“Lēsoni 13 Naunau ʻa e Faiakó: Ko e Ngāue Fakaetauhi ʻo hangē ko e Fakamoʻuí,” Ko Sīsū Kalaisi mo ʻEne Ongoongolelei Taʻengatá - Naunau ʻa e Faiakó (2023)
“Lēsoni 13 Naunau ʻa e Faiakó,” Ko Sīsū Kalaisi mo ʻEne Ongoongolelei Taʻengatá – Naunau ʻa e Faiakó
Lēsoni 13 Naunau ʻa e Faiakó
Ko e Ngāue Fakaetauhi ʻo hangē ko e Fakamoʻuí
Lolotonga e moʻui ʻa e Fakamoʻuí, naʻá Ne ngāue fakaetauhi ki he niʻihi kehé ʻi Heʻene fakamālohia ʻa e tuí, faitāpuekina, fakamoʻui, fakafiemālieʻi, mo fakamolemoleʻí. ʻE maʻu ʻe he kau akó ʻi he lēsoni ko ʻení, ʻa e faingamālie ke fakamatalaʻi ʻa e ʻuhinga ʻo e ngāue fakaetauhi ʻo hangē ko e Fakamoʻuí. Te nau fakakaukauʻi foki ha ngaahi founga faka-Kalaisi te nau lava ai ʻo ngāue fakaetauhi kiate kinautolu ʻoku nau feohí.
Ngaahi Fokotuʻu ki Hono Akoʻí
Ko e Fakamoʻuí ʻa hotau faʻifaʻitakiʻanga haohaoa ki he founga ʻo e ngāue fakaetauhi ʻi he ʻofá.
Te ke lava ʻo kamata e kalasí ʻaki hano fakaʻaliʻali ha fakatātā ʻo hono fufulu ʻe he Fakamoʻuí e vaʻe ʻo ʻEne Kau ʻAposetoló. Pe te ke lava ʻo huluʻi e “Ko e ʻOhomohe Fakaʻosí” mei he 0:00 ki he 0:50.
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fc1%2Fe2%2Fc1e27db7be764cd12db7bd46123e57c438943488%2Fc1e27db7be764cd12db7bd46123e57c438943488.jpeg/full/!250,/0/default)
-
Ko e hā te tau lava ʻo ako fekauʻaki mo e ngāue fakaetauhí mei hono fufulu ʻe Sīsū e vaʻe ʻo ʻEne Kau ʻAposetoló? (Fakakaukau ke toe vakaiʻi ʻa e fakamatala ʻa ʻEletā Sefilī R. Hōlani ʻi he konga 1 ʻo e naunau teuteú.)
Fakamanatu ange ki he kau akó naʻe hili hono fufulu ʻe he Fakamoʻuí e vaʻe ʻo e Kau ʻAposetoló, naʻá Ne ʻoange ha fekau foʻou kiate kinautolu. Fakakaukau ke mou lau fakataha ʻa e Sione 13:34–35 pea fakaʻaliʻali ʻa e moʻoni ko ʻení: ʻE lava ke ʻiloa kitautolu ko e kau ākonga ʻa Kalaisi ʻo kapau te tau feʻofaʻaki ʻo hangē ko ʻEne ʻofa ʻiate kitautolú.
ʻI hoʻo fakaafeʻi e kau akó ke vahevahe ʻa e ʻuhinga ʻo e foʻi moʻoni ko ʻení ki honau tuʻunga fakaākongá, te mou lava ʻo aleaʻi ha taha pe lahi ange ʻo e ngaahi fehuʻi ko ʻení:
-
ʻOku kaunga fēfē nai hoʻo ʻofa ki he niʻihi kehé ʻo hangē ko e ʻofa ʻa e Fakamoʻuí ʻiate kitautolú ki he founga hoʻo ngāue fakaetauhí?
-
Ko e hā kuó ne tokoniʻi koe ke ke ngāue fakaetauhi ʻi he ʻofa faka-Kalaisi lahi angé?
-
Te tau ʻilo fēfē nai ʻa kinautolu ʻoku fie maʻu ʻetau tokoní mo e meʻa te tau lava ʻo faí? (Te mou lava ʻo toe vakaiʻi mo aleaʻi e fakamatala ʻa Palesiteni Lāsolo M. Nalesoni mo Palesiteni Henelī B. ʻAealingí ʻi he konga 1 ʻo e naunau teuteú, ko ha konga ʻo hoʻomou fealēleaʻakí.)
Fakakaukau ke fakaafeʻi ha niʻihi ʻo e kau akó ke nau vahevahe ʻa e founga kuo nau ongoʻi ai e ʻofa ʻa e Fakamoʻuí ʻi heʻenau moʻuí ʻi heʻenau ngāue fakaetauhi ki he niʻihi kehé pe ʻi he ngāue fakaetauhi ange ʻa e niʻihi kehé kiate kinautolú.
Te ke lava ʻo fakaʻaliʻali ʻa e fakamatala taʻe-kakato ko ʻení ʻi he palakipoé: Te tau lava ʻo ngāue fakaetauhi ʻi he ʻofa faka-Kalaisí ʻi heʻetau …
Fakamanatu ange ki he kau akó naʻe fakaafeʻi kinautolu ʻi he konga 1 ʻo e naunau teuteú ke ako mo fakakaukau ki he sīpinga ngāue fakaetauhi ʻa e Fakamoʻuí. Vahevahe ʻa e kau akó ki ha ngaahi kulupu iiki. Fakaafeʻi kinautolu ke toe vakaiʻi e ngaahi sīpinga fakafolofola ne nau akó pea mo ha faʻahinga ongo ne nau lekooti. Fakaʻaliʻali pe ʻoange ki he kulupu takitaha ha tatau ʻo e ngaahi fehuʻi ko ʻení, pea fakaafeʻi e kau akó ke nau aleaʻi fakataha ia.
-
Ko e hā ʻokú ke saiʻia taha ai ʻi he founga ngāue fakaetauhi ʻa e Fakamoʻuí ʻi he fakamatala naʻá ke akó?
-
Te tau lava fēfē nai ʻo muimui ki Heʻene sīpingá ʻi heʻetau ngāue fakaetauhi ki he niʻihi kehé? (Te mou lava ʻo toe vakaiʻi fakataha ʻa e fakamatala ʻa Palesiteni Sini B. Pingihami mo Sisitā Seiloni ʻIupangikē ʻi he konga 1 ʻo e naunau teuteú ko ha konga ʻo hoʻomou fealeaʻakí pea vahevahe ʻa e meʻa naʻá ke saiʻia ai mei aí.)
-
Kuo tokoniʻi fēfē nai koe ʻe hoʻo ngaahi feinga ke ngāue fakaetauhi ʻo hangē ko e Fakamoʻuí ke ke ofi ange ai kiate Iá?
Te ke lava ʻo fakaafeʻi ha niʻihi ʻo e kau akó ke vahevahe mo e kalasí ʻa e ngaahi meʻa mahuʻinga mei heʻenau fealeaʻaki fakakulupú. Te ke lava ʻo tānaki atu ha ngaahi fakaʻosinga ki he fakamatala taʻe-kakato ʻi he palakipoé lolotonga e vahevahe ʻa e kau akó.
Te tau lava ʻo ako ke ʻofa mo ngāue fakaetauhi ki he fānau kotoa pē ʻa e ʻOtuá.
Fakakaukau ke mou toe vakaiʻi fakakalasi ʻa e talanoa fakatātā ʻo e Samēlia leleí ʻi he Luke 10:25–37. Te ke lava ʻo poupouʻi ʻa e kau akó ke nau fakafehoanaki ʻa e ngaahi tōʻonga mo e angafai ʻa e taulaʻeikí mo e Līvaí pea mo e Samēliá. Fakaafeʻi e kau akó ke vahevahe e meʻa ʻoku nau ako mei he talanoa fakatātaá fekauʻaki mo e ngāue fakaetauhi ki he niʻihi kehé ʻo hangē ko ia ne fai ʻe he Fakamoʻuí. Ke poupouʻi ʻa e fakakaukau mo e vahevahe ʻoku loloto angé, te ke lava ʻo ʻeke ha niʻihi ʻo e ngaahi fehuʻi ko ʻení:
-
ʻOkú ke pehē ko e hā nai naʻe fili ai ʻe he Fakamoʻuí ha Samēlia ko e sīpinga ʻoku totonu ke tau faʻifaʻitaki ki aí?
-
ʻE lava fēfē nai ke fakatatau ʻa e Samēlia ʻi he talanoa fakatātaá kia Sīsū Kalaisí?
-
Ko e hā te ne lava ʻo taʻofi kitautolu mei he ngāue fakaetauhi ki he niʻihi kehé ʻo hangē ko ia naʻe mei fai ʻe he Fakamoʻuí? Te tau lava fēfē nai ʻo maʻu e tokoni ʻa e Tamai Hēvaní mo Sīsū Kalaisi ke ikunaʻi e ngaahi tūkiaʻanga ko ʻení?
Ke tokoni ki he kau akó ke nau fakakaukau ki he founga te nau lava ai ʻo ngāue fakaetauhi ʻi he ngaahi founga faka-Kalaisí, fakaʻaliʻali pe tufa ha laʻipepa ʻoku ʻi ai e ngaahi tūkunga ko ʻení (te ke lava foki ʻo faʻu haʻo meʻa pē ʻaʻau). Te ke lava ʻo fakaafeʻi e kau akó ke nau fili ha niʻihi ʻo kinautolu pea aleaʻi ʻa e ngaahi faingataʻa ʻoku hoko aí kae pehē ki he ngaahi founga faka-Kalaisí ke ngāue fakaetauhi ai ʻi he tūkunga takitaha. Te ke lava ʻo ʻai ke fakahoko fakakalasi pe fakakulupu iiki ʻe he kau akó ʻa e ʻekitivitī ko ʻení.
-
Kuo fakahā atu ʻe hoʻo kaungāmeʻá ʻokú ne fefaʻuhi mo e palopalema ʻi he ponokalafí.
-
Kuo vahe atu koe ke ke ngāue fakaetauhi ki ha taha ʻoku ʻikai ke ne saiʻia ke ke ʻaʻahi ange ki ai.
-
ʻOku ʻi ai hao kaungāmeʻa tangata naʻá ne toki fakahā ʻokú ne manako pē ʻi he tangatá pea ʻoku ʻikai ke ne toe ongoʻi ʻoku feʻunga mo e lotú.
-
ʻOkú ke ngāue mo ha taha kuó ne toki aʻusia ʻa e pekia ha taha ‘okú ne ‘ofa ai.
-
ʻOkú ke fakatokangaʻi ha kaungāmeʻa naʻá ne faʻa lea ʻaki ʻi he tui fekauʻaki mo e ngaahi faleʻi ʻa e palōfitá ka ko ʻeni ʻokú ne fakaangaʻi ia.
Ko Hono Fakatupulaki ʻEtau Founga Akoʻí mo e Akó
Poupouʻi e kau akó ke nau fakahoko ha ngaahi ngāue maʻoniʻoni. ʻOange ki he kau akó ha ngaahi faingamālie ke nau fakalaulauloto ki he founga ʻe lava ke nau ngāue ai ʻi he tuí mo fakaʻaongaʻi e meʻa ʻoku nau akó. ʻI hoʻo poupouʻi maʻu pē e kau akó ke fakalaulauloto mo fakaʻaongaʻi e meʻa ʻoku nau akó, te ke lava ʻo tokoniʻi kinautolu ke fakatupulaki ʻenau tuʻunga malava ke fakahoko ʻa e ngāue māʻoniʻoní. Muimuiʻi ʻo ka fie maʻu.
Fakaafeʻi e kau akó ke nau fakalaulauloto mo tohi ʻenau ngaahi fakakaukau fekauʻaki mo e ngaahi fehuʻi ko ʻení:
-
Ko hai ʻokú ke ongoʻi ke hiki hake, fakamālohia, pe poupouʻí?
-
Ko e hā ha ngāue tokoni faka-Kalaisi te ke lava ʻo fai maʻá e tokotahá ni?
Fakakaukau ke fakamoʻoni ki he mahuʻinga ʻo hono ngāueʻi e ngaahi ueʻi fakalaumālié ke tāpuekina e moʻui ʻa e niʻihi kehé pea mo e fiefia ʻe lava ke maʻu mei he ngāue fakaetauhi ʻo hangē ko e Fakamoʻuí.
Ki he Kalasi Hokó
ʻI he lolotonga ʻo e uiké, fakakaukau ke ʻave ki he kau akó ʻa e pōpoaki ko ʻení pe ko haʻo pōpoaki pē ʻaʻau: ʻI hoʻo ako ʻa e naunau teuteu ki he lēsoni 14, fakakaukau pe ko e hā ʻa e mana maʻongoʻonga taha te ke ala aʻusiá.