Lēsoni 12 Naunau ʻa e Faiakó

Ko Hono Maʻu e Moʻoni Haohaoá ʻi he Ngaahi Akonaki ʻa Sīsū Kalaisí

Naʻe pehē ʻe Palesiteni Lāsolo M. Nalesoni: “ʻOku mālohi fau e tokāteline haohaoa ʻa Kalaisí. ʻOkú ne liliu e moʻui ʻa e taha kotoa ʻoku mahino ki aí mo feinga ke fakahoko ia ʻi heʻene moʻuí” (“Moʻoni Haohaoa, Tokāteline Haohaoa, mo e Fakahā Haohaoa,” Liahona, Nōvema 2021, 6). ʻE maʻu ʻe he kau akó ʻi he lēsoni ko ʻení, ʻa e faingamālie ke vahevahe ʻa e founga kuo tākiekina ai ʻenau moʻuí ʻe he ngaahi akonaki ʻa Sīsū Kalaisí. Te nau aleaʻi foki mo e ʻuhinga ʻo e ongoongoleleí pea fakaafeʻi ke nau fakakaukau ki he meʻa te nau lava ʻo fai ke nau tokanga taha ange ai ki hono moʻui ʻaki iá.

Ngaahi Fokotuʻu ki Hono Akoʻí

ʻOku akoʻi ʻe Sīsū Kalaisi ʻa e ngaahi moʻoni ʻoku nau liliu e moʻuí.

Te ke lava ʻo fakaʻaliʻali e fakatātā ʻoku ʻoatú, pe ko ha meʻa kehe te ke fili mei he akonaki ʻa Sīsū Kalaisí, pea fakaafeʻi e kau akó ke vahevahe ha ngaahi ʻuhinga ʻe ala maʻu ki he hoko ʻa “[Sīsū Kalaisi] ko e faiako maʻongoʻonga taha kuo moʻui pe ʻe moʻui ʻi ha taimi” (Jeffrey R. Holland, “Teaching, Preaching, Healing,” Ensign, Jan. 2003, 33).

Ko e Akonaki ʻa e Fakamoʻuí ʻi he Tuʻunga Fakaākongá, tā ʻe Justin Kunz

Ke poupouʻi ʻa e fealēleaʻaki ʻoku mahuʻingamālié, te ke lava ʻo fai ha niʻihi ʻo e ngaahi fehuʻi ko ʻení:

• Ko e hā e ola ʻo e ngaahi akonaki ʻa e Fakamoʻuí ne maʻu ʻe kinautolu naʻa nau fanongo ki Heʻene faiakó? (Te ke lava ʻo toe vakaiʻi e ngaahi sīpinga ʻoku maʻu ʻi he konga 1 ʻo e naunau teuteú.) Ko e hā ha ola ʻo ʻEne ngaahi akonakí ʻi hoʻo moʻuí?

• Ko e hā kuo pau ke tau fai ʻo kapau ʻoku tau fie maʻu ke ʻi ai ha ivi tākiekina lahi mo tuʻuloa ʻo e ngaahi akonaki ʻa Sīsū Kalaisí ʻi heʻetau moʻuí? (Mahalo te ke fie vakaiʻi e Sione 3:21; 7:17; 13:17 mo e fakamatala ʻa ʻEletā Hōlani ʻi he konga 1 ʻo e naunau teuteú. Te ke lava leva ʻo fakaafeʻi e kau akó ke nau feinga ke ʻiloʻi ha tefitoʻi moʻoni hangē ko ʻení: ʻI heʻetau ngāueʻi e ngaahi akonaki ʻa e ʻEikí, ʻe lava ke tau ʻilo honau moʻoní, tupulaki ʻi he māmá, mo aʻusia e fiefiá.)

Fakamanatu ange ki he kau akó naʻe fakaafeʻi kinautolu ʻi he konga 1 ʻo e naunau teuteú ke fili ha akonaki ʻa e Fakamoʻuí kuó ne tākiekina ʻenau moʻuí. Naʻa nau mei lava foki ʻo fekumi ki ha akonaki ʻoku nau pehē ʻoku mahuʻinga ki heʻenau moʻuí. ʻOange ki he kau akó ha ngaahi miniti siʻi ke toe vakaiʻi ʻenau potufolofolá mo e ngaahi fehuʻi ʻe tolu ʻoku fekauʻaki mo iá ʻi he konga 1 ʻo e naunau teuteú. Poupouʻi e kau ako ne teʻeki ke nau fakahoko e ʻekitivitií ke kumi ha akonaki ʻa e Fakamoʻuí te nau lava ʻo vahevahé.

Fakaafeʻi e kau akó ke vahevahe ʻa e akonaki ʻa Sīsū Kalaisi naʻa nau filí pea mo ʻenau tali ki ha taha ʻo e ngaahi fehuʻi ʻe tolu mei he naunau teuteú. Te ke lava ʻo fakahoko fakakalasi ʻa e ʻekitivitī ko ʻení pe vahevahe ʻa e kau akó ki ha fanga kiʻi kulupu iiki pea kole ange ke nau taufetongi ʻi he vahevahé.

ʻOku akoʻi ʻe Sīsū Kalaisi ki he kakai Nīfaí ʻa e ʻuhinga ʻo ʻEne ongoongoleleí.

Lau fakataha ʻa e tūkunga ko ʻení:

Ne toki foki mai ʻa ʻAmelia ʻo mālohi ʻi he Siasí hili ha ngaahi taʻu lahi ʻo ʻene mavahé. Neongo naʻe angaʻofa ʻa e kakaí kiate ia, ka ʻokú ne faʻa ongoʻi hē mo loto-foʻi lolotonga e ngaahi leá mo e lēsoní. ʻI heʻene taʻe-fiemālié, naʻá ne pehē atu ʻi ha ʻaho ʻe taha, “Naʻá ku fanongo he ʻaho atú ki ha pehē ʻe ha taha ʻoku ʻuhinga ʻa e ongoongoleleí ko e ʻongoongo lelei.ʼ ʻOku ʻikai ke u ongoʻi ʻoku pehē. ʻOku ngali faingataʻa ʻa e ongoongoleleí, pea ʻoku lahi fau e ngaahi fiemaʻu ke te fakahokó. ʻOku hangē ange ia ha kavengá kae ʻikai ko ha tāpuaki.”

• Ko e hā ʻe lava ke hoko lolotonga e ngaahi malangá, lēsoní, pe ngaahi fealēleaʻaki ʻi he ongoongoleleí ʻe lava ke ongoʻi pehē ai ha taha hangē ko ʻAmeliá?

• Ko e hā ha ngaahi maʻu hala ʻe ala maʻu ʻe ʻAmelia fekauʻaki mo e ʻuhinga mo e taumuʻa ʻo e ongoongoleleí?

Ko Hono Fakatupulaki ʻEtau Founga Akoʻí mo e Akó

Ako mo e kau akó. Hili hono aʻusia ʻe he kāingalotu ʻo e Siasí ʻi he kuonga ʻo ʻAlamaá ʻa e ngaahi nunuʻa kovi ʻo e ngāue fakataulaʻeiki kākaá, ko kinautolu naʻe kei faivelengá naʻa nau “tuʻu maʻu mo tuʻu taʻe-faʻa-ueʻi” (ʻAlamā 1:25) ʻi heʻenau tuí pea ʻiloʻi “naʻe ʻikai lelei ange ʻa e tokotaha malangá ʻi he tokotaha fanongó, pea ʻikai foki ke lelei ange ʻa e faiakó ʻi he tokotaha ʻoku akó; pea ko ia naʻa nau tuʻunga tatau kotoa pē” (ʻAlamā 1:26). ʻI hoʻo lau ʻokú ke tuʻunga tatau mo e kau akó, te ke tauʻatāina ange ʻi hoʻomou feakoʻakí. Fakalaulauloto ki he ongo ʻe ala maʻu ʻe hoʻo kau akó ʻi he taimi ʻokú ke fakahaaʻi ai ha tokanga moʻoni ki he meʻa ʻoku nau fakakaukau ki ai mo ongoʻí.

Fakaafeʻi e kau akó ke nau toe vakaiʻi e 3 Nīfai 27:13–14, 19–21 pea kumi e ngaahi konga mahuʻinga ʻo e ongoongoleleí ʻo hangē ko hono akoʻi ʻe he Fakamoʻuí.

Ke fakatupulaki ha fealēleaʻaki ʻoku mahuʻingamālié, te ke lava leva ʻo fai ha ngaahi fehuʻi hangē ko ʻení:

• Fakatatau ki he Fakamoʻuí, ko e hā e ngaahi konga mahuʻinga mo e tāpuaki taupotu taha ʻo hono moʻui ʻaki ʻEne ongoongoleleí? (Tokoni ke ʻiloʻi ʻe he kau akó ʻa e moʻoni ko ʻení: ʻI heʻetau tui kia Sīsū Kalaisí, fakatomala, papitaiso, maʻu ʻa e Laumālie Māʻoniʻoní, pea kātaki ki he ngataʻangá, te tau lava ʻo tuʻu taʻe-halaia ʻi he ʻao ʻo e ʻOtuá ʻi he ʻaho fakaʻosí.)

• ʻE liliu fēfē ʻe hono fokotuʻu ʻa Sīsū Kalaisi ʻi he uhouhonga ʻo e ongoongoleleí ʻa e anga e fakakaukau mo e ongo ʻa ʻAmelia ki aí? Kuo tākiekina fēfē nai hoʻo fakakaukaú mo moʻui ʻaki e ongoongoleleí ʻi he tokanga taha ki he Fakamoʻuí?

• Ko e hā ha ngaahi faingataʻa te tau lava ʻo fehangahangai mo ia ʻi he taimi ʻoku toʻo ai ʻetau tokangá meia Sīsū Kalaisi mo e ngaahi konga mahuʻinga ʻo ʻEne ongoongoleleí? (Mahalo te ke toe fie vakaiʻi e fakamatala ʻa Brother Taniela K Sati ʻi he konga 2 ʻo e naunau teuteú.) Ko e hā ha ngaahi meʻa kuo nau fakatupu ke toʻo hoʻo tokangá mei he ngaahi tefitoʻi meʻa mahuʻinga ʻo e ongoongoleleí? Ko e hā kuó ne tokoniʻi lahi taha koe ke tukutaha hoʻo tokangá ʻi he ngaahi tefitoʻi meʻa mahuʻingá?

Fakaafeʻi e kau akó ke nau toe vakaiʻi e fakamatala ʻa Palesiteni Tieta F. ʻUkitofa ʻi he konga 2 ʻo e naunau teuteú pea lekooti e meʻa te nau lava ʻo fai ke tokanga lelei ange ai ki he ngaahi tefitoʻi moʻoní mo hono fakaʻaongaʻi ʻo e ongoongoleleí.

Te ke lava foki ʻo ʻeke pe ʻoku ʻi ai ha kau ako ʻe niʻihi te nau loto ke vahevahe ʻa e meʻa te nau ala fai ke tokanga taha ai ki he ngaahi meʻa mahuʻinga tahá ʻi heʻenau fāifeinga ke moʻui ʻaki ʻa e ongoongoleleí.

Ke fakaʻosí, te ke lava pe ko ha tokotaha ako ʻo fakamoʻoni ki he fakaʻofoʻofa mo e mālohi ʻo hono moʻui ʻaki e ongoongolelei taʻengata ʻa Sīsū Kalaisí.

Ki he Kalasi Hokó