Leksyon 18: Nangalagad ang Manluluwas sa Kalibutan sa mga Espiritu
18
Nangalagad ang Manluluwas sa Kalibutan sa mga Espiritu
Pasiuna
Sa paghisgot bahin sa Manluluwas, mipamatuod ang modernong mga Apostoles: “Ang Iyang kinabuhi usa ka gasa nga gihatag alang sa tanan kinsa magpuyo dinhi sa yuta.” (“Ang Buhi nga Kristo: Ang Pagpamatuod sa mga Apostoles,” Ensign o Liahona, Abr. 2000, 2). Tungod sa makatubos nga sakripisyo ug sa Iyang pagpangalagad sa kalibutan sa mga espiritu, ang tanan sa mga anak sa Dios nga nakapuyo sa yuta makabaton og oportunidad nga modawat o mosalikway sa ebanghelyo. Niini nga leksyon, makat-unan sa mga estudyante ang mahitungod sa tahas sa Manluluwas didto sa kalibutan sa mga espiritu ug sa atong tahas sa pagluwas sa mga patay.
Background nga Basahunon
Spencer J. Condie, “The Savior’s Visit to the Spirit World,” Ensign, Hulyo 2003, 32–36.
Richard G. Scott, “Ang Hingpit nga Kalipay sa Pagtubos sa mga Patay,”Liahona, Nob. 2012, 93–95.
Mibisita si Jesukristo sa kalibutan sa mga espiritu
Ikonsiderar ang pag-display sa litrato sa Paglubong ni Jesus (Libro sa Hulagway sa Ebanghelyo [2009], nu. 58; tan-awa usab sa LDS.org) ug sa Maria ug ang Nabanhaw nga si Jesukristo (Libro sa mga Hulagway sa Ebanghelyo, nu. 59).
Imahe
Ang Paglubong ni Kristo
Ang Paglubong ni Kristo, ni Carl Heinrich Bloch. Sa maayong kabubut-on sa National History Museum at Frederiksborg Castle in Hillerød, Denmark. Ayaw kopyaha.
Dapita ang usa ka estudyante sa pagbasa og kusog sa mosunod nga pamahayag ni Elder Spencer J. Condie sa Seventy:
Imahe
Elder Spencer J. Condie
“Ang mga kamatuoran sa pagkamatay ug Pagkabanhaw ni Jesus gihangop sa Kristiyanong mga pundok isip usa ka mahinungdanong konsepto. Hinoon, ang gihimo sa imortal nga espiritu ni Jesukristo human sa Iyang kamatayon ug sa wala pa Siya mabanhaw usa ka misteryo sa tanan gawas lang sa mga Santos sa Ulahing mga Adlaw. Ug ang kahulugan sa unsay Iyang gihimo atol niadtong mga orasa naghatag og doktrinal nga pundasyon sa pagtukod og mga templo tadlas sa kalibutan. Dugang pa, ang pagpamatuod kon unsay Iyang gihimo makahupay gayud niadtong mga nagbangutan sa kamatayon sa usa ka minahal” (“The Savior’s Visit to the Spirit World,” Ensign, Hulyo 2003, 32).
I-refer ngadto sa mga litrato ug pangutan-a ang klase:
Unsa ang gihimo ni Jesus sa tunga-tunga sa Iyang paglubong ug sa Iyang Pagkabanhaw?
Aron makahatag og background, dapita ang mga estudyante sa pagbasa sa Lucas 23:39–43.
Unsay gisulti sa Manluluwas ngadto sa kriminal nga didto sa krus? (Ipasabut nga gitudlo ni Propeta Joseph Smith nga ang usa ka mas tukmang pagpresentar sa mga pulong sa Manluluwas mao kini “Karong adlawa mouban ka kanako ngadto sa kalibutan sa mga espiritu” [sa History of the Church, 5:424–25]. Ang mga pulong sa Manluluwas ngadto sa kriminal nasaypan sa pagsabut sa mga Kristiyanos nga makahimo ra diay sa paghinulsol ang usa ka tawo nga may seryusong mga sala sa katapusan gayud sa iyang kinabuhi. Apan, ang mga kasulatan nagtudlo nga kinahanglang dili nato ilangay ang atong paghinulsol.)
Unsay buot ipasabut niini nga mga pulong sa gibuhat sa Manluluwas samtang didto sa lubnganan ang Iyang lawas? (Tan-awa usab sa 1 Pedro 4:6.)
Sultihi ang mga estudyante nga nakadawat si Joseph F. Smith og padayag nga naghulagway sa pagbisita ni Jesukristo sa kalibutan sa mga espiritu. Aron matabangan ang mga estudyante sa pagsabut sa konteksto niini nga pagpadayag, i-summarize ang pasiuna nga seksyon ug ang unang 10 ka bersikulo sa Doktrina ug mga Pakigsaad 138. Dayon papuli-puliha sa pagpabasa og kusog ang pipila ka estudyante sa Doktrina ug mga Pakigsaad 138:11–12, 15–16, 18–19, 23–24. Hisguti ang mosunod nga mga pangutana:
Sumala niini nga panan-awon, unsay gihimo sa Manluluwas sa tunga-tunga sa paglubong Kaniya ug sa Pagkabanhaw? (Kinahanglang mapahayag sa mga estudyante nga samtang didto sa lubnganan ang Iyang lawas, gibisitahan ni Jesus ang mga espiritu nga matarung sa kalibutan sa mga espiritu.)
Nganong napuno man sa kamaya ug kalipay kini nga mga matarung nga espiritu? (Kon makatubag na ang mga estudyante, ipasabut ang mosunod nga kamatuoran: Sumala sa plano sa Dios, ang mga patay nga kaniadto nagmatinud-anon sa mortalidad matubos gikan sa kamatayon pagkahuman nga Nabanhaw si Jesukristo. Mahimo nimong ipasabut nga walay gipadalang mga misyonaryo didto sa kalibutan sa espiritu hangtud nahuman ang pagkamatay ug Pagkabanhaw sa Manluluwas [tan-awa sa Lucas 16:19–31; Moises 7:36–39].)
Ang tanang anak sa Dios dunay oportunidad nga makadungog sa ebanghelyo
Dapita ang mga estudyante sa pagbasa og hilum sa Doktrina ug mga Pakigsaad 138:20–21, 25–28 ug sa pagtino sa pangutana nga gihinuktukan ni Presidente Smith. (Pahinumdom: Aron matabangan nga makita sa mga estudyante ang kaimportante sa maayong mga pangutana ug sa pagpangita og mga tubag samtang magtuon sila sa mga kasulatan, ipasabut nga daghang pagpadayag nga narekord sa mga kasulatan gihatag isip resulta sa kinasingkasing nga pagpangutana.) Human makatubag ang mga estudyante, ipabasa nila ang Doktrina ug mga Pakigsaad 138:29–30, nga mangita sa unsang paagi ang mga espiritu nga naa sa bilanggoan makadungog sa ebanghelyo. Ipangutana:
Unsay gibuhat sa Manluluwas taliwala sa mga matarung samtang mibisita sa kalibutan sa mga espiritu? (Siguroa nga mahibaloan sa mga estudyante ang mosunod nga kamatuoran: Samtang naa sa kalibutan sa mga espiritu, giorganisar ni Jesus ang buhat sa kaluwasan alang sa mga patay.)
Unsa ang katuyoan sa pagpangalagad sa Manluluwas didto sa kalibutan sa mga espiritu? (Kinahanglang makapasabut ang mga estudyante sa mosunod nga kamatuoran: Mihatag og paagi ang Manluluwas sa tanang anak sa Dios aron makadungog sa ebanghelyo ug makadawat og hingpit nga kalipay.)
Ngano nga kinahanglang isangyaw ang ebanghelyo ngadto sa tanang anak sa Dios? (Tan-awa sa D&P 138:33–34; 1 Pedro 3:18–20.)
Unsay gitudlo niini ngari kanato mahitungod sa epekto sa gihimong pag-ula ni Jesukristo? (Ang mga epekto sa Pag-ula midangat usab ngadto sa kalibutan sa mga espiritu.)
Ikonsiderar ang pagpaambit sa mosunod nga pamahayag ni Presidente Joseph Fielding Smith (1876–1972):
Imahe
President Joseph Fielding Smith
“[U]nsa may dangatan niadtong daghan kaayong liboan nga nangamatay ug wala gayud makadungog kang Kristo, walay oportunidad nga makahinulsol ug mapasaylo sa ilang mga sala, wala gayud makahimamat og mga elder sa Simbahan nga naghupot sa awtoridad? Ang uban sa buotan natong mga kasilinganang Kristiyano moingon nimo nga mawala ra sila hangtud sa hangtud. …
“Patas ba kini? Makiangayon ba kini? Dili! Ang Ginoo mohatag sa matag tawo og oportunidad nga makadungog ug makadawat og kinabuhing dayon, o usa ka dapit sa iyang gingharian” (Doctrines of Salvation, comp. Bruce R. McConkie, 3 vols. [1954–56], 2:132).
Ngano nga kini nga mga kamatuoran mahitungod sa kalibutan sa mga espiritu importante man? Unsa may kalainan kon mahibaloan sa usa ka tawo o dili kini nga kamatuoran kabahin sa kalibutan sa mga espiritu?
Sa unsang paagi ang kahibalo bahin sa pangalagad sa Manluluwas didto sa kalibutan sa mga espiritu makahupay kaninyo?
Makatabang kita sa paghatag og kaluwasan alang sa mga patay
Hatagi og kopya ang matag estudyante sa kauban nga handout, “Ulahing Adlaw nga Buhat alang sa mga Patay.” Bahina ang mga estudyante ngadto sa ginagmay nga grupo o mga pares. Dapita sila sa pagbasa sa mga pamahayag nga naa sa handout, nga mangita og maghisgot sa mga panalangin nga gisaad para niadtong moapil sa buhat sa pagtubos sa mga patay.
Sa unsang paagi ang pag-apil sa buhat sa templo ug sa family history makatabang niadtong mga patay na aron makadawat sa mga panalangin nga miabut gumikan sa matubsanong pagsakripisyo ni Jesukristo?
Sa unsang paagi ang pag-apil sa proxy nga mga ordinansa alang sa mga patay makatabang aron mas mahimo kitang sama sa Manluluwas? (Kon makatubag na ang mga estudyante, ipasabut ang mosunod nga baruganan: Kon moapil kita sa mga ordinansa sa templo para sa atong patay nang kaliwatan, mitabang kita nga mahatag ang ilang kaluwasan ug malig-on kita batok sa kaaway.)
Ikonsiderar ang pagpaambit sa mosunod nga pagpasabut ni Presidente Gordon B. Hinckley (1910–2008) kon sa unsang paagi ang proxy nga buhat para sa mga patay mitupong sa matubsanong buhat sa Manluluwas:
Imahe
President Gordon B. Hinckley
“Kadto nga ginahimo sa sulod sa Balay sa Ginoo, … maduol sa espiritu sa gihimong sakripisyo sa Ginoo kay sa ubang mga kalihokan nga akong nahibaloan. Ngano man? Kay kini gihimo man niadtong walay pugong nga mihatag sa ilang panahon ug mga kabtangan nga wala maghulat nga pasalamatan o gantihan, sa pagbuhat para sa uban sa butang nga dili nila mahimo nga sila ra” (“A Century of Family History Service,” Ensign, Mar. 1995, 62–63; tan-awa usab sa Obadiah 1:21).
I-refer og balik ang mga estudyante ngadto sa pamahayag nga naa sa handout, ug ipangutana:
Kanus-a kamo nakakita o mibati og mga panalangin nga gisaad para niadtong moapil sa buhat sa pagtubos sa mga patay?
Dapita ang mga estudyante sa hilum nga pagkonsiderar sa mosunod nga pangutana:
Asa niini nga mga saad ang tinguha ninyong maangkon sa inyong kinabuhi karon gayud, ug unsay andam ninyong buhaton aron maangkon kini?
Hagita ang mga estudyante nga pakigkitaan nila ang ilang family history consultant ug sa pagkat-on og dugang kon unsaon sa paghimo ang buhat alang sa ilang mga patay na nga mga katigulangan. Basaha og kusog ang Doktrina ug mga Pakigsaad 128:22, ug ipamatuod ang kabahin sa mahangturong pagpangalagad ni Jesukristo ug sa sagradong buhat alang sa mga patay nga gi-orden bisan sa wala pa ang pundasyon sa kalibutan.
Spencer J. Condie, “The Savior’s Visit to the Spirit World,” Ensign, Hulyo 2003, 32–36.
Handout
Ulahing Adlaw nga Buhat alang sa mga Patay
Si Elder John A. Widtsoe (1872–1952) sa Korum sa Napulog Duha ka mga Apostoles mitudlo sa mosunod bahin sa misyon nga giorden nang daan kanato aron makatabang sa pagluwas sa mga anak sa Dios:
Imahe
Elder John A. Widtsoe
“Sa atong kinabuhi sa wala pa sa yuta, sa adlaw sa dakong konseho, mihimo kita og piho nga kasabutan sa Labawng Makagagahum. Dunay gisugyot ang Ginoo nga usa niya ka plano, nga gimugna niya. Gidawat nato kini. Kay ang plano gituyo man para sa tanang katawhan, nahimo kitang mga kapartido sa kaluwasan sa matag tawo ubos niana nga plano. Miuyon kita, diha-diha dayon, nga dili lang kita mga manluluwas sa atong kaugalingon, apan … manluluwas sa tibuok tawhanong pamilya. Nakigtambayayong kita sa Ginoo. Ang pagtuman sa plano nahimong dili lang buluhaton sa Amahan, ug sa Manluluwas, apan atoa usab. Ang labing gagmay kanato, ang pinakaubos, makigtambayayong sa Labawng Makagagahum sa pagkab-ot sa katuyoan sa mahangturong plano sa kaluwasan (“The Worth of Souls,” Utah Genealogical and Historical Magazine, Oct. 1934, 189)” (sa Doctrine and Covenants and Church History: Gospel Doctrine Teacher’s Manual [1999], 173).
Si Elder Richard G. Scott sa Korum sa Napulog Duha ka mga Apostoles miawhag sa kabatan-onan sa Simbahan sa paghimo og buhat sa templo para sa kaugalingon nilang mga katigulangan:
Imahe
Elder Richard G. Scott
“Ang bisan unsang buhat nga inyong himoon sa templo maoy oras nga maayong pagkagahin, apan ang pagdawat og mga ordinansa alang sa usa sa imong katigulangan naghimo sa imong panahon sa templo nga mas sagrado, ug gani mas dagkong panalangin ang madawat. …
“Gusto ba ninyo mga kabatan-onan nga mawagtang ang impluwensya sa kaaway sa inyong kinabuhi? Isubsob ang inyong kaugalingon sa pagpangita sa inyong mga katigulangan, pag-andam sa ilang mga ngalan alang sa sagradong mga ordinansa sa templo, ug dayon adto sa templo aron mobarug isip puli nila sa pagdawat sa mga ordinansa sa bunyag ug sa gasa sa Espiritu Santo. … Wala na akoy mahunahuna nga mas labawng makapanalipod gikan sa impluwensya sa kaaway sa inyong kinabuhi” (“Ang Hingpit nga Kalipay sa Pagtubos sa Patay,” Ensign o Liahona, Nob. 2012, 93–94).
Si Elder A. David Bednar sa Korum sa Napulog Duha ka mga Apostoles mihatag sa mosunod nga pagdapit ug saad:
Imahe
Elder David A. Bednar
“Akong dapiton ang kabatan-onan sa Simbahan sa pagkat-on ug pagsinati sa Espiritu ni Elijah. Ako moawhag kaninyo sa pagtuon, sa pagsiksik sa inyong mga katigulangan, ug sa pag-andam sa inyong kaugalingon sa pagpahigayon og proxy nga bunyag sa balay sa Ginoo alang sa inyong kaliwatan nga namatay na (tan-awa sa D&P 124:28–36). Ug awhagon ko kamo sa pagtabang sa ubang tawo sa pag-ila sa ilang mga family history.
“Kon kamo motuman niini nga pagdapit uban sa pagtuo, ang inyong kasingkasing mobati sa inyong mga amahan. Ang saad nga gihimo ngadto nila ni Abraham, Isaac, ug Jacob matisok diha sa inyong mga kasingkasing. Ang inyong patriyarkal nga panalangin, uban sa pamahayag niini sa kaliwatan, mosumpay ninyo ngadto sa mga amahan ug mahimong mas mahinungdanon alang kaninyo. Ang inyong gugma ug pasalamat alang sa inyong mga katigulangan motubo. Ang inyong pagpamatuod ug pagkakabig ngadto sa Manluluwas mahimong lig-on ug malungtaron. Ug ako mosaad nga kamo panalipdan batok sa grabe nga impluwensya sa yawa. Samtang kamo moapil ug mohigugma niining balaan nga buhat, kamo panalipdan sa inyong kabatan-on ug sa tibuok ninyong kinabuhi” (“Ang mga Kasingkasing sa mga Anak Mobati,” o Liahona, Nob. 2011, 26–27).
