ʻAloʻofá

Ko e ʻaloʻofá ʻa e tokoni pe ivi fakalangi naʻe foaki mai kiate kitautolu ʻi he ʻaloʻofa mo e ʻofa ʻa e Tamai Hēvaní mo Sīsū Kalaisí. ʻOku tuʻunga ʻi he ʻaloʻofa ʻa e ʻEikí ʻoku malava ai ʻe Heʻene feilaulau fakaleleí ke toetuʻu ʻa e tokotaha kotoa pē naʻe moʻuí—ʻe toe fakatahaʻi hotau laumālié mo hotau sinó, ʻo ʻikai ʻaupito ke na toe mavahevahe. ʻOku tuʻunga ʻi Heʻene ʻaloʻofá, ʻoku malava ai ʻe he niʻihi ʻoku nau moʻui ʻaki e ongoongolelei ʻa e ʻEikí ke nau fakatomala pea fakamolemoleʻí.

Vakai Fakalūkufuá

Ko e ʻaloʻofá ko e tokoni pe ivi ʻoku foaki tuʻunga ʻi he Fakalelei ʻa e ʻEiki ko Sīsū Kalaisí. ʻOku tuʻunga ʻi he ʻaloʻofa ʻa e ʻOtuá ʻe toetuʻu ai ʻa e tokotaha kotoa pē naʻe moʻuí—ʻe toe fakatahaʻi hotau laumālie mo hotau sinó, ʻo ʻikai ʻaupito ke na toe mavahevahe. ʻOku tuʻunga ʻi Heʻene ʻaloʻofá, ʻoku malava ai ʻe he niʻihi ʻoku nau moʻui ʻaki e ongoongolelei ʻa e ʻEikí ke nau fakatomala pea fakamolemoleʻí.

Ko e ʻaloʻofá ko ha meʻaʻofa ia mei he Tamai Hēvaní ʻoku fakafou mai ʻi Hono ʻAlo ko Sīsū Kalaisí. Ko e tefitoʻi ʻuhinga ʻo e foʻi lea ʻaloʻofá, ʻo hangē ko hono fakaʻaongaʻi ʻi he folofolá, ʻoku fakatautefito ia ki he mālohi ke fakahoko mo e faitoʻo fakalaumālie ʻoku ʻomi ʻi he ʻaloʻofa mo e ʻofa ʻa Sīsū Kalaisí.

ʻOku aʻusia ʻe he tokotaha kotoa pē ʻi he māmaní ʻa e mate fakatuʻasinó. Tuʻunga ʻi he ʻaloʻofa ʻa Sīsū Kalaisí, ʻe toetuʻu ʻa e tokotaha kotoa pē pea moʻui ʻo taʻengata (vakai, 1 Kolinitō 15:20–22; 2 Nīfai 9:6–13).

Koeʻuhi ko e ngaahi fili fakatāutahá, ʻoku aʻusia foki ʻe he tokotaha kotoa ʻa e ngaahi nunuʻa ʻo e angahalá (vakai, 1 Sione 1:8–10; Mōsaia 16:4). ʻOku ui ʻa e ngaahi nunuʻa ko ʻení ko e mate fakalaumālie. He ʻikai lava ha taha ʻo foki ki he ʻao ʻo e ʻOtuá taʻe kau ai ʻa e ʻaloʻofa fakalangí. Tuʻunga ʻi he Fakaleleí, ʻe lava ke fakamolemoleʻi ʻetau ngaahi angahalá; te tau lava ʻo maʻa ʻi he ʻao ʻo e ʻOtuá. Ke maʻu ʻa e mālohi ko ʻení, kuo pau ke tau talangofua ki he ongoongolelei ʻo Sīsū Kalaisí, ʻa ia ʻoku kau ai ʻa e tui kiate Iá, fakatomala mei heʻetau ngaahi angahalá, maʻu e meʻafoaki ʻo e Laumālie Māʻoniʻoní pea feinga ke muimui ki he ngaahi akonaki ʻa Sīsū Kalaisí ʻi he toenga ʻo ʻetau moʻuí (vakai, ʻEfesō 2:8–9; Sēmisi 2:17–22; 2 Nīfai 25:23; 31:20).

ʻOku tokoniʻi kitautolu ʻe he ʻaloʻofa ʻa e ʻOtuá ʻi he ʻaho kotoa pē. ʻOkú ne fakamālohia kitautolu ke tau fakahoko ha ngaahi ngāue lelei naʻe ʻikai ke tau mei lava ʻo fakahoko ʻiate kitautolu pē. Naʻe talaʻofa mai ʻe he ʻEikí kapau te tau fakavaivaiʻi kitautolu ʻi Hono ʻaó pea tui kiate Ia, ʻe tokoni ʻEne ʻaloʻofá ke tau ikunaʻi ʻetau ngaahi vaivai fakafoʻituitui kotoa pē (vakai, ʻEta 12:27).

Lekooti e Ngaahi Ongo ʻOkú ke Maʻú