C 130:22). Ana mwakuri te Tamnei ae Raoiroi bon te tia kakoaua ibukin te Tama ao te Nati ao ibukin koauan bwaai ni kabane (taraa 3 Nibwaai 11:36; Moronaai 10:5). E kona naba ni kairira bwa tina karaoi rinerine aika koaua ao ni kabebeteira (taraa D&C 31:11). Te kawai are e kona n taetae te Tamnei ae Raoiroi nakoira e kabwarabwaraaki inanon booki aika tabu bwa kanga te “bwanaa ae maraara” (taraa 1 Uea 19:11–12).
Reiakinan Waaki Ni Kakukurei
Moanna ma waaki ni kakukurei ni bootaki. Ibukin iango, taraa iteraniba 3.
Tataro
Kaoa te ataei bwa e na anga te tataro ni kaukuki.
Anene
Tuangiia ataei bwa ko nang anenea te anene ibukin Tamara are i Karawa. Anene ke taekin taekana nakon moan kibun “I Ataia Bwa E Maiu Tamau” (Aia Boki n Anene Ataei 5) ao ni karaoi mwakuri aika oti inano. Kaoia ataei bwa a na raoniko.
I ataia bwa e maiu Tamau ao e tangirai naba. (taua baim nakon bwabwam)
Te Tamnei ae Raoiroi e wirikirikia aei nakoiu ao e tuangai bwa e bon koaua, (kamronrona baim nakon taningam)
Ao e tuangai bwa e bon koaua.
Kaokan Karaoan Waaki ni Kakukurei
Kaoia ataei bwa ana taekina “Tamnei.” Tuangiia bwa aran Tamnein te Atua teuana bon te Tamnei ae Raoiroi. Kaoia ataei bwa ana taekina “Tamnei ae Raoiroi.” Kabwarabwara bwa te Tamnei ae Raoiroi e buokiira bwa ti na ataia bwa Tamara are i Karawa e tangirira
Kabwarabwaraana n te Kaotioti
Tuangiia ataei bwa ngkana ti karaoa ae eti, ao e na buokiira te Tamnei ae Raoiroi bwa ti karaoa te rinerine ae eti. Kaoia ataei bwa ana raoniko ngkana ko katei kabwarabwaraana n te kaotioti aika eti. Te katoto:
Bon te bwai ae eti bwa ko na nakon te taromauri. Ti a karaoa ae ao ngkoa ti a nako n taromauri (katiotioi baimi ngkana kam nakonako n te mronron).
Kaokiokia ma katoto riki ake tabeua, n aron tibwauaan te taore, buoka Tinam n taea aontano, ao a mwaiti riki.
Karaki
Kabwarabwara bwa e kona te Tamnei ae Raoiroi ni buokiira ngkana ti maaku. Taekina te karaki aei:
N te bong teuana ao iai te angibuaka ae korakora itinanikun ana auti David. Iai te rurunga ae korakora (tuangiia ataei bwa ana rabuna taningaia) ao te ang ae korakora (tuangiia ataei bwa ana katotonga te ang) ao te karau (tuangiia ataei bwa ana katotonga te karau ni baia). David e maaku. Tinana e tuangnga bwa ngkana e maaku ao e na tataro nakon Tamana are i Karawa (kaota te tamnei n te iteraniba 30. David ao tinana a tataro bwa e na kawakiniia Tamara are i Karawa. Ngkanne David e namakina te kawakinaki ao te kukurei. E taekinna tinana bwa e a tia Tamara are i Karawa ni kanakomaia te Tamnei ae Raoiroi n anganna taian namakin aikanne bwa e aonga n aki maaku.
Kaoia ataei bwa ana taekina “Tamnei ae Raoiroi.”
Kabaneana
Tibwaua am koaua iaon te Tamnei ae Raoiroi. E kona n ae te bwai ae ko a tia n rinanona ni maium ae bebete man uarereke ngke ko kairaki iroun te Tamnei ae Raoiroi.
Tataro
Kaoa te ataei bwa e na anga te tataro ni kainiin.
Waaki ni Kakukurei Aika a Kona n Rineaki
Te Katauraoi
-
Ibukin waaki ni kakukurei iaon koroboki aika tabu: Uota kaobiin te Baibara. Mwaakena Ioane 14:26 bwa e aonga ni bebete rekena iroum.
-
Ibukin kamatataan waaki ni kakukurei n te tamnei: Karekea kaobiin te tamnei n te iteraniba 31 ibukiia ataei n tatabemania.
Te Tamnei ae Raoiroi E Buokai
Nakon te taromauri
Tataro
Bwaina te nanoanga
Karineia kaaro
Wareki booki aika tabu
-
Ibukin te tatakaro n te kiubi: Karekea kaobiin te tamnei n te iteraniba 31 ao karanna ngkana e kainnanoaki. Korei n irii rain ake a turu taneia ao rukumma iaon rain ake a katanetaneaki. Teibin ke kuruun mwakorokoro ni karaoa te kiubi.
Kibun te Kamate nano
Karaoa te kamronron ma ataei ao kaokioki n taekin kibun waaki ni kakukurei aikai:
Te Tamnei ae Raoiroi e taetae ni maraara. (katuka tabonibaim iaon riam)
E aki kona n takarua, e boni koaua. (kamroron baim ni katobibia wiim ae kanga ko takarua)
E na kakabwaiako ao ni buokiko ao ni kairiko (tomai baimi ao nakonako ni kamronron)
Ni bwaai ni kabane aika ko karaoi. (tekateka inano)
Koroboki aika Tabu
Tuangiia ataei bwa Iesu e reirei inanon booki aika a tabu bwa te Tamnei ae Raoiroi e na reireiniira. Kauka te baibara nakon Ioane 14:26 ao wareka, “Te Tamnei ae Raoiroi … e na reireiniko ni bwaai ni kabane.” Kaoia ataei bwa ana kaokioka te kibuntaeka ma ngkoe, tabeua taeka n te taina.
Kamataata n te Korotamnei
Katea ieta te tamnei are iaon te iteraniba 31 ao anganiia ataei n tatabemaniia kaobiin te kamatata. Kotea tamnein a na kateitei te Ekaretia ao kabwarabwara bwa te Tamnei ae Raoiroi e buokiira n ataia bwa te nako n taromauri bon te bwai ae riai ni karaoaki. Kaoa te ataei bwa e na kotea ana kateitei te Ekaretia iaon aia kaobii. Kaokiokia ibukin te kamaatata n te tamnei riki tabeua.
Te Tatakaro n te Kiubi
Karabinoa te kiubi are ko karaoia. Wareka te taeka i aon te kiubi, ao tuangiia ataei bwa ana taekinna ma ngkoe. Tuangiia ataei bwa ana katea kaina ae bebete are e na nakoraoi ma te tamnei. Ngkana iterana are iai te taeka “E Buokai te Tamnei ae Raoiroi ” e waerake, tuangiia ataei bwa te Tamnei ae Raoiroi e buokiira bwa ti na ataia ngkana ti a tia ni karaoa te bwai teuana ae tamaroa. Kaokia, anganiia aia tai ataei ni karabinoa te kiubi.
