Mga Seminary ug mga Institute
Leksyon 23: Gipahiuli sa Manluluwas ang Iyang Priesthood, Simbahan, ug ang Ebanghelyo

23

Gipahiuli sa Manluluwas ang Iyang Priesthood, Simbahan, ug Ebanghelyo

Pasiuna

Mipamatuod ang mga modernong Apostoles: “Kami mopahayag pinaagi sa ligdong nga mga pulong nga ang Iyang pagkapari ug ang Iyang Simbahan [ni Jesukristo] gipahiuli dinhi sa yuta” (“Ang Buhi nga Kristo: Ang Pagpamatuod sa mga Apostoles,” Ensign o Liahona, Abr. 2000, 3). Samtang itudlo nimo kini nga leksyon, tabangi nga masabtan sa mga estudyante nga isip kabahin sa Iyang mahangturong pangalagad, misugo ang Manluluwas nga ipahiuli ang ebanghelyo ug ang Iyang Simbahan pinaagi ni Propeta Joseph Smith. Ang mainampingon nga pagtuon sa Doktrina ug mga Pakigsaad nagpadayag nga si Jesukristo ang nagdumala sa gingharian sa Dios dinhi sa yuta.

Background nga Basahunon

Mga Sugyot alang sa Pagtudlo

Joseph Smith—Kasaysayan 1:18–20

Gipahiuli ni Jesukristo ang Iyang Simbahan sa ulahing mga adlaw

Sugdi ang klase pinaagi sa pagpasulat sa mga estudyante og pipila ka importanting mga pangutana nga tingali ipangutana sa usa ka tawo sa Langitnong Amahan. Human sa pipila ka tubag, dapita ang usa ka estudyante sa pagbasa og kusog sa Joseph Smith—Kasaysayan 1:18–19. Dayon ipangutana:

  • Unsa ang gipangutana ni Joseph Smith sa Langitnong Amahan ug ni Jesukristo?

  • Giunsa sa pagtubag ni Jesukristo? (Ikonsiderar ang pagpasabut nga ang bersikulo 20 nagrekord nga gisubli sa Manluluwas ang Iyang tubag: “Siya miusab pagdili kanako sa pagpasakop sa bisan hain kanila.”)

  • Kon “sayop” ang tanang simbahan, unsa man ang gikinahanglang mahitabo aron maania sa yuta ang Simbahan sa Ginoo? (Dunay panginahanglan nga mapahiuli ang Simbahan sa Ginoo sa Bag-ong Tugon.)

I-display ang mosunod nga pamahayag ni Presidente James E. Faust (1920–2007) sa Unang Kapangulohan, ug ipabasa kini og kusog sa usa ka estudyante:

President James E. Faust

“Nagtuo kita nga Ang Simbahan ni Jesukristo sa mga Santos sa Ulahing mga Adlaw gipahiuli gikan sa orihinal nga simbahan gitukod pinaagi ni Jesukristo, nga gitukod ‘ibabaw sa patukuranan nga mao ang mga apostoles ug mga propeta, nga niini si Jesukristo mismo mao ang ulohang bato sa pamag-ang’ [Mga Taga-Efeso 2:20]. Dili kini nabulag gikan sa laing simbahan” (“Ang Pagpahiuli sa Tanang mga Butang,” Liahona, Mayo 2006, 68).

  • Unsay buot ipasabut kon moingon ta nga Ang Simbahan ni Jesukristo sa mga Santos sa Ulahing mga Adlaw usa ka pagpahiuli sa Simbahan sa Manluluwas nga giestablisar sa kapanahunan sa Bag-ong Tugon?

Ingna ang mga estudyante nga walay igong panahon ang klase sa pagkumpara sa matag elemento sa nag-una (buot ipasabut sa orihinal) nga Simbahan ngadto sa gipahiuli nga Simbahan. Hinoon, mahimo nimong iparibyu sa mga estudyante ang Lucas 6:13; 10:1; Mga Buhat 14:23; Mga Taga-Efeso 4:11; Mga Taga-Filipos 1:1; ug ang Tito 1:5 ug ipapangita ang mga elemento sa estraktura sa organisasyon sa nag-una nga Simbahan nga anaa usab sa Simbahan karon. (Para sa dugang pa nga mga ehemplo, awhaga ang mga estudyante sa pagbasa sa “Unsa ang Blueprint sa Simbahan ni Jesukrisot?” ni Brother Tad R. Callister, kinatibuk-ang presidente sa Sunday School, nga gilista diha sa Mga Basahunon sa Estudyante nga seksyon niini nga leksyon.) I-display ang mosunod nga pamahayag ni Brother Callister, ug ipabasa kini og kusog sa usa ka estudyante:

Tad R. Callister

“Kon dunay motandi … sa blueprint sa orihinal nga Simbahan ni Kristo ngadto sa matag simbahan sa kalibutan karon, iyang masayran nga sa punto, organisasyon, pagtulun-an, ordinansa, bunga, ug pagpadayag, usa ra ang motukma niini—Ang Simbahan ni Jesukristo sa mga Santos sa Ulahing mga Adlaw” (“Unsa ang Blueprint sa Simbahan ni Jesukristo?” [Church Educational System nga debosyunal para sa mga young adults, Ener. 12, 2014]; LDS.org ).

  • Nganong importante ang pag-angkon og pagpamatuod nga ang Simbahan ni Jesukristo sa mga Santos sa Ulahing mga Adlaw usa ka pagpahiuli sa orihinal nga Simbahan sa Manluluwas? (Ang ingon niana nga pagpamatuod nagtabang nato sa pag-ila nga Ang Simbahan ni Jesukristo sa mga Santos sa Ulahing mga Adlaw mao ang tinuod nga Simbahan sa Ginoo dinhi sa yuta karon. Kay ang Ginoo mao ra gihapon sa kagahapon, karon, ug sa kahangturan, angay nga maglaum kita nga ang Iyang Simbahan adunay susamang mga elemento sa matag dispensasyon.)

Doktrina ug mga Pakigsaad 1:17, 38; 18:34–35

Si Jesukristo ang nagdumala sa buhat sa Pagpahiuli

Dapita ang mga estudyante sa pagpakli ngadto sa Joseph Smith—Kasaysayan 1:17 ug sa pag-ila unsay gisugo sa Langitnong Amahan kang Joseph Smith (maminaw sa Iyang Anak). Dayon basaha og kusog ang mosunod nga pamahayag ni Presidente Joseph Fielding Smith (1876–1972):

President Joseph Fielding Smith

“Ang tanang pagpadayag sukad pa sa pagkapukan miabut pinaagi ni Jesukristo” (Doctrines of Salvation, comp. Bruce R. McConkie, 3 vols. [1954–56], 1:27).

Aron mahulagway kini nga kamatuoran, dapita ang mga estudyante sa pagbasa og hilum sa Doktrina ug mga Pakigsaad 1:17, 38; 18:34–35 nga maghunahuna sa mosunod nga pangutana: Sa unsang paagi kini nga mga bersikulo nakatabang nga mas masabtan nato ang kamatuoran nga gigiyahan ug gidumala ni Jesukristo ang Iyang Simbahan pinaagi sa pagpadayag? Human sa igo nga panahon, dapita ang mga estudyante sa pagpaambit unsay ilang nakit-an.

I-display ang mosunod nga pamahayag ni Elder Gary J. Coleman sa Seventy, ug ipabasa kini og kusog sa usa ka estudyante:

Elder Gary J. Coleman

“Ang Doktrina ug mga Pakigsaad usa ka tugon [testamento] sa ulahing mga adlaw bahin sa pagpangalagad ni Jesukristo ngadto sa mga anak sa Dios pinaagi sa mga propeta ug mga sulugoon sa Dios, ug naghulagway kini sa balaang sundanan sa pagpadayag nga naggiya sa Simbahan ug sa mga miyembro niini karon” (“You Shall Have My Word: The Personal Ministry of Jesus Christ in the Restoration,” in You Shall Have My Word: Exploring the Text of the Doctrine and Covenants, ed. Scott C. Esplin, Richard O. Cowan, and Rachel Cope, The 41st Annual Brigham Young University Sidney B. Sperry Symposium [2012], 3).

  • Sumala ni Elder Coleman, ngano nga ang Doktrina ug mga Pakigsaad importante sa Simbahan karon? (Usa kini ka ulahing adlaw nga tugon bahin sa pagpangalagad ni Jesus, ug nagpakita kini kon sa unsang paagi ang pagpadayag naggiya sa Simbahan karon.)

  • Ngano kaha nga importante sa mga anak sa Langitnong Amahan ang pagsabut sa kamatuoran nga gitudlo ni Elder Coleman?

Ipamatuod nga ang mga pagpakita sa Manluluwas, mga pagpadayag, ug pagtugyan sa mga gahum sa prieshood ug mga yawe atol sa Pagpahiuli mahinungdanong mga bahin sa Iyang mahangturon nga pangalagad. Aron matabangan ang mga estudyante nga makita ang dugang piho nga paagi kon giunsa sa pagdumala sa Manluluwas ang Pagpahiuli sa walay katapusang ebanghelyo ug sa Iyang Simbahan sa katapusang mga adlaw, i-display ang mosunod nga tsart o ihatag kini sa mga estudyante isip handout (ayaw iapil ang mga pulong nga naa sa parenthesis):

handout, Gidumala sa Manluluwas ang Buhat sa Pagpahiuli

Gidumala sa Manluluwas ang Buhat sa Pagpahiuli

Mga Doktrina sa Simbahan

Mga Ordinansa sa Simbahan

Pagpangulo sa Simbahan

Doktrina ug mga Pakigsaad 76 ulohan sa seksyon ug summary (Mga gingharian sa himaya, kinabuhi human sa kamatayon)

Doktrina ug mga Pakigsaad 84:33–39 (Panumpa ug pakigsaad sa priesthood)

Doktrina ug mga Pakigsaad 128:1, 15, 18 (Puli nga bunyag alang sa mga patay)

Doktrina ug mga Pakigsaad 131:1–4 (Celestial nga kaminyoon gikinahanglan alang sa kahimayaan)

Doktrina ug mga Pakigsaad 137:6–10; 138:29–35 (Kadtong nangamatay nga walay kahibalo sa kamatuoran dunay oportunidad sa pagkatubos)

Doktrina ug mga Pakigsaad 20:37, 72–74 (Mga rekisito ug eksaktong paagi sa bunyag)

Doktrina ug mga Pakigsaad 20:70 (Pagpanalangin sa mga bata)

Doktrina ug mga Pakigsaad 20:75–77, 79 (Pagpangalagad sa sakrament)

Doktrina ug mga Pakigsaad 124:33–39 (Mga ordinansa sa templo)

Doktrina ug mga Pakigsaad 132:7, 15–20 (Mahangturong kaminyoon)

Doktrina ug mga Pakigsaad 20:38–59 (Mga katungdanan sa mga office sa priesthood)

Doktrina ug mga Pakigsaad 20:61–62 (Pag-conduct sa regular nga mga komperensya sa Simbahan)

Doktrina ug mga Pakigsaad 26:2 (Inuyunan sa kadaghanan)

Doktrina ug mga Pakigsaad 107:22–27, 33–35, 64–67, 85–91 (Mga katungdanan sa pagpangulo sa Simbahan)

Bahina ang klase ngadto sa tulo ka grupo ug i-assign ang matag grupo og usa ka kolum nga tun-an. Dapita ang matag estudyante nga mobasa og tulo o upat ka pakisayran sa gi-assign diha nila nga kolum ug pag-andam sa pagtubag sa mosunod nga mga pangutana:

  • Unsa ang gipahiuli sa Manluluwas dinhi sa yuta pinaagi ni Propeta Joseph Smith?

  • Nganong importante kana nga mga baruganan o mga buhat nga inyong nadiskubrihan?

Human sa pipila ka minutos, dapita ang mga estudyante nga ipaambit ang ilang mga nadiskubrihan. Kon makapaambit na sila, hatagi og gibug-aton nga si Jesukristo ang nagdumala sa buhat sa Pagpahiuli. Kon gikinahanglan, ipangutana ang susama sa mosunod:

  • Nganong importante ang pagsabut nga si Jesus padayon nga nagdumala sa buluhaton sa Iyang Simbahan ug sa mga lider niini?

  • Unsa nga mga kasinatian ang nakatabang ninyo aron mahibalo nga kini nga Simbahan mao ang Simbahan ni Jesukristo?

Kon may oras pa, ipabasa og kusog sa usa ka estudyante ang Doktrina ug mga Pakigsaad 1:30. Dayon pangutan-a ang klase:

  • Human makonsiderar kon unsay atong nahisgutan karon, ngano nga Ang Simbahan ni Jesukristo sa mga Santos sa Ulahing mga Adlaw “mao lamang ang tinuod ug buhi nga simbahan sa ibabaw sa tibuok yuta”? (Kay kini mao lamang ang simbahan sa yuta nga dunay balaang awtoridad nga motudlo sa tinuod nga ebanghelyo ni Jesukristo, mangalagad sa gikinahanglang mga ordinansa sa kaluwasan, ug pagdawat sa padayong pagpadayag pinaagi sa pinili nga mga sulugoon sa Ginoo.)

Sa pagtapos sa leksyon, ikonsiderar ang pagpabasa og kusog sa usa ka estudyante sa Doktrina ug mga Pakigsaad 76:40–42 samtang magsunod ang klase. Ipamatuod nga kini nga mga bersikulo mao ang mga summary sa mahangturong pagpangalagad sa Manluluwas. Hagita ang mga estudyante sa pagkonsiderar kon unsay ilang mahimo aron sa pagtahud kang Jesukristo, nga mipahigayon sa Pag-ula aron kita mabalaan, malimpyohan, ug maluwas sa gingharian sa Amahan.

Mga Basahunon sa Estudyante