Lēsoni 28 Naunau ʻa e Faiakó

Tuʻu ko ha Kau Fakamoʻoni ʻo Sīsū Kalaisi

ʻI he kalasi ko ʻení, kuo maʻu ʻe he kau akó ha faingamālie ke ako, fakalaulauloto, mo aleaʻi ʻa Sīsū Kalaisi mo ʻEne ongoongolelei taʻengatá. Kuo fakaafeʻi kinautolu ke fakamālohia ʻenau fakamoʻoni ki he Fakamoʻuí pea ngāue ʻi he tui ke hoko ʻo hangē ange ko Iá. ʻI he lēsoni ko ʻení, ʻe fakakaukauloto ʻa e kau akó ki he meʻa kuo nau ongoʻi, ako, mo aʻusiá. ʻE fakaafeʻi kinautolu ke vahevahe ʻenau fakamoʻoni ki he Fakamoʻuí.

Ngaahi Fokotuʻu ki Hono Akoʻí

ʻOku fakamoʻoni ʻa e kau ākonga ʻa Sīsū Kalaisí kiate Ia.

Fakatokangaʻi ange: Ke ʻoange ha taimi lahi ki he kau akó ke nau fakakaukauloto ai mo vahevahe ʻenau fakamoʻoni ki he Fakamoʻuí lolotonga e kalasí, ʻoku siʻisiʻi ange ʻa e ngaahi fakakaukau fakafaiako ʻi he lēsoni ko ʻení.

Te ke lava ʻo vahevahe ʻa e tūkunga ko ʻení ʻi hoʻo kamata e kalasí:

Fakakaukauloto ʻoku ʻalu ha kaungāmeʻa ofi ki heʻene fuofua houalotu ʻaukai mo e fakamoʻoní pe foki mai ki he lotú hili ha ngaahi taʻu lahi ʻene mavahé. Kapau naʻá ke vahevahe hoʻo fakamoʻoní, ko e hā naʻá ke lea ʻakí? Ko e hā naʻá ke fakaʻamu ʻe vahevahe ʻe he niʻihi kehé?

Fakakaukau ke ʻoange ha taimi ki he kau akó ke lekooti e meʻa te nau ala lea ʻaki ʻi heʻenau fakamoʻoní. Hili ia peá ke toki fakaafeʻi ha niʻihi e kau akó ke nau vahevahe e meʻa naʻa nau lekōtí. Te ke lava ʻo ʻeke ha taha pe lahi ange ʻo e ngaahi fehuʻi ko ʻení, ko ha konga ʻo hoʻomou fealeaʻakí:

• Te ke ongoʻi fēfē nai kapau naʻe ʻikai fakamoʻoni ha taha kia Sīsū Kalaisi? Ko e hā ʻoku mātuʻaki mahuʻinga ai ke fai ha fakamoʻoni kia Sīsū Kalaisi mo ʻEne ongoongolelei taʻengatá? (ʻI he fealeaʻaki e kau akó, te ke lava ʻo fakaʻaliʻali e fakamatala ko ʻeni ʻa ʻEletā Tieta F. ʻUkitofá: “Ko e ʻelito ʻo [ʻetau] fakamoʻoní ʻe hoko maʻu pē ia ko e tui mo e ʻilo kia Sīsū Kalaisi mo Hono misiona fakalangí” [“The Power of a Personal Testimony,” Liahona, Nov. 2006, 38].)

• Kuo founga fēfē nai hoʻo maʻu hoʻo fakamoʻoni kia Sīsū Kalaisí? (Te ke lava ʻo toe vakaiʻi ʻa e ʻAlamā 5:46–48 pea mo e fakamatala hono ua ʻa ʻEletā ʻUkitofa ʻi he konga 1 ʻo e naunau teuteú. Kapau ʻe fie maʻu, te ke lava ʻo tokoni ki he kau akó ke nau ʻiloʻi ha moʻoni hangē ko ʻení: Te tau lava ʻo maʻu ha fakamoʻoni pau kia Sīsū Kalaisi ʻo fakafou ʻi he Laumālie Māʻoniʻoní.) Ko e hā ha ivi tākiekina kuo maʻu ʻe he Laumālie Māʻoniʻoní ki hoʻo mahino mo e ʻofa ki he Fakamoʻuí?

Fakakaukau ke fakaafeʻi ha toko taha pe toko ua ʻo e kau akó kimuʻa ʻi he kalasí ke na mateuteu ke vahevahe ʻi he kalasí ʻa e founga kuo tāpuekina ai ʻena moʻuí ʻi heʻena fanongo ki he fakamoʻoni ʻa e niʻihi kehé kia Sīsū Kalaisí. Te ke lava leva ʻo ʻeke ange:

• Ko e hā ha ngaahi founga ʻe niʻihi te tau lava ʻo tuʻu ai ko e kau fakamoʻoni ʻo Sīsū Kalaisí? (Mahalo te ke fie kole ki he kau akó ke toe vakaiʻi ʻa e fakamatala ʻa ʻEletā Niila L. ʻEnitaseni ʻi he konga 2 ʻo e naunau teuteú.)

• Ko e hā ʻe mahuʻinga ai ke vahevahe ʻetau fakamoʻoni ki he Fakamoʻuí, neongo kapau ʻoku tau ongoʻi ʻoku ʻikai ke fuʻu mālohi? (Fakakaukau ke toe vakaiʻi e ʻuluaki fakamatala ʻa Palesiteni ʻUkitofa ʻi he konga 1 ʻo e naunau teuteú.)

Ko Hono Fakatupulaki ʻEtau Founga Akoʻí mo e Akó

Fakaafeʻi e kau akó ke fakahoko ʻenau fakamoʻoni kia Sīsū Kalaisi mo Hono misiona fakalangí. Tokoni ke mahino ki he kau akó ʻi hono vahevahe ko ia ha fakamoʻoni kau kia Sīsū Kalaisí, ʻoku ʻikai ngata pē ʻi hono tāpuakiʻi ai e tokotaha ʻoku fakamoʻoní ka ʻe lava foki ʻo fakamālohia ai e tui mo e fakamoʻoni ʻa e niʻihi kehé. ʻE lava ke hoko ʻa e fakamoʻoní ko hano fakahaaʻi faingofua ʻo e meʻa ʻoku tui ki ai, ʻamanaki lelei ki ai, pe ʻiloʻi ʻe ha taha ʻoku moʻoni.

Fakamanatu ki he kau akó naʻe fakaafeʻi kinautolu ke nau teuteu ki he kalasí ʻaki hono fili ha ʻekitivitī ako ke tokoni ke nau fakakaukauloto ki heʻenau fakamoʻoni ki he Fakamoʻuí mo ʻEne ongoongolelei taʻengatá. ʻOange ha taimi ki he kau akó ke nau toe vakaiʻi ʻenau ngaahi fakamatala ne hikí mo teuteu ha meʻa ke vahevahe.

Kapau ʻoku tokolahi hoʻo kalasí, ʻe lava ke ke vahevahe e kau akó ki ha ngaahi kulupu iiki ke maʻu ʻe he tokotaha kotoa ha faingamālie ke vahevahe. Poupouʻi e kau akó ke nau tokanga ki he taimi ʻoku nau fakaʻaongaʻí ke lava ʻa e tokotaha kotoa pē ʻi he kalasí pe kulupú ʻo vahevahe. Neongo ʻoku totonu ke poupouʻi e kau akó kotoa ke vahevahe, ka ʻoku ʻikai totonu ke ongoʻi ʻe ha taha ʻoku fakamālohiʻi ia.

Fakaʻosi e kalasí ʻaki hono fai hoʻo fakamoʻoní pea poupouʻi e kau akó ke hokohoko atu hono fakamālohia ʻenau fakamoʻoni kia Sīsū Kalaisí mo kumi ha ngaahi faingamālie ke vahevahe ai e fakamoʻoni ko ia kiate Iá.

Kimuʻa pea ʻosi e kalasí, poupouʻi e kau akó ke hokohoko atu ʻenau lesisita ki he ʻinisititiutí.