Pasiuna sa Manwal sa Magtutudlo sa Si Jesukristo ug ang Walay Katapusan nga Ebanghelyo (Religion 250)

Unsa ang gilauman sa usa ka magtutudlo sa relihiyon?

Samtang mangandam ka sa pagtudlo, importante nga masabtan ang Tumong sa Seminaries and Institutes of Religion:

“Ang atong katuyoan mao ang pagtabang sa mga batan-on ug mga young adult nga makasabut ug makasalig sa mga pagtulun-an ug Pag-ula ni Jesukristo, mahimong takus alang sa mga panalangin sa templo, ug makaandam sa ilang kaugalingon, sa ilang mga pamilya, ug sa uban alang sa kinabuhing dayon uban sa ilang Amahan sa Langit” (Gospel Teaching and Learning: A Handbook for Teachers and Leaders in Seminaries and Institutes of Religion [2012], x).

Makab-ot nimo kini nga katuyoan pinaagi sa pagsunod sa ebanghelyo, pinaagi sa epektibong pagtudlo sa ebanghelyo ngadto sa imong mga estudyante, ug sa tukmang pagpangalagad sa imong klase o programa. Samtang mag-andam ka sa pagtudlo sa ebanghelyo niining paagiha, mo-qualify ka sa impluwensya sa Espiritu Santo.

Imong oportunidad ang pagtabang sa mga estudyane aron makakat-on pinaagi sa Espiritu aron mapalig-on nila ang ilang pagtuo ug mapalawman ang ilang pagkakabig. Matabangan nimo ang mga estudyante sa pagtuman niini samtang giyahan nimo sila nga ma-identify, masabtan, mabatyagan ang kamatuoran ug kaimportante ug pag-andam nga ma-apply ang makahuluganong mga doktrina ug baruganan sa ebanghelyo ni Jesukristo.

Ang handbook sa Pagtudlo sa Ebanghelyo ug Pagkat-on usa ka mahinungdanong kapanguhaan para masabtan ang proseso sa pagtudlo ug kon usaon sa pagkahimong malampuson sulod sa classroom. Mo-refer kanunay niini nga handbook.

Unsa man ang mga katuyoan niini nga kurso?

Kini nga kurso, Si Jesukristo ug ang Walay Katapusang Ebanghelyo (Religion 250), maghatag og oportunidad sa mga estudyante nga makatuon sa mahangturong pangalagad ni Jesukristo, mag-focus sa Iyang balaang mga tahas sa tibuok Niyang pangalagad sa premortal, mortal, ug human niining kinabuhia. Ang mga sumbanang basahon, mga pulong sa modernong mga propeta, ug ang dokumento nga giulohan og “Ang Buhi nga Kristo: Ang Pagpamatuod sa mga Apostoles” (Ensign o Liahona, Abr. 2000, 2–3) gigamit isip dinasig nga mga kapanguhaan alang niini nga kurso. Si Elder Richard G. Scott sa Korum sa Napulog Duha ka mga Apostoles mipasabut og maayo sa kaimportante sa pagtuon sa kinabuhi ug misyon ni Jesukristo:

Elder Richard G. Scott

“Madasigon akong moawhag kaninyo sa pag-establisar og personal nga plano sa pagtuon aron mas makasabut ug makapasalamat sa walay ikatandi, mahangturon, walay kinutuban nga mga sangputanan sa hingpit nga pagtuman ni Jesukristo sa Iyang balaanong gitakda nga tawag isip atong Manluluwas ug Manunubos. Ang mas lawom nga personal nga pagpamalandong sa kasulatan inubanan sa pagsiksik, kinasingkasing nga pag-ampo molig-on sa inyong panabut ug pasalamat alang sa Iyang bililhon nga Pag-ula” (“Siya Buhi! Tanang Himaya ngadto sa Iyang Pangalan!” Ensign o Liahona, Mayo 2010, 77).

Kon masabtan ug mahatagan na og bili sa mga estudyante ang kahulugan sa balaang tawag sa Manluluwas sa epekto niini sa ilang kinabuhi, makabarug silang lig-on batok sa mga hagit sa kinabuhi ug mobating mas andam sa paghisgot sa balaanong mga tahas sa Manluluwas sa plano sa kaluwasan, diin ang personal nilang kinabuhi usa ka mahinungdanon nga bahin.

Unsa man ang gilauman sa mga estudyante?

Kinahanglang mobasa ang mga estudyante sa mga scripture passage ug sa propetikanhong mga pagpamulong nga gilista diha sa seksyon nga Mga Basahunon sa Estudyante sa matag leksyon. Kinahanglan nga makab-ot sa mga estudyante ang mga requirement sa attendance ug ipakita ang abilidad gamit ang materyal sa kurso.

Sa unsang paagi nahimo kini nga manwal?

Kini nga kurso gidesinyo nga molungtad og usa ka semester nga adunay 28 ka mga leksyon nga gisulat alang sa 50 ka minuto nga mga panahon sa klase [class period]. Kon ang inyong klase mag-abut kaduha matag semana, pagtudlo og usa ka leksyon matag panahon sa klase. Kon ang inyong klase mag-abut kausa lamang matag semana sulod sa 90 ngadto sa 100 ka minuto, ihiusa ug itudlo ang duha ka leksyon sa matag panahon sa klase. Ang matag outline sa leksyon naglangkob og upat ka seksyon:

• Pasiuna

• Background nga Basahunon

• Mga Sugyot alang sa Pagtudlo

• Mga Basahunon sa Estudyante

Pasiuna

Kini nga seksyon naghatag og mubo nga pasiuna ngadto sa mga hilisgutan ug mga tumong sa leksyon.

Pagbasa sa Background

Kini nga seksyon nagsugyot og mga kapanguhaan sama sa mga mensahe gikan sa modernong mga propeta nga makatabang aron mas masabtan nimo ang mga doktrina, mga baruganan, ug mga kamatuoran sa ebanghelyo nga gihisgutan diha sa outline sa leksyon.

Mga Sugyot alang sa Pagtudlo

Ang mga Sugyot alang sa pagtudlo sa seksyon naglakip sa materyal aron masabtan nimo ang unsay itudlo ug ang unsaon sa pagtudlo niini (tan-awa usab sa mga seksyon 4.3.3 ug sa 4.3.4 sa handbook nga Pagtudlo sa Ebanghelyo ug Pagkat-on). Ang gisugyot nga mga kalihokan sa pagkat-on gidesinyo sa pagtabang sa mga estudyante aron ma-identify, masabtan, ug ma-apply ang sagradong mga kamatuoran. Mahimo nimong pilion ang pagpaghiangay sa pipila o tanang mga gisugyot aron ipahaum sa imong indibidwal nga estilo sa pagtudlo ug aron makab-ot nga mga panginahanglan ug kahimtang sa imong mga estudyante. Samtang imong ikonsiderar unsaon sa pagpahiangay sa mga materyal sa leksyon, sunda kini nga tambag gikan ni Elder Dallin H. Oaks sa Korum sa Napulog Duha ka mga Apostoles:

Elder Dallin H. Oaks

“Si Presidente Packer kanunayng nagtudlo, sa akong pandungog, nga una natong hangupon, dayon atong ipahiangay. Kon hingpit kita nga pamilyar sa gitakda nga leksyon nga atong ihatag, nan makasunod kita sa Espiritu aron sa pagpahiangay niini. Apan adunay tintasyon, kon maghisgut kita kabahin niini nga pagpailin-ilin, nga mosugod sa pagpahiangay imbis nga mohangup. Usa kini ka pagbalanse. Padayon kini nga hagit. Apan maayong paagi kon himoon og una ang paghangup ug dayon pagpahiangay aron magpabilin diha sa maanindot nga dapit” (“A Panel Discussion with Elder Dallin H. Oaks” [Seminaries and Institutes of Religion Satellite Broadcast, Ago. 7, 2012]; si.lds.org).

Ang mga Sugyot para sa seksyon sa Pagtudlo naglangkob og pinakaminus usa ka pamahayag sa doktrina o baruganan, nga makita nga naka-bold. Samtang ang mga estudyante modiskubre niini nga mga doktrina ug mga baruganan ug mopaambit sa unsay ilang nakat-unan, ang ilang mga pulong mahimong lahi kay sa niadtong gipahayag diha sa manwal. Kon mahitabo kini, pag-amping nga dili nimo mapakita nga sayop ang ilang mga tubag. Hinoon, kon ang pamahayag mahimong mas tukma pa, sa mainampingong paagi tabangi nga maklaro ang pagsabut.

Aron matabangan ang mga estudyante nga mahimong tibuok kinabuhi nga mga tinun-an sa mga kasulatan, tudloi sila unsaon sa paggamit ang mga tabang sa pagtuon nga anaa sa Latter-day Saint nga edisyon sa mga kasulatan. Kuhaa ang mga oportunidad sa klase aron pagtabang sa mga estudyante nga makapraktis sa scripture study skills ug mga pamaagi (tan-awa sa Gospel Teaching and Learning, 20–23). Kon imo kining buhaton, mapalawman sa mga estudyante ang ilang paghigugma sa mga kasulatan, mas masaligon sila sa pagpangita’g mga tubag sa ilang mga pangutana, ug makakat-on nga magiyahan sa gahum sa Espiritu Santo.

Mga Basahunon sa Estudyante

Naglista kini nga seksyon sa mga scripture passage ug pakigpulong sa mga general authority sa Simbahan nga makapalambo sa panabut sa mga estudyante mahitungod sa mga topic nga anaa sa mga leksyon. Awhaga ang mga estudyante sa pagbasa niini nga mga materyal sa dili pa sila moadto sa klase. Samtang tun-an nila ang dinasig nga mga materyal, dili lang kay mas maandam sila sa pag-apil sa diskusyon sa klase, apan maangkon usab nila ang mas lapad nga panabut sa mga topic sa kurso. Hatagi ang mga estudyante og lista sa tanang “Basahunon sa Estudyante” sa sinugdanan sa semester.

Unsaon nako sa pagpangandam sa pagtudlo?

Ang Ginoo motabang kanimo samtang mangandam ka sa pagtudlo. Sa imong pagpangandam, tingali makatabang kanimo ang pagpangutana sa imong kaugalingon sa mosunod nga mga pangutana:

• Nag-ampo ba ko aron makadawat sa giya sa Espiritu Santo?

• Gitun-an ba nako ang gi-assign nga mga scripture block ug background nga basahunon?

• Nabasa ba nako ang kurikulum ug gitino kon duna pa bay kinahanglan nakong ipahiangay o i-adjust aron mohaum sa panginahanglan sa mga estudyante?

• Sa unsang paagi nako mafollow-up ang mga pagbasa sa estudyante sa pagsiguro nga nakuha sa mga estudyante ang kadaghanan gikan niini?

• Unsaon nako sa pagtabang ang matag usa sa akong mga estudyante nga hingpit nga moapil sa leksyon?

Ang mosunod nga mga sugyot mahimong makatabang usab:

• Awhaga ang mga estudyante sa pagbasa sa gi-assign nga mga scripture passage ug mga artikulo sa dili pa magleksyon.

• Molaum sa mga estudyante nga motuman sa ilang tahas isip mga tigkat-on.

• Paghatag og daghang oportunidad sa mga estudyante nga mopasabut sa mga doktrina ug mga baruganan sa ilang kaugalingong mga pulong, mopaambit og mga kasinatian nga may kalabutan sa leksyon, ug mopamatuod sa unsay ilang nahibaloan ug gibati.

• Lain-laina ang mga kalihokan sa pagkat-on ug ang mga paagi nga imong gamiton sa matag klase ug usab sa matag adlaw.

• Paghimo og palibut sa pagkat-on nga makadapit sa Espiritu diin ang mga estudyante makabaton og kahigayunan ug responsibilidad sa pagtudlo ug pagkat-on gikan sa usag (tan-awa sa D&P 88:78,122).

Si Elder Richard G. Scott sa Korum sa Napulog Duha ka mga Apostoles mitudlo:

Elder Richard G. Scott

“Isiguro nga dunay daghang partisipasyon tungod kay kana nga paggamit sa kabubut-on sa estudyante magtugot sa Espiritu aron motudlo. … “Samtang ang mga estudyante mopahayag sa mga kamatuoran, gipanghimatuod kini diha sa ilang mga kalag ug malig-on ang ilang personal nga pagpamatuod” (“To Understand and Live Truth” [gabii uban ni Elder Richard G. Scott, Peb. 4, 2005], 3; si.lds.org).

Sa unsang paagi nga akong ikapahiangay ang mga leksyon ngadto sa dunay mga kakulangan?

Samtang nangandam ka sa pagtudlo, pagmahunahunaon sa mga estudyante nga adunay piho nga mga panginahanglan. Ipahiangay ang mga kalihokan ug mga ekspektasyon aron matabangan sila nga molampus. Sama pananglit, makabenipisyo ang ubang estudyante gikan sa pag-access sa audio recording sa mga kasulatan. Sayon ra kining i-download gikan sa LDS.org.

Alang sa dugang nga mga ideya ug mga kapanguhaan, konsultaha ang Disability Resources page sa disabilities.lds.org ug ang seksyon sa Seminary and Institute of Religion policy manual nga giulohan og “Gipahiangay nga mga Klase ug mga Programa alang sa mga Estudyante nga dunay mga Kakulangan [Adapted Classes and Programs for Students with Disabilities].