Gitubos sa Manluluwas ang mga Sala sa Tanang Katawhan

Pasiuna

Si “[Jesukristo] mihatag sa Iyang kinabuhi aron sa pagtubos sa mga sala sa tanang katawhan. Ang Iyang kinabuhi usa ka gasa nga gihatag alang sa tanan kinsa magpuyo dinhi sa yuta” (“Ang Buhi nga Kristo: Ang Pagpamatuod sa mga Apostoles,” Liahona, Abr. 2000, 2). Si Elder Richard G. Scott sa Korum sa Napulog Duha ka mga Apostoles mitudlo nga “Ang Pag-ula mao kanang mahinungdanong lamas sa plano sa kalipay sa atong Amahan sa Langit diin kon wala kini, kana nga plano wala unta magamit” (“Siya Buhi! Tanang Himaya ngadto sa Iyang Pangalan!” Liahona, Mayo 2010, 76–77). Kini nga leksyon mag-focus sa grabing pag-antus sa Manluluwas, nga nagsugod sa Getsemani ug natapos sa krus, ug maghulagway sa unsang paagi makatabang si Jesukristo sa pagbuntog sa atong mga sala ug paglig-on kanato sa inadlaw natong pagpakabuhi pinaagi sa Iyang Pag-ula.

Background nga Basahunon

David A. Bednar, “Ang Pag-ula ug ang Panaw sa Pagka-mortal,” Liahona, Abr. 2012, 19.
Jeffrey R. Holland, “Ang Pag-ula ni Jesukristo,” Ensign, Mar. 2008, 32–38.

Mga Sugyot alang sa Pagtudlo

Marcos 14:33–36; Lucas 22:39–44; 2 Nephi 9:21

Andam nga giantus ni Jesukristo ang paghingutas sa Pag-ula

Ikonsiderar ang pagsugod sa klase pinaagi sa pagpakanta sa mga estudyante sa “Ako Nahingangha Nahibulong” (Mga Himno ug mga Awit sa mga Bata, nu. 22) o laing himno mahitungod sa Manluluwas. Dayon kon magsugod na ang leksyon, ipangutana:

Sa unsang paagi ang pagkanta sa “Ako Nahingangha Nahibulong” (o sa laing himno mahitungod sa Manluluwas) miandam kaninyo nga makatuon sa Pag-ula ni Jesukristo?

Dapita ang mga estudyante sa pagbasa og hilum sa Marcos 14:33–36, nga mangita sa mga pulong nga naghulagway sa pag-antus sa Manluluwas sa Getsemani. Ilista sa pisara ang mga pulong nga nakit-an sa mga estudyante.

Unsa ang ipasabut niini nga mga pulong diha kaninyo?

Dapita ang mga estudyante sa pagtuon sa Lucas 22:39–44; 2 Nephi 9:21; ug Mosiah 3:7 alang sa dugang nga mga detalye mahitungod sa pag-antus a Manluluwas atol sa Iyang makatubos nga pagsakripisyo. Mahimo kang mosugyot nga i-cross reference sa mga estudyante kini nga mga tudling diha sa ilang mga kasulatan.

Unsang importante nga mga kamatuoran ang gitudlo niini nga mga tudling mahitungod sa pag-antus nga gilahutay ni Jesus para kanato? (Ang mga tubag kinahanglang maglakip sa mosunod nga kamatuoran: ang pag-antus ni Jesukristo sa Getsemani naghimo Kaniya nga miagas ang dugo sa matag lungag sa panit.)

Pasabta ang mga estudyante nga ang Pag-ula ni Jesukristo naglakip sa Iyang Pag-antus alang sa atong mga sala didto sa Getsemani ug sa krus, pagpaagas sa Iyang dugo, Iyang kamatayon sa krus, ug Iyang Pagkabanhaw gikan sa lubnganan. Dapita ang usa ka estudyante sa pagbasa og kusog sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles:

“Kita wala masayud, kita dili makasulti, walay mortal nga hunahuna nga makatugkad sa hingpit nga kahulugan sa gibuhat ni Kristo sa Getsemani.

“Kita nasayud nga Siya nagsingot og daghang tibug-ol [dagkong mga tulo] sa dugo sa matag lungag sa panit samtang Iyang gihurot ang linugdang sa mapait nga kopa nga gihatag sa Iyang Amahan ngadto Kaniya.

“Kita nasayud nga Siya miantus, sa lawas ug espiritu, nga labaw pa nga posibling maantus sa usa ka tawo, gawas kon kini ngadto sa kamatayon. …

“Kita nasayud nga Siya natumba sa yuta samtang ang mga kasakit ug mga panghingutas sa walay katapusan nga palas-anon nakapakurog Kaniya ug buot unta nga dili Siya moinom sa mapait nga kopa” (“Ang Makalimpyo nga Gahum Diha sa Getsemani,” Ensign, Abr. 2011, 57).

Unsay inyong mga pagbati mahitungod sa pag-antus ni Jesukristo sa Getsemani ug sa krus?

Juan 15:13; 1 Pedro 3:18; Doktrina ug mga Pakigsaad 19:15–19

Nag-antus si Jesus aron kita dili na kinahanglan nga mag-antus sama sa Iyang gihimo

Ipangutana ang mosunod:

Ngano kaha nga andam man si Jesus nga moantus og hilabihan para kanato?

Dapita ang mga estudyante nga tun-an og hilum ang Juan 15:13; 1 Pedro 3:18; ug ang Doktrina ug mga Pakisgsaad 19:15–19, nga mangita sa mga rason nganong andam nga antuson ni Jesukristo ang mga kasakit sa Pag-ula. Human sa igong panahon, dapita ang mga estudyante sa pagpaambit unsay ilang nadiskubrihan. Samtang motubag ang mga estudyante, ikonsiderar ang pag-summarize sa ilang mga tubag diha sa pisara, sama sa mosunod:

Aron ipakita ang Iyang dakong gugma para nato.

Aron malikayan nga mag-antus pa kita sa hingpit sa atong mga sala.

Aron matugutan kita nga makahinulsol ug mapasaylo sa atong mga sala.

Aron sa paghimaya sa Amahan.

Aron matugutan kitang makabalik sa Dios.

Aron madala kita ngadto sa Dios.

Samtang mangutana ka sa mosunod nga mga pangutana, hatagi og panahon ang mga estudyante nga makapamalandong sa ilang mga tubag sa dili pa sila dapiton sa pagtubag. (Pahinumdumi ang mga estudyante nga samtang magkat-on sila sa pagpamalandong kon unsay nadiskubrihan nila sa mga kasulatan, sa kasagaran mopadayag og dugang nga mga kamatuoran ang Espiritu kanila.)

Unsay gitudlo niini nga mga hinungdan sa pag-antus ni Jesukristo mahitungod Kaniya?
Sa unsang paagi kini nga mga rason may kalabutan diha nimo sa personal?

Ipasabut gayud sa mga estudyante nga pinaagi sa Pag-ula, nahimo si Jesukristo nga usa ka Puli—gipulihan Niya ang atong dapit, Siya ang mipas-an sa atong palas-anon, giantus Niya ang atong mga sala. Gihulagway kini ni Pablo sa ingon niini nga paagi: “Tungod kanato siya [si Kristo nga Anak] nga wala makasinati ug sala [si Jesus wala makahimo og sala] gihimo niya [sa Dios nga Amahan] nga sala, aron diha kaniya atong mahimo ang pagkamatarung nga anaa sa Dios” (2 Mga Taga-Corinto 5:21). Sama og ang Ginoo ug Manluluwas mihimo sa mosunod nga tanyag sa matag usa kanato sa: “Pagduol kanako. Tangtangon nako ang inyong sala, ug akong ihatag kaninyo ang akong pagkamatarung.”

Ipamatuod nga tungod kay gihimo ni Jesukristo ang Pag-ula, mapasaylo kita sa atong mga sala kon kita maghinulsol. Tungod sa Iyang sakripisyo para kanato, ang paagi giandam para makabalik kita sa pagpuyo uban sa atong Langitnong Amahan nga usa ka unit sa mahangturong pamilya. Mitugyan si Jesukristo sa Pag-ula tungod sa Iyang dako nga gugma para sa Langitnong Amahan ug para kanato. Awhaga ang mga estudyante sa pagpamalandong kon sa unsang paagi mas epektibo ang ilang pagpangita ug pagtagamtam sa mga panalangin sa Pag-ula sa ilang kinabuhi.

Alma 7:11–13

Ang Pag-ula ni Jesukristo mopadangat kanato sa Iyang grasya o makatanyag og makapalihok nga gahum

I-display ang mosunod nga pamahayag ni Elder Neal A. Maxwell sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:

“Dihang ang paghingutas miabut na sa kahingpitan niini, kini sobra pa, sobra pa gayud kaayo kay sa nahunahuna Niya bisan pa sa Iyang talagsaon nga salabutan! …

“Ang nahiusa nga gibug-aton sa tanang mortal nga kasal-anan—nangagi, karon, ug sa umaabut—midat-ug nianang hingpit, walay sala, ug sensitibo nga Kalag! Ang tanan natong mga kahuyang ug mga sakit nahimo, usab, nga parte sa makalilisang nga kwentada sa Pag-ula. (Tan-awa sa Alma 7:11–12; Isa. 53:3–5; Mat. 8:17.) …

“… Ang Iyang pag-antus—sa ingon niini, ang kagrabihon gipilo-pilo sa walay kinutuban—miresulta sa wala madugay sa Iyang pagtuaw diha sa krus, ug kini usa ka pagtuaw sa pagkatinalikdan. (Tan-awa sa Mat. 27:46.)” (“Willing to Submit,” Ensign, Mayo 1985, 72–73).

Unsa kaha ang buot ipasabut ni Elder Maxwell sa “makalilisang nga kwentada sa Pag-ula”?
Agig dugang sa atong mga sala, unsa pa ang giila ni Elder Maxwell nga nakadugang sa pag-antus sa Manluluwas?

Dapita ang usa ka estudyante sa pagbasa og kusog sa Alma 7:11–13. Pasunda ang uban sa klase sa pagbasa ug ipapangita ang ubang kahimtang sa mortalidad nga giantus sa Manluluwas. Ipareport sa mga estudyante kon unsay ilang nakita-an, ug ilista sa pisara ang ilang mga tubag. (Ang mga tubag kinahanglang maglakip sa mga kasakit, mga balatian, mga tintasyon, sakit, mga kahuyang, ug kamatayon.) Hisguti ang kahulugan niini nga mga kahimtang ug kon sa unsang paagi mapanalanginan kita ni Jesukristo pinaagi sa Espiritu Santo kon masinati nato kini.

Dapita ang usa ka estudyante sa pagbasa og kusog sa mosunod nga pamahayag ni Elder David A. Bednar sa Korum sa Napulog Duha ka mga Apostoles:

“Ang Manluluwas nag-antus dili lamang alang sa atong mga sala apan usab sa walay kaangayan, dili patas, sa kasakit, sa tumang kaguol, ug sa emosyonal nga mga pag-antus nga sa kanunay naghasol kanato. Walay pisikal nga kasakit, walay tumang kaguol sa kalag, walay pag-antus sa espiritu, walay sakit o kahuyang nga inyo ug akong masinati panahon sa atong mortal nga panaw nga wala masinati og una sa Manluluwas. Kamo ug ako sa panahon sa kahuyang makatuaw, ‘Walay nakasabut. Walay nakahibalo.’ Walay tawhanong binuhat, tingali, ang nahibalo. Apan ang Anak sa Dios hingpit nga nahibalo ug nakasabut, kay Siya mibati ug mipas-an sa atong mga palas-anon una pa kay kanato. Ug tungod kay Iyang gibayaran ang hingpit nga kantidad ug mipas-an sa palas-anon, Siya makasabut kanato sa hingpit ug ikatunol ngari kanato ang Iyang mga bukton sa kalooy sa daghang yugto sa atong kinabuhi. Siya makatunol, makahikap, makatabang—sa tinuoray makapaduol kanato—ug makalig-on kanato nga mahimong mas maayo kutob sa atong mahimo ug motabang kanato sa paghimo sa butang nga dili nato mahimo kon magsalig lamang kita sa atong kaugalingong gahum” (“Ang Pag-ula ug ang Panaw sa Pagka-mortal,” Liahona, Abr. 2012, 19).

Pangutan-a ang mga estudyante unsaon nila sa pag-summarize ang mga gipangtudlo ni Elder Bednar. Dayon ipangutana:

Sa unsang paagi ang mga panalangin nga anaa pinaagi sa Pag-ula makahatag og paagi aron makabalik kita sa presensya sa Langitnong Amahan? (Samtang motubag ang mga estudyante, ipasabut og maayo nga tungod sa Pag-ula ni Jesukristo, makadawat kita og kahupayan ug kalig-on pinaagi sa Espiritu Santo sa paglahutay sa “mga sakit ug mga kasakit ug mga pagtintal sa matag matang” [Alma 7:11].)

Aron matabangan ang mga estudyante sa pagsabut sa makapalihok nga gahum sa Manluluwas, o grasya, dapita sila nga ang matagusa magtuon sa mosunod nga mga scripture passage ug mangandam sa pagpaambit unsay ilang nakat-unan. (Ikonsiderar ang pagsulat niining mga pakisayran [reference] sa pisara.)

2 Mga Taga-Corinto 12:7–10

Mosiah 3:19

Mosiah 24:10–15

Alma 31:24–25, 31–33, 38

Ether 12:27

Human sa igong panahon, ipangutana:

Ikonsiderar ang mga paagi nga nalig-on ni Jesukristo pinaagi sa Pag-ula ang mga tawo sigun sa gihulagway niini nga scripture passage. Kanus-a kamo o ang usa ka tawo nga inyong kaila nalig-on sa sama niini nga paagi?
Nganong importane para nato ang pagkasabut nga duna kitay akses sa makapalihok nga gahum ni Jesukristo?

I-display ang mosunod nga mensahe ni Elder Richard G. Scott sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:

“Adunay labihan ka importante nga panginahanglan alang sa matag usa kanato sa paglig-on sa atong panabut sa kamahinungdanon sa Pag-ula ni Jesukristo nga mahimo kining dili matarug nga pundasyon kon asa nato tukuron ang atong kinabuhi. …

“Madasigon akong moawhag kaninyo sa pag-establisar og personal nga plano sa pagtuon aron mas makasabut ug makapasalamat sa walay ikatandi, mahangturon, walay kinutuban nga mga sangputanan sa hingpit nga pagtuman ni Jesukristo sa Iyang balaanong gitakda nga tawag isip atong Manluluwas ug Manunubos” (“Siya Buhi! Tanang Himaya ngadto sa Iyang Pangalan!” Liahona, Mayo 2010, 77).

Sa imong konklusyon, awhaga ang mga estudyante sa pag-establisar og plano sa personal nga pagtuon bahin ni Jesukristo ug sa Iyang Pag-ula.

Mga Basahunon sa Estudyante

Marcos 14:33–36; Lucas 22:39–46; Juan 15:13; 1 Pedro 3:18; 2 Nephi 9:21; Mosiah 3:7; Alma 7:11–13; Doktrina ug mga Pakigsaad 19:15–20.
David A. Bednar, “Ang Pag-ula ug ang Panaw sa Pagka-mortal,” Liahona, Abr. 2012, 19.