Leksyon 25: Mobalik si Jesukristo sa Umaabut nga Adlaw
25
Mobalik si Jesukristo sa Umaabut nga Adlaw
Pasiuna
Ang mga propeta sukad sa tanang henerasyon nanagna nga mobalik pag-usab si Jesukristo dinhi sa yuta. Mirekord si Isaias, “Ug ang himaya sa Ginoo igapadayag, ug ang tanan nga unod sa tingub makakita niini” (Isaias 40:5). Kini nga mga panagna nakatabang sa mga disipulo ni Jesukristo aron maandam ang ilang kaugalingon ug ang uban para niining nag-inusarang hitabo ug sa pagkaangkon og paglaum, nasayud nga makita daan sa Langitnong Amahan ang umaabut ug miandam sa kalibutan alang sa mahimayaon nga pagbalik sa Iyang Anak.
Background nga Basahunon
Dallin H. Oaks, “Pagpangandam alang sa Ikaduhang Pag-anhi,”Liahona, Mayo 2004, 7–10.
Mga Sugyot alang sa Pagtudlo
Moanhi ang Manluluwas uban sa gahum ug himaya
Pangutan-a ang mga estudyante sa mosunod nga mga pangutana, ug i-summarize sa pisara ang ilang mga tubag:
Unsay inyong mahunahunaan kon mahisgutan ang Ikaduhang Pag-anhi?
Unsa ang inyong gituohan nga mahimong kahimtang sa Ikaduhang Pag-anhi?
Unsay inyong nakat-unan gikan niini nga tudling mahitungod sa Ikaduhang Pag-anhi? (Kon makatubag na ang mga estudyante, hatagi og gibug-aton ang mosunod nga kamatuoran: Kon mobalik na pag-usab ang Manluluwas, moanhi Siya uban sa gahum ug himaya kauban sa tanang panon sa langit. Isulat sa pisara kini nga kamatuoran.)
Pasabta ang mga estudyante nga dunay daghang aspeto sa Ikaduhang Pag-anhi ni Jesukristo nga matun-an diha sa mga kasulatan, sama sa mga timailhan nga mag-una sa Ikaduhang pag-anhi ug sa kalaglagan nga moabut sa mga dautan atol sa Iyang pag-anhi. Kini nga leksyon piho nga mag-focus sa Manluluwas, sa Iyang pag-anhi uban sa gahum ug himaya, ug sa unsang paagi makaandam kita alang niana nga talagsaong hitabo. Hatagi ang matag estudyante og kopya sa tsart nga “Mga Panagna mahitungod sa Ikaduhang Pag-anhi.” Dapita ang mga estudyante nga magpares sa pagtrabaho, ug i-assign ang matag pares og duha o tulo ka tudling sa mga scripture passage nga matun-an (siguroa nga ma-assign ang matag tudling). Pasulata ang matag pares diha sa tsart kon unsay gitudlo diha sa gi-assign sa ilaha nga mga tudling mahitungod sa Ikaduhang Pag-anhi ni Jesukristo. Human sa igong panahon, ipa-report sa mga estudyante unsay ilang nadiskubrihan.
Basi sa unsay inyong natun-an, sa unsang paagi ang gahum ug himaya ni Jesukristo ikapakita sa Iya unya nga pag-anhi?
Asa nga mga panagna mahitungod sa Ikaduhang Pag-anhi ang importante kaayo kaninyo? Ngano man?
(Pahinumdom: Sa dili pa magpadayon, mahimo kang mo-refer og balik sa tsart ug ipangutana sa mga estudyante unsa ka bililhon ang pagtuon sa mga kasulatan sa ingon niini nga paagi—nga mangita sa mga koneksyon, mga sundanan, ug mga tema.)
Ang mga propeta nag-andam kanato para sa Ikaduhang Pag-anhi ni Jesukristo
I-display ang mosunod nga pamahayag ni Elder Sterling W. Sill (1903–1994) sa Seventy, ug dapita ang usa ka estudyante sa pagbasa niini og kusog:
Imahe
Elder Sterling W. Sill
“Ang ikaduhang pag-anhi ni Kristo gihisgutan og kapin sa 1,500 ka higayon sa Daang Tugon ug 300 ka higayon sa Bag-ong Tugon. Kon gihunahuna sa Dios nga ingon niana ka importante kini nga hilisgutanan, tingali may gusto kaayo siyang ipabuhat kanato mahitungod niini” (sa Conference Report, Abr. 1966, 19).
Ngano kaha nga makahuluganon man nga ang mga kasulatan maglakip sa daghang panagna bahin sa Iyang Ikaduhang Pag-anhi?
I-display ang mosunod nga mga scripture passage, o isulat kini sa pisara. Dapita ang mga estudyante sa hilum nga pagkumpara ug pagtandi niini nga mga tudling, nga mangkita sa duha ka managlahing paagi aron makaandam kita sa Ikaduhang Pag-anhi.
Human sa igong panahon, hisguti ang pipila o ang tanang mosunod nga pangutana:
Unsaon ninyo pag-summarize ngadto sa usa lang sa pamahayag ang mga kamatuoran nga gitudlo niini nga mga tudling? (Siguroa nga masulti sa mga estudyante ang butang sama sa mosunod: Ang mga panagna mahitungod sa Ikaduhang Pag-anhi ni Jesukristo gihatag ug gi-rekord diha sa mga kasulatan aron maandam ang atong kaugalingon ug ang uban para nianang adlawa.)
Nganong gikinahanglan nga andamon nato ang uban ug dili lang ang atong kaugalingon para sa Ikaduhang Pag-anhi ni Jesukristo?
Unsa ang pipila ka paagi aron matabangan nato ang uban nga maandam para sa pagbalik sa Ginoo?
Sa unsang paagi kaha nga ang pagtabang nga maandam ang uban sa Ikaduhang Pag-anhi makatabang aron maandam usab kamo?
Hangyoa ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:
Imahe
Elder Dallin H. Oaks
“Samtang kita walay gahum sa pag-usab sa katinuod sa Ikaduhang Pag-anhi ug wala mahibalo sa tukma nga panahon, mapadali nato ang atong kaugalingon sa pagpangandam ug mosulay sa pag-impluwensya sa pagpangandam niadtong anaa sa atong palibut. …
“Unsa kaha kon moabut Siya ugma? Kon kita nahibalo nga makigkita kita sa Ginoo ugma—pinaagi sa atong kamatayon nga wala sa oras o pinaagi sa Iyang kalit nga pag-abut—unsa may atong buhaton karon? Unsa nga mga pagkumpisal ang atong buhaton? Unsa nga mga binuhatan ang atong undangon? Unsa nga mga problema ang atong husayon? Unsa nga pagpasaylo ang atong ihatag? Unsa nga mga pagpamatuod ang atong ipaambit?
“Kon kita mobuhat niini nga mga butanga, nganong dili man karon? Nganong dili man mangita og kalinaw samtang maangkon pa ang kalinaw? Kon ang atong mga lamparahan sa pagpangandam hapit nang mahurot, sugdan dayon nato ang pag-ilis niini” (“Pagpangandam alang sa Ikaduhang Pag-anhi,”Liahona, Mayo 2004, 8, 9).
Unsa kaha ang pweding buhaton sa usa ka tawo aron madali ang iyang pagpangandam alang sa Ikaduhang Pag-anhi?
Unsa ang peligro sa paglangan sa atong pagpangandam?
Pagpangandam alang sa Ikaduhang Pag-anhi ni Jesukristo
Pasabta ang mga estudyante nga pipila lang ka adlaw sa wala pa mamatay si Jesukristo, nangutana ang Iyang mga disipulo bahin sa mga timailhan nga mag-una sa Iyang Ikaduhang Pag-anhi (tan-awa sa Mateo 24:3; Joseph Smith—Mateo 1:4). Makita sa Mateo 24–25 ang tubag sa Manluluwas. Dapita ang pipila ka estudyante nga magpuli-puli sa pagbasa og kusog sa Mateo 25:1–13 ug hangyoa ang uban sa klase sa pagsunod. Dayon giyahi ang mga estudyante sa usa ka diskusyon bahin sa pasumbingay sa napulo ka dalagang birhen gamit ang pipila o tanang mosunod nga pangutana ug mga kinutlo:
Unsa ang gikonsiderar ninyo nga binuang mahitungod sa mga buhat niining lima ka dalagang birhen? (Ang mga birhen nga buangon wala mobuhat sa mga butang nga gikinahanglang maandam alang sa pag-anhi sa Manluluwas. Ang makugihong paningkamot aron maandam alang sa pag-anhi sa Manluluwas pinaagi sa pagbuhat sa unsay nahibaloan nato nga eksakto magdala og dagkong panalangin, lakip ang pagkaandam nga makig-uban sa Manluluwas kon Siya moanhi.)
Unsay anaa nga importansya sa mga pulong nga “panggula kamo ug sugata ninyo siya”? (bersikulo 6). Nganong dili na man lang ta mapailubong maghulat Kaniya nga moduol kanato? (Tan-awa usab sa D&P 133:5, 10, 14, 19.)
Nganong ang maalamong mga dalagang birhen wala man makapaambit sa ilang lana ngadto sa buangon nga mga birhen?
Unsa ang gitudlo niini nga pasumbingay kaninyo mahitungod sa pag-andam nga makighimamat sa Manluluwas? (Bisan og mogamit sila og lain-laing mga pulong, tingali isulti sa mga estudyante ang susamang baruganan nga sama sa mosunod: Pinaagi sa pagsunod sa mga sugo sa Dios, mahimo kitang mangandam alang sa Ikaduhang Pag-anhi ni Jesukristo. Tan-awa usab sa D&P 45:56–57.)
Dugangi ang diskusyon sa mosunod nga mga pamahayag ni Elder Dallin H. Oaks ni Elder David A. Bednar sa Korum sa Napulog Duha ka mga Apostoles:
Imahe
Elder Dallin H. Oaks
“Sa [pasumbingay sa napulo ka dalagang birhen], miingon ang Ginoo, ‘Ug niana nga adlaw, kon Ako moanhi sa akong himaya, nga ang sambingay matuman diin Ako namulong mahitungod sa napulo ka mga birhen’ (D&P 45:56).
“Gihatag diha sa ika-25 nga kapitulo sa Mateo, kini nga sambingay naghatag og kalainan sa mga kahimtang sa lima ka buang-buang ug sa lima ka but-an nga mga birhen. Silang napulo giimbitar sa kumbira sa kasal, pero katunga lamang kanila ang andam nga adunay lana diha sa ilang mga lamparahan sa dihang miabut ang pamanhunon. Ang lima nga andam nakaadto sa kumbira sa kasal, ug ang pultahan gisirado. Ang lima nga milangay sa ilang mga pagpangandam wala makaabut. Sarado na ang pultahan, ug wala na sila pasudla sa Ginoo, nag-ingon, ‘wala ako makaila kaninyo’ [Mateo 25:12]. ‘Busa pagtukaw kamo,’ ang Manluluwas mitapos, ‘kay wala ninyo hibaloi ang adlaw o ang takna diin ang Anak sa Tawo moabut.’ [Mateo 25:13].
“Ang lintunganay niining mao nga pasumbingay makahahadlok. Ang napulo ka mga birhen klaro nga nagrepresentar sa mga miyembro sa Simbahan ni Kristo, kay ang tanan giimbitar man sa kumbira sa kasal ug ang tanan nahibalo sa unsay gikinahanglan aron makasulod inig abut sa pamanhunon. Apan katunga lamang ang andam sa dihang siya miabut” (Dallin H. Oaks, “Pagpangandam alang sa Ikaduhang Pag-anhi,”Liahona, Mayo 2004, 8).
Imahe
Elder David A. Bednar
“Ang lima ba ka but-an nga mga birhen hakog ug dili ganahang mopaambit, o nagpasabut sila og sakto nga ang lana sa pagkakabig dili mahulaman? Ang espiritwal nga kalig-on ba nga miresulta sa padayon nga pagsunod sa mga sugo mahatag ngadto sa laing tawo? Ang kahibalo ba nga naangkon pinaagi sa makugihong pagtuon ug pamalandong sa kasulatan mahatag sa tawo nga nanginahanglan? Ang kalinaw ba nga mahatag sa ebanghelyo sa matinud-anong Santos sa Ulahing mga Adlaw mapasa sa indibidwal nga nakasinati og kalisdanan o dakong hagit? Ang klaro nga tubag sa kada usa niining mga pangutana mao nga dili.
“Sama sa gipasabut og maayo sa but-an nga mga birhen, kada usa nato kinahanglang “mamalit alang kanato.’ Kining dinasig nga mga babaye wala maghulagway og transaksyon sa negosyo; hinoon, gipasabut nila og maayo ang atong indibidwal nga responsibilidad sa pagpabilin sa atong lamparahan sa pagpamatuod nga magsiga ug magbaton og igong suplay sa lana sa pagkakabig. Kining bililhong lana makuha usa ka tulo kada higayon—“pagtulun-an human sa usa ka pagtulun-an [ug] lagda human sa usa ka lagda’ (2 Nephi 28:30), nga mapailubon ug makanunayon. Walay shortcut; walay kinalit nga pagpangandam nga posible” (David A. Bednar, “Nakabig ngadto sa Ginoo,”Liahona, Nob. 2012, 109).
Nganong kinahanglan man nga karon dayon kita mangandam alang sa Ikaduhang Pag-anhi ni Kristo?
Ikonsiderar ang pagsulat sa pisara sa mosunod nga dili kompleto nga pamahayag ug hangyoa ang mga estudyante sa pagpamalandong ug dayon pagsulat kon unsaon nila kini sa pagkompleto:
Aron paspas ang akong pagpangandam para sa Ikaduhang Pag-anhi ni Kristo, ako .
Awhaga ang mga estudyante sa paghunahuna og piho nga mga paagi nga sila makatabang sa pamilya, mga higala, o sa uban aron makasabut sa kaimportante sa pagpangandam sa pagbalik ni Jesukristo. Awhaga ang mga estudyante sa pagpasalig sa Ginoo nga sundon nila ang mga pag-aghat nga ilang nadawat.