Sa “Ang Buhi nga Kristo: Ang Pagpamatuod sa mga Apostoles,” Gipamahayag sa mga lider sa Simbahan: “[Kami] mohalad sa [among] pagpamatuod sa pagkatinuod sa Iyang dili katupngan nga kinabuhi ug sa walay katapusan nga gahum sa Iyang labing dako nga sakripisyo sa pag-ula. Walay lain nga adunay labaw ka mahinungdanon nga impluwensya| sa tanan kinsa nakapuyo ug magpuyo pa dinhi sa yuta” (Ensign o Liahona, Abr. 2000, 2). Kini nga leksyon mopakita nga dili hitupngan ang Manluluwas tungod kay, sa ubang mga rason, wala Siyay sala ug bug-os ang Iyang pagtugyan ngadto sa Langitnong Amahan. Pinaagi sa pagtuon sa Iyang inter-aksyon sa babayeng Samarianhon sa may atabay, makita usab sa mga estudyante ang dakong impluwensya nga pwede natong maangkon ngadto kang bisan kinsa nga moabli sa ilang kasingkasing ngadto Kaniya.
Nagpakabuhi si Jesukristo og usa ka kinabuhi nga walay sala
Sugdi ang klase nga isulat sa pisara ang akong kabubut-on ug kabubut-on sa Dios. Dapita ang usa ka estudyante sa pagbasa og kusog sa Juan 6:38, ug hangyoa ang klase sa pagsunod, nga mangita kon pila ka “akong kabubut-on” ang gidesisyunan ni Jesus nga buhaton. Dapita ang mga estudyante sa hilum nga paghunahuna kon pila ka desisyon ang ilang gihimo bag-o lang nga matawag og “akong kabubut-on” ug pila ang matawag nga “kabubut-on sa Dios.”
Sultihi ang mga estudyante nga human sa Iyang bunyag gitintal si Jesus ni Satanas sa pagbuhat og mga butang nga matawag og “akong kabubut-on.” Papuli-puliha sa pagbasa og kusog ang mga estudyante gikan sa Mateo 4:1–11. Dapita ang klase sa pagsunod, nga mangita kon sa unsang paagi gibuntog ni Jesukristo ang tintasyon. (Ikonsiderar ang pagpasabut sa mga estudyante nga ang Joseph Smith Translation sa Mateo 4:1–11 nagklaro nga ang Espiritu, dili si Satanas, ang midala ni Jesus ngadto sa kinahitas-an sa templo [tan-awa sa bersikulo 5] ug dayon sa taas kaayong bukid [tan-awa sa bersikulo 8]. Human gidala sa Espiritu si Jesus niining mga dapita, miabut ang yawa sa pagtintal Kaniya.)
Unsay inyong namatikdan mahitungod sa paagi kon giunsa sa pagtubag sa Manluluwas ang mga tintasyon ni Satanas?
Unsay inyong nakat-unan gikan sa ehemplo sa Manluluwas niini nga mga bersikulo?
Sa unsang paagi ang mga tintasyon nga giatubang sa Manluluwas susama sa atong giatubang sa atong kinabuhi?
I-display og basaha ang mosunod nga pamahayag ni Presidente David O. McKay (1873–1970), nga mikomentaryo mahitungod sa mga tintasyon nga giatubang ni Jesus didto sa kamingawan:
Imahe
President David O. McKay
“Hapit tanang tintasyon nga moabut kaninyo ug kanako susama ra sa usa niadto nga matang. Ikatigoriya kini, ug inyong makita nga hapit tanang gihatag nga tintasyon nga nagpahugaw kaninyo og kanako ubos sa usa niining tulo, bisan kini gamay ra, moabut kanato nga (1) usa ka tintasyon sa gana; (2) usa ka pagtugyan ngadto sa garbo ug pagsunod sa uso ug pamatasan ug panghambog niadtong mga butang nga makapalayo sa mga butang sa Dios; o (3) pagtagbaw sa kahinam, o usa ka tinguha sa katigayunan sa kalibutan, o gahum tali sa mga katawhan” (“Unspotted from the World,” Ensign, Ago. 2009, 27).
Dapita ang usa ka estudyante sa pagbasa og kusog sa Mga Hebreohanon 2:17–18; 4:15–16. Dapita ang usa ka estudyante sa pagbasa og kusog sa Doktrina ug mga Pakigsaad 20:22. Hangyoa ang klase sa pagsunod ug sa pagtimaan sa bisan unsang pagkasusama tali sa duha ka tudling. Dayon ipangutana ang mga mosunod:
Nganong gikinahanglan man nga mosinati si Jesus og mga tintasyon?
Nganong importante nga atong masabtan nga gisinati ni Jesukristo ang susamang matang sa mga tintasyon nga atong giatubang karon?
Sultihi ang mga estudyante nga usa sa mga katuyoan sa leksyon karon mao ang paghulagway sa dili hitupngan nga kinabuhi sa Manluluwas. Pangutan-a ang klase kon sa unsang paagi ang mga scripture passage nga natun-an na niini nga leksyon naghulagway og usa ka aspeto sa dili hitupngan nga kinabuhi sa Manluluwas. (Kinahanglang ma-identify sa mga estudyante ang mosunod nga mga baruganan: Nagpakabuhi si Jesukristo og usa ka kinabuhi nga dili hitupngan tungod kay wala gayud siya monunot sa mga tintasyon ug wala magpakasala.)
I-display ang mosunod nga pamahayag ni Presidente Howard W. Hunter (1907–95), ug ipabasa kini og kusog sa usa ka estudyante:
Imahe
President Howard W. Hunter
“Importanting hinumduman nga si Jesus makahimo ra sa pagpakasala, nga natintal ra unta siya, nga ang plano sa kinabuhi ug kaluwasan napakyas unta, apan nagpabilin siyang matinuoron. Kon wala pa untay posibilidad nga siya matintal sa mga pag-agni ni Satanas, wala untay tinuod nga pagsulay, walay tinuod nga kadaugan nga miresulta. … Hingpit Siya ug walay sala, dili tungod kay gikinahanglan Niya kini, apan tungod kay Siya tinuoray gayud ug determinado niini” (“The Temptations of Christ,” Ensign, Nob. 1976, 19).
Dapita ang mga estudyante sa pagbasa og hilum sa Lucas 22:42, 44ug sa 3 Nephi 11:11nga mangita sa mga hiyas ni Jesukristo nga usa ka lahi usab nga ehemplo sa dili hitupngan niyang kinabuhi. (Kinahanglang ma-identify sa mga estudyante ang pagkamatugyanon sa Manluluwas ngadto sa kabubut-on sa Amahan.)
I-display ang mosunod nga pamahayag ni Presidente Ezra Taft Benson (1899–1994), ug dapita ang usa ka estudyante sa pagbasa niini og kusog:
Imahe
President Ezra Taft Benson
“Giantus Niya sa Getsemani ang mga kasakit sa tanang katawhan aron dili na sila mag-antus kon maghinulsol sila.
“Gitugyan Niya ang Iyang kaugalingon nga ipaubos ug insultuhon sa Iyang mga kaaway nga walay pagreklamo o pagbalus.
“Ug sa katapusan, gilahutay Niya ang pagpasakit ug brutal nga pagpakaulaw samtang naa sa krus. Didto dayon boluntaryo Siyang mitugyan nga mamatay. …
“Hingpit ang Iyang pagkamasulundon sa atong Langitnong Amahan” (“Jesus Christ: Our Savior and Redeemer,” Ensign, Nob. 1983, 7, 8).
I-follow up pinaagi sa pagpangutana sa mga mosunod:
Sa plano sa Langitnong Amahan sa kaluwasan, ngano kaha nga mahinungdanon man kang Jesus ang pagkawalay sala sa hingpit ug sa hingpit nga pagtugyan ngadto sa kabubut-on Langitnong Amahan? (Tingali makahatag ang mga estudyante og lain-laing mga tubag, apan kinahanglang ma-identify nila ang mosunod nga kamatuoran: Gikinahanglan sa plano sa kaluwasan nga si Jesus hingpit gayud nga magmasulundon aron mapahigayon ang Pag-ula.)
Sa unsang paagi ang pagkahibalo nga hingpit ang Iyang pagkawalay sala ug kamasulundon sa kabubut-on sa Langitnong Amahan nakaimpluwensya sa inyong pagtuo kang Jesukristo? (Samtang motubag ang mga estudyante, ipasabut gayud nga makaangkon kita og kusog sa pagbuntog sa tintasyon ug magmasulundon samtang mosunod kita sa ehemplo ni Jesukristo sa pagtinguha sa pagbuhat sa kabubut-on sa Amahan imbis sa atong kaugalingong kabubut-on.)
“Walay lain nga adunay labaw ka mahinungdanon nga impluwensya diha sa tanan kinsa nakapuyo ug magpuyo pa dinhi sa yuta.”
Dapita ang mga estudyante sa pagpamalandong niini nga pamahayag pinaagi sa pagpangutana sa mosunod:
Asa sa mga kinaiya ni Jesukristo ang nakapahimo Niya nga makabaton og sama niana nga impluwensya sa tanang nga nakapuyo na o magpuyo pa?
Sultihi ang mga estudyante nga usa sa mga indibidwal nga naimpluwensya kaayo ni Jesus atol sa Iyang mortal nga pangalagad mao ang babayeng Samarianhon. Tabangi nga makagamit ang mga estudyante sa mga tabang sa pagtuon diha sa mga kasulatan sa pagpangita og impormasyon mahitungod sa mga Samarianhon (tan-awa sa Giya sa mga Kasulatan, “Samarianhon, Mga”; Giya sa mga Kasulatan, “Samarianhon Mga”; scriptures.lds.org). I-summarize ang Juan 4:1–8, ug dayon ipabasa og kusog sa usa ka estudyante ang Juan 4:9. Ipasabut kon sa unsang paagi ang tubag sa babaye kang Jesus nagpakita sa pagka wala magkagustohay tali sa mga Judeo ug mga Samarianhon nianang higayuna. Dayon ipabasa og hilum sa mga estudyante ang Juan 4:10–15. Human sa igong panahon, ipangutana ang mga mosunod:
Unsaon ninyo sa paghulagway ang inter-aksyon tali ni Jesus ug sa babaye?
Unsa may gitanyag ni Jesus kaniya?
Ipabasa og kusog sa usa ka estudyante ang Juan 4:16–19 samtang magsunod ang klase ug mag-visualize kon unsa kahay pagbati kon sila pa ang babaye niini nga pagsultihanay. (Pahinumdom: Ang pag-visualize makatabang nga mas maklaro ug tinuod ang istorya diha sa kasulatan.) Dayon ipangutana ang mga mosunod:
Unsa kaha ang naa sa inyong hunahuna kon pananglit kamo kadtong babayeng Samarianhon? Ngano man?
Unsa may naa nga ebidensya nga dunay impluwensya si Jesus kaniya? (Ipasabut ang sunod-sunod nga pagtawag sa babaye Kaniya og: “Judeo” [bersikulo 9]; “Sir” [mga bersiulo 11, 15]; ug dayon “propeta” [bersikulo 19].)
Dapita ang pipila ka estudyante nga magpuli-puli sa pagbasa og kusog sa Juan 40:20–29. Ipa-identify sa klase ang mga tawag o title para sa Manluluwas diha sa bersikulo 25 ug bersikulo 29. Dayon hangyoa nga mamalandong kadali ang mga estudyante sa dili pa motubag sa mosunod nga pangutana:
Unsay gihimo sa Manluluwas sulod niining mubo nga panahon aron mausab ang pagtan-aw sa babaye mahitungod Kaniya “gikan sa pagka-Judeo” (bersikulo 9) ngadto sa “pagka-Kristo” (bersikulo 29)? (Dapita ang mga estudyante nga ipaambit unsay ilang naobserbahan niini nga mga tudling. Ang mga tubag pweding maglakip sa mosunod: Mipakita Siya og respeto kaniya, mitudlo Siya kaniya og doktrina, mitudlo Siya sa paagi nga ang Espiritu Santo mosaksi ngadto kaniya, mipadayag Siya og pribadong mga butang kaniya, ug Iyang gi-focus ang Iyang atensyon ngadto kaniya.)
Unsay gikatudlo niini nga istorya bahin sa Manluluwas ug sa babayeng Samarianhon mahitungod sa pagbati sa Manluluwas diha ninyo ug sa posibling impluwensya Niya diha ninyo?
Kanus-a kamo nakabantay nga miimpluwensya ang Manluluwas sa inyong kinabuhi o sa kinabuhi sa tawo nga inyong nailhan? Unsa man ang epekto sa impluwensya sa Manluluwas?
Unsay inyong i-commit nga buhaton aron mas maila ang impluwensya sa Manluluwas sa inyong kinabuhi ug matugutan nga mousab kaninyo ang Iyang impluwensya?
Ipamatuod nga kon itumong nato ang atong kinabuhi sa Manluluwas, maangkon Niya ang dakong impluwensya ngari kanato. Ang kinadak-ang impluwensya sa Manluluwas mahitabo kon atong dapiton ang gahum sa Iyang maulaong sakripisyo nga molimpyo kanato, mobayaw, kanato ug mousab kanato. Awhaga ang mga estudyante sa pagpamalandong sa unsay ilang mahimo aron ikapakita ang pasalamat sa Manluluwas gumikan sa Iyang impluwensya sa ilang kinabuhi. Dapita sila sa paglihok kon unsay ilang gibati.