Leksyon 7: Si Jeskristo—Ang Bugtong Anak sa Dios sa Unod
7
Si Jesukristo—Ang Bugtong Anak sa Dios sa Unod
Pasiuna
Sa kaniadto, ang balita mahitungod sa pagkatawo sa Manluluwas usa ka malipayong balita sa kadaghanan—gipadala sa Dios ang Iyang Anak sa pagtubos sa kalibutan. “Ang Buhi nga Kristo: Ang Pagpamatuod sa mga Apostoles” namahayag nga si Jesus mao “ang Unang Natawo sa Amahan, ang Bugtong Anak diha sa unod, ang Manunubos sa kalibutan” (Ensign o Liahona, Abr. 2000, 2–3). Niini nga leksyon, mahibaloan sa mga estudyante nganong mahinungdanon kaayo nga matawo si Jesus sa mortal nga inahan ug imortal nga Amahan.
Pagbasa sa Background
Robert E. Wells, “Our Message to the World,” Ensign, Nob. 1995, 65–66.
Sugdi ang klase pinaagi sa pagpasalida sa video nga “The Nativity” (2:59). (I-download ug i-preview ang video sa dili pa magklase.)
Human mapasalida ang video, ipangutana:
Unsa nga mga aspeto sa pagkatawo sa Manluluwas ang importante kaninyo ug ngano?
Sultihi ang mga estudyante nga niini nga leksyon hisgutan nila ang usa ka aspeto sa pagkatawo ni Jesukristo nga importante kaayo nga atong masabtan ang mahitungod sa abilidad sa pagtuman sa Iyang tahas sa plano sa Amahan.
Dapita ang usa ka estudyante sa pagbasa og kusog sa Mateo 1:18–19, ug ipa-visualize sa klase ang sitwasyon nga gihulagway niini nga mga bersikulo. (Pahinumdom: Ang pag-visualize mao ang abilidad sa pagtuon sa kasulatan nga makatabang sa paghimo sa usa ka istorya sa kasulatan nga mas klaro ug tinuod.) Dayon pangutan-a ang mga estudyante kon unsa kahay ilang bation kon makita nila ang ilang kaugalingon nga naa sa susamang sitwasyon ni Joseph. Ipabasa og hilum sa mga estudyante ang Mateo 1:20–24 ug ipa-identify nganong mihukom si Joseph sa dili “pagpakigbulag [ni Maria]” (bersikulo 19), buot ipasabut nga makigbulag kang Maria sa hilum. (Pahinumdom: Ang paghatag og depinisyon sa lisud nga mga pulong makatabang nga masabtan sa mga estudyante ang mga kasulatan. Para niini nga mga bersikulo, mahimo nimong gamiton ang mosunod nga mga pagpasabut: (1) ang ngalan nga Jesus [Yeshua sa Aramaic] nagpasabut nga “si Jehova mao ang kaluwasan” o “si Jehovah moluwas”; (2) ang kasulatan nga gi-refer sa Mateo 1:22–23 mao ang Isaiah 7:14; ug (3) ang ngalan nga Emmanuel nagpasabut nga “Ang Dios uban kanato.”)
Dapita ang usa ka estudyante sa pagbasa og kusog sa Lucas 1:26–30. Hangyoa ang klase sa pagsunod, nga mangita kon unsay gitudlo niini nga tudling mahitungod ni Maria. Hangyoa ang mga estudyante nga ipasabut ang unsay ilang nakit-an. Dayon ipabasa og kusog sa usa ka estudyante ang Lucas 1:31–35 samtang magsunod ang klase. Ipangutana:
Sa unsang paagi nga kining mga bersikulo nagmatuod kon si kinsa ang Amahan ni Jesus?
I-drowing sa pisara ang mosunod nga diagram:
Imahe
diagram, parents, you
Pangutan-a ang usa ka sakop sa klase sa mosunod nga mga pangutana:
Unsa nga pisikal nga kinaiya ang inyong napanunod gikan sa inyong amahan? Unsa nga pisikal nga kinaiya ang inyong napanunod gikan sa inyong inahan?
Idugang ang tubag sa estudyante sa diagram nga naa sa pisara (tan-awa ang nag-uban nga example):
Imahe
diagram, parents, attributes, you
Papasa ang nag-unang diagram ug i-drowing sa pisara ang mosunod:
Imahe
diagram, Mary, Heavenly Father, Jesus Christ
I-display ang mosunod nga pamahayag ni Elder James E. Talmage (1862–1933) sa Korum sa Napulog Duha ka mga Apostoles, ug ipabasa kini og kusog sa usa ka estudyante:
Imahe
Elder James E. Talmage
“Kana nga Bata nga matawo kang Maria mao ang anak ni Elohim, ang Mahangturong Amahan, dili supak sa balaod sa kinaiyahan apan pinasubay sa mas taas nga manipestasyon niini; … Sa Iyang kinaiyahan gitingub ang mga gahum sa Pagkadios inubanan sa kapasidad ug mga posibilidad sa mortalidad; ug kini pinaagi sa ordinaryong paglihok sa sukaranang balaod sa kaliwatan, nga gipamahayag sa Dios, gipasabut sa science, ug gidawat sa pilosophy, nga mosanay ang buhing mga binuhat—subay sa ilang matang. … Ang Batang si Jesus mopanunod sa pisikal, mental, ug espiritwal nga mga kinaiya, mga hilig, ug mga gahum nga naghulagway sa Iyang mga ginikanan—usa nga imortal ug nahimaya—ang Dios, apan ang usa tawo—babaye” (Jesus the Christ, 3rd ed. [1916], 81).
Unsa nga importanting mga kinaiya ang napanunod sa Manluluwas gikan sa Iyang mga ginikanan?
Samtang magtubag ang mga estudyante, ilista sa pisara ubos sa “Maria” ang mga kinaiya nga napanunod ni Jesukristo gikan sa Iyang inahan (sama sa pagka-mortal—ang abilidad nga mag-antus og sakit ug mamatay sa pisikal). Ilista ubos sa “Langitnong Amahan” ang mga kinaiya nga napanunod ni Jesus gikan sa Iyang Amahan (sama sa mga gahum ug ang Pagkadios—pagka-imortal o ang gahum nga mabuhi sa kahangturan; tan-awa sa Juan 10:17–18).
Dayon dapita ang usa ka estudyante sa pagbasa og kusog sa Mosiah 3:7–8. Ipangutana:
Nganong nagkinahanglan man ang Manluluwas sa mga gahum sa pagka-mortal ug sa pagka-imortal aron makompleto ang Pag-ula? (Samtang magtubag ang mga estudyante, siguroa nga masabtan nila ang mosunod nga kamatuoran: “Isip Bugtong Anak sa Dios sa unod, si Jesukristo nakahimo sa Maulaong sakripisyo, nga magkinahanglan Niya nga molahutay labaw pa sa malahutay sa usa ka mortal nga tawo, ug sa ingon makatuman sa Iyang tahas sa plano sa Amahan. Agig dugang, tungod kay dunay gahum si Jesus batok sa kamatayon, may kapasidad Siya nga mobangon gikan sa pagkamatay. Siguroa nga masabtan sa mga estudyante nga kon si Jesukristo natawo pa sa duha ka mortal nga ginikanan, dili unta Niya mabuntog ang kamatayon o malahutay ang grabing kasakit ug pag-antus sa Pag-ula. Kon natawo pa Siya sa duha ka imortal nga ginikanan, wala unta Siya mag-antus sa pisikal ug wala mamatay.)
Aron madugangan pa ang pag-emphasize niining importante kaayo nga doktrina, hatagi ang matag estudyante og kopya sa mosunod nga pamahayag ni Elder Robert E. Wells sa Korum sa Seventy, ug hatagi sila’g panahon sa pagbasa ug pagpamalandong niini:
Imahe
Elder Robert E. Wells
“Ang balaanong Pagkaanak ni Jesukristo … maoy sentro sa panabut sa kinatibuk-ang plano sa kaluwasan. Siya ang Nag-una nga Bugtong Anak sa Amahan sa premortal nga kalibutan ug ang Bugtong Anak sa Amahan dinhi sa kalibutan. Ang Dios nga Mahangturong Amahan mao ang tinuoray nga ginikanan sa atong Ginoo ug Manluluwas nga si Jesukristo ug sa uban pa Niyang mga espiritu nga anak. …
“Ang ‘balaanong Pagkaanak’ nagpasabut usab sa pagkatudlo isip ‘Bugtong Anak sa unod.’ … Kini nga tawag nagpasabut nga ang pisikal nga lawas ni Jesus kaliwat sa usa ka mortal nga inahan ug sa imortal nga Mahangturong Amahan, diin nga reyalidad mahinungdanon kaayo sa Pag-ula, nga maoy kinatas-an sa tanang buhat nga dili matuman sa ordinaryo nga tawo. Adunay gahum si Kristo sa pagtugyan sa Iyang kinabuhi ug gahum sa pag-angkon niini og balik tungod kay napanunod Niya ang pagka-imortal gikan sa Iyang Langitnong Amahan. Gikan ni Maria, nga Iyang inahan, napanunod ni Kristo ang pagka-mortal, o ang gahum nga mamatay.
“Kini nga walay katapusang pag-ula ni Kristo ug ang balaang Pagkaanak ni Kristo magkauban sa pagmugna sa nagbinugtong nga pinakaimportanting doktrina sa kinatibuk-ang Kristiyanidad” (“Our Message to the World,” Ensign, Nob. 1995, 65).
Tapusa kini nga porsyon sa leksyon pinaagi sa pagpangutana sa mga mosunod:
Sa unsang paagi ang pagkahibalo sa mga hiyas nga napanunod ni Jesus gikan ni Maria makatabang sa imong pagsalig ug pag-angkon og pagtuo sa Manluluwas?
Sa unsang paagi ang pagkahibalo sa mga hiyas nga napanunod ni Jesus gikan sa Langitnong Amahan makatabang sa imong pagsalig ug pag-angkon og pagtuo sa Manluluwas?
Sultihi ang mga estudyante nga atong nabasa sa Basahon ni Mormon nga nakakita si Nephi og panan-awon diin nahibaloan niya ang mahitungod sa mga ginikanan ni Jesukristo. Makakat-on kita og dugang nga mga kamatuoran gikan niini nga panan-awon. Dapita ang pipila ka estudyante nga magpuli-puli sa pagbasa og kusog sa 1 Nephi 11:13–21. Pasunda ang uban sa klase sa pagbasa ug ipa-identify ang importanting mga doktrina nga gitudlo niini nga tudling. Ipasabut nga, niini nga konteksto, ang pulong nga pagpahiangay nagpasabut sa pagpaubos gikan sa mas taas ngadto sa mas ubos nga kahimtang o pagdawat sa mas ubos nga estado.
Kinsa ang nahibaloan ni Nephi nga mahimong mga ginikanan ni Jesukristo? (Kinahanglang ma-identify sa mga estudyante ang mosunod nga doktrina: Ang Dios, nga Mahangturong Amahan, ug si Maria mao ang mga ginikanan sa mortal nga si Jesukristo.)
Samtang ikonsiderar ninyo ang mga leksyon niini nga kurso karon, ngano kaha nga ang pagkatawo ni Jesukristo makonsiderar man nga kabahin sa Iyang pagpakig-angay?
I-display ang mosunod nga pamahayag ni Brother Tad R. Callister, Sunday School general president, ug ipabasa kini og kusog sa usa ka estudyante:
Imahe
Tad R. Callister
“Ang Dios nga Anak mibaylo sa langitnon niyang panimalay ug sa tanang celestial nga mga dayan-dayan para sa mortal nga panimalay nga may kinaraang mga dayan-dayan. Siya, ‘ang Hari sa Langit’ (Alma 5:50), ‘ang Ginoong Makagagahum kinsa naghari’ (Mosiah 3:5), mibiya sa trono aron matawo sa usa ka pasungan. Gibaylo Niya ang iyang kamandoan nga usa ka dios nga magtubo sama sa usa ka bata. … Usa kadto ka pagbaylo nga walay ikatupong nga sukod. … Ang halangdong Jehova, ang tiglalang sa dili maihap nga kalibutan, nga walay kinutuban ang hiyas ug gahum, mianhi sa kalibutan nga giputos sa bakbak ug gipahigda sa pasungan” (The Infinite Atonement [2000], 64).
Aron matabangan ang mga estudyante nga makasabut sa unsang paagi ang mortal nga pagkatawo ni Jesukristo usa usab diay ka bahin sa pagpakig-angay sa Dios nga Amahan, basaha og kusog ang pamahayag ni Elder Bruce R. McConkie (1915–85) sa Korum sa Napulog Duha ka mga Apostoles:
Imahe
Elder Bruce R. McConkie
“Ang pagpakig-angay sa Dios (buot ipasabut sa Amahan) naglangkob sa kamatuoran nga bisan og usa siya ka halangdon, nahingpit, nahimaya nga Personahe, nahimo siyang personal ug literal nga Amahan sa usa ka mortal nga Kaliwat nga natawo sa babaye nga mortal” (Mormon Doctrine, 2nd ed. [1966], 155).
Tapusa pinaagi sa pagpangutana sa mga estudyante kon unsay ilang mga hunahuna ug mga pagbati para sa Manluluwas samtang gihunahuna nila ang Iyang pagpakig-angay ug ang milagrusong matang sa Iyang pagkatawo. Pangutan-a kon duna ba kanila ang gustong mopaambit sa ilang pagpamatuod sa Manluluwas isip konklusyon sa klase karon.