Lēsoni 21 Naunau ʻa e Faiakó

Ko e Fanongo ki he Leʻo ʻo e ʻEikí ʻi he Ngaahi ʻAho Kimui Ní

“ʻI hotau kuongá ni, ne hā ai [ʻa Sīsū Kalaisi] mo ʻEne Tamaí ki he kiʻi tamasiʻi ko Siosefa Sāmitá, ʻo ne fakafeʻao mai ai ʻa e talaʻofa ko ia ne fai fuoloa ko e ʻkuonga ʻo e kakato ʻo e ngaahi kuongá’” (“Ko e Kalaisi Moʻuí: Ko e Fakamoʻoni ʻa e Kau ʻAposetoló,” ChurchofJesusChrist.org). ʻE fakaafeʻi e kau akó ʻi he lēsoni ko ʻení ke nau fakakaukau ki he founga ʻe lava ai ʻe he fakamoʻoni ʻa Siosefa Sāmita kia Sīsū Kalaisí ʻo fakamālohia ʻenau tui kiate Iá. ʻE fakaafeʻi foki ʻa e kau akó ke nau fakapapauʻi ʻa e founga te nau lava ai ʻo fakatupulaki ʻenau malava ke fanongo ki he leʻo ʻo e Fakamoʻuí.

Ngaahi Fokotuʻu ki Hono Akoʻí

Ko Siosefa Sāmitá ko ha fakamoʻoni tonu ia ki he ʻOtua ko e Tamaí mo Sīsū Kalaisi.

Fakaʻaliʻali ʻa e fakamatala ko ʻeni naʻe fai ʻe Palesiteni Kōtoni B. Hingikelií:

Naʻe hoko ʻa e Palōfita ko Siosefa Sāmitá ko ha fakamoʻoni mahuʻinga ki he Kalaisi moʻuí. (Gordon B. Hinckley, “What Hath God Wrought through His Servant Joseph!,” Ensign, Jan. 1997, 2)

• Ko e hā ʻoku hoko ai ʻa Siosefa Sāmita ko ha “fakamoʻoni mahuʻinga ki he Kalaisi moʻuí”?  

Hiki ʻi he palakipoé ʻa e fakamatala ko ʻení: Fakafou ʻi he aʻusia tonu ʻa Siosefa Sāmitá, naʻá ne ako ai …

Fakaafeʻi e tokotaha ako takitaha ke fili pea toe vakaiʻi e Siosefa Sāmita—Hisitōlia 1:16–17, Tokāteline mo e Ngaahi Fuakava 76:22–24, pe Tokāteline mo e Ngaahi Fuakava 110:2–4, ʻo kumi ha founga ke fakakakato ʻaki e fakamatala ʻi he palakipoé. Fakaafeʻi leva e kau akó ke vahevahe ʻenau ngaahi fakamatala kuo fakakakató, ʻa ia ʻe lava ke kau ai ʻa e ngaahi moʻoni ko ʻení: ʻOku ʻi ai ʻa e Tamai Hēvaní mo Sīsū Kalaisi; ʻOku sino mavahevahe mo kehekehe ʻa Sīsū Kalaisi mo e Tamai Hēvaní; ʻOku maʻu ʻe Sīsū Kalaisi ha sino nāunauʻia mo toetuʻu; ʻOku ʻafioʻi kitautolu ʻe Sīsū Kalaisi ʻaki hotau hingoá; Ko Sīsū Kalaisi ʻa e ʻAlo pē Taha naʻe Fakatupu ʻo e Tamaí; Ko Sīsū Kalaisi ʻa e Tupuʻangá; Ko Sīsū Kalaisi ʻa hotau Taukapo ki he Tamaí.

ʻI he vahevahe ʻa e kau akó, fakakaukau ke fai ha ngaahi fehuʻi ʻe lava ʻo tokoni ke fakaloloto ʻenau mahino ki he ngaahi moʻoni ʻoku nau ʻiló. Hangē ko ʻení:

• Ko e hā ʻoku mahuʻinga ai ke ʻiloʻi e moʻoni mahuʻinga ko ʻení fekauʻaki mo Sīsū Kalaisí?

• ʻOku fakamālohia fēfē ʻe he moʻoni ko ʻení hoʻo fakamoʻoni ki he Fakamoʻuí?

• ʻE fakatupulaki fēfē hoʻo loto-holi ke muimui kiate Iá ʻi hono ʻilo e moʻoni ko ʻení?

Hili ha taimi fealeaʻaki, fakaafeʻi ha toko taha pe toko ua ʻi he kau akó ke vahevahe ʻena fakamoʻoní kia Siosefa Sāmita ko ha fakamoʻoni ʻo e Fakamoʻuí.

Te tau lava ʻo fanongo ki he leʻo ʻo e ʻEikí.

Ko Hono Fakatupulaki ʻEtau Founga Akoʻí mo e Akó

Tanumaki ha ngaahi aʻusia fakaako mahuʻinga. Ke tokoni ke maʻu ʻe he kau akó ha ngaahi aʻusia fakaako ʻuhingamālie angé, kumi ha ngaahi founga ke fakafehokotaki ai e meʻa ʻoku nau akó ki honau ngaahi tūkungá, meʻa ʻoku nau manako aí, mo e ngaahi fehuʻí. Fakaʻaongaʻi e ngaahi maʻuʻanga tokoni mei he naunau teuteú mo e ngaahi aʻusia fakataautaha ʻa e kau akó ke vakaiʻi e founga kuo ʻaonga pe ʻe lava ʻo ʻaonga ai e ngaahi moʻoni ʻo e ongoongoleleí ki heʻenau moʻuí.

Fakakaukau ke vahevahe ʻa e tūkunga ko ení pe ko ha meʻa pē ʻaʻau:

Naʻe talaange ʻe he ongo faifekaú ki ho kaungāmeʻá kapau te ne tafoki ki he ʻEikí, te ne lava ʻo maʻu e fakahaá mo fanongo ki Hono leʻó. Neongo ʻokú ne loto ke tui ki he talaʻofa ko ʻení, ka ʻokú ne hohaʻa naʻá ne maʻuhala ʻene ngaahi fakakaukaú ko Hono leʻó. ʻOkú ne fehuʻi, “ʻOkú ke ʻiloʻi fēfē ʻa e taimi ʻokú ke fanongo ai ki he leʻo ʻo e ʻEikí?”

Fakaafeʻi ha kau ako tokosiʻi ke vahevahe e founga te nau tali ʻakí. Te ke lava foki ʻo tuku ke vahevahe ʻe he kau akó ha ngaahi faingataʻa pe hohaʻa kehe ʻoku nau fehangahangai mo ia ʻi he fanongo ki he leʻo ʻo e Fakamoʻuí.

Fakamanatu ki he kau akó naʻe akoʻi ʻa ʻŌliva Kautele fekauʻaki mo ʻene fanongo ki he leʻo ʻo e Fakamoʻuí ʻi he taimi naʻá ne maʻu ai ha ngaahi fehuʻi fekauʻaki mo e uiuiʻi fakapalōfita ʻo Siosefa Sāmitá. Fakaafeʻi e kau akó ke nau toe vakaiʻi e Tokāteline mo e Ngaahi Fuakava 6:14–15, 22–23, ʻo kumi e meʻa naʻe akoʻi ʻe he ʻEikí kia ʻŌliva Kautele fekauʻaki mo e fanongo ki Hono leʻó.

• Ko e hā te tau lava ʻo ako fekauʻaki mo e fanongo ki he leʻo ʻo e ʻEikí mei he aʻusia ʻa ʻŌlivá? (ʻE lava ke ʻiloʻi ʻe he kau akó ha moʻoni hangē ko ʻení: Te tau lava ʻo fanongo ki he leʻo ʻo e ʻEikí ʻo fakafou ʻi he Laumālie Māʻoniʻoní. ʻOku fakamaama ʻe he leʻo ʻo e Fakamoʻuí hotau ʻatamaí mo ʻomi ha nonga kiate kitautolu.)

• Ko e hā ʻoku mahuʻinga ai ke tau feinga maʻu pē ke fanongo ki he leʻo ʻo e Fakamoʻuí—tautautefito ʻi hotau kuongá?

• Kuo tāpuekina fēfē hoʻo moʻuí ʻi he fanongo ki he leʻo ʻo e ʻEikí?

Fakakaukau ke fakaʻaliʻali ʻa e fakamatala ko ʻeni ʻa Palesiteni Lāsolo M. Nalesoní:

Ko e taimi ʻoku tau feinga ai ke fanongó—ʻo fanongo moʻoni—ki Hono ʻAló, ʻe tataki kitautolu ke tau ʻilo e meʻa ke tau fai ʻi ha faʻahinga tūkunga pē. …

ʻI heʻetau feinga ke hoko ko e kau ākonga ʻa Sīsū Kalaisí, ʻoku fie maʻu ke lahi ange e taumuʻa ʻo ʻetau feinga ke fanongo kiate Iá. (Russell M. Nelson, “Fanongo Kiate Ia,” Liahona, Mē 2020, 89)

Te ke lava ʻo vahevahe ha sīpinga fakatāutaha ʻo ha founga ʻe taha ʻokú ke fanongo ai ki he leʻo ʻo e ʻEikí ʻi hoʻo moʻuí. Pe te ke huluʻi ha sīpinga mei ha taki ʻo e Siasí, ʻoku maʻu ʻi he ʻū vitiō “Fakafanongo kiate Ia” ʻi he Gospel Media (ChurchofJesusChrist.org).

ʻOange ki he tokotaha ako takitaha ʻa e laʻipepa tufa ko ʻení.

Fanongo kiate Ia!

Ko Sīsū Kalaisi mo e Ongoongolelei Taʻengatá – Naunau ʻa e Faiakó—Lēsoni 21

Fakakaukauloto kuo ʻoatu kiate koe ʻa e faingamālie ke faʻu ha foʻi vitiō nounou ʻoku fakahaaʻi ai ʻa e founga ʻokú ke fanongo ai ki he leʻo ʻo e Fakamoʻuí. Hiki ha kiʻi fakamatala nounou ki he meʻa te ke vahevahe ʻi he tali ki he “Founga ʻOku Ou Fanongo Ai Kiate Iá.” ʻE ala tokoni atu e ngaahi fehuʻi ko ʻení ʻi hoʻo faʻu hoʻo fokotuʻutuʻú:

• Ko e hā ha ngaahi aʻusia kuó ne tokoniʻi koe ke mahino lelei ange ʻa e founga ʻoku folofola atu ai ʻa e ʻEikí kiate koé?

• Ko e hā ha ngaahi fakakaukau te ke ala fakakau mei he ngaahi fakamatala ʻa Palesiteni Lāsolo M. Nalesoni mo Sisitā Mīsela D. Keleki ʻi he konga 2 ʻo e naunau teuteú?

• Te ke vahevahe fēfē hoʻo ngaahi fakakaukaú mo e ngaahi ongó ʻi ha founga ʻe mahino ngofua ki he niʻihi kehé?

Faʻu ha kiʻi pōpoaki nounou mei hoʻo fokotuʻutuʻú (palakalafi ʻe taha ki he ua) te ke lava ʻo vahevahe mo e kalasí.

Kapau te ke fie maʻu, te ke lava ʻo fakalaulauloto mo lekooti ʻa e meʻa ʻokú ke fie fakahoko ke fakatupulaki ai hoʻo malava ke fanongo ki he leʻo ʻo e Fakamoʻuí.

© 2023 ʻe he Intellectual Reserve, Inc. All rights reserved.

Fanongo kiate Ia!

Ko Sīsū Kalaisi mo e Ongoongolelei Taʻengatá – Naunau ʻa e Faiakó—Lēsoni 21

Hili hono ʻoange ha taimi feʻunga, fakaafeʻi ha kau ako ʻe niʻihi ke vahevahe mo e kalasí ʻenau pōpoaki “Fanongo kiate Iá.” Poupouʻi e kau akó ke vahevahe foki ʻenau pōpoaki “Fanongo kiate Iá” ʻi tuʻa ʻi he kalasí. ʻE lava ke fakahoko ʻeni ʻi ha fepōtalanoaʻaki mata ki he mata, telefoni, pe pōpoaki telefoni pe ʻi he mītia fakasōsialé.

Kapau ʻe feʻunga ʻa e taimí, fakakaukau ke fakaafeʻi e kau akó ke nau fakamātoato ange ʻi heʻenau feinga ke fanongo ki he ʻEikí. Te nau lava ʻo fakaʻaongaʻi ha ngaahi miniti siʻi ke palani mo fakataimi-tēpileʻi e founga te nau ala fakahoko ai ʻení.

Ki he Kalasi Hokó

Fakakaukau ke vahevahe ʻa e pōpoaki ko ʻení, pe ko haʻo pōpoaki pē ʻaʻau, ʻi ha ngaahi ʻaho siʻi kimuʻa ʻi hoʻo kalasi hokó: ʻI hoʻo ako ʻa e naunau teuteu ki he lēsoni 22, fakakaukau ki he ʻuhinga kiate koe ʻa e hokohoko atu hono Fakafoki Mai ʻo e Ongoongoleleí.