Usa ka Personal nga Pagsaksi kang Jesukristo

Pasiuna

Ang Unang Kapangulohan ug ang Korum sa Napulog Duha ka mga Apostoles mipahayag: “Kami mopamatuod, ingon nga sa husto nga paagi Iyang gi-orden nga mga Apostoles—nga si Jesus mao ang Buhi nga Kristo, ang imortal nga Anak sa Dios” (“Ang Buhi nga Kristo: Ang Pagpamatuod sa mga Apostoles,” Liahona, Abr. 2000, 3). Sa tibuok niini nga kurso, atong natun-an ang mahangturong pagpangalagad ni Jesukristo ug ang mga pagpamatuod sa mga propeta mahitungod Kaniya. Samtang mag-angkon kita og personal nga pagpamatuod pinaagi sa Espiritu Santo nga si Jesus mao ang Buhi nga Kristo, andam kita nga mopaambit sa kaugalingon natong pagsaksi sa Manluluwas ngadto sa uban.

Background nga Basahunon

D. Todd Christofferson, “Mahimong usa ka Saksi ni Kristo,” Liahona, Mar. 2008, 58–63.

Mga Sugyot alang sa Pagtudlo

2 Nephi 25:26; Mosiah 18:8–11

Magbarug ingon nga mga saksi ni Kristo

Pangutan-a ang mga estudyante kon duna ba nila ang naa sa kahimtang nga sila ra ang miyembro sa Simbahan o sila ra ang tawo nga andam nga morepresentar sa mga sumbanan sa Simbahan. Dapita sila sa pagtubag sa mosunod nga mga pangutana:

Unsay imong gibati dihang nag-atubang ka niana nga sitwasyon isip sumusunod ni Jesukristo?
Unsa ang pipila ka makahuluganon o mahagitong mga aspeto sa imong kasinatian?

Pahinumdumi ang mga estudyante bahin sa istorya ni Alma diha sa Basahon ni Mormon, nga nakabig pinaagi sa mga gipangtudlo ni propeta Abinadi. Human sa iyang pagkakabig, nagsugod usab si Alma sa pagsangyaw sa ebanghelyo. Sa Mosiah 18, atong mabasa ang iyang mga pagtulun-an mahitungod sa pakigsaad sa bunyag. Ipabasa og kusog sa usa ka estudyante ang Mosiah 18:8–11. Dapita ang mga estudyante sa pagsunod ug pag-ila sa mga kinaiya ug mga buhat nga nagpaila nga ang usa ka tawo andam sa paghimo ug pagtuman sa pakigsaad sa bunyag. Human motubag ang mga estudyante, ipasabut ang mga pulong nga “pagbarug ingon nga mga saksi sa Dios sa tanan nga mga panahon, ug diha sa tanan nga mga butang, ug diha sa tanan nga mga dapit ” nga naa sa bersikulo 9. Dayon ipangutana:

Unsay buot ipasabut sa pagbarug isip usa ka saksi sa Dios nga Amahan ug ni Jesukristo “sa tanan nga mga panahon, ug diha sa tanan nga mga butang, ug diha sa tanan nga mga dapit”? (Mosiah 18:9).

I-display ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles, ug ipabasa kini og kusog sa usa ka estudyante:

“Ang mga Apostoles dunay tawag ug ordinasyon nga mahimong espesyal nga mga saksi sa pangalan ni Kristo sa tibuok kalibutan (tan-awa sa D&P 107:23), apan ang katungdanan sa pagsaksi ug pagpamatuod kang Kristo sa tanang panahon ug sa tanang dapit magamit sa matag miyembro sa Simbahan kinsa nakadawat sa pagpamatuod sa Espiritu Santo” (“Witnesses of Christ,” Ensign, Nob. 1990, 30).

Sumala ni Elder Oaks, kinsa man ang dunay responsiblidad sa pagsaksi kang Jesukristo? (Siguroa nga maila sa mga estudyante ang mosunod nga kamatuoran: Ang tanang miyembro sa Simbahan nakigsaad nga mobarug isip mga saksi sa Langitnong Amahan ug ni Jesukristo.)
Gawas sa pagsulti gayud sa atong mga gituohan ug pagpamatuod, unsa pa ang ubang mga paagi nga kita makabarug isip saksi ni Kristo? (Aron matabangan ang mga estudyante nga matubag kini nga pangutana, ikonsiderar ang pagdapit nga basahon nila ang Mateo 5:14–16 ug ang 3 Nephi 18:24.)

I-display ang mosunod nga pamahayag ni Elder D. Todd Christofferson sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:

“Atol sa Iyang pangalagad sa Kasadpang Bahin sa Kalibutan, ang Manluluwas mihatag niini nga sugo: ‘Ipakita ninyo ang inyong kahayag aron kini moiwag sa kalibutan. Tan-awa Ako mao ang kahayag diin kamo mopakita—nga diin kamo nakakita kanako nga mihimo’ (3 Nephi 18:24). Ang mga tawo kinahanglang makakita diha kanato og butang nga kabahin ni Jesukristo. Ang paagi sa atong linihokan, sinultihan, panagway, ug bisan ang paghunahuna mopakita Kaniya ug sa Iyang mga paagi” (“Mahimong Usa ka Saksi ni Kristo,” Liahona, Mar. 2008, 60).

Sa unsang paagi ninyo nakita ang uban nga milihok, misulti, o makita sa mga paagi nga nagpakita sa ilang mga gituohan kang Jesukristo?
Unsaon man ninyo sa pag-awhag og tawo aron buntugon niya ang pagduhaduha o kahadlok nga mahimong saksi ni Jesukristo?

Isulat ang mosunod nga mga pulong diha sa pisara:

Mosulti bahin ni Kristo

Magmaya kang Kristo

Magsangyaw bahin ni Kristo

Managna bahin ni Kristo

Magsulat bahin ni Kristo

Dapita ang mga estudyante sa pagbasa og hilum sa 2 Nephi 25:26, ug hangyoa sila nga ipasabut sa unsang paagi ang usa ka tawo makapaambit sa ilang pagpamatuod bahin ni Jesukristo sa mga paagi nga gi-summarize sa pisara. Alang sa abag sa diskusyon sa klase, gamita ang mosunod nga pamahayag ni Elder D. Todd Christofferson kon gikinahanglan:

“Ang hugpong sa mga pulong ni Nephi nga ‘kami naghisgot kang Kristo’ [2 Nephi 25:26] nagsugyot nga dili kita magduhaduha sa paghisgot kabahin sa atong mga pagbati kalabut sa Manluluwas diha sa panag-istoryahanay ug inadlaw-adlaw nga mga kahimtang. Sa kasagaran kini sa tagsa-tagsa nga mga sitwasyon diin sa bukas nga mahigalaon nga mga paagi mahimo kitang maghisgot kon si kinsa Siya ug unsay Iyang gibuhat ug gitudlo, nag-awhag usab sa uban sa paghigugma uga sa pagsunod Kaniya.

“‘Kami nalipay diha kang Kristo’ nagpasabut nga kita nagpuyo sa usa ka malipayon nga kinatibuk-ang kinaiya nga nagpakita sa atong hugot nga pagtuo kang Kristo. Nasayud kita nga ang ‘iyang grasya igo’ alang kanato aron matubos gikan sa kamatayon ug sala ug mahimo nga hingpit diha Kaniya (tan-awa sa Moroni 10:32–33). Bisan tuod nga nakasinati kita og mga kahigawad ug gani mga trahedya, kita nasayud nga tungod Kaniya, ang atong mahangturong kalipay sigurado. Samtang ang atong hugot nga pagtuo kang Jesukristo makita sa uban, atong gipakita sa uban kinsa ‘nabudlay ug nabug-atan’ kon sa unsa nga paagi nga makakita og kapahulayan diha Kaniya (tan-awa sa Mateo 11:28–30).

“‘Kami nagsangyaw kang Kristo’ tataw nga nagpasabut sa buhat sa full time ug member missionary apan naglakip usab sa unsay atong gibuhat diha sa mga tulumanon sa pagsimba, mga klase sa Sunday School, ug susama nga mga kahimtang diin Siya mao ang hilisgutan sa pagtuon ug panudlo. Ang atong pagsalmot isip mga magtutudlo ug mga estudyante kabahin sa atong paghatag og pagsaksi mahitungod Kaniya. …

“‘Kami nanagna kang Kristo’ nagpasabut nga kita mipadayag sa atong pagpamatuod mahitungod Kaniya pinaagi sa gahum sa Espiritu (tan-awa sa 1 Mga Taga-Corinto 12:3). “Ang pagpanghimatuod ni Jesus mao ang espiritu sa propesiya” (Pinadayag 19:10). Sama niadtong kinsa nanagna sa karaan kabahin sa Iyang unang pag-anhi, kita usab mopanghimatuod diha sa pulong ug buhat sa mga panagna kabahin sa Iyang Ikaduhang Pag-anhi. …

“‘Ug kami nagsulat sumala sa among mga panagna’ nagsugyot sa kaalam sa paghimo ogusa ka permanente nga rekord sa atong pagpamatuod kang Kristo. Nakasabut kita nga ang mga pagpamatuod nga atong gihatag ‘gitala diha sa langit alang sa pagtan-aw sa mga anghel; ug sila magmaya diha [kanato]’ (D&P 62:3). Ang atong kaugalingong mga kaliwatan ug ang uban mahimong magtamud ug magmaya sa atong pagsaksi kang Kristo nga gisulat o girekord alang sa ilang kaayohan” (“Mahimong Usa ka Saksi ni Kristo,” Ensign, Mar. 2008, 62–63).

Sa imong pagtapos niini nga porsyon sa leksyon, awhaga ang mga estudyante nga magkonsiderar og usa ka mga dapit sa pisara ug magtakda og tumong kon unsa ang ilang buhaton sa pagkahimong mas lig-on nga saksi ni Jesukristo.

Ang Pagpamatuod kang Jesukristo

Hangyoa ang mga estudyante nga hunahunaon og balik ang kurso sa semester ug ilhon ang pipila ka mga tahas ni Jesukristo ug ang pipila ka mga hisgutanan nga may kalabutan Kaniya nga maoy gihisgutan sa klase. I-summarize ang mga tubag sa mga estudyante diha sa pisara. (Ang mga tahas tingali maglakip sa Manlalaban, Manluluwas, Usa nga Miula, Unang Natawo, Bugtong Anak, Jehova, Mesiyas, Tiglalang. Ang mga hisgutanan tingali maglakip sa mosunod: ang pagkasentro ni Jesukristo sa plano sa Dios; ang Iyang premortal nga pangalagad; ang katinuod nga Siya Buhi; ang Iyang postmortal nga pangalagad; ang Ikaduhang Pag-anhi; ang Iyang Milenyal nga paghari; ang Pagpahiuli sa Iyang ebanghelyo; Iyang pagpangulo sa Simbahan; ug ang mga pamaagi diin Siya ang Kahayag ug Kinabuhi sa Kalibutan.)

I-download ug ipasalida ang video recording sa mosunod nga pamahayag ni Presidente Gordon B. Hinckley (1910–2008), diin gipaambit niya ang iyang pagpamatuod kang Jesukristo. Kon walay video sa inyong pinulongan, dapita ang usa ka estudyante sa pagbasa og kusog sa pamahayag.

“Si Jesus ang akong higala. Walay laing nakahatag og labaw pa niini kanako. ‘Walay bisan kinsa nga may gugma nga labaw pa niini, nga ang usa ka tawo magahalad sa iyang kinabuhi sa pagpakamatay alang sa iyang mga higala’ (Juan 15:13). Iyang gihatag ang Iyang kinabuhi alang kanako. Iyang giablihan ang dalan paingon sa kinabuhing dayon. Bugtong ang Dios lang ang makahimo niini. Nanghinaut ako nga ako mahimong angayan nga mahimong usa Niya ka higala.

“Siya ang akong ehemplo. Ang Iyang pamaagi sa kinabuhi, ang Iyang hingpit nga dili hakog nga kinaiya, ang Iyang pagtabang niadtong anaa sa panginahanglan, ang Iyang katapusan nga sakripisyo ang tanan mibarug isip usa ka ehemplo ngari nako. …

“Siya ang akong magtutudlo. Walay laing tingog ang nakapamulong sukad og talagsaong pinulongan. …

“Siya ang akong tig-ayo. Nagbarug ako sa tanang pagdayeg sa Iyang kahibulongan nga mga milagro. …

“Siya ang akong lider. Akong dungog ang mahimong usa sa bagang hut-ong niadtong nahigugma Kaniya ug kinsa misunod Kaniya panahon sa duha ka millenia nga milabay sukad sa Iyang pagkatawo. …

“Siya ang akong Manluluwas ug Manunubos. Pinaagi sa paghatag sa Iyang kinabuhi diha sa kasakit ug dili matukib nga pag-antus, mipaubos Siya aron ibayaw ako ug ang matag usa kanato ug ang tanang anak sa Dios nga mga lalaki ug mga babaye gikan sa kinalawman nga mahangturon nga kangitngit nga nagsunod sa kamatayon. … Walay mga kinutuban ang akong pagpasalamat. Ang akong mga pagpasalamat ngadto sa akong Ginoo walay pagtapos.

“Siya ang akong Dios ug ang akong Hari. Gikan sa kahangturan hangtud sa kahangturan, Siya maghari ug mangulo isip Hari sa kaharian ug Ginoo sa Kaginoohan. Ang Iyang kagamhanan walay katapusan. Ang Iyang himaya walay kangitngit” (“My Testimony,” Ensign, Mayo 2000, 71).

Ipresentar ang mosunod nga sitwasyon ngadto sa imong mga estudyante: Kon dunay mangutana nimo unsay imong gituohan mahitungod ni Jesukristo, unsa ang tulo o upat ka mga ideya nga ganahan kaayo nimong hatagan og gibug-aton? Hatagi ang mga estudyante og panahon nga makasulat sa ilang mga ideya. Dayon dapita ang mga estudyante nga magpares sila ug mopaambit sa ilang mga tubag sa usag usa. Awhaga sila sa paghisgot nganong gipili nila kadto ug bisan unsa nilang mga kasinatian nga tingali makalig-on sa ilang panabut ug gugma alang sa Manluluwas. Human sa igong panahon, pangutan-a ang mga estudyante kon aduna ba kanila ang gustong mopaambit sa ilang pagpamatuod bahin ni Jesukristo diha sa klase.

Tapusa pinaagi sa paghatag sa kaugalingon nimong pagsaksi sa mahangturon nga pangalagad sa Buhi nga Kristo. Ikonsiderar ang pagpahayag sa imong pasalamat sa daghang mahinungdanon nga tahas nga gihimo sa Ginoo nga si Jesukristo sa tibuok panahon. Dayon ihatag sa mga estudyante ang mosunod nga hagit: Sa pagtapos ninyo niini nga kurso, pamalandungi kinsay inyong nailhan nga tingali malig-on pinaagi sa pagpamati sa inyong pagpamatuod bahin sa Manluluwas. Atol sa moabut nga semana ug sa lapas pa, desisyuni kinsa ang inyong impluwensyahan ug unsaon ninyo sa pagpaambit ang inyong pagsaksi.

Mga Basahunon sa Estudyante

Mateo 5:14–16; 2 Nephi 25:26; Mosiah 18:8–11; 3 Nephi 18:24.
D. Todd Christofferson, “Mahimong usa ka Saksi ni Kristo,” Liahona, Mar. 2008, 58–63.