“Lēsoni 12 Naunau Teuteu ki he Kalasí: Ko Hono Maʻu e Moʻoni Haohaoá ʻi he Ngaahi Akonaki ʻa Sīsū Kalaisí,” Ko Sīsū Kalaisi mo ʻEne Ongoongolelei Taʻengatá - Naunau ʻa e Faiakó (2023)
“Lēsoni 12 Naunau Teuteu ki he Kalasí,” Ko Sīsū Kalaisi mo ʻEne Ongoongolelei Taʻengatá - Naunau ʻa e Faiakó
Lēsoni 12 Naunau Teuteu ki he Kalasí
Ko Hono Maʻu e Moʻoni Haohaoá ʻi he Ngaahi Akonaki ʻa Sīsū Kalaisí
Kuo hanga ʻe heʻetau moʻui ʻi he kuonga fakakomipiutá ʻo ʻomi ha faingamālie fakaofo ke tau maʻu ai ha ngaahi fakamatala taʻe-hano-tatau. Ka naʻe pehē ʻe Palesiteni Lāsolo M. Nalesoni, “Ko e taha e ngaahi fokoutua ʻo hotau kuongá ko e tokosiʻi fau e kakai ʻoku nau ʻilo ʻa e feituʻu ke maʻu ai ʻa e moʻoní” (“Moʻoni Haoahaoa, Tokāteline Haohaoa, mo e Fakahā Haohaoa,” Liahona, Nōvema 2021, 6). ʻI hoʻo fakakaukau ki he ngaahi pōpoaki mo e leʻo kehekehe ʻoku feʻauʻauhi ke maʻu hoʻo tokangá, fakakaukau ki he founga ʻoku hoko ai ʻa Sīsū Kalaisi mo ʻEne ngaahi akonakí ko e maʻuʻanga tokoni taupotu taha ʻo e moʻoni haohaoá pea maʻu ʻa e mālohi ke tataki, fakamālohia, mo liliu hoʻo moʻuí (vakai Sione 14:6).
Konga 1
ʻE lava fēfē nai ʻe he ngaahi akonaki ʻa Sīsū Kalaisí ʻo fakaleleiʻi ʻeku moʻuí?
Hili e Toetuʻu ʻa Sīsuú, naʻá Ne ʻaʻeva mo ha ongo ākonga naʻá na fononga ki ʻEmeasi. Naʻe ʻikai ke na ʻiloʻi ko Ia ʻa e Kalaisi kuo toetuʻú. ʻI heʻenau ʻaʻevá, naʻe akonaki ʻa Sīsū mei he folofolá ki he ʻuhinga ʻo Hono misiona fakalangí. (Vakai Luke 24:13–27.)
Ako ke Teuteu ki he Kalasí
Lau ʻa e Luke 24:31–32, pea kumi ki he tokoni ʻa e akonaki ʻa e Fakamoʻuí ki he ongo ākonga ko ʻení.
Naʻe akonaki ʻa Sīsū Kalaisi ʻi he “mafai mei he ʻOtuá” kae ʻikai hangē ko e kau tangata tohí mo e kau Fālesí (Joseph Smith Translation, Matthew 7:37). ʻI he taimi naʻá Ne akonaki ai ʻi Hono kolo tupuʻanga ko Nasaletí, naʻe “ofo [ʻa e kakaí] ʻi heʻene akonakí: he naʻe lea ia ʻi he mālohi” (Luke 4:32). Ka neongo naʻe faiako ʻa e ʻEikí ʻi he mālohi, naʻe ʻi ai ha kakai ʻe niʻihi naʻe fuʻu faingataʻa ʻEne ngaahi akonakí mo e tokāteliné kiate kinautolu pea nau fili ke ʻoua te nau muimui kiate Ia. Naʻe fehuʻi ʻe he ʻEikí ki Heʻene kau ʻAposetoló ʻi ha taimi pehē ʻe taha ʻo pehē, “ʻE ʻalu mo kimoutolu foki?” (Sione 6:67; vakai foki Sione 6:68–69).
Te tau lava foki ʻo ongoʻi faingataʻaʻia ʻi hotau kuongá ni, ʻi he ngaahi akonaki mo e tokāteline ʻa Sīsū Kalaisí. Mahalo te tau ongoʻi ʻi ha taimi ʻe niʻihi ʻoku ʻahiʻahiʻi kitautolu ke tau “ʻalu.” He ʻikai feʻunga ke tau fanongo pē ki Heʻene folofolá ke tau lava ʻo kei faivelenga ai pē ʻi he kotoa ʻo ʻetau moʻuí.
Hili hono akoʻi ʻe he ʻEikí ha ngaahi moʻoni mahuʻinga ʻo e ongoongoleleí ki ha Fālesi ko Nikotīmasi, naʻá Ne folofola, “Ko ia ʻoku fai ki he moʻoní, ʻoku haʻu ia ki he māmá, koeʻuhí ke fakahā ai ʻene ngaahi ngāué, ʻoku fai ia ʻi he ʻOtuá” (Sione 3:21; tānaki atu hono fakamamafaʻí).
Lolotonga e akonaki ʻa Sīsū ʻi he temipalé ʻi he taimi ʻe taha, naʻá Ne folofola ʻo pehē, “Pea ko ia ia ʻe fai ki hono finangaló, te ne ʻilo ʻa e [tokāteliné], pe ʻoku ʻi he ʻOtuá ia, pe ko ʻeku lea ʻiate au pē” (Sione 7:17; tānaki atu hono fakamamafaʻí). ʻI hono tā ʻe Sīsū kimui ange ha sīpinga ʻo e ngāue tokoní ki Heʻene kau ākongá ʻaki hono fufulu honau vaʻé, naʻá Ne folofola, “ʻOku mou monūʻia ʻi hoʻomou ʻilo ʻa e ngaahi meʻá ni, ʻo kapau te mou fai ki ai” (Sione 13:17; tānaki atu hono fakamamafaʻí).
ʻI hono fakamatalaʻi e mahuʻinga ʻo e ngāue fakatatau ki he ngaahi akonaki ʻa Sīsū Kalaisí, naʻe pehē ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá:
“Ko ia, pea hā leva?” ʻOku ou tui ko e tali ia ʻa e Fakamoʻuí he ʻaho kotoa pē ko ha konga ʻoku fakatahaʻi ai ʻEne akonakí mo e malangá. Naʻe ʻikai ha ʻaonga ʻEne ngaahi malangá mo e naʻinaʻí kapau naʻe ʻikai liliu e moʻui totonu ʻo ʻEne kau ākongá.
“Ko ia, pea hā leva?” ʻOkú ta ʻiloʻi ʻoku fuʻu tokolahi ha kakai kuo teʻeki ai ke nau fakafehokotaki e meʻa ʻoku nau pehē ʻoku nau tui ki aí pea mo ʻenau tōʻonga moʻuí. (“Teaching, Preaching, Healing,” Ensign, Jan. 2003, 37)
Ako ke Teuteu ki he Kalasí
Fakakaukau ki he ngaahi akonaki ʻa e Fakamoʻuí ʻoku maʻu ʻi he Ngaahi Kosipelí (Mātiu, Maʻake, Luke, mo Sioné) pea ʻi he 3 Nīfai 11–27. Fili ha akonaki ʻe taha kuo fuʻu mahuʻinga kiate koe peá ke toe ako ia.
ʻI hoʻo ako mo fakalaulaulotó, lekooti hoʻo ngaahi fakakaukau fekauʻaki mo e ngaahi fehuʻi ko ʻení:
-
Ko e hā ʻoku ongo taha kiate koe fekauʻaki mo e akonaki ko ʻeni mei he Fakamoʻuí?
-
Ko e hā ha founga kuo tokoniʻi ai ʻe he akonakí ni hoʻo moʻuí?
-
Kuo tohoakiʻi fēfē nai ai koe ke ke ofi ange kia Sīsū Kalaisí?
Haʻu mateuteu ki he kalasí ke vahevahe ʻa e akonaki naʻá ke ʻiló mo e founga kuó ne tākiekina hoʻo moʻuí. Kapau ʻoku ʻikai te ke lava ʻo fakakaukau ki ha akonaki mei he Fakamoʻuí kuó ne tākiekina koe, kumi leva ha akonaki ʻe ala kaunga ki hoʻo moʻuí. Ako ia pea haʻu mateuteu ke vahevahe ʻa e meʻa ʻoku ongo taha kiate koe fekauʻaki mo e akonaki ko ʻení.
Konga 2
Ko e fē ʻa e ngaahi akonaki ʻa e ʻEikí ʻoku mahuʻinga taha ki hoku fakamoʻuí?
Naʻe akoʻi ʻe Palesiteni Poiti K. Peeka ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
ʻOku mahuʻinga ke ʻiloʻi ʻa e moʻoni kotoa pē. ʻOku ʻi ai ha ngaahi moʻoni ʻe niʻihi ʻoku ʻaonga ange, ka ʻoku ʻi ai ha ngaahi moʻoni ʻoku mahuʻinga taha hono ʻiloʻí. (“Truths Most Worth Knowing” [fakataha lotu ʻa e Potungāue Ako ʻa e Siasí maʻá e kakai lalahi kei talavoú, Nov. 6, 2011], ChurchofJesusChrist.org)
Te tau lava ʻo hanga ki he Fakamoʻuí ke maʻu ha fakahinohino ki he meʻa ʻe ala mahuʻinga taha hono ʻiló. Hili e Toetuʻu ʻa Sīsū Kalaisí, naʻá Ne hā ki ha kakai tokolahi, kau ai ʻEne Kau ʻAposetolo ʻe Toko Hongofulu Mā Uá. Naʻá Ne fekauʻi ʻa e Toko Hongofulu Mā Uá ke malanga ʻaki ʻEne ongoongoleleí ki he kakai kotoa pē. Naʻá Ne toe fakapapauʻi foki ʻe fakahaofi ʻa kinautolu ʻoku tui ki Heʻene ongoongoleleí pea papitaisó. (Vakai Maʻake 16:15–16.)
ʻI he taimi naʻe hā ai ʻa Sīsū Kalaisi ki he kau Nīfaí, naʻá Ne akoʻi kiate kinautolu ʻa e ʻuhinga ʻo ʻEne ongoongoleleí pea mo e ʻuhinga naʻe mahuʻinga ai ki honau fakamoʻuí.
Ako ke Teuteu ki he Kalasí
Lau ʻa e 3 Nīfai 27:13–14, 19–21, pea fakakaukau ke fakaʻilongaʻi ʻa e ngaahi konga mahuʻinga ʻo e ongoongolelei ʻa e Fakamoʻuí.
Naʻe pehē ʻe Brother Taniela K Sati, ko e Tokoni ʻUluaki mālōlō ʻi he Kau Palesitenisī Lahi ʻo e Lautohi Faka-Sāpaté:
Neongo ʻoku tali ʻe he ongoongolelei ʻo Sīsū Kalaisí ʻa e moʻoni kotoa pē, ka ʻoku ʻikai mahuʻinga tatau ʻa e moʻoni kotoa pē. Naʻe akoʻi mahino ʻe he Fakamoʻuí ko ʻEne ongoongoleleí, ko e ʻuluaki mo e mahuʻinga tahá, ko ʻEne feilaulau fakaleleí. Ko ʻEne ongoongoleleí ko ha fakaafe foki ia ke maʻu ʻa e ngaahi tāpuaki ʻo e Fakaleleí ʻo fakafou ʻi he tui kia Kalaisí, fakatomalá, papitaisó, maʻu ʻa e Laumālie Māʻoniʻoní, mo e kātaki faivelenga ki he ngataʻangá. …
… ʻOku mahuʻinga ke tau fafangaʻi ʻa kinautolu ʻoku tau akoʻi mo tatakí ʻaki ʻetau tokanga taha ki he ngaahi tefitoʻi tokāteliné … kae ʻikai ko hono fakamoleki e taimi mahuʻingá ʻi he ngaahi kaveinga mo e ngaahi maʻuʻanga tokoni ʻoku siʻi ange honau mahuʻingá. (“Nourished by the Good Word of God,” Liahona, Nov. 2007, 93–94)
Naʻe fakahoko ʻe Palesiteni Tieta F. ʻUkitofa, ʻi heʻene hoko ko e Tokoni Ua ʻi he Kau Palesitenisī ʻUluakí, ʻa e faleʻi ko ʻení:
Kapau ʻe faifaiange peá ke pehē ʻoku ʻikai fuʻu ʻaonga fēfē ʻa e ongoongoleleí kiate koe, ʻoku ou fakaafeʻi koe ke ke kiʻi tuʻu ʻi ha tuʻunga māʻolunga, ʻo vakaiʻi hoʻo moʻuí, pea fakafaingofuaʻi hoʻo foungá ki he tuʻunga fakaākongá. Tokanga taha ki he ngaahi tefitoʻi tokāteliné, tefitoʻi moʻoní, mo e fakaʻaongaʻi ʻo e ongoongoleleí. ʻOku ou palōmesi atu ʻe tataki mo tāpuakiʻi koe ʻe he ʻOtuá ʻi ho halá ke ke aʻusia ha moʻui ʻoku fiefia angé pea ʻe ʻaonga lelei ange ai e ongoongoleleí kiate koe. (“ʻOku ʻAonga ʻAupito!,” Liahona, Nōvema 2015, 22)
Fakalaulauloto ʻi he Teuteu ki he Kalasí
Ko e hā ʻe lava ke hoko ʻi he ʻikai ke tau fakatokangaʻi e ngaahi tefitoʻi meʻa mahuʻinga ʻo e ongoongoleleí kae tokanga taha pē ki he ngaahi akonaki ʻoku ʻikai fuʻu mahuʻingá? Ko e hā kuó ne tokoniʻi lahi taha koe ke tukutaha hoʻo tokangá ʻi he ngaahi tefitoʻi meʻa mahuʻingá?