26

N Na Bwabetitoaki ao ni Kamatoaki

Te Kabwarabwara Ibukin te Tia Reirei

N te aro bwa ko na tauraoi n te tamnei n anga te reirei aei, taiaoka warekii ao n iangoi raoi bwaai aikai:

E bwabetitoaki Iesu Kristo bwa e na kaotia “nakon te Tama bwa e na ongeaba nakoina ni kawakin ana tua” ao ni katea te banna ni katoto ibukira (taraa 2 Nibwaai 31:7, 9; taraa naba Mataio 3:13–17). Ngkana ti bwabetitioaki, ti kaotia naba bwa ti kukurei n ira te Tia Kamaiu ao n ongeaba nakon Ana tua. Imwiin bwabetitoakin Iesu, “ao e ruo nakoina te Tamnei ae Raoiroi” (2 Nibwaai 31:8). Imwiin are ti bwabetitoaki, ti a anganaki ana bwaintituaraoi te Tamnei ae Raoiroi rinanon te otenanti n te kamatoaak. E nanonaki n aei bwa ti kona ni karekea ana iraorao te Tamnei ae Raoiroi ngkana ti kawakin taian tua.

Reiakinan Waaki Ni Kakukurei

Moanna ma waaki ni kakukurei ni bootaki. Ibukin iango, taraa iteraniba 3.

Tataro

Kaoa te ataei bwa e na anga te tataro ni kaukuki.

Te Tamnei

Kaota tamnein Iesu Kristo ngke e bwabetitoaki (iteraniba 110). Kaoti kamatatakiia n te tamnei (Iesu, te ran, Ioane te Tia Bwabetito, ao e nako riki). Kabwarabwaraa bwa e bwabetitoaki Iesu bukina bwa E tangira Tamara are i Karawa ao e tangiria ni kan ongeaba Irouna. Kaoia ataei bwa ana taekina “Iesu” ao “ni bwabetitoaki” ma ngkoe.

Jesus being baptized

Boem

Kotoi iteran te tamnei aika kakaokoro ngkana ko kaokioki taekan moan ni kibun te “Bwabetito” (Aia Boki n Anene Ataei 100–101). Kaoia ataei bwa ana kotoia ma ngkoe.

Iesu e nakon Ioane te Tia Bwabetito, (kotea Iesu, ao imwiina Ioane)

I Iutea n taai ake rimoa,

Ao e bwabetitoaki n te kateboaki

N ranin te Karaanga are Ioretan. (kotea te ran)

Ko na bae n tangiria ni kabwarabwaraa bwa “te kateboaki” nanona bwa e bane rabwatan Iesu ni kabane iaan te ran ngke E bwabetitoaki.

Te Tamnei

Kaota tamnein te ataeinaine ngke e bwabetitoaki (iteraniba 110) ao kaoti bwaai aika ti tebo inanon tamnei aika uoua aikai. Tuangiia ataei bwa a kona ni bwabetitoaki, n aron Iesu, ngkana a koro wanua aia ririki. Katei baai aika wanua, aua ni kauaai baim, ao wareki. Kaokia, ao kaoia ataei bwa ana karaoia ma ngkoe. Katuruturua ni kabwarabwaraa bwa te bwabetitoaki bon te kawai teuana ae ti kona n ira iai Iesu; ngkana ti bwabetitoaki ti kaotia bwa ti tangira Tamara are i Karawa ao n tangiria n ongotaeka Nakoina.

girl being baptized

Te Kabwarabwara n taian Tamnei

Kaota te tamnei iaon te iteraniba 111. Taetae nakoia ataei iaon te bwai are e riki n te tamnei. Kabwarabwaraa bwa imwiin are ti bwabetitoaki, ti a kamatoaaki. Kaoia ataei bwa ana taekina “kamatoaaki.” Tuangiia bwa e nanonaki ikai bwa mwaane ake iai irouia te nakoanibonga a na katokai baiia iaon atuura n anganiira ana bwaintituaraoi te Tamnei ae Raoiroi.

coloring page, baptism and confirmation

N Na Bwabetitoaki

N Na Kamatoaaki

Kabaneana

Kaoa te ataei bwa e na taekina, “N na bwabetitoaki ao ni kamatoaki,” tabeua taeka n te taina. Kabwarabwaraa ni kakomototoa nakoia ataei aron am namakin ngke ko bwabetitoaki ao ni kamatoaaki.

Tataro

Kaoa te ataei bwa e na anga te tataro ni kainiin.

Kawai n Angareirei

Tamnei: Ngkana iai uoua tamnei iaon te iteraniba ae ti teuana, ko kona ni buokiia ataei n ti kabanea aia iango iaon teuana te tamnei man rabuna are teuana.

Ataei aika uarereke: Tabeman ataei, riki ataei ake a rangin ni uarereke, ana aki kona n oota ni bwaai ni kabane ake a kabwarabwaraaki n reirei aikai. E ngae n anne, ti reiakin bwaai tabeua ni katoa wiiki, ao ko buokiia bwa ana namakina te tamnei ao n taneiai ma taeka ao kiibu man te euangkerio.

Waaki ni Kakukurei Aika a Kona n Rineaki

Te Katauraoi

• Ibukin waaki ni kakukurei iaon koroboki aika tabu: Uota kaobiin Ana Boki Moomon. Mwaakena 3 Nibwaai 12:1 bwa e aonga ni bebete rekena iroum.

• Ibukin te takakaro ni keeti: Kaobiia te tamnei are n te iteraniba 111 ao karanii ngkana a kainnanoaki. Rukuma te beeba nakon iterana n te aro bwa te kabwarabwara n te bwabetito e kaotaki n iterana are teuana ao te kamatoa e karaoaki n iterana are teuana.

• Ibukin te waaki ni kakukurei n te kara: Kaobiina te tamnei are iaon te iteranbia 111 ibukiia ataei bwa ana karanna.

Koroboki aika Tabu

Tuangiia ataei bwa Iesu Kristo e tuangiira ni booki aika tabu bwa e tangiriira bwa tina bwabetitoaki. Kauka ana Boki Moomon nakon 3 Nibwaai 12:1 ao e taetae, “E taku Iesu, ‘Onimakinai ao kona bwabetitoaki.’ ” Kaoia ataei bwa ana kaokiokia n taekina te kibu n taeka ma ngkoe, tabeua taeka n te taina. Kauringiia bwa a kona ni bwabetitoaki ngkana e koro waniua aia ririki.

Te Takakaro ni Keeti

Kaotia nakoia ataei kaobiin tamnein te bwabetito, wareka kabwarabwaraan te tamnei, ao kaoa te ataei bwa e na taekina “bwabetito.” Raira te iteranibaa, ao kaokioka taekana ni kakoaua raoi te tamnei.

Karaba te tamnei i akuum. Ao kaotia nakoia ataei rarikin te iteranibaa, ao titiraki, “Te ataei ni mwaane aei e bwabetitoaki ke kamatoaki?” Kaoa te ataei bwa e na taekina te reke mang ngkoe. Manga karaba riki te tamnei i akuum ao kaokioka te waaki ni kakukurei ni karokoa ae toki nanoia ataei. Te waaki ni kakukurei aei e kaineti riki nakoia ataei aika a ikawai riki.

Karanakin

Anganiia ataei bwa ana karana te tamnei i aon te iteranibaa 111. N aia tai ni kara, rmanga rinanon moan tua ake reireiaki n te reirei. Kotei mwakoro aika kakawaki n te tamnei, wareka kabwarabwaraan te tamnei nakoia ataei, ao kabwarabwaraa nakoia bwa tera are a karanna.

Kawai n Angareirei

Karaoan kaobii: Ngkana akea te mitiin ni kaobii , ko kona ni katuka te beeba ae aki korobokiaki iaon te tamnei ao katanea n te bentira ke te been. Tai tabe ma katanean bwaai ni kabane; ti katanea tinanikuna ao rongorongona ae tau bwa e aonga ni kinaaki te tamnei

Karanakin: “Kaungaia [ataei] ni kaoti aia tamnei nakoiia aia utu. Aio e na buokiia n uringa te bwai ae a tia n reiakinna. E na anganiia naba kaaro aia tai ni marooroakin reirein te euangkerio ma aia ataei” (Teaching, No Greater Call 167).