Laipelí
Sākalamēnití

“Sākalamēnití,” Ngaahi Tefitó mo e Ngaahi Fehuʻí (2023)

Ko hono tufaki ʻe Sīsū Kalaisi ʻa e sākalamēnití ki he ʻEne kau ākongá

Fakahinohino ki hono Ako ʻo e Ongoongoleleí

Sākalamēnití

Ko ha ouau toputapu ke tohoaki kitautolu ke tau ofi ange ki a Sīsū Kalaisi

Ko e hā e ʻuhinga ʻo e sākalamēnití kiate koé? ʻE lava ke hoko ʻa e kau ʻi he uike takitaha ki he ouau toputapu ní ko ha meʻa mahuʻinga fakalaumālie ʻi hoʻo moʻuí ʻi hoʻo feinga ke mahino hono ʻuhingá. Kimuʻa siʻi pē pea Tutuki ʻa Sīsuú, naʻá Ne tānaki fakataha ʻEne kau ākongá ke maʻu meʻatokoni ke fakamanatu ʻa e Laka Atú. Naʻá Ne ʻafioʻi ʻe ngata ʻEne moʻui fakamatelié pea te Ne mavahe mei Heʻene kau ākongá. Naʻá Ne fiemaʻu ke nau manatua ‘Ene ngaahi akonakí. ʻI he feituʻu ko iá, naʻe foaki ai ʻe Sīsū ʻa e maá mo e uainé ki Heʻene kau ākongá, ʻo fakamatalaʻi ange ke nau maʻu ia ʻi he fakamanatu ki Hono sinó mo e taʻataʻá.

ʻE lava ke tokoni hoʻo feinga ke ako e ʻuhinga mo e taumuʻa ʻo e sākalamēnití ke ke ongoʻi houngaʻia moʻoni ai ʻi he meʻa kotoa kuó Ne fai maʻau.

Ko e Hā ʻa e Sakalamēniti?

Ko e sākalamēnití ko ha ouau ia ʻo e lakanga fakataulaʻeikí ʻoku maʻu ai ʻe he kāingalotu ʻo e Siasí ʻa e maá mo e vaí he uike takitaha ko hono fakamanatu ʻo e feilaulau fakalelei ʻa Sīsū Kalaisí. Ko e mā kuo pakí ko ha fakamanatu ia ʻo Hono sinó mo ʻEne mamahi fakaesinó. ʻOku fakataipe ʻe he vaí ʻa e taʻataʻa ʻo Sīsuú, naʻe lilingi ʻi he mamahi lahi. ʻI heʻetau maʻu ʻi he taau ʻa e sākalamēnití, ʻoku tau fakafoʻou ai ʻetau ngaahi fuakava mo e ʻEikí, ʻoku tau tauhi maʻu ha fakamolemole ʻo ʻetau ngaahi angahalá, pea ʻoku tau to e ukupē aʻi ke muimui ʻia Sīsū Kalaisi.

Vakai fakalūkufua ki he tefitó: Sākalamēnití

Ngaahi fakahinohino ki hono ako ʻo e ongoongoleleí: Sīsū Kalaisi, Ngāue Fakafaifekau ʻa Sīsū Kalaisi ʻi he Māmaní, Fakalelei ʻa Sīsū Kalaisí, Ngaahi Fuakavá mo e Ouaú, ʻAho Sāpaté

Konga 1

ʻOku Tokoniʻi Koe ʻe he Sākalamēnití Ke Ke Manatuʻi ʻa Sīsū Kalaisi

ko e maʻu ʻe he kāingalotú ʻa e laulau sākalamēnití

Ko e ʻaho hili hono fafanga fakaofo ʻe Sīsū ʻa e toko 5,000, naʻá Ne malanga mo akoʻi “ko ia ʻokú ne kai hoku sinó, mo inu hoku totó, ʻoku ʻiate ia ʻa e moʻui taʻengatá; pea te u fokotuʻu ia ʻi he ʻaho fakamuí” (Sione 6:54). ʻI he taimi ko iá, ngalingali naʻe puputuʻu ʻEne kau ākongá ʻi he ngaahi leá ni. Ka neongo ia, naʻe toki fakamahinoʻi kimui ange hona ʻuhingá ʻi he taimi naʻe fakafeʻiloaki ai ʻe he ʻEikí ʻa e sākalamēnití ki Heʻene kau ākongá he lolotonga e ʻOhomohe Fakaʻosí.

ʻI hoʻo hoko ko e mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻokú ke maʻu e faingamālie ke kau fakauike ʻi he ouau ʻo e sākalamēnití. ʻOku tokoniʻi koe ʻe hono maʻu ʻo e maá mo e vaí ke ke manatuʻi ʻa e sino mo e taʻataʻa ʻo Sīsū Kalaisí, ʻa ia naʻá Ne foaki taʻetotongi maʻá e fānau kotoa ʻa e ʻOtuá.

Ngaahi meʻa ke fakakaukau ki ai

  • Lau ʻa e ngaahi fakamatala fakafolofola ʻo e fakafeʻiloaki ʻe Sīsū Kalaisi ʻa e ouau ʻo e sākalamēnití ki Heʻene kau ākongá ʻi Selusalemá (vakai, Mātiu 26:26–28; Maʻake 14:22–24; Luke 22:19–20) pea ki he kau Nīfaí (vakai, 3 Nīfai 18:1–11). Ko e hā ʻokú ke ako mei he ngaahi potufolofola ko ʻení ʻo kau ki he sākalamēnití? ʻE ala tokoni foki ke lau ʻa e ngaahi fakamatala ʻi he Liliu ʻa Siosefa Sāmitá, Mātiu 26:22, 24–25 (ʻi he Joseph Smith Translation appendix) mo e Liliu ʻa Siosefa Sāmitá, Maʻake 14:20–25 (ʻi he Joseph Smith Translation appendix).

  • Lau ʻa e Mōsese 5:4–8. ʻI he kuonga muʻá, naʻe fekau ʻe he ʻOtuá ki Heʻene fānaú ke nau ʻoatu ʻa e feilaulau ʻaki ʻa e monumanú ko ha fakataipe, pe tatau, ʻo e feilaulauʻi ʻa Sīsū Kalaisi—ko e Lami ʻa e ʻOtuá. ʻOku fakahoko fēfē ʻe he sākalamēnití ha taumuʻa he ʻahó ni ʻo hangē ko e ngaahi feilaulau ʻi he kuonga ʻo e Fuakava Motuʻá? (Vakai foki, Tokāteline mo e Ngaahi Fuakava 64:9–11.)

  • Naʻe folofola ʻa e ʻEikí ki a Siosefa Sāmita ʻoku ʻikai mahuʻinga ʻa e meʻa ʻoku tau kai pe inu ʻi he e sākalamēnití, kehe pē ke tau manatuʻi ʻa e taumuʻa ʻo hono fai iá (vakai, Tokāteline mo e Ngaahi Fuakava 27:1–2). Fakakaukau ki he ʻuhinga ʻoku ʻikai mahuʻinga tatau ai ʻa e meʻa ʻoku tau fakaʻaongaʻi ko e fakaʻilonga ʻi he sākalamēnití mo e meʻa ʻoku tokoni ʻa e ongo fakaʻilonga ko iá ke tau manatuʻí.

ʻEkitivitī ki he ako mo e niʻihi kehé

  • Fakakaukau ke mou mamataʻi fakataha e foʻi vitiō “Sacrament” (2:59) pe “Always Remember Him” (5:27). Te mou ala aleaʻi ʻa e founga ʻe lava ai ʻe hoʻo ngaahi feinga ke manatuʻi ʻa Sīsū Kalaisi mo ʻEne feilaulau fakaleleí ʻo faitokohia hoʻo ngaahi ongó mo e tōʻongá. Ko e hā te ke lava ʻo fai ke tokanga lahi ange ki a Sīsū Kalaisi he lolotonga ʻo e houalotu sākalamēnití pea mo hoʻo maʻu ʻa e sākalamēnití?

Ako lahi ange

Konga 2

ʻOku ʻOmai ʻe he Teuteu ʻi he Moʻui Taau ki he Sākalamēnití ʻa e Ngaahi Tāpuakí

konga mā kuo pakipaki mo e kiʻi ipu vai

Mahalo kuó ke fakatokangaʻi he taimi ʻe niʻihi ʻokú ke tangutu pē ʻi he sākalamēnití, ʻo ngalo ke ke maʻu mo foua ʻa e ouau toputapú ni ʻo hangē ko e taumuʻa ʻa e ʻEikí. Ka ʻe lava ʻe hoʻo feinga ke teuteu mo maʻu ʻi he tuʻunga taau ʻa e sākalamēnití ʻo fakafeʻungaʻi koe ki ha ngaahi tāpuaki lahi.

Naʻe fakamatalaʻi ʻe ʻEletā Tēvita A. Petinā ʻo pehē: “Ko e ouau ʻo e sākalamēnití ko ha fakaafe māʻoniʻoni ia ʻoku toutou fakahoko ke fakatomala fakamātoato mo fakafoʻou fakalaumālie ai. ʻOku ʻikai ke fakamolemoleʻi e angahalá ia ʻi hono maʻu pē ʻo e sākalamēnití. Ka ʻi heʻetau mateuteu moʻoni mo kau ki he ouau toputapú ni ʻi he loto mafesifesi mo ha Laumālie fakatomalá, ko e talaʻofá leva te tau lava ke maʻu maʻu pē ʻa e Laumālie ʻo e ʻEikí. Pea ʻi he ivi fakamaʻa ʻo e Laumālie Māʻoniʻoní, ko hotau takaua maʻu peé, te tau lava ai ke tauhi maʻu ai pē ha fakamolemole ʻo ʻetau ngaahi angahalá.”1

Ngaahi meʻa ke fakakaukau ki ai

  • Lau ʻa e 1 Kolinitō 11:23–29. ʻOku ʻuhinga ki he hā ke “[vakavakaiʻi]” ʻi he taimi ʻoku maʻu ai ʻe ha taha ʻa e sākalamēnití? Ko e hā ʻoku mahuʻinga ai ke teuteu ke maʻu ʻa e sākalamēnití ʻi he tuʻunga tāú?

  • Fakafanongo pe lau e fakalea ʻo ha himi sākalamēniti, hangē ko e “ʻOku ʻi ai ha Fonua” pe “Sīsū Homau Huhuʻi.”2 ʻE fakatupulaki fēfē ʻe he fakalaulauloto ki he pōpoaki ʻoku maʻu ʻi he himi sākalamēnití hoʻo houngaʻia ʻi he ouau sākalamēnití?

ʻEkitivitī ki he ako mo e niʻihi kehé

  • Lau e lotu tāpuakiʻi ʻo e sākalamēnití, ʻoku maʻu ʻi he Tokāteline mo e Ngaahi Fuakava 20:75–79. Fakaafeʻi ha niʻihi ʻi hoʻo kulupú ke nau kumi ki he meʻa ʻoku tau palōmesi ki ai ʻi he heʻetau maʻu ʻa e sākalamēnití kae kumi ʻa e toengá ki he palōmesi ʻoku fai mai ʻe he ʻEikí. Te ke lava foki ʻo ʻai ke lau ʻe he kulupú ʻa e Tokāteline mo e Ngaahi Fuakava 20:37 pea aleaʻi ʻa e ngaahi faitatau ʻi he ngaahi talaʻofa naʻe fai he lolotonga e sākalamēnití mo e fuakava ʻo e papitaisó.

Ako lahi ange

Ngaahi Maʻuʻanga Tokoni Kehe fekauʻaki mo e Sākalamēnití