Leksyon 2: Si Jesukristo Mao Ang Sentro sa Tanang Kasaysayan sa Tawo
2
Si Jesukristo Mao Ang Sentro sa Tanang Kasaysayan sa Tawo
Pasiuna
Sa pagpamatuod mahitungod sa mahinungdanong tahas ni Jesukristo sa plano sa Langitnong Amahan, namahayag ang modernong mga propeta, “Kami ligdong nga mopamatuod nga ang Iyang kinabuhi, diin mao ang mahinungdanon sa tibuok kasaysayan sa tawo, nagsugod dili lamang sa Betlehem ni natapos sa Kalbaryo” (“Ang Buhi nga Kristo: Ang Pagpamatuod sa mga Apostoles,” Ensign o Liahona, Abr. 2000, 2). Makatabang kini nga leksyon sa mga estudyante aron mas masabtan nga miestablisar ang Langitnong Amahan sa Iyang plano sa kaluwasan sa premortal nga kalibutan ug miorden daan ni Jehova, ang premortal nga si Jesukristo, nga maoy sentro nga binuhat niana nga plano. Madasig ang mga estudyante sa pagbutang kang Jesukristo diha sa sentro sa ilang mortal nga kinabuhi.
Pagbasa sa Background
Robert D. Hales, “Kabubut-on: Mahinungdanon sa Plano sa Kinabuhi,”Liahona, Nob. 2010, 24–27.
Dallin H. Oaks, “The Great Plan of Happiness,” Ensign, Nob. 1993, 72–75.
I-display ang mosunod nga pamahayag ni Elder Alexander B. Morrison sa Seventy, ug ipabasa kini og kusog sa usa ka estudyante. Dapita ang klase sa pagsunod ug pag-ila unsay gipresentar sa Langitnong Amahan ngadto sa Iyang mga anak sa premortal nga kalibutan:
Imahe
Elder Alexander B. Morrison
“Dugay nang panahon, sa wala pa mamugna ang kalibutan nga ato karong gipuy-an, ang Dios nga atong Amahan … miestablisar og plano. … [Kana] nga plano naghatag og perpektong paagi para makadawat sa pagka-imortal ang tanang anak sa Dios ug makabaton og kinabuhing dayon” (“Life—the Gift Each Is Given,” Ensign, Dis. 1998, 15–16).
Unsang mga panalangin ang gisulti ni Elder Morrison ang posible natong madawat sa katapusan isip kabahin sa plano sa Dios? (Ipasabut nga ang pagka-imortal nagpasabut sa pagkabanhaw—dili na mamatay og usab sa pisikal—ug ang kinabuhing dayon nagpasabut sa matang sa kinabuhi nga gibatunan sa Dios.)
Dapita ang mga estudyante sa pagbasa og hilum sa Alma 12:25 ug sa pag-ila kon giunsa sa paghulagway ni Alma ang plano sa Dios ug kanus-a kini giandam. Hangyoa sila sa pagreport kon unsay ilang nakit-an. (Gitudlo ni Alma nga ang “plano sa katubsanan” giestablisar “sukad sa katukuran sa kalibutan.” Human makatubag ang mga estudyante, mahimo nimong ipasabut nga ang ubang title [tawag] sa plano sa Dios naglakip sa “maloloy-on nga laraw sa makagagahum nga Tiglalang” [2 Nephi 9:6]; “laraw sa kaluwasan” [Alma 24:14]; “mahinungdanon nga laraw sa Dios sa kahangturan” [Alma 34:9]; “mahinungdanon nga laraw sa kalipay” [Alma 42:8]; ug sa “walay katapusan nga pakigsaad” [D&P 22:1; 45:9; 66:2].)
Dayon dapita ang mga estudyante nga tun-an ang Alma 12:22–32 nga magparis, mangita og mga rason nganong ang plano sa Dios gitawag og plano sa katubsanan. Human sa igong panahon, dapita ang pipila ka estudyante nga ipaambit sa klase ang ilang mga nakit-an. Tabangi nga makasabut pa og dugang ang mga estudyante niining mga bersikulo pinaagi sa pagpangutana:
Sumala sa mga pagtulun-an ni Alma, unsa man kaha ang atong mahangturong panaw kon wala ang plano sa katubsanan? (Kon wala ang plano sa katubsanan, wala untay pagkabanhaw sa patay o katubsanan gikan sa sala, ang tawo magpabilin untang nawala ug napukan ug anaa sa kahimtang nga hangtud sa hangtud nang patay sa pisikal ug sa espiritwal [tan-awa usab sa 2 Nephi 9:6–13].)
Nganong importante man nga mahatag ang paagi para atong mabuntog kini nga mga kahimtang?
Dapita ang mga estudyante sa pagbasa og kusog sa Alma 12:33–34. Hangyoa ang klase sa pagsunod, nga mangita kon unsay gihatag sa Dios aron matubos ang Iyang mga anak. Tabangi ang mga estudyante nga masulti ang doktrina o baruganan nga gitudlo niini nga mga bersikulo pinaagi sa pagpangutana:
Unsaon ninyo sa pag-summarize ang giandam ni Jesus nga atong madawat diha sa plano sa kaluwasan? (Ang mga tubag kinahanglan maglakip sa mosunod: Kon maghinulsol kita ug dili mopagahi sa atong kasingkasing, madawat nato ang kalooy ug kapasayloan sa mga sala pinaagi sa Bugtong Anak sa Dios. Pinaagi lang kang Jesukristo kita makadawat og kapasayloan sa mga sala ug makasulod sa presensya sa Langitnong Amahan.)
Ipamatuod nga si Jesukristo ang sentro sa plano sa Dios ug nga pinaagi sa Iyang Pag-ula nahatag ang paagi aron atong madawat ang pagka-imortal ug kinabuhing dayon.
Si Jesukristo gi-orden nang daan nga mahimo natong Manluluwas
Dapita ang mga estudyante sa pagsusi diha sa Abraham 3:24–27 ug sa 1 Pedro 1:19–20, nga mangita kon unsay gitudlo niini nga mga tudling mahitungod sa tahas sa Manluluwas sa plano sa Dios. Dayon ipangutana ang mga mosunod. (Pahinumdom: Pinaagi sa pagpangutana og ingon niana, matabangan ninyo ang mga estudyante sa pagkat-on unsaon sa pag-analisar ang mga tudling sa kasulatan ug pag-ila sa mga doktrina nga gitudlo niini.)
Sa Abraham 3:26, unsay ipasabut sa mga pulong nga “kinabuhi sa wala pa dinhi sa yuta” ug sa “kinabuhi dinhi sa yuta”? (“Ang kinabuhi sa wala pa dinhi sa yuta” nag-refer sa premortal nga kinabuhi, ug ang “kinabuhi dinhi sa yuta” nag-refer sa mortal nga kinabuhi.)
Kinsa ang tulo ka indibidwal ang gihisgutan sa Abraham 3:27, ug unsay gihimo sa matag usa kanila? (Langitnong Amahan, Jesukristo, ug Satanas. Ipasabut nga sa premortal nga kalibutan, giorden daan sa Langitnong Amahan ang Iyang anak nga Unang Natawo, si Jesukristo, nga mahimong sentrong binuhat sa Iyang plano.)
Siguroa nga masabtan sa mga estudyante nga nailhan si Jesus nga si Jehova sa premortal nga kalibutan. Dayon ipangutana:
Dihang miingon si Jehova sa Amahan, “Ania Ako, ipadala ako,” unsa man ang Iyang gisaad nga buhaton sa mortalidad? (Motudlo sa Iyang ebanghelyo, magtukod sa Iyang Simbahan mag-antus ug mamatay para sa atong mga sala, ug mobangon gikan sa pagkamatay.)
Unsay nahimo ngari kanato sa pagpili sa Langitnong Amahan kang Jehova isip atong Manunubos, kon hisgutan ang atong umaabut nga mga posibilidad?
Patun-a sa hilum ang mga estudyante sa Moises 4:2, nga mangita sa uban pang importante nga kamatuoran mahitungod sa pagpili sa Langitnong Amahan kang Jehova nga mahimo natong Manluluwas ug Manunubos. Samtang ipasabut sa mga estudyante unsay ilang nakit-an, siguroa nga ilang ma-identify ang mosunod nga mga kamatuoran: napili na si Jehova sukad pa sa sinugdanan. Usa ka rason nga napili si Jehova mao ang Iyang tinguha nga mobuhat sa kabubut-on sa Amahan ug ihatag ang tanang himaya ngadto sa Amahan. Aron madugangan pa ang pag-emphasize niini nga mga kamatuoran, i-display og basaha og kusog ang mosunod nga pamahayag ni Elder Jeffrey°R. Holland sa Korum sa Napulog Duha ka mga Apostoles:
Imahe
Elder Jeffrey R. Holland
“Si [Jesukristo] lamang ang bugtong mapainubsanon kaayo ug andam didto sa konseho sa kinabuhi nga wala pa dinhi sa yuta nga i-orden nang daan sa [pagpahinabo sa walay katapusang Pag-ula]” (“Ang Pag-ula ni Jesukristo,” Ensign, Mar. 2008, 35).
Ipa-visualize sa mga estudyante kon unsa kaha ang talan-awon kon didto kita dihang ang Langitnong Amahan misulti sa tanan Niyang mga anak nga ang Una Niyang Natawo nga Anak, si Jehova, maoy atong Manluluwas. Dayon i-display ang mosunod nga pamahayag ni Propeta Joseph Smith (1805–44), ug ipabasa kini og kusog sa usa ka estudyante:
Imahe
Prophet Joseph Smith
“Sa unang organisasyon didto sa langit didto kitang tanan ug nakakita sa Manluluwas nga gipili ug gitudlo ug ang plano sa kaluwasan gihimo, ug gitugotan nato kini” (Mga Pagtulun-an sa mga Presidente sa Simbahan: Joseph Smith [2007], 249).
Unsa kaha ang imong nahibaloan mahitungod ni Jehova nga maghimo nimo sa pag-sustain sa Iyang tawag ug pagkatudlo isip atong Manluluwas ug Manunubos?
I-display ang mosunod nga pamahayag ni Elder Neal A. Maxwell (1926–2004) sa Korum sa Napulog Duha ka mga Apostoles. Dayon hatagi ang mga estudyante og pipila ka minutos sa pagsulat og bisan unsa nilang hunahuna ug pagbati mahitungod sa Manluluwas samtang pamalandungan nila ang balaang kamatuoran nga gitudlo ni Elder Maxwell:
Imahe
Elder Neal A. Maxwell
“Wala pa gayud bisan kinsa ang mitanyag og dako kaayo ngadto sa daghan kaayo pinaagi sa mubo kaayong mga pulong dihang miingon si Jesus, ‘Ania ako, ipadala ako.’ (Abr. 3:27.)” (“Jesus of Nazareth, Savior and King,” Ensign, Mayo 1976, 26).
Ikonsiderar ang paghangyo sa pipila ka estudyante nga ipaambit sa klase ang ilang gisulat.
Pagbutang sa Manluluwas nga sentro sa atong mortal nga kinabuhi
I-refer og balik ang mga estudyante sa Abraham 3:25, diin atong nakat-unan nga tuyo sa atong Langitnong Amahan nga ang mortalidad usa ka panahon sa pagsulay, sa pagsuta kon motuman ba kita sa Iyang mga sugo. I-display ang mosunod nga pamahayag ni Elder Robert D. Hales sa Korum sa Napulog Duha ka mga Apostoles. Ipabasa og kusog sa usa ka estudyante ang pamahayag samtang mangita ang klase og usa ka pagpili nga kinahanglan natong buhaton isip kabahin sa atong mortal nga pagsulay:
Imahe
Elder Robert D. Hales
“Hunahunaa kini: sa atong kahimtang sa wala pa sa kalibutan mipili kita sa pagsunod sa Manluluwas nga si Jesukristo! Ug tungod kay mibuhat kita, mao nga gitugtan nga makaanhi sa yuta. Ako mopamatuod nga pinaagi sa paghimo sa samang pagpili sa pagsunod sa Manluluwas karon, samtang ania kita dinhi sa yuta, atong maangkon ang mas dako nga panalangin sa kahangturan. Apan sayri kini: kita kinahanglang mopadayon sa pagpili sa pagsunod sa Manluluwas. Ang kahangturan anaa sa kakuyaw, ug ang atong maalamong paggamit sa kabubut-on ug ang atong mga lihok mahinungdanon aron kita unta makabaton og kinabuhing dayon” (“Kabubut-on: Mahinungdanon sa Plano sa Kinabuhi,” Ensign o Liahona, Nob. 2010, 25).
Aron matabangan ang mga estudyante sa pag-identify ug pagsabut sa baruganan o kamatuoran nga gitudlo ni Elder Hales, ipangutana ang mga mosunod:
Unsa ang inyong nakat-unan gikan sa pamahayag ni Elder Hales mahitungod sa atong mga pagpili niining kinabuhia? (Human makatubag ang mga estudyante, ipamatuod nga pinaagi sa pagpili nga himoong sentro ang Manluluwas sa atong kinabuhi samtang ania kita dinhi sa yuta, atong maangkon ang mas dako nga panalangin sa kahangturan.)
Unsa kaha ang gipasabut ni Elder Hales sa iyang mga pulong nga “ang kahangturan anaa sa kakuyaw”?
Unsa ang ubang mga kinaiya ug mga buhat nga nagpakita nga ang usa ka tawo mipili sa pagsunod kang Jesukristo? (Isulat sa pisara ang tubag sa mga estudyante.)
Ipasabut nga para sa kadaghanan kanato, sayon ra ang pag-focus sa Manluluwas sa Adlawng Dominggo. Apan unsaon nato nga mahimo Siyang mas dako pa nga bahin sa atong kinabuhi sulod sa semana? Hatagi ang mga estudyante og panahon nga makapamalandong unsay ilang nahimo karon aron maka-focus sa Manluluwas. Dapita sila nga ilang isulat ang butang nga ilang mahimo karon aron matarung nila og butang sa sentro ang Manluluwas sa ilang kinabuhi. Awhaga sila sa hilum nga pag-commit sa Langitnong Amahan nga ila kining buhaton.
Tapusa ang leksyon pinaagi sa pagpamatuod sa mga kamatuoran nga gitudlo karon.