Mataupu 59
Ua Maea Ona Fausia o le Malumalu i Navu
Oketopa 1854–Setema 1846
Sa lei o ese nisi o le au paia mai Navu. Sa faatonu mai e le Alii ia latou fau se malumalu i Navu. Sa latou mananao e usiusitai ia te ia. Sa galulue malosi uso o le au paia sa nonofo pea i Navu i le fauga o le malumalu.
Sa toatele tagata o le au paia sa mamai. Sa matitiva foi le toatele o i latou. Sa latou iloa e tatau ona latou o ese vave mai Navu. Peitai sa latou mananao e fai ia uma lelei le malumalu.
Sa oo ina uma ona fai o le malumalu, ma fai ai e le au paia sauniga o le malumalu i le ao ma le po atoa. Sa tuuina atu ia i latou le faaeega paia. Sa latou fiafia lava ua latou maua se malumalu.
Sa oo ioa ina tatau ona o ese ma Navu le vaega o le au paia na totoe ai. Sa latou uta a latou mea totino uma i taavale toso. Sa latou sopoia le vai tafe o le Misisipi ma malaga ese.
Sa latou toe tutu ma toe tepa i tua i lo latou nuu pele o Navu. Sa latou iloa atu le malumalu o tu mai i luga o le maupuepue. Sa latou faanoanoa lava e o ese mai Navu. Peitai sa latou fiafia ua uma ona latou fau o le malumalu o le Alii.
Sa nonofo le au paia i tafatafa o le vai tafe mo ni nai aso. Sa le lava a latou mea ’ai. Sa fesoasoani mai ia i latou le Alii. Sa ia auina mai ni manu lele e ta’u o le salu. Sa pu’e e le au paia ia manu ma ’a’ai ai.
Ona auina atu lea e Polika laga nisi alii e fesoasoani i le au paia. Sa o atu ia uso ma ave i latou i le mea na tolauapi ai isi o le au paia.