Lēsoni 24 Naunau ʻa e Faiakó

Ko e Falala kia Sīsū Kalaisi ko Hotau Fakamāú

0ʻOku tau lau ʻi he “Ko e Kalaisi Moʻuí: Ko e Fakamoʻoni ʻa e Kau ʻAposetoló,” “Te tau tuʻu takitaha kotoa pē ke Ne [hotau Fakamoʻuí] fakamāuʻi ʻo fakatatau mo ʻetau ngaahi ngāué pea mo e ngaahi holi ʻa hotau lotó” (ChurchofJesusChrist.org). ʻE tokoni ʻa e lēsoni ko ʻení ke fakamatalaʻi mahino ʻe he kau akó ʻa e ʻuhinga te tau lava ai ʻo falala kakato kia Sīsū Kalaisi ko hotau fakamāú. Te nau maʻu foki ha faingamālie ke vakaiʻi e meʻa te nau lava ʻo fai ke teuteu ai ki he Fakamaau Fakaʻosí.

Ngaahi Fokotuʻu ki Hono Akoʻí

Ko Sīsū Kalaisi ʻa hotau fakamāú.

Vahevahe ʻa e tūkunga ko ʻení:

Fakakaukauloto ʻoku ʻi ai hao kaungāmeʻa naʻe tukuakiʻi ki ha hia mamafa. ʻOkú ke ʻiloʻi foki ʻa e tokotaha mamahi ʻi he hiá. ʻOkú ke ʻofa ʻiate kinaua fakatouʻosi.

• Kapau te ke lava ʻo fili ha fakamaau maʻá ho kaungāmeʻá, ko e hā ha ngaahi ʻulungaanga lelei te ke fie maʻu lahi taha ke maʻu ʻe he fakamāú?

• Ko e hā ha ngaahi meʻa te ke hohaʻa ki ai kapau naʻe ʻikai maʻu ʻe he fakamāú ha taha pe lahi ange ʻi he ngaahi ʻulungaanga kuo tau ʻiló? (Hangē ko ʻení, ʻe fēfē nai kapau naʻe manavaʻofa ʻa e fakamāú kae ʻikai angatonu pe angatonu kae ʻikai manavaʻofa?)

Fakamanatu ki he kau akó naʻe fakaafeʻi kinautolu ke teuteu ki he kalasí ʻo ʻiloʻi ha ʻulungaanga mei he moʻui ʻa e Fakamoʻuí ʻokú ne fakahaaʻi te tau lava ʻo falala kiate Ia ke hoko ko ha fakamaau angatonu. ʻOange ha ngaahi miniti siʻi ki he kau akó ke nau toe vakaiʻi ʻa e ʻulungaanga naʻa nau maʻú pe, kapau ʻe fie maʻu, ke nau feinga ke ʻiloʻi ha [ʻulungaanga ʻe] taha. Kole ange leva ke nau faʻu ha fanga kiʻi kulupu iiki pea ʻoange kiate kinautolu ʻa e laʻipepa tufa ko ʻení.

Ko Sīsū Kalaisi ʻa e “Fakamaau Māʻoniʻoní” (2 Tīmote 4:8)

Ko Sīsū Kalaisi mo ʻEne Ongoongolelei Taʻengatá – Naunau ʻa e Faiakó—Lēsoni 24

Lau leʻolahi ʻa e Saame 9:8 mo e 96:11–13. Fakaafeʻi leva ʻa e mēmipa takitaha ʻo e kulupú ke nau vahevahe ha ʻulungaanga mei he moʻui ʻa e Fakamoʻuí ʻokú ne fakahaaʻi ʻoku fakamāuʻi ʻe Sīsū Kalaisi ʻa e kakai kotoa pē ʻi he māʻoniʻoni. ʻI hoʻomou vahevahe e ngaahi ʻulungāngá, te mou lava ʻo aleaʻi ʻa e ngaahi fehuʻi ko ʻení:

• ʻE kaunga fēfē nai e ʻulungaanga ko ʻení ki he founga ʻoku fakamāuʻi ai kitautolu ʻe Sīsū Kalaisí?

• Ko e hā ha founga ʻoku fakatupulaki ai ʻe he ʻulungaanga ko ʻení hoʻo falala ki he feʻunga ʻa e Fakamoʻuí ke hoko ko ho fakamāú?

Hili hono ʻiloʻi ha ngaahi ʻulungaanga pau, aleaʻi ʻa e founga ʻoku kehe ai ʻa Sīsū Kalaisi mei he kau fakamaau kotoa pē ʻo e faʻahinga ʻo e tangatá. (Fakakaukau ke toe vakaiʻi e ngaahi lea ʻa Palesiteni Tāleni H. ʻOakesi mo ʻEletā Lisiate G. Sikoti ʻi he konga 1 ʻo e naunau teuteú.) Te mou lava foki ʻo aleaʻi ʻa e ʻuhinga ʻoku mahuʻinga ai ke hāsino mei he Fakamoʻuí ʻa e ngaahi ʻulungaanga kotoa ko ʻení ko hotau fakamāú.

© 2023 ʻe he Intellectual Reserve, Inc. All rights reserved.

Ko Sīsū Kalaisi ʻa e “Fakamaau Māʻoniʻoní” (2 Tīmote 4:8)

Ko Sīsū Kalaisi mo ʻEne Ongoongolelei Taʻengatá – Naunau ʻa e Faiakó—Lēsoni 24

Laʻipepa tufa Ko Sīsū Kalaisi ʻa e Fakamaau Māʻoniʻoní

Hili hono ʻoange ha taimi feʻunga ki he fealēleaʻakí, te ke lava ʻo fakaafeʻi ha niʻihi ʻo e kau akó ke vahevahe ʻenau ongo fekauʻaki mo e hoko ʻa Sīsū Kalaisi ko honau fakamāú.

ʻE fakamāuʻi kitautolu ʻe Sīsū Kalaisi ʻi heʻetau ngaahi ngāué mo e ngaahi holi ʻa hotau lotó.

Ko Hono Fakatupulaki ʻEtau Founga Akoʻí mo e Akó

Fakamatalaʻi mahino ʻa e ngaahi tefitoʻi moʻoni totonú. Naʻe akoʻi ʻe ʻEletā B. H. Lōpeti, ne kau kimuʻa ʻi he Kau Fitungofulú, “Ke ʻiloʻi ʻa e moʻoní, kuo pau ke fakahaaʻi ia, pea ko e mahino mo kakato ange ʻa e fakamatalá, ko e lelei ange ia e faingamālie ʻe maʻu ʻe he Laumālie Māʻoniʻoní ke fakamoʻoniʻi ki he laumālie ʻo e tangatá ʻoku moʻoni ʻa e ngāué” (ʻi he James E. Faust, “What I Want My Son to Know before He Leaves on His Mission,” Ensign, May 1996, 41). ʻOange ki he kau akó ha ngaahi faingamālie ke nau ʻiloʻi mo fakamatalaʻi mahino ai e ngaahi tefitoʻi moʻoni totonu ʻoku maʻu ʻi he folofolá mo e ngaahi lea ʻa e kau palōfita ʻi onopōní.

Fakaafeʻi e kau akó ke nau toe vakaiʻi fakalongolongo e Fakahā 20:12 mo e Tokāteline mo e Ngaahi Fuakava 137:9 pea lekooti ha foʻi moʻoni fekauʻaki mo e founga ʻe fakamāuʻi ai kitautolú. Kole ange ki ha niʻihi ʻo e kau akó ke vahevahe e moʻoni ne nau ʻiloʻí. ʻI hono fakaʻaongaʻi e ngaahi fakakaukau ʻa e kau akó, mahalo te ke fie hiki ʻi he palakipoé ha moʻoni hangē ko ʻení: Te tau takitaha tuʻu ʻi he ʻao ʻo e ʻEikí pea fakamāuʻi [kitautolu]ʻo fakatatau ki heʻetau ngaahi ngāué mo e ngaahi holi ʻa hotau lotó. Ke fakaloloto e mahino ʻa e kau akó, te ke lava ʻo fakahoko ha taha pe lahi ange mei he ngaahi fehuʻí ni:

• ʻOkú ke pehē ko e hā ʻoku mahuʻinga ai ʻetau ngaahi ngāué ʻi he Fakamaau Fakaʻosí? (Fakamahinoʻi ange ʻe lava ke kau ʻi he ngaahi ngāué ʻa e tauhi ʻo e ngaahi fekaú, maʻu e ngaahi ouaú, tauhi ʻo e ngaahi fuakavá, fakatomalá, mo e tokoni ki he niʻihi kehé.)

• ʻOkú ke pehē ko e hā ʻe fakamāuʻi foki ai kitautolu ʻi heʻetau ngaahi fakakaukaú mo e ngaahi holi ʻa hotau lotó? (Mahalo te ke fie vahevahe ʻa e fakamatala ko ʻeni ʻa Palesiteni ʻOakesí: “ʻOku fakapapauʻi mai ʻe he ngaahi holi ʻoku tau ngāue ki aí ʻa ʻetau liliú, lavameʻá mo e tuʻunga ʻoku tau aʻusiá” [“Holi ʻo e Lotó,” Liahona, Mē 2011, 42].)

• Ko e hā ʻoku mahuʻinga ai ke vakavakaiʻi maʻu pē ʻa e founga ʻoku tākiekina ai ʻe heʻetau ngaahi holí, leá, mo e tōʻongá ʻa e tuʻunga ʻoku tau hoko ki aí? (Fakakaukau ke toe vakaiʻi e fakamatala ʻa Palesiteni ʻOakesi ʻi he konga 2 ʻo e naunau teuteú.)

Fakamanatu ki he kau akó naʻe fakahoko ʻe ʻAlamā ko e Siʻí ha ngaahi fehuʻi ongo moʻoni ʻe lava ʻo tokoni ke tau vakaiʻi e tuʻunga ʻoku tau aʻusiá. Fakaafeʻi e kau akó ke nau toe vakaiʻi ʻa e ʻAlamā 5:15–16, 19, 26–27 pea fakakaukau ki ha fehuʻi ʻe taha pe lahi ange ʻoku felāveʻi lahi taha mo ʻenau moʻuí. Hili hono ʻoange ha taimi feʻunga ke fakakaukauloto fakalongolongo aí, poupouʻi ha toko taha pe toko ua ʻo e kau akó ke vahevahe ʻa e founga kuo tokoni pe lava tokoni ai ʻenau fakaʻaongaʻi ha taimi ke fakakaukauloto moʻoni ai kiate kinautolú ke nau hoko ʻo hangē ange ko e Fakamoʻuí.

Hangē ko ia ʻoku fokotuʻu mai ʻe ʻAlamaá, fakaafeʻi e kau akó ke nau fakakaukauloto ʻoku nau tuʻu ʻi he ʻao ʻo e ʻOtuá ke fakamāuʻi.

• Ko e hā nai te ke ongoʻi ʻi he momeniti ko ʻení? Ko e hā hono ʻuhingá?

• Ko hai te ke fie maʻu lahi taha ke ʻi ai mo koé?

• Ko e hā ʻoku mahuʻinga ai ke mahino ʻoku ʻikai ngata pē ʻi he hoko ʻa Sīsū Kalaisi ko hotau fakamāú, ka ʻokú Ne hoko foki ko hotau Taukapo ki he Tamaí? (Te ke lava ʻo toe vakaiʻi e ʻuhinga ʻo e hoko ʻa Sīsū Kalaisi ko hotau taukapó [vakai, konga 2 ʻo e naunau teuteú].)

Lau leʻolahi ʻa e Tokāteline mo e Ngaahi Fuakava 45:3–5, pea fakaafeʻi e kau akó ke nau fakakaukauloto ʻoku tautapa ʻa Sīsū Kalaisi maʻanautolu.

• Te ke ongoʻi fēfē nai ʻi hoʻo fanongo ki hono taukapoʻi koe ʻe Sīsū Kalaisi ʻi he ʻao ʻo e Tamai Hēvaní? (Mahalo te ke toe fie vakaiʻi e lea ʻa ʻEletā Teili G. Lenilani ʻi he konga 2 ʻo e naunau teuteú ke fakapapauʻi ʻoku mahino ki he kau akó ʻoku ʻikai fakafepakiʻi ʻe he Fakamoʻuí ʻa e finangalo ʻo e Tamaí ʻi Heʻene hoko ko hotau Taukapó.)

• ʻE hanga fēfē nai ʻe he mahino mo hono tali e fatongia ʻo e Fakamoʻuí ko hotau Taukapó, ʻo ʻomi ha ʻamanaki lelei ki ha taha ʻokú ne ongoʻi he ʻikai ke ne teitei lelei feʻunga ke foki ki he ʻao ʻo e ʻOtuá?

• Ko e hā te ke lava ʻo fai he ʻahó ni ke fakahaaʻi ai ki he ʻEikí ʻokú ke fie maʻu Ia ke hoko ko ho Taukapó?

Te ke lava ʻo fakamoʻoni he ʻikai ngata pē ʻi hono taukapoʻi kitautolu ʻe he ʻEikí ʻi he Fakamaau Fakaʻosí ka ʻokú Ne finangalo lelei foki ke hoko ko hotau Taukapo he ʻahó ni (vakai, Tokāteline mo e Ngaahi Fuakava 29:5–6). Te Ne taukapoʻi kitautolu ʻi heʻetau fekumi ki Heʻene tokoní.  

Ki he Kalasi Hokó

Ke poupouʻi e kau akó ke nau lau ʻa e naunau teuteú kimuʻa ʻi he kalasi hono hokó, fakakaukau ke vahevahe ha pōpoaki hangē ko ʻení: ʻI hoʻo ako ʻa e naunau teuteu ki he lēsoni 25, fehuʻi loto pē: Ko e hā ʻa e ivi tākiekina hoku tuʻunga fakaākonga fakaʻahó ʻi hoku ikuʻanga taʻengatá?