Gipamahayag ni Jesukristo nga, “Ako mao ang dalan, ang kamatuoran, ug ang kinabuhi” (Juan 14:6). “Ang paagi [ni Jesus] mao ang dalan paingon sa kalipay dinhi niini nga kinabuhi ug sa kinabuhing dayon sa kalibutan nga moabut.” (“Ang Buhi nga Kristo: Ang Pagpamatuod sa mga Apostoles,” Ensign o Liahona, Abr. 2000, 3). Kini nga leksyon naghatag og gibug-aton sa imbitasyon ni Jesukristo ngadto sa tanan sa pagsunod Kaniya ug mahimo nga Iyang mga disipulo. Kini nga leksyon nagsuta usab kon unsay ipasabut sa pagsubay sa dalan sa pagkadisipulo.
Pagbasa sa Background
Dieter F. Uchtdorf, “Ang Dalan sa Disipulo,” Ensign o Liahona, Mayo 2009, 75–78.
Joseph B. Wirthlin, “Follow Me,” Ensign, Mayo 2002, 15–17.
Gidapit ni Jesukristo ang tanan nga mahimo Niyang mga disipulo
Dapita ang usa ka estudyante nga ipaambit sa daklit ang mahitungod sa usa ka panahon dihang nagbiyahe siya sa usa ka destinasyon ug sayop diay ang iyang napadulngan o miliko sa sayop nga dalan. Dayon dapita ang mga estudyante sa pagbasa sa Juan 14:6 ug isulti sa kaugalingon nilang mga pulong ang gitudlo ni Jesus nga doktrina niini nga bersikulo. (Tingali mogamit og lahi nga mga pulong ang mga estudyante, apan kinahanglan nilang masabtan nga ang bugtong paagi aron kita makabalik og puyo sa Langitnong Amahan mao ang pagsunod kang Jesukristo.)
Sultihi ang mga estudyante nga human gibunyagan si Jesukristo ug dayon gitintal didto sa kamingawan, gidapit Niya ang uban sa pagsunod Kaniya. Kadtong mga misunod sa Manluluwas kaniadto ug karon gitawag og mga disipulo. Dapita ang mga estudyante nga i-identify ang mga ngalan nga naa sa Juan 1:35–47 sa ubang nanag-una nga mga disipulo sa Manluluwas ug unsay nakaaghat kanila sa pagsunod Kaniya.
I-display ang mosunod nga pamahayag ni Presidente James E. Faust (1920–2007) nga sakop sa Unang Kapangulohan, ug hangyoa ang usa ka estudyante sa pagbasa niini og kusog:
Imahe
President James E. Faust
“Ang pulong nga disipulo ug ang pulong nga disiplina naggikan sa samang Latin nga gigikanan—discipulus, nga nangahulugan og tinun-an. Nagpasabut kini og praktis o pagbansay. Ang pagdisiplina sa kaugalingon ug ang pagpugong sa kaugalingon makanunayon ug permanente nga mga kinaiya sa mga sumusunod ni Jesus. …
“Unsa man ang pagkadisipulo? Una sa tanan kini pagkamasulundon ngadto sa Manluluwas” (“Pagkadisipulo,” Ensign o Liahona, Nob. 2006, 20).
Unsay ipasabut niini nga depinisyon mahitungod sa pagkadisipulo mahitungod sa kon unsa kaha ang kinabuhi sa nanag-unang mga disipulo ni Jesukristo?
Dapita ang mga estudyante sa pagbasa ug pagkumpara sa 2 Nephi 26:33 ug sa Alma 5:33–34 aron makita kon si kinsa pa ang gidapit ni Jesus sa pagduol Kaniya. Dayon hisguti ang mosunod nga mga pangutana:
Unsa ang gitudlo niini nga mga tudling mahitungod sa imbitasyon sa Manluluwas sa pagduol Kaniya? (Human motubag ang mga estudyante, isulat sa pisara ang mosunod nga kamatuoran: gidapit ni Jesukristo ang tanang tawo sa pagduol Kaniya ug sa pagkahimo nga Iyang mga disipulo.)
Sumala ni Alma, unsa ang gisaad sa Manluluwas niadtong modawat sa imbitasyon sa pagduol Kaniya?
Para ninyo unsa man ang gipasabut niini nga mga saad?
Ipares-pares ang mga estudyante. Dapita sila sa pagtuon sa Mateo 4:18–22 ug Lucas 5:11 ug sa pag-identify sa mga pagsakripisyo nga gihimo sa pinakaunang mga disipulo ni Jesukristo aron modawat sa tawag sa pagsunod Kaniya. Hisguti ang mosunod nga mga pangutana:
Unsaon ninyo sa paghulagway ang reaksyon niining nag-unang mga disipulo sa sugo sa Manluluwas nga sundon Siya? (Hisguti ang kahulugan sa mga pulong sama sa “diha-diha gibiyaan nila ang ilang mga laya,” “diha-diha,” ug “gibiyaan.”)
Unsa nga importanting mga kamatuoran ang nadugang niini nga mga tudling bahin sa unsay buot ipasabut sa pagkahimong disipulo ni Jesukristo? (Human matubag sa mga estudyante, isulat sa pisara ang mosunod nga kamatuoran: Ang pagkadisipulo ni Jesukristo nagkinahanglan sa pagkamasulundon ug sakripisyo.)
Hatagi ang mga estudyante og mga kopya sa mosunod nga pamahayag ni Elder Joseph B. Wirthlin (1917–2008) sakop sa Korum sa Napulog Duha ka mga Apostoles ug ipabasa kini og kusog sa usa ka estudyante:
Imahe
Elder Joseph B. Wirthlin
“Ang mga laya [pukot] sa kinatibuk-an nagpasabut sa usa ka gamit sa pagdakop og butang. Sa … mas importanting kahulugan, pwede natong masabut ang pukot isip butang nga magdani o magpugong kanato sa pagsunod sa tawag ni Jesukristo, ang Anak sa buhi nga Dios.
“Ang mga laya [pukot] nga gigamit dinhi posible nga atong mga trabaho, atong mga lingaw-lingaw, atong mga kalipay, ug, labaw sa tanan, atong mga tintasyon ug mga sala. Sa laktud, ang pukot pweding bisan unsa nga mobitad kanato palayo sa atong relasyon sa Langitnong Amahan o gikan sa Iyang gipahiuli nga Simbahan. …
Imposible ang paglista sa daghang pukot nga mobitik kanato ug magpugong kanato sa pagsunod sa Manluluwas. Apan kon sinsero kita sa atong tinguha sa pagsunod Kaniya, kinahanglang diha-diha dayon biyaan nato ang makalambud nga pukot sa kalibutan ug mosunod Kaniya.
“… Dali kaayong mapuno sa mga appointment, mga miting ug mga buluhaton ang atong kinabuhi. Sayon ra kaayo kitang mabitik sa daghang pukot nga usahay bisan gani ang sugyot para paglingkawas niini makahulga ug gani makahadlok para kanato.
“Usahay bation nato nga kon unsa man kita ka busy, ingon niana pud kita kaimportante—sama og ang atong pagka-busy nagpasabut sa atong kabililhon. Mga kaigsoonan, pweding ang tibuok natong kinabuhi atong magahin sa kanunayng pagdali-dali, pagsusi sa tanang lista nga buhatunon nga sa katapusan dili diay importante.
“Nga ang atong pagkadaghan kaayo’g gipangbuhat dili maoy importante kaayo. Angay nga i-focus nato ang atong hunahuna, atong kasingkasing, ug atong mga kalag sa mga butang nga may mahangturong kahulugan—kana ang mahinungdanon” (“Follow Me,” Ensign, Mayo 2002, 15–16).
Kon ang mga isda, mga pukot, ug ang mga sakayan nga gibiyaan sa mangingisda nagrepresentar sa temporal nilang mga kabalaka, unsa man kahang mga butanga ang gikinahanglan sa Manluluwas nga inyong ihiklin aron sa pagsunod Kaniya?
Ngano kaha nga ang mga temporal nga kabalaka usahay lisud man biyaan?
Sa unsang paagi mamatikdan sa usa ka indibidwal nga nabitik diay siya niana nga matang sa pukot nga gihisgutan ni Elder Wirthlin?
Dapita ang mga estudyante nga ipaambit ang mahitungod sa usa ka panahon sa ilang kinabuhi dihang misanong sila sa panawagan sa Manluluwas sa pagsunod Kaniya (tingali pinaagi sa pagbiya sa naandan nilang mga pamaagi o pinaagi sa pagdawat og calling sa Simbahan). Dayon ipangutana:
Sa unsang paagi ang pagsanong niini nga tawag mipanalangin sa inyong kinabuhi?
I-display ang mosunod nga mga reference sa kasulatan ug mga pangutana, o isulat kini sa pisara:
Lucas 9:57–62—Unsa man ang makapugong kanato sa pagsunod sa Manluluwas?
Lucas 14:25–27, 33—Unsa man ang gi-require sa Manluluwas sa Iyang mga disipulo?
Lucas 14:28–32—Sa unsang paagi ang pulong nga ikapahuman may kalabutan sa mga panginahanglanon sa pagkahimong disipulo?
Bahina ang klase ngadto sa tulo ka grupo, ug i-assign ang matag grupo sa pagtuon og usa sa mga tudling ug sa may kalabutan nga pangutana. Human sa igong panahon, dapita ang mga estudyante sa pagpaambit kon sa unsang paagi gitubag sa gibasa nila nga tudling ang ilang pangutana. Human mahisguti ang tanang tulo ka tudling, ipangutana:
Unsa nga panginahanglanon sa pagkadisipulo ang gihulagway diha sa mga pagkumpara sa Manluluwas? (Samtang hisgutan sa mga estudyante kini nga pangutana, tabangi nga ilang masabtan ang mosunod nga kamatuoran: Ang pagkadisipulo nagkinahanglan sa padayon natong kaandam sa pagbiya sa tanan ug pagsunod kang Jesukristo.)
Pasabta nga samtang ang pagkadisipulo nagpasabut nga padayon natong palawman pa ang atong debosyon ug pasalig sa pagsunod sa Manluluwas, wala niya imando nga kinahanglan kitang modagan og labaw pa kay sa atong kusog (tan-awa sa Mosiah 4:27).
Hatagi og kopya ang matag estudyante sa mosunod nga pamahayag ni Presidente Dieter F. Uchtdorf sa Unang Kapangulohan, ug dapita ang usa ka estudyante sa pagbasa niini og kusog:
Imahe
President Dieter F. Uchtdorf
“Ang unang lakang diha sa dalan sa pagkadisipulo nagsugod, swerte gayud kaayo, diha sa eksaktong dapit nga atong gibarugan! Dili kita kinahanglan nga mopasarang og una aron mohimo sa unang lakang. Dili igsapayan kon kita adunahan o kabus. Wala kinahanglana nga mahimong edukado, hanas manulti, o intelehente. Dili kinahanglan nga mahimo kitang hingpit o maayo og dungog o gani maayo og pamatasan.
“Kamo og ako mahimong molakaw diha sa dalan sa pagka-disipulo karon. Magmapainubsanon kita; mag-ampo kita sa atong Amahan sa Langit sa tibuok natong kasingkasing ug ipahayag ang atong mga tinguha sa pagpaduol ngadto Kaniya ug magkat-on mahitungod Kaniya.
“Pagbaton og hugot nga pagtuo. Pangita, ug kamo makakaplag. Pagtuktok, ug kamo pagaablihan [tan-awa sa Mateo 7:7]. Pag-alagad sa Ginoo pinaagi sa pag-alagad sa uban. Mahimong aktibo nga sakop diha sa inyong ward o branch. Lig-una ang inyong pamilya pinaagi sa pagpasalig nga mosunod sa mga baruganan sa ebanghelyo. Paghiusa sa kasingkasing ug sa hunahuna diha sa inyong kaminyoon ug diha sa inyong pamilya.
“Karon mao ang panahon nga ipahiangay ang inyong mga kinabuhi aron makabaton og temple recommend ug gamiton kini. Karon ang panahon sa paghimo og makahuluganong mga family home evening, sa pagbasa sa pulong sa Dios, ug pakig-istorya sa atong Langitnong Amahan sa kinasingkasing nga pag-ampo. Karon mao ang panahon nga atong pun-on ang atong mga kasingkasing sa pagpasalamat alang sa Pagpahiuli sa Iyang Simbahan, alang sa buhi nga mga propeta, sa Basahon ni Mormon, ug sa gahum sa priesthood nga mipanalangin sa atong mga kinabuhi. Karon ang panahon sa paghangop sa ebanghelyo ni Jesukristo, sa pagkahimo nga Iyang mga disipulo ug sa paglakaw sa iyang dalan” (“Ang Dalan sa Disipulo,”Liahona, Mayo 2009, 77).
Sa giingon ni Presidente Uchtdorf asa man magsugod ang dalan sa pagkadisipulo?
Sumala ni Presidente Uchtdorf, kanus-a ang panahon nga sugdan ang pagsubay sa dalan sa pagkadisipulo?
Isulat sa pisara ang mosunod:
Karon mao na ang panahon nga ako …
Dapita ang mga estudyante sa pagpamalandong kon unsaon kaha nila sa pagkompleto kini nga sentence gamit ang usa ka buhat isip disipulo ni Jesukristo. Awhaga sila nga buhaton diha-diha dayon kon unsa man ang mosantop sa hunahuna, tungod kay kana nga hunahuna posibling usa ka pag-aghat gikan sa Espiritu Santo. Ipamatuod nga kon buhaton nila kining una nga lakang, tabangan sila sa Ginoo nga sila mahimo Niyang disipulo.