Lēsoni 22 Naunau ʻa e Faiakó

Kau mo Sīsū Kalaisi ʻi he Hokohoko atu hono Fakafoki Mai ʻo e Ongoongoleleí

Naʻe fakamoʻoni ʻa Palesiteni Lāsolo M. Nalesoni ʻo pehē: “ʻOku tau hoko ko e kau fakamoʻoni ki ha konga hono fakafoki mai ʻo e ongoongoleleí. Kapau ʻokú ke pehē kuo kakato hono fakafoki mai ʻo e Siasí, ko e kamataʻangá pē ʻeni ʻokú ke vakai ki aí. ʻOku kei lahi fau ʻa e meʻa ʻe hoko maí” (“Latter-day Saint Prophet, Wife and Apostle Share Insights of Global Ministry,” Oct. 30, 2018, newsroom.ChurchofJesusChrist.org). ʻI he lēsoni ko ʻení, ʻe ʻilo ai ʻe he kau akó ʻa e meʻa te nau fai pe lava ʻo fai ke kau ai ʻi he hokohoko atu hono Fakafoki Mai ʻo e Ongoongoleleí. Te nau fakakaukau foki ki he tokoni te nau lava ʻo maʻu mei he Fakamoʻuí ʻi heʻenau fai ʻEne ngāué.

Ngaahi Fokotuʻu ki Hono Akoʻí

ʻOku tataki ʻe Sīsū Kalaisi ʻa e ngāue ʻo e hokohoko atu hono Fakafoki mai ʻo e ongoongoleleí.

Fakaʻaliʻali ʻa e lea ko ʻeni ʻa Palesiteni Nalesoní pea fakaʻaliʻali pē ʻa e fehuʻi fakaʻosi ʻi he fakamatalá):

Palesiteni Russell M. Nelson

Tatau ai pē pe ʻokú ke nofo ʻi fē pe ko e hā ho tūkungá, ko e ʻEiki ko Sīsū Kalaisí ho Fakamoʻuí, pea ko ho palōfitá ʻa e palōfita ʻa e ʻOtuá ko Siosefa Sāmitá. Naʻe tomuʻa fakanofo ia kimuʻa teʻeki ʻai e tuʻunga ʻo e māmaní, ke hoko ko e palōfita ʻo e kuonga fakakosipeli fakaʻosí ni, ʻi he taimi “ʻe ʻikai taʻofi ai ha meʻa” mei he Kāingalotú. ʻOku kei tafe pē ʻa e fakahaá mei he ʻEikí ʻi he lolotonga e ngāue hokohoko ʻo hono fakafoki mai e ongoongoleleí.

Ko e hā ʻene ʻuhinga kiate koe ʻa e pehē kuo ʻosi fakafoki mai e ongoongolelei ʻo Sīsū Kalaisí ki māmaní? (“Fanongo kiate Ia,” Liahona, Mē 2020, 88; tānaki atu hono fakamamafaʻí)

Fakaafeʻi ha niʻihi ʻo e kau akó ke nau tali e fehuʻi ʻa Palesiteni Nalesoní pea vahevahe e ʻuhinga kiate kinautolu ʻa hono Fakafoki Mai ʻo e Ongoongoleleí. Te ke lava leva ʻo ʻeke ange:

• Ko e hā ʻene ʻuhinga kiate koe ʻoku hokohoko atu hono Fakafoki Mai ʻo e Ongoongoleleí?

Ko Hono Fakatupulaki ʻEtau Founga Akoʻí mo e Akó

Fai ha ngaahi fehuʻi vakaiʻi ʻoku ueʻi ai ha ako lahi ange. ʻI he taimi ʻoku tali ai ʻe he kau akó e ngaahi fehuʻí, vahevahe ʻenau ngaahi ongó, pe ʻomi ha ngaahi fakakaukaú, fakafanongo fakamātoato ki he meʻa ʻoku nau lea ʻakí mo e founga ʻenau leá. ʻIloʻi pe ʻe lava ha fehuʻi vakaiʻi ʻo tokoniʻi e kau akó ke nau fakakaukau lahi ange, fakaʻaongaʻi ʻenau aʻusia fakatāutahá, pe vakaiʻi e ngaahi ongo ʻi honau lotó. ʻOku totonu ke hoko angamaheni pē ʻa e ngaahi fehuʻi vakaiʻí, kae ʻikai fakamālohiʻi. ʻOku totonu ke fakaʻaiʻai ai ʻa e kau maí, kae ʻikai ko e fie pule.

Fakaafeʻi e kau akó ke vahevahe ha ngaahi sīpinga ʻo e hokohoko atu hono Fakafoki Mai ʻo e Ongoongoleleí. (Mahalo ʻe tokoni ke toe vakaiʻi ʻa e fakamatala ʻa ʻEletā Lekalanite R. Ketisi ko e Siʻí ʻi he konga 1 ʻo e naunau teuteú pea vahevahe ha sīpinga ʻe taha pe ua kuó ke ʻiloʻi.) Lolotonga e vahevahe ʻa e kau akó, te ke lava ʻo kiʻi taʻofi ʻo fai ha ngaahi fehuʻi vakaiʻi, hangē ko ʻení:

• Kuo tokoniʻi fēfē koe pe ko ha taha ʻokú ke ʻilo ʻe he [sīpinga ʻa e tokotaha akó] ke ke ofi ange ai kia Sīsū Kalaisi?

• ʻOkú ke pehē ʻe tokoni fēfē [ʻa e sīpinga ʻa e tokotaha akó] ke teuteuʻi kitautolu ki he Hāʻele ʻAngaua Maí?

• Kuo fakamālohia fēfē [ʻe he sīpinga ʻa e tokotaha akó] hoʻo fakamoʻoni ko e ngāue ʻeni ʻa e ʻEikí?

Ke tokoni ke fakahoungaʻi kakato ange ʻe he kau akó ʻa e mahuʻinga ʻo hono tānaki fakataha ʻo ʻIsilelí ʻi he hokohoko atu hono Fakafoki Mai ʻo e ongoongoleleí, fakakaukau ke fakaʻaliʻali ʻa e fakamatala ko ʻeni ʻa Palesiteni Nalesoní: “Ko e tānaki [ʻo ʻIsilelí] ko e meʻa mahuʻinga taha ia ʻoku hoko ʻi he māmaní he ʻaho ní” (Russell M. Nelson mo Wendy W. Nelson, “ʻAmanakiʻanga ʻo ʻIsilelí” [fakataha lotu fakamāmani lahi ʻa e toʻutupú, 3 Sune 2018], fakalahi ki he New Era mo e Ensign, 8, ChurchofJesusChrist.org).

Fakaafeʻi e kau akó ke fakaʻaongaʻi ha ngaahi miniti siʻi ke toe vakaiʻi ʻa e konga 2 ʻo e naunau teuteú pea kumi e ngaahi ʻuhinga ʻoku fuʻu mahuʻinga ai hono tānaki ʻo ʻIsilelí. Te ke lava leva ʻo ʻai ke nau fakatātaaʻi mo ha hoa pe fakakalasi ʻa e founga te nau tali ʻaki ki ha taha pe lahi ange ʻi he ngaahi tūkunga ko ʻení:

• Fakamatalaʻi ki ha kalasi semineli ʻi he ako māʻolungá ʻa e mahuʻinga ʻo hono tānaki fakataha ʻo ʻIsilelí.

• Vahevahe mo ha taha ʻoku ʻikai kau ki heʻetau tuí ʻa e founga ʻe lava ke tāpuekina ai e kakai kotoa pē ʻi hono tānaki ʻo ʻIsilelí.

• Fakamatalaʻi e ngaahi founga te tau lava ai ʻo tokoni ki he ʻEikí ʻi hono tānaki ʻo ʻIsilelí ki ha mēmipa ʻo e Siasí ʻokú ne ongoʻi taʻepauʻia ʻi he founga te ne lava ai ʻo tokoní.

Hili hono fakatātāʻí, te ke lava ʻo fakaafeʻi ha tokotaha ako ke lau leʻolahi e fakamatala ʻa Palesiteni Tieta F. ʻUkitofa ʻi he konga 1 ʻo e naunau teuteú. Te ke lava ʻo ʻoange ha taimi ki he kau akó ke lekooti ai ʻenau ngaahi fakakaukau fekauʻaki mo e ngaahi fehuʻi ko ʻení:

• Te ke fakamatalaʻi fēfē hoʻo ngaahi feinga ke paotoloaki e ngāue ʻa e ʻEikí ʻi he hokohoko atu hono Fakafoki Mai ʻo e Ongoongoleleí?

• Ko e hā ha tokoni te ke lava ʻo fai he taimí ni ke paotoloaki ai ʻEne ngāué? (Fakakaukau ke toe vakaiʻi e fakamatala ʻa Palesiteni Poni H. Kōtoni ʻi he konga 2 ʻo e naunau teuteú.)

ʻOku ngāue ʻa e Fakamoʻuí mo kitautolu ʻi heʻetau fakahoko ʻEne ngāué.

Fakakaukau ke vahevahe ʻa e ngaahi tūkunga ko ʻení:

Kuo maʻu ʻe Malia ha uiuiʻi foʻou ʻi hono uōtí pea ʻokú ne ongoʻi lōmekina ai. ʻI heʻene mavahe mei he ʻōfisi ʻo e pīsopé, ʻokú ne pehē loto pē: “Te u fakahoko fēfē ʻa e uiuiʻi ko ʻení? ʻOku ʻikai pē ke u feʻunga au. ʻOku ʻi ai ha niʻihi kehe ʻoku nau taau ange. Mahalo ʻoku totonu ke u kole ki he pīsopé ke kumi ha taha kehe.”

• Ko e hā ha faleʻi te ke ʻoange kia Malia?

Fakaafeʻi e kau akó ke toe vakaiʻi ʻa e Sēkope 5:70–72, Tokāteline mo e Ngaahi Fuakava 38:7, mo e Tokāteline mo e Ngaahi Fuakava 49:27 pea fekumi ki ha tefitoʻi moʻoni ʻe ala tokoni kia Malia. ʻE lava ke ʻiloʻi ʻe he kau akó ha tefitoʻi moʻoni hangē ko ʻení: ʻI heʻetau fai e ngāue ʻa e ʻEikí, ʻokú Ne ʻi hotau lotolotongá mo ngāue fakataha mo kitautolu.

• ʻE tokoniʻi fēfē ʻa Malia ʻi he ʻilo ko ia ʻoku ngāue ʻa e Fakamoʻuí mo kitautolú? ʻE ala tokoni fēfē atu ʻa e ʻilo ko ʻení kiate koé?

• Ko e hā ʻoku mahuʻinga ai ke ʻilo naʻe ʻi ai ʻa e Tamaí mo e Fakamoʻuí lolotonga ʻEne ngāue fakafaifekau ʻi he matelié? (Te ke lava ʻo toe vakaiʻi e fakamatala ʻa ʻEletā Kimi B. Kalake ʻi he konga 3 ʻo e naunau teuteú ke tokoni ki he kau akó ke tali e fehuʻi ko ʻení.)

• Ko e fē ha taimi kuó ke ongoʻi ai ha fakapapau naʻe ʻiate koe ʻa e Tamai Hēvaní mo Sīsū Kalaisi ʻi hoʻo fakahoko ʻEna ngāué?

ʻE lava ke fakakaukau ʻa e kau akó ki he finangalo lelei ʻa e Fakamoʻuí ke ngāue mo kinautolu ʻi heʻenau fakahoko ʻEne ngāué. ʻI heʻenau fakakaukau ki aí, te ke lava ʻo fakaʻaliʻali e lisi ko ʻení pea fakaafeʻi e kau akó ke nau lau e veesi kuo fili ki he himi takitaha. Poupouʻi e kau akó ke hiki ʻenau ngaahi fakakaukaú mo e ngaahi ongo fekauʻaki mo e meʻa ne nau laú.

• “Tuku ke Tau Faimālohi,” (Ngaahi Himí, fika 149), veesi 3

• “ʻE ʻOtua Māfimafi ʻAfio Mai” (Ngaahi Himí, fika 152), veesi 3

• “ʻO ka Tau ka Fakaʻaongaʻi ʻa e Taimi” (Ngaahi Himí, fika 166), veesi 4

• “Te U Fai Ho Finangaló” (Ngaahi Himí, fika 171), veesi 3

Ke fakaʻosi e kalasí, te ke lava ʻo kole ki ha toko taha pe toko ua ʻi he kau akó ke vahevahe ʻena aʻusia fekauʻaki mo e moʻoni ko ʻení: ʻI heʻetau fakahoko e ngāue ʻa e ʻEikí, ʻokú Ne ʻi hotau lotolotongá mo ngāue mo kitautolu.

Ki he Kalasi Hokó

Fakakaukau ke fakalotolahiʻi e kau akó ʻi ha ngaahi ʻaho siʻi kimuʻa he kalasi hono hokó ke nau ako ʻa e naunau teuteu ki he lēsoni 23.