Lēsoni 25 Naunau ʻa e Faiakó: Ko e Fāifeinga ke Hoko ko ha Ākonga Faivelenga ʻa Sīsū Kalaisí
“Lēsoni 25 Naunau ʻa e Faiakó: Ko e Fāifeinga ke Hoko ko ha Ākonga Faivelenga ʻa Sīsū Kalaisí,” Ko Sīsū Kalaisi mo ʻEne Ongoongolelei Taʻengatá – Naunau ʻa e Faiakó (2023)
“Lēsoni 25 Naunau ʻa e Faiakó,” Ko Sīsū Kalaisi mo ʻEne Ongoongolelei Taʻengatá – Naunau ʻa e Faiakó
Lēsoni 25 Naunau ʻa e Faiakó
Ko e Fāifeinga ke Hoko ko ha Ākonga Faivelenga ʻa Sīsū Kalaisí
ʻOku taau ʻa e feinga kotoa pē ke hoko ko ha ākonga faivelenga ʻa Sīsū Kalaisi koeʻuhí “ko Hono ʻalungá, ko e hala ia ʻoku fakatau ki he fiefia ʻi he moʻui ko ʻení pea mo e moʻui taʻengata ʻi he maama ka hoko maí” (“Ko e Kalaisi Moʻuí: Ko e Fakamoʻoni ʻa e Kau ʻAposetoló,” ChurchofJesusChrist.org). ʻE ʻiloʻi ʻe he kau akó ʻi he lēsoni ko ʻení, ʻa e meʻa ʻoku fie maʻu ʻe he ʻEikí mei Heʻene kau ākongá. Te nau fakakaukau foki ki he meʻa te nau lava ʻo fai ke hoko ai ko ha ākonga mateaki mo faivelenga ange ʻa Sīsū Kalaisí.
Ngaahi Fokotuʻu ki Hono Akoʻí
ʻOku fakaafeʻi kitautolu ʻe Sīsū Kalaisi ke hoko ko ʻEne kau ākonga.
Fakakaukau ke fakaʻaliʻali ha fakatātā ʻo hono fufulu ʻe Sīsū e vaʻe ʻo ʻEne kau ʻAposetoló, pea kole ki ha toko taha pe toko ua ʻo e kau akó ke vahevahe ʻa e ongo te nau maʻú kapau naʻe fufulu ʻe he Fakamoʻuí honau vaʻé.
Te ke lava ʻo fakaʻaliʻali e ngaahi fehuʻi ko ʻení pea kole ki he kau akó ke nau fakalaulauloto ki ai ʻi ha kiʻi miniti:
Ko e hā te u lava ʻo ako fekauʻaki mo e ngaahi ʻulungaanga ʻo e Fakamoʻuí mei Heʻene ngaahi tōʻonga ki Heʻene kau ʻAposetoló? Te u lava fēfē nai ʻo muimui lelei ange ki he ngaahi ʻulungaanga faka-Kalaisi ko ʻení?
Fakamatalaʻi ange ko e faʻahinga fehuʻi ko ʻení te tau lava ʻo fehuʻi loto pē ʻi heʻetau fāifeinga ke hoko ko ha kau ākonga lelei ange ʻa Sīsū Kalaisí. Ko e ākonga ʻa Kalaisí ko ha taha ʻoku muimui ki he Fakamoʻuí mo moʻui ʻaki ʻEne ngaahi akonakí (vakai, Tokāteline mo e Ngaahi Fuakava 41:5). Hili hono fufulu ʻe he Fakamoʻuí e vaʻe ʻo ʻEne kau ʻAposetoló, naʻá Ne akoʻi lahi ange kinautolu fekauʻaki mo e tuʻunga fakaākongá.
Fakaafeʻi e kau akó ke nau toe vakaiʻi e Sione 13:14–17, 34–35; 14:15 pea fakakakato ʻa e fakamatala ko ʻení: Ko ha ākonga ʻa Sīsū Kalaisí …
Fakaafeʻi ha kau ako ʻe niʻihi ke vahevahe ʻenau ngaahi fakamatala kuo fakakakató, ʻa ia ʻe lava ke kau ai e ngaahi kupuʻi lea hangē ko e “ʻoku tokoni ki he niʻihi kehé,” “ʻoku ʻofa ki he niʻihi kehé,” mo e “ʻoku tauhi ʻEne ngaahi fekaú.” ʻI he tali ʻa e kau akó, te ke ala fai ha ngaahi fehuʻi hangē ko ʻení ke muimuiʻi ʻaki:
Ko hai mei he folofolá pe ko hoʻo moʻuí ʻokú ne fakatātaaʻi e faʻahinga tuʻunga fakaākonga ko ʻení? Kuo tokoniʻi fēfē nai koe ʻe heʻene sīpingá?
Ko Hono Fakatupulaki ʻEtau Founga Akoʻí mo e Akó
ʻOange ki he kau akó ha ngaahi faingamālie ke nau vakavakaiʻi ai kinautolu. ʻE lava ke hoko ʻa e vakaiʻi pē kitá ko ha meʻangāue ʻaonga ki he tupulaki fakatāutahá. Ka neongo ia, ʻe ʻi ai ha ngaahi meʻa ʻe niʻihi te nau ala tataki e kau akó ke nau ongoʻi halaia pe loto-foʻi. Fakamanatu ki he kau akó ʻi heʻenau fakakakato ʻa e vakaiʻi pē kita ko ʻení ke faʻa kātaki mo angaʻofa kiate kinautolu. Kuo folofola ʻa e ʻEikí, “Te u ʻaloʻofa ki homou vaivaí” (Tokāteline mo e Ngaahi Fuakava 38:14).
Te ke lava ʻo fakaʻaliʻali pe ‘oange ki he kau akó ha tatau ʻo e vakaiʻi pē kita ko ʻení.
Vakaiʻi pē Kita ʻi he Tuʻunga Fakaākongá
Ko Sīsū Kalaisi mo ʻEne Ongoongolelei Taʻengatá – Naunau ʻa e Faiakó—Lēsoni 25
Fakakaukau ki he fakamatala takitaha pea fakafuofuaʻi koe ʻo fakaʻaongaʻi ʻa e meʻafua ko ʻení: 1 = taʻe-fiemālie ʻaupito, 2 = kiʻi taʻe-fiemālie, 3 = ʻikai fiemālie pe taʻe-fiemālie, 4 = kiʻi fiemālie, mo e 5 = fiemālie ʻaupito.
ʻOku ou fāifeinga fakamātoato ke hoko ko ha ākonga ʻa Sīsū Kalaisi.
ʻOku ou feinga ke tauhi e ngaahi fekau ʻa e Fakamoʻuí he ʻaho kotoa pē.
ʻOku ou feinga ke ʻofa mo tokoniʻi ʻa kinautolu ʻoku mau feohí ʻo hangē ko ia ne mei fai ʻe Sīsū Kalaisí.
ʻOku ou feinga ke feilaulauʻi e ngaahi holi fakamāmaní kae muimui ki he Fakamoʻuí.
Hili hono maʻu ʻe he kau akó ha taimi ke lekooti ai ʻenau ngaahi talí, fakaafeʻi kinautolu ke fakaʻaongaʻi ha ngaahi miniti siʻi ke fakalaulauloto ki he meʻa ʻoku nau ako mei he vakaiʻi pē kita ko ʻení.
Vahevahe mo e kau akó naʻe fakaafeʻi ʻe he Fakamoʻuí ha pule koloaʻia kei talavou ke ne vakaiʻi pē ia. Fakaafeʻi ha tokotaha ako ke fakamatalaʻi fakanounou e talanoa ʻo e talavou ko ʻení (vakai ki he konga 2 ʻo e naunau teuteú).
Ko e hā ʻoku mahuʻinga fekauʻaki mo e fehuʻi “Ko e hā ʻoku ou kei hala aí?” (Mātiu 19:20). Ko e hā ʻoku mahuʻinga ai ke fai e fehuʻi ko ʻení ʻe he kau ākonga kotoa pē ʻa Sīsū Kalaisí?
Fakaafeʻi e kau akó ke lau ʻa e Maʻake 10:21, ʻo kumi e founga naʻe fakamatalaʻi ʻaki ʻe Maʻake e ngaahi ongo ʻa e Fakamoʻuí fekauʻaki mo e pule kei talavou koloaʻia ko ʻení.
ʻE tokoniʻi fēfē nai koe hono ongoʻi e ʻofa ʻa e Fakamoʻuí ʻi he taimi ʻokú ke ʻiloʻi ai ha meʻa ʻoku fie maʻu ke ke liliú?
Te ke lava leva ʻo ʻai ke toe vakaiʻi ʻe he kau akó e fakamatala ʻa ʻEletā Leli R. Lōleni ʻi he konga 2 ʻo e naunau teuteú. Fakaʻaliʻali leva ʻa e ngaahi fehuʻi ko ʻení, pea fakaafeʻi e kau akó ke hiki ʻenau ngaahi fakakaukau fekauʻaki mo e fehuʻi ʻoku nau pehē ʻoku mahuʻinga tahá:
Ko e hā e meʻa ʻokú ne taʻofi hoʻo tupulaki fakalaumālié?
Te ke fakahaaʻi fēfē nai ki he ʻEikí hoʻo holi ke fua ho kolosí pea muimui kiate Iá?
ʻOku ʻi ai nai ha meʻa ʻokú ke ongoʻi ʻoku fie maʻu ke ke feilaulauʻi he taimí ni ke ke hoko ai ko ha ākonga lelei ange ʻa Sīsū Kalaisí?
ʻOku fakamālohia ʻe he ʻEikí ʻEne kau ākongá.
Te ke lava ʻo fakaʻaliʻali ʻa e fakamatala ko ʻeni ʻa Palesiteni Sēmisi E. Fausí pea fakaafeʻi e kau akó ke kumi e ngaahi tāpuaki ʻoku talaʻofa kiate kinautolu ʻoku loto fiemālie ke fakahoko e ngāue ʻo e tuʻunga fakaākongá:
ʻĪmisi
Palesiteni James E. Faust
ʻOku fakakaukau e tokolahi ʻoku fuʻu mamafa mo fakakavenga e tuʻunga fakaākongá. Ki he niʻihi, ʻoku kau ai hono foaki ha meʻa ʻoku fuʻu tōtuʻa. Ka ʻoku ʻikai ke mamafa ʻa e kolosí ʻo hangē ko ʻene ʻasí. ʻOku tau maʻu ha mālohi lahi ange ke fua ia ʻi heʻetau talangofuá.
“Haʻu kiate au ʻa kimoutolu kotoa pē ʻoku feinga mo mafasiá, pea te u foaki ʻa e fiemālié kiate kimoutolu.
“Toʻo ʻeku haʻamongá kiate kimoutolu, pea mou ako ʻiate au; he ʻoku ou angavaivai mo angamalū: pea te mou ʻilo ai ʻa e fiemālié ki homou laumālié.
Te ke lava ʻo kole ki he kau akó ke nau ngāue mo hanau hoa pe ʻi ha fanga kiʻi kulupu iiki pea tuku ke nau toe vakaiʻi ʻa e Loma 8:16–18, 28, 35, 38–39. Fakaafeʻi kinautolu ke kumi e ngaahi moʻoni ʻe lava ʻo tokoni kiate kinautolu ʻi heʻenau fehangahangai mo e ngaahi faingataʻa ʻo e tuʻunga fakaākongá. (ʻE lava ke ʻiloʻi ʻe he kau akó ha ngaahi moʻoni hangē ko ʻení: Kapau ko ha kau ākonga faivelenga kitautolu, te tau lava ʻo hoko ko e kaungā-ʻea-hoko fakataha mo Sīsū Kalaisi pea lāngilangiʻia fakataha mo Ia. Kapau ʻoku tau ʻofa ʻi he ʻOtuá ʻe fengāueʻaki fakataha ʻa e ngaahi meʻa kotoa pē koeʻuhí ko ʻetau leleí.)
ʻI hono vahevahe ʻe he kau akó e ngaahi moʻoni ne nau maʻú, fakakaukau ke fai ange e ngaahi fehuʻi ko ʻení:
ʻE tokoni fēfē nai ʻa e tui te tau lava ʻo hoko ko ha kaungā-ʻea-hoko fakataha mo Sīsū Kalaisí ke tau kei hoko ai ko ha kau ākonga faivelenga? (Te mou lava ʻo toe vakaiʻi ʻa e 2 Nīfai 9:18. Mahalo ʻe mahuʻinga ke fakamahinoʻi ʻoku maʻu ʻe he kaungā-ʻea-hokó ha tofiʻa tatau mo ha taha kehe [vakai, Tokāteline mo e Ngaahi Fuakava 76:50, 55–59; 84:38].)
Kuo poupouʻi fēfē nai koe ʻe hoʻo ʻofa ki he ʻOtuá mo ʻEne ʻofa kiate koé ʻi he taimi kuo faingataʻa ai e hala ʻo e tuʻunga fakaākongá?
Ke fakaʻosi e kalasí, te ke lava ʻo vahevahe hoʻo fakamoʻoni ki he ngaahi tefitoʻi moʻoni ʻo e tuʻunga fakaākongá ʻa ia naʻa mou aleaʻi fakakalasí. Pe te ke lava ʻo mamata ʻi he “Ko Hono Moʻui Fiefia ʻAki e Ongoongoleleí” (1:40) mo Palesiteni Tieta F. ʻUkitofa ne hoko kimuʻa ko ha mēmipa ʻo e Kau Palesitenisī ʻUluakí.
