Ang Martir na Pagkamatay ni Propetang Joseph Smith

Ang mga tumiwalag sa Simbahan at ang mga kalaban ng Simbahan ang nagpasimuno sa planong patayin sina Propetang Joseph Smith at ang kanyang kapatid na si Hyrum Smith. Ang kanilang pagkamatay ay nagdagdag ng malakas na tatak sa kanilang mga patotoo sa Aklat ni Mormon, sa Doktrina at mga Tipan, at sa ipinanumbalik na ebanghelyo ni Jesucristo. Ang pag-aaral tungkol sa buhay at pagkamatay bilang martir ni Propetang Joseph Smith ay makatutulong sa mga estudyante na pag-isipan ang maraming pagpapala na ibinigay sa kanila ng Panginoon sa pamamagitan ng ministeryo ni Propetang Joseph Smith, na kinasangkapan Niya upang maipanumbalik ang Kanyang ebanghelyo sa mga huling araw.

Mga Babasahin Tungkol sa Paksang Ito

Thomas S. Monson, “Si Propetang Joseph Smith: Huwarang Guro,” Ensign o Liahona, Nob. 2005, 67–70.
“The Martyrdom,” kabanata 22 sa Church History in the Fulness of Times Student Manual, Ika-2 ed. (Church Educational System manual, 2003), 273–85.
“Ang Pagkamatay Bilang Martir: Tinatakan ng Propeta ng Kanyang Dugo ang Kanyang Patotoo,” kabanata 46 sa Mga Turo ng mga Pangulo ng Simbahan: Joseph Smith (2007), 617–32.

Mga Mungkahi sa Pagtuturo

Doktrina at mga Tipan 135:4–5; 136:36–39

Hinangad ng mga kaaway na patayin si Joseph Smith

Magdispley ng larawan ng Carthage Jail. Ipaliwanag sa mga estudyante na noong Hunyo 27, 1844, si Propetang Joseph Smith at ang kanyang kapatid na si Hyrum, na Patriarch sa Simbahan, ay pinatay bilang martir sa piitang ito sa Carthage, Illinois. Si Joseph Smith ay 38 taong gulang nang siya ay mamatay, at si Hyrum ay 44.

Ipabasa nang malakas sa isang estudyante ang Doktrina at mga Tipan 136:36–39 habang tahimik na sumasabay ang klase. Hikayatin ang mga estudyante na habang nagbabasa sila ay tukuyin kung paano ibinuod ng Panginoon ang buhay ni Joseph Smith at ang gawaing ginawa niya. Pagkatapos ay talakayin ang sumusunod na tanong:

Paano inilarawan ng Panginoon ang buhay at gawain ni Propetang Joseph Smith? (Maaaring kabilang sa mga sagot ang mga sumusunod na katotohanan: Inilatag ni Joseph Smith ang pundasyon para sa gawain ng Diyos sa dispensasyong ito ng ebanghelyo. Si Propetang Joseph Smith ay walang kasalanan sa oras ng kanyang kamatayan, at tapat niyang ginampanan ang misyong ibinigay sa kanya ng Diyos.)

Upang matulungan ang mga estudyante na maunawaan ang ilan sa mga impluwensyang humantong sa pagkamatay ng propeta, sabihin sa kanila na ang mga Banal ay nanirahan nang payapa sa estado ng Illinois sa loob ng tatlong taon, ngunit noong 1842, muli nilang dinanas ang oposisyon. Ang mga kalaban ng Simbahan ay kinabibilangan ng mga mamamayan ng Illinois na natakot sa impluwensya sa pulitika ng mga Banal. Ang ilan ay nainggit sa pag-unlad ng ekonomiya ng Nauvoo at pinuna ang kapangyarihan ng pamahalaan at militia ng lunsod ng Nauvoo. May mga ibang mali ang pagkaunawa sa ilang naiibang mga doktrina at gawain ng mga Mormon. Ang mga sumasalungat sa Simbahan at ang mga kalaban sa labas ng Simbahan ay nagsanib-pwersa upang labanan ang Propeta at ang Simbahan.

Mamahagi ng kopya ng handout na nasa katapusan ng lesson na ito sa bawat estudyante. Ipabasa nang malakas sa isang estudyante ang bahaging pinamagatang “Pagsalungat sa Propeta at sa Simbahan.”

Ipaliwanag na alinsunod sa mga ipinatutupad na batas sa panahon ng pagkamatay ng propeta, walang batas na nilabag nang wasakin ang palimbagan. Ipakita ang sumusunod na pahayag ni Elder Dallin H. Oaks ng Korum ng Labindalawang Apostol:

“Ang pagsususog sa konstitusyon ng Estados Unidos na nagpalawak ng garantiya sa malayang pamamahayag upang maprotektahan ito laban sa mga gawain ng mga pamahalaan ng lungsod at estado ay hindi pa naipatupad bago sumapit ang 1868, at hindi ito naipatupad bilang pederal na batas hanggang 1931. … Dapat nating hatulan ang mga ginawa ng mga nauna sa atin batay sa mga batas at kautusan at sa kalagayan ng kanilang panahon, hindi ng sa atin” (“Joseph, the Man and the Prophet,” Ensign, Mayo 1996, 72).

Bakit mahalagang tandaan ang huling pangungusap sa pahayag ni Elder Oaks habang iniisip natin ang mga ginawa ng mga naunang lider ng Simbahan? (Maaari mong ipaliwanag na ang karamihan sa mga miyembro ng Konseho ng lungsod ng Nauvoo ay miyembro ng Simbahan, ngunit kumikilos sila sa kanilang katungkulan bilang halal na kawani nang kanilang ipag-utos na wasakin ang palimbagan. Ang Simbahan bilang isang organisasyon ay hindi gumawa ng aksyon laban sa palimbagan, ngunit gumawa ng aksyon ang konseho ng lungsod upang “pahupain ang … kaguluhan” [sa History of the Church, 6:432]).

Ipabasa nang malakas sa isang estudyante ang bahagi ng handout na may pamagat na “Sina Joseph at Hyrum ay Pinaratangan nang Mali.” Ipabasa nang malakas sa isang estudyante ang Doktrina at mga Tipan 135:4. Sabihin sa klase na tahimik na sumabay sa pagbasa, na inaalam ang propesiya noong naglakbay siya patungong Carthage.

Kahit hindi perpekto ang bawat tao, ano sa palagay ninyo ang kailangang gawin ng isang tao para magkaroon ng “budhi na walang kasalanan sa harapan ng Diyos, at sa lahat ng tao”? (D at T 135:4).

Ipaliwanag na habang naghahanda si Hyrum sa pagpunta sa Carthage Jail, binasa niya ang Eter 12:36–38 at pagkatapos ay itinupi ang pahina. Ipabasa nang malakas sa isang estudyante ang Doktrina at mga Tipan 135:5, na isang direktang sipi ng mga talatang ito mula sa Eter, habang tahimik na sumasabay ang klase. Sabihin sa mga estudyante na pag-isipan kung bakit makahulugan kay Hyrum ang scripture passage na ito. Maaari mong imungkahi sa mga estudyante na markahan nila ang anumang salita o parirala na pinakanapansin nila.

Anong mga partikular na mga salita o parirala sa mga talatang ito mula sa Aklat ni Eter ang sa palagay ninyo ay makahulugan kay Hyrum nang maranasan niya ang pagkabilanggo at posibleng kamatayan?
Ano sa palagay ninyo ang ibig sabihin ng sumusunod na parirala: “Malalaman ng lahat ng tao na hindi nabahiran ng inyong dugo ang aking mga kasuotan”? (Maaari mong sabihin sa mga estudyante na i-cross-reference ang talata 5 sa Jacob 1:19 at Mosias 2:27 upang malaman ang kahulugan ng pariralang ito. Ang matutuhang mag-cross-reference ng isang scripture passage sa iba pang mga talata na nagbibigay ng karagdagang kaalaman ay mahalagang kasanayan sa pag-aaral ng banal na kasulatan.)

Sabihin sa mga estudyante na isipin kung ano ang maaaring nadama nina Joseph at Hyrum sa pagkabatid na nagampanan nila ang kanilang mga katungkulan at tungkulin mula sa Diyos sa abot ng kanilang makakaya.

Ano ang matututuhan natin mula sa mga halimbawa nina Joseph at Hyrum Smith na makakatulong sa atin na magampanan ang mga responsibilidad na tinatanggap natin mula sa Diyos?

Doktrina at mga Tipan 135:1–3, 6–7

Pagkamatay Bilang Martir sa Carthage Jail at Pagpaparangal kay Joseph Smith

Ipabasa nang malakas sa isang estudyante ang section heading ng Doktrina at mga Tipan 135. (Maaari mong ipaliwanag na ang mga pagkakaiba sa heading na ito noong 1981 at 2013 na edisyon ng mga banal na kasulatan ay nagpapakita ng mga bagong kaalaman.) Sabihin sa ilang estudyante na magsalitan sa pagbasa nang malakas ng Doktrina at mga Tipan 135:1–2 at ang bahagi ng handout na may pamagat na “Kamatayan Bilang Martir sa Carthage Jail.” Sabihin sa klase na tahimik na sumabay sa pagbasa habang nagbabasa ang mga estudyanteng ito.

Ano kaya ang ibig sabihin ng pariralang “upang tatakan ang patotoo ng aklat na ito at ng Aklat ni Mormon”?

Habang ibinabahagi ng mga estudyante ang nasa isipan nila, maaari mong isulat sa pisara ang sumusunod na kahulugan: ang “tatakan ” ay ang matibay na pagtatatag ng isang bagay, tulad ng patotoo. Maaari mo ring imungkahi sa mga estudyante na isulat ang alituntuning ito sa kanilang banal na kasulatan sa tabi ng talata 1.

Ipabasa nang tahimik sa mga estudyante ang Doktrina at mga Tipan 135:3, 6–7, na inaalam ang ilan sa mga katotohanang nalaman natin mula sa pahayag na ito ng pagiging martir nina Joseph at Hyrum Smith.

Anong mga katotohanan ang natutuhan ninyo sa pagpapabatid ng pagiging martir nina Joseph at Hyrum Smith? (Maaaring matukoy ng mga estudyante ang maraming katotohanan, kabilang ang sumusunod: Si Joseph Smith ay nakagawa ng higit pa para sa kaligtasan ng mga tao sa daigdig na ito kaysa sa sinumang tao maliban kay Jesucristo. Ang Aklat ni Mormon at ang Doktrina at mga Tipan ay inilabas para sa kaligtasan ng sanlibutan.)
Sa palagay ninyo sa anu-anong tiyak na paraan maiiba ang buhay ninyo kung wala ang ministeryo ni Propetang Joseph Smith?

Ipabasa nang malakas sa isang estudyante ang pahayag ni Elder Dallin H. Oaks na matatagpuan sa handout section na may pamagat na “Mga Pagpaparangal kay Propetang Joseph Smith.”

Bakit mahalagang malaman na ang mga taong nakasama ni Joseph Smith ay itinuturing siya bilang isang propeta at isang “kagalang-galang, at marangal na tao”?

Magtapos sa pagtatanong sa mga estudyante kung mayroon sa kanilang gustong magbahagi ng kanilang patotoo tungkol kay Joseph Smith. Hikayatin ang mga estudyante na maghanap ng mga oportunidad sa susunod na ilang araw na ibahagi sa iba ang kanilang patotoo tungkol kay Propetang Joseph Smith at sa kanyang tungkulin sa pagpapanumbalik ng ebanghelyo ni Jesucristo.

Mga Babasahin ng mga Estudyante

Doktrina at mga Tipan 135:1–7; 136:36–39.
Thomas S. Monson, “Si Propetang Joseph Smith: Huwarang Guro,” Ensign o Liahona, Nob. 2005, 67–70.
“The Martyrdom,” kabanata 22 sa Church History in the Fulness of Times Student Manual, Ika-2 ed. (Church Educational System manual, 2003), 273–85.

Ang Martir na Pagkamatay ni Propetang Joseph Smith

Mga Pundasyon ng Panunumbalik—Lesson 22

Pagsalungat sa Propeta at sa Simbahan

Noong Hunyo 1844, tumindi ang galit ng mga tao sa Simbahan. Ilang mamamayan sa Illinois ang nag-usap-usap na itaboy ang mga Banal mula sa estado, habang ang iba ay nagpaplanong patayin ang propeta. Ilan sa mga taong nagsabwatan laban sa propeta at sa Simbahan ay dating mga miyembro ng Simbahan na nagsitalikod. Noong Hunyo 7, 1844, si William Law, na naglingkod bilang pangalawang tagapayo sa Unang Panguluhan, at iba pang mga tumalikod ang naglimbag ng unang isyu ng Nauvoo Expositor. Sa tangkang udyukang magalit ang publiko laban sa propeta at sa Simbahan, ginamit ng mga taong ito ang pahayagan upang siraan si Joseph Smith at ang iba pang mga lider ng Simbahan. Si Joseph Smith, na tumatayong alkalde ng lungsod, at ang karamihan sa konseho ng lungsod ng Nauvoo ay natanto na ang nagpapagalit na ulat ng pahayagan ay maaaring humantong sa marahas na pagsalakay ng mga tao laban sa lungsod. Idineklara nila na nagdudulot ng kaguluhan sa publiko ang pahayagan at iniutos na wasakin ang palimbagan ng Nauvoo Expositor.

Sina Joseph at Hyrum ay Pinaratangan nang Mali

“Dahil sa [pagwasak sa Nauvoo Expositor] ng mayor at konseho ng lungsod, ang mga awtoridad ng Illinois ay nagsampa ng kasong walang batayan laban sa Propeta, kanyang kapatid na si Hyrum, at iba pang mga opisyal ng lungsod ng Nauvoo. Ipinag-utos ng gobernador ng Illinois, si Thomas Ford, ang mga lalaki na humarap sa paglilitis sa Carthage, Illinois, ang sentro ng bayan, at pinangakuan sila ng proteksyon. Alam ni Joseph na kung siya ay magtutungo sa Carthage, manganganib ang buhay niya mula sa mga mandurumog na nagbabanta sa kanya.

“Dahil naniniwala na sila lamang ang gusto ng mga mandurumog ipinasiya nina Joseph at Hyrum na umalis papuntang Kanluran para iligtas ang kanilang buhay. Noong Hunyo 23, tinawid nila ang Ilog ng Mississippi, ngunit kalaunan nang araw na iyon, natagpuan ng mga kapatid na kalalakihan ang Propeta at sinabi sa kanyang lulusubin ng mga kawal ang lungsod kung hindi siya susuko sa mga awtoridad sa Carthage. Pumayag na sumuko ang Propeta, umaasang makapagpapakalma ito sa mga opisyal ng gobyerno at mga mandurumog. Noong Hunyo 24, nagpaalam sina Joseph at Hyrum Smith sa kanilang pamilya at kasama ang iba pang mga opisyal ng lungsod ng Nauvoo ay nagpunta sila sa Carthage at kusang sumuko sa mga opisyal ng bayan sa Carthage kinabukasan. Matapos mapakawalan sa pamamagitan ng piyansa ang magkapatid, pinaratangan sila ng rebelyon laban sa estado ng Illinois, hinuli, at ikinulong sa Carthage Jail habang naghihintay ng paglilitis. Kusa silang sinamahan nina Elder John Taylor at Willard Richards, tanging mga miyembro ng Labindalawa na hindi naglilingkod noon sa misyon” (Mga Turo ng mga Pangulo ng Simbahan: Joseph Smith [2007], 619).

Kamatayan Bilang Martir sa Carthage Jail

Sa araw na iyon noong Hunyo 27, 1844, isang bisita ang nagbigay kay Joseph ng rebolber. Nang tangkaing pasukin ng mga mandurumog ang silid kung saan nakakulong ang Propeta at iba pang kalalakihan, si Hyrum ay binaril at napatay, sa hangaring depensahan ang lahat ng nasa silid. Mabilis na tinakbo ni Joseph ang pintuan at nagtago sa haligi ng pinto upang paputukan ng baril ang pasilyo. Tatlo sa anim na bala lamang ang pumutok, na sumugat sa ilang miyembro ng mga mandurumog. Pagkatapos ay sapilitang itinutok ng mga mandurumog ang kanilang mga baril sa nakaawang na pinto, at hinampas ni John Taylor ng tungkod ang kanilang mga baril.

Nang tumindi na ang kaguluhan sa pintuan, sinubukang tumakas ni John Taylor sa pamamagitan ng pagtalon sa bintana. Nang tangkang tatalon na siya sa bintana, nabaril siya sa hita mula sa balang nagmula sa may pintuan at isa pang balang nagmula sa labas. Bumagsak siya sa sahig, at habang tinatangkang magtago sa ilalim ng kama sa tabi ng bintana, malubha siyang nasugatan sa tatlo pang mga tama ng bala. Samantala, nang nakaumang na ang mga baril sa may pintuan, sinimulang paghahampasin ito ni Willard Richards ng baston.

Ipinasiya ni Joseph Smith na tumakas sa pagtalon sa bintana. Habang patuloy na inililihis ni Willard Richards ang mga mandurumog sa pintuan, lumundag ang propeta sa bukas na bintana. Nang gawin niya ito, pinaulanan siya ng mga balang nagmula sa loob at labas ng piitan. Nahulog siya sa labas ng bintana, na humihiyaw ng “O Panginoon, aking Diyos!” at lumagpak sa lupa sa ibaba. Ang mga miyembro ng mga mandurumog na nasa loob ng piitan ay nagmamadaling nagsilabasan upang matiyak sa kanilang sarili na patay na si Joseph. Kahit wala namang mga miyembro ng Simbahan ang papunta sa Carthage, may sumigaw ng, “Nagsidatingan na ang mga Mormon!” at tumakas ang buong pangkat ng mga mandurumog.

Mga Pagpaparangal kay Propetang Joseph Smith

Sinabi ni Elder Dallin H. Oaks ng Korum ng Labindalawang Apostol:

“Ang mga taong nakakilalang mabuti kay Joseph at nakasama siya sa pamunuan ng Simbahan ay minahal at sinang-ayunan siya bilang propeta. Pinili ng kapatid niyang si Hyrum na mamatay sa tabi niya. Si John Taylor, na kasama rin niya nang siya ay pinaslang, ay nagsabi: Nagpapatotoo ako sa harapan ng Diyos, mga anghel, at mga tao, na siya ay isang mabuti, kagalang-galang, at marangal na tao—na ang kanyang pagkatao sa pribado man o sa harap ng mga tao ay kapuri-puri—at siya ay nabuhay at namatay bilang isang tao ng Diyos’ (The Gospel Kingdom [1987], 355; tingnan din sa D at T 135:3). Sinabi ni Brigham Young: ‘Sa palagay ko wala ni isa mang tao sa mundo na mas nakakakilala [kay Joseph Smith] kaysa sa akin; at tahasan kong sinasabi na, maliban kay Jesucristo, wala ni isang tao na nabuhay o mabubuhay nang higit sa kanya sa mundong ito’ [Discourses of Brigham Young, pinili ni John A. Widtsoe (1954), 459]” (“Joseph, the Man and the Prophet,” Ensign, Mayo 1996, 73).